အစာအိမ်ရောဂါလက္ခဏာများ အမြန်ဆုံးသက်သာစေဖို့ဆိုရင်။

          အစာအိမ်နှင့်သက်ဆိုင်သော ရောဂါလက္ခဏာများသည် အစာခြေလမ်းကြောင်းစနစ်ကို ထောက်ပံ့သော အာရုံကြောအချို့ကို ထိခိုက်ခြင်းကြောင့် ဖြစ်လာခြင်းဖြစ်ကြောင်း တွေ့ရှိရပါသည်။

အစာအိမ်ရောဂါလက္ခဏာများ။

အောက်ပါတို့သည် အဖြစ်များသော အစာအိမ်ရောဂါလက္ခဏာများ ဖြစ်ကြပါသည်။

– လေတက်ခြင်း

– လေလည်ခြင်း

– ဝမ်းဗိုက်ကယ်ခြင်း

– ဝမ်းဗိုက်အောင့်ခြင်း

– ဝမ်းဗိုက်တွင် တင်းကြပ်ကြပ်ဖြစ်သည်ဟု ခံစားရခြင်း စသည့်ရောဂါ လက္ခဏာများဖြစ်ကြပါသည်။

ဘယ်လိုအခြေအနေမျိုးမှာ ဆရာဝန်နှင့်ပြသသင့်ပါသလဲ။

          အထက်ပါ အစာအိမ်ရောဂါလက္ခဏာများသည် အခြားလက္ခဏာများနှင့် တွဲ၍တွေ့ရှိရလျှင် အစာအိမ်ရောဂါလက္ခဏများ ပိုမိုဆိုးရွားလာသည်ကို ရည်ညွှန်းပါသည်။

၎င်းတို့မှာ

– သွေးဝမ်းသွားခြင်း

– ဝမ်းသွားသည့် အကြိမ်အရေအတွက်ပြောင်းလဲလာခြင်း

– ခန္ဓာကိုယ်အလေးချိန် ကျဆင်းလာခြင်း

– ဝမ်းချုပ်ခြင်း သို့မဟုတ် ဝမ်းလျှောခြင်း

– မကြာခဏပျို့ခြင်း၊ အန်ခြင်း

– အချိန်ကြာမြင့်စွာ ဝမ်းဗိုက်အောင့်ခြင်း၊ နာခြင်း

– ရင်ဘတ်အောင့်ခြင်း စသည်တို့ ဖြစ်ကြပါသည်။

ထိုရောဂါလက္ခဏာများနှင့်တွဲ၍တွေ့ရှိရပါက ဆရာဝန်နှင့် အမြန်ဆုံးတိုင်ပင်၍ စနစ်တကျ ဆေးကုသမှုခံယူရန် လိုအပ်ပါသည်။

အစာအိမ်ရောဂါလက္ခဏာ ဖြစ်ပေါ်ရခြင်း အကြောင်းရင်းများ။

အောက်ပါတို့သည် အစာအိမ်ရောဂါ လက္ခဏာဖြစ်ရခြင်း၏ အကြောင်းရင်းများ ဖြစ်ကြပါသည်။

– အစာအိမ်လေရောဂါဖြစ်စေသော အစားအစာများ။

အမျှင်ဓာတ် များပြားစွာပါဝင်သော အစားအစာများ (ဥပမာ ပဲအမျိုးမျိုး ၊ သစ်သီးများ၊ ဟင်းသီးဟင်းရွက်များ ၊ အစေ့အဆန်များ) စသည့် အစားအစာများ ဖြစ်ကြပါသည်။

– ဆိုဒါနှင့် အရက်ဘီယာများ။

– ဆီးချိုသကြားများ။

– အချို့သောရောဂါများ။

( ၁ )    နာတာရှည် အူလမ်းကြောင်း ရောဂါများ။

          Diverticulitis, Ulcerative colitis , Crohn’s disease စသော နာတာရှည်အူလမ်းကြောင်း ရောဂါများကြောင့်လည်း အစာအိမ်လေရောဂါလက္ခဏာများကို ဖြစ်စေနိုင်ကြောင်း တွေ့ရှိရပါသည်။

( ၂ )      အူလမ်းကြောင်းတွင် ဘက်တီးရီးယားပိုးများ ကြီးထွားပေါက်ဖွားသည့်အခြေအနေများ။

အူသိမ်ပိုင်းတွင် ဘက်တီးရီးယားပိုးများ‌ ပေါက်ဖွားခြင်း၊ အရေအတွက် များပြားလာခြင်းကြောင့် အစာအိမ်လေပွခြင်း ၊ ဝမ်းလျှောခြင်းနှင့် ခန္ဓာကိုယ် အလေးချိန်ကျဆင်းခြင်းတို့ ဖြစ်လာနိုင်ပါသည်။

( ၃ )     အချို့သော အစားအစာများကို ကောင်းစွာစုပ်ယူနိုင်မှု မရှိခြင်း။

နို့ထွက်ပစ္စည်းများတွင် တွေ့ရသည့် Lactose သကြားဓာတ်များ သို့မဟုတ် ဂျုံ နှင့် ဘာလီ စသော အစားအစာများတွင် တွေ့ရသော Gluten ပရိုတင်းဓာတ်များကို ကောင်းစွာ ဖြိုခွဲခြင်း ၊ စုပ်ယူခြင်း မလုပ်နိုင်သော အခြေအနေများတွင်လည်း အစာအိမ်ရောဂါ လက္ခဏာများဖြစ်နိုင် ကြောင်း တွေ့ရှိရပါသည်။

( ၄ )     ၀မ်းချုပ်ခြင်း

ဝမ်းချုပ်ခြင်း လက္ခဏာကြောင့်လည်း အစာအိမ်ရောဂါလက္ခဏာများ ဖြစ်လာနိုင်ပါသည်။

အစာအိမ်ရောဂါကို သက်သာပျောက်ကင်းစေသော နည်းလမ်းများ

အစာအိမ်လေရောဂါလက္ခဏာများသည်  အောက်ပါနည်းလမ်းများကို လိုက်နာခြင်းဖြင့် သက်သာပျောက်ကင်းနိုင်ကြောင်း တွေ့ရှိရပါသည်။

– ပန်းသီးရှာလကာရည်ကို သောက်ပါ။

ပန်းသီးရှာလကာရည် ပါဝင်သော ရေတစ်ဖန်ခွက်ကို သောက်သုံးခြင်းဖြင့် အစာအိမ် လေရောဂါလက္ခဏာများကို ပျောက်ကင်းစေနိုင်ပါသည်။

– ထောပတ်နို့ ကိုသောက်ပါ။

ထောပတ်နို့ တစ်ခွက်ကို သောက်ပေးခြင်းဖြင့်လည်း  အစာအိမ် လေရောဂါလက္ခဏာများကို ဖယ်ရှားနိုင်မည် ဖြစ်ပေသည်။

– ရေများများသောက်ပေးပါ။

ရေဓာတ်သည် အစားအစာများနှင့် အဖျော်ယမကာများကို ခြေဖျက်နိုင်ရန်အတွက်  လိုအပ်သော အရာတစ်ခုဖြစ်ပါသည်။

ရေဓာတ်ခန်းခြောက်ခြင်းသည် အစာခြေဖျက်ခြင်းကို ပို၍ခက်ခဲစေသည့်အတွက် အစာမကြေဖြစ်ခြင်းနှင့် အခြားအစာအိမ်ရောဂါလက္ခဏာများကိုဖြစ်စေနိုင်သော အကြောင်းရင်းတစ်ခုဖြစ်ပါသည်။

– ပက်လက်အနေအထားဖြင့်လဲလျောင်းခြင်းမှရှောင်ကြဉ်ပါ။

ပက်လက်အနေအထားဖြင့် လဲလျောင်းခြင်းသည် အစာအိမ်မှ အက်ဆစ်များကို အထက်သို့ ဆန်တက်ခြင်းအား ဖြစ်စေသောကြောင့် ရင်ပူခြင်းလက္ခဏာကို ဖြစ်စေနိုင်ပါသည်။

– ချင်း  ကိုစားပေးပါ။

ချင်းသည် အစာမကြေဖြစ်ခြင်း၊ ရင်ပြည့်ရင်ကယ်ဖြစ်ခြင်း တို့ကို သက်သာပျောက်ကင်းစေနိုင်သော သဘာ၀ ဆေးဘက်ဝင်အစားအစာတစ်မျိုးဖြစ်ပါသည်။

ချင်းတွင် ပါဝင်သော ဓာတုပစ္စည်းများသည် အစာအိမ်ကျုံ့ညှစ်ခြင်းကို မြန်စေနိုင်သည့်အပြင် ပျို့အန်ခြင်း၊ ဝမ်းလျှောခြင်းတို့ကိုလည်း လျော့နည်းစေနိုင်သော အာနိသင်ရှိကြောင်း လက်ခံယုံကြည် ထားကြပါသည်။

– ရေနွေးဖြင့် ရေချိုးခြင်း သို့မဟုတ် ရေနွေးအိတ်ဖြင့် ကပ်ပေးခြင်းပြုလုပ်ပေးပါ။

အပူချိန်သည် တင်းကြပ်နေသောကြွက်သားများကို ပြေလျော့စေရန်ကူညီနိုင်သော ဂုဏ်သတ္တိရှိသောကြောင့် အစာအိမ်ကြွက်သားများကိုလည်း ပြေလျော့ပေးနိုင်ကြောင်း တွေ့ရပါသည်။

ထို့ကြောင့် အစာအိမ်လေရောဂါ ခံစားနေရသောသူများသည် ရေနွေးဖြင့် ရေချိုးခြင်း သို့မဟုတ် ဝမ်းဗိုက်ကို ရေနွေးအိတ်နွေးနွေးဖြင့် ကပ်ပေးခြင်းတို့ကို ပြုလုပ်သင့်ကြောင်း အကြံပြုလိုပါသည်။

– ဆေးလိပ်၊ အရက်သောက်ခြင်းမှ ရှောင်ကြဉ်ပါ။

ဆေးလိပ်သောက်ခြင်းသည် လည်ချောင်းကို ကသိကအောင့်ဖြစ်စေနိုင်ပြီး အစာအိမ်လက္ခဏာများကိုလည်း အားပေးနိုင်ပါသည်။

ထို့အတူအရက်သောက်ခြင်းသည်လည်း အစာခြေဖျက်ရန် ခက်ခဲခြင်းကို ဖြစ်စေပြီး အသည်းနှင့် အစာအိမ်တို့ကို ထိခိုက်ပျက်စီးစေနိုင်ကြောင်း တွေ့ရပါသည်။

ထိုအချက်များကြောင့် အစာအိမ်ဝေဒနာရှိသူများသည် အရက်နှင့် ဆေးလိပ်သောက်ခြင်းမှ ရှောင်ကြဉ်သင့်ပေသည်။

– အစာခြေဖျက်ရန်ခက်ခဲသော အစားအစာများစားခြင်းမှ ရှောင်ကြဉ်ပါ။

ဆီကြော်အစားအစာများ၊ အငန်ဓာတ်များသော အစားအစာများ၊ မပုပ်သိုးစေရန် စီမံထားသော တာရှည်ခံဓာတုပစ္စည်းများပါဝင်သော အစားအစာများစားသုံးခြင်းမှ ရှောင်ကြဉ်ခြင်းသည် အစာအိမ်ရောဂါ ပြဿနာများကို ဖြေရှင်းနိုင်ပါသည်။

– အုန်းရည်သောက်ပေးပါ။

အုန်းရည်တွင် ပိုတက်ဆီယမ်နှင့် မဂ္ဂနီဆီယမ်ဓာတ် မြင့်မားစွာ ပါဝင်သည့်အတွက်  ကြွက်သားနာကျင်ခြင်း၊ ကြွက်တက်ခြင်း လက္ခဏာများကို သက်သာစေနိုင်သော အစားအစာအဖြစ် လက်ခံယုံကြည် ထားကြပါသည်။

ထို့အပြင် အုန်းရည်ကို သောက်သုံးခြင်းဖြင့် အစာမကြေခြင်း နှင့် အစာအိမ်ရောဂါဝေဒနာများကို သက်သာပျောက်ကင်းစေနိုင်ကြောင်း အကြံပြုအပ်ပါသည်။

Author : Dr. CK