“အဆီဓာတ်များသော အစားအစာများ နှင့် တာရှည်ခံရန် ပြုလုပ်စီမံထားသည့်အစားအစာ များသည် အစာကြေညက်ရန်ခက်ခဲသည့်အတွက် ၎င်းတို့ကို ရှောင်သင့်ပါသည်။”
ဗိုက်အောင့်ဗိုက်နာဖြစ်ခြင်းသည် လူအများစု ခံစားရလေ့ရှိသော ရောဂါလက္ခဏာတစ်မျိုး ဖြစ်ပြီး ၎င်းရောဂါဝေဒနာကို အစာအိမ်နာခြင်းအောင့်ခြင်း ဟုလည်း ခေါ်ဝေါ်လေ့ရှိပါသည်။
ဗိုက်အောင့်ဗိုက်နာဖြစ်ခြင်း အကြောင်းရင်းများ
ဗိုက်အောင့်ဗိုက်နာဖြစ်ခြင်း၏ အကြောင်းရင်းများစွာရှိသည့်အနက် အဓိကအကြောင်းရင်း များမှာ ဝမ်းဗိုက်တွင်ရှိသော အင်္ဂါရပ်များတွင်
-ရောဂါပိုးကူးစက်ခံရခြင်း
-ရောင်ရမ်းနေခြင်း
-ပိတ်ဆို့နေခြင်း နှင့်
-အကျိတ်အခဲများဖြစ်ခြင်း စသည်တို့ဖြစ်ကြပါသည်။
အခြားအဖြစ်များသည့် အကြောင်းရင်းများမှာ
-ဝမ်းချုပ်ခြင်း
-ဝမ်းလျှောခြင်း
-အစာအိမ်နှင့်အူလမ်းကြောင်းရောင်ရမ်းခြင်း
-အစာအိမ်အက်ဆစ်အထက်သို့ဆန်တက်ခြင်း
-အန်ခြင်း
-စိတ်ဖိစီးမှုများခြင်း စသည်တို့ကြောင့်လည်း ဖြစ်နိုင်ကြောင်းတွေ့ရှိရပါသည်။
ထို့ပြင် ဆိုးရွားပြင်းထန်သော ဗိုက်အောင့်ဗိုက်နာဖြစ်ခြင်း အကြောင်းရင်းများလည်း တွေ့ရှိရပါသည်။ ယင်းတို့မှာ
-ဝမ်းဗိုက်တွင်းရှိ အင်္ဂါရပ်များ ပေါက်ပြဲခြင်း သို့မဟုတ် ပေါက်ပြဲလုနီးပါးဖြစ်ခြင်း ( ဥပမာ အူအတက်ရောင်ခြင်း သို့မဟုတ် အူအတက် ပေါက်ပြဲခြင်း )
-သည်းခြေတွင် ကျောက်တည်ခြင်း
-ကျောက်ကပ်တွင် ကျောက်တည်ခြင်း
-ကျောက်ကပ်တွင် ရောဂါပိုးကူးစက်ခံရခြင်း စသည်တို့ဖြစ်ကြပါသည်။
ဗိုက်အောင့်ဗိုက်နာဖြစ်လျှင် သက်သာပျောက်ကင်းစေနိုင်သော နည်းလမ်းများ
ဗိုက်အောင့်ဗိုက်နာဖြစ်လျှင် သက်သာပျောက်ကင်းစေနိုင်သော နည်းလမ်းအချို့ကို အောက်တွင် ဖော်ပြထားပါသည်။
( ၁ ) ရေသောက်ပေးပါ
ခန္ဓာကိုယ်တွင် ရေဓာတ်ခန်းခြောက်ခြင်းသည် အစာအိမ်အောင့်ခြင်းနာခြင်းကို ဖြစ်စေနိုင်သော အကြောင်းရင်းတစ်ရပ် အဖြစ်တွေ့ရှိရပါသည်။ အဘယ်ကြောင့်ဆိုသော် ရေဓာတ်သည် အစားအစာများကို ကောင်းစွာ ခြေဖျက်စုပ်ယူနိုင်ရန်အတွက် အလွန်အရေးပါသည့် အခန်းကဏ္ဍတွင် ပါဝင်သောကြောင့် ဖြစ်ပါသည်။
ထို့ကြောင့် ဗိုက်အောင့်ဗိုက်နာဖြစ်ခြင်းကို ခံစားနေရသောသူများအား ရေများများသောက် စေခြင်းဖြင့် ရောဂါဝေဒနာကို သက်သာစေနိုင်မည်ဖြစ်ပါသည်။
( ၂ ) ချင်းပြုတ်ရည် သောက်ပေးပါ
ချင်း(ဂျင်း)တွင် အစာအိမ်ကျုံ့ညှစ်ခြင်းကို မြန်ဆန်စေနိုင်သော ဓာတုပစ္စည်းများပါဝင်သဖြင့် အစာမကြေဗိုက်အောင့်ဗိုက်နာဖြစ်ခြင်းကို ကာကွယ်သက်သာစေနိုင်သည့် အစားအစာတစ်မျိုး အဖြစ် လက်ခံယုံကြည်ထားရှိကြပါသည်။
ထို့ပြင် ၎င်းတွင် ပျို့ခြင်း၊ အန်ခြင်းနှင့် ဝမ်းလျှောခြင်းကို သက်သာစေနိုင်သည့် အစွမ်းအာနိသင်များရှိကြောင်းကိုလည်း လေ့လာသိရှိရပါသည်။
( ၃ ) ရေနွေးဖြင့် ရေချိုးခြင်း သို့မဟုတ် ဝမ်းဗိုက်ပေါ်တွင် ရေနွေးအိတ်ကပ်ပေးခြင်း ပြုလုပ်ပေးပါ
အပူဓာတ်သည် တင်းကျပ်နေသည့် ကြွက်သားများကို ပြေလျော့စေနိုင်သည့် အတွက် ဗိုက်အောင့်ဗိုက်နာဖြစ်နေသောသူများအား ရေနွေးနွေးဖြင့် ရေချိုးစေခြင်း ၊ သို့မဟုတ် နာနေသည့် ဝမ်းဗိုက်နေရာပေါ်တွင် ရေနွေးအိတ်ကပ်ပေးခြင်းဖြင့် ဝေဒနာကို သက်သာပျောက်ကင်း စေနိုင်မည် ဖြစ်ပါသည်။
( ၄ ) ဆေးလိပ်နှင့်အရက်သောက်ခြင်းမှ ရှောင်ကြဉ်ပါ
ဆေးလိပ်သောက်ခြင်းဖြင့် အစာအိမ်အက်ဆစ်ထွက်ခြင်းကို ပိုမိုအားပေးနိုင်သည့်အတွက် အစာအိမ်ဗိုက်အောင့်ဗိုက်နာဖြစ်နေသူများသည် ဆေးလိပ်သောက်ခြင်းကို ရှောင်ရန် လိုအပ်ပါသည်။
ထို့အတူ အရက်သည်လည်း အစာခြေဖျက်ခြင်းကို နှောင့်နှေးစေသည့်အပြင် အစာအိမ်နှင့် အသည်း နံရံတို့ကို ပျက်စီးစေနိုင်သဖြင့် ဗိုက်အောင့်ဗိုက်နာဖြစ်နေသောသူများသည် အရက်သောက်ခြင်းကိုလည်း ရှောင်သင့်ကြောင်း အကြံပြုလိုပါသည်။
( ၅ ) အစာကြေရန်ခက်ခဲသည့်အစားအစာများကို ရှောင်ပါ
အဆီဓာတ်များသော အစားအစာများ နှင့် တာရှည်ခံရန် ပြုလုပ်စီမံထားသည့်အစားအစာ များသည် အစာကြေညက်ရန်ခက်ခဲသည့်အတွက် ၎င်းတို့ကို ရှောင်သင့်ပါသည်။
( ၆ ) ရှားစောင်းလက်ပပ်ဖျော်ရည်ကို သောက်ပေးပါ
ရှားစောင်းလက်ပပ်တွင် အောက်ဖော်ပြပါ အစွမ်းအာနိသင်များရှိသဖြင့် ဗိုက်အောင့်ဗိုက်နာခံစားနေရသောသူများအနေနှင့် သောက်သုံးသင့်ကြောင်း လေ့လာတွေ့ရှိရပါသည်။
-အစာအိမ်အက်ဆစ်ထွက်ခြင်းကို လျော့နည်းစေနိုင်ခြင်း
-အူမကြီး လှုပ်ရှားမှုကို အားပေး၍ အဆိပ်အတောက်များကို ဖယ်ရှားပေးနိုင်ခြင်း
-အသားဓာတ်များအား ခြေဖျက်ခြင်းကို ပိုမိုကောင်းမွန်စေခြင်း
-အစာလမ်းကြောင်းရှိ အကျိုးပြုဗက်တီးရီးယားများကို ပေါက်ပွားစေခြင်း စသည့် အာနိသင်များရှိခြင်းကြောင့် ဖြစ်ပေသည်။
( ၇ ) အုန်းစိမ်းရည်ကို သောက်သုံးပေးပါ
အုန်းရည်တွင် ပါဝင်သည့် ဓာတ်များသည် နာကျင်ခြင်းနှင့် ကြွက်သားတင်းကျပ်ခြင်းတို့ကို လျော့နည်းသက်သာစေနိုင်သဖြင့် ဗိုက်အောင့်ဗိုက်နာဖြစ်နေသည့်သူများအနေဖြင့် သောက်သုံးသင့်ကြောင်း လေ့လာတွေ့ရှိရပါသည်။
( ၈ ) အစာအိမ်လေဆေးများကို သောက်သုံးပေးပါ
အောက်ပါ ဒြပ်ပေါင်းများပါဝင်သည့် အစာအိမ်လေဆေးများကို သောက်သုံးခြင်းဖြင့်လည်း ဗိုက်အောင့်ဗိုက်နာခြင်းကို သက်သာစေနိုင်မည်ဖြစ်ပါသည်။
-Aluminium Hydroxide
-Magnesium Hydroxide
– Simethicone စသော ဓာတုဒြပ်ပေါင်းများပါဝင်သည့် အစာအိမ်လေဆေးများ ဖြစ်ကြပါသည်။
အထက်ဖော်ပြပါ လွယ်ကူရိုးရှင်းသည့် ဆောင်ရန်ရှောင်ရန် နည်းလမ်းများကို လိုက်နာခြင်းအားဖြင့် ဗိုက်အောင့်ဗိုက်နာခြင်း ရောဂါဝေဒနာမှ ကင်းဝေးစေရန် ဆုမွန်ကောင်းတောင်းအပ်ပါသည်။
Author: Dr. မိုး ( ဆေး ၁ )
