ယနေ့ခေတ် နေထိုင်စားသောက်မှုပုံစံအရ အစာစားချိန်မမှန်ခြင်း ၊ အသင့်စား အစားအစာများအား စားသောက်လေ့ရှိခြင်း ၊ အလုပ်အကိုင်တွင် စိတ်ဖိစီးမှုများခြင်း စသည့် အကြောင်းရင်းများကြောင့် အစာအိမ်အချဉ်ပေါက်ခြင်း ဟူသည့် ရောဂါဝေဒနာကို ခံစားရလေ့ ရှိကြပါသည်။
အစာအိမ်အချဉ်ပေါက်ခြင်း ဆိုသည်မှာ အစာအိမ်မှ အက်ဆစ်ချဉ်ရည်များ ပုံမှန်ထက် ပိုမိုထွက်ခြင်းကြောင့် အစာအိမ်အနားသားများအား အက်ဆစ်တိုက်စားသည့်အတွက် အစာအိမ်ရောင်ရမ်းခြင်း ဖြစ်လာသည်ကို ဆိုလိုပါသည်။
အစာအိမ်ရောင်ခြင်း ဖြစ်နိုင်သည့် အကြောင်းရင်းများ
-စိတ်ဖိစီးမှုများခြင်း
-အကိုက်အခဲပျောက်ဆေးများ၊ ပဋိဇီ၀ပိုးသတ်ဆေးများ၊ သိုင်းရွိုက်ဟော်မုန်း ဆေးဝါးများ နှင့် ကိုယ်ဝန်တားမြစ်သော အမျိုးသမီးဟော်မုန်းသောက်ဆေးများ စသည့်ဆေးဝါးများကို အချိန်ကြာမြင့်စွာ သောက်သုံးရခြင်း
– H. pylori ဗက်တီးရီးယားပိုးကြောင့် အစာအိမ်ရောင်ရမ်းခြင်း
-သည်းခြေပြွန်မှ သည်းခြေရည်များသည် အစာအိမ်ဆီသို့ နောက်ပြန်စီးဆင်းခြင်း
-အခြားသော ဗက်တီးရီးယားပိုးများ၊ ဗိုင်းရပ်စ်ပိုးများ ကူးစက်ခံရခြင်း စသည်တို့ ဖြစ်ကြပါသည်။
အစာအိမ်အချဉ်ပေါက်ခြင်းဖြစ်လျှင် အောက်ပါရောဂါလက္ခဏာများကို တွေ့ရလေ့ရှိပါသည်။
-ပျို့ခြင်း
-အန်ခြင်း
-ဝမ်းဗိုက်ကယ်ခြင်း
-ဗိုက်နာဗိုက်အောင့်ခြင်း
-အစာမကြေဖြစ်ခြင်း
-အစာအိမ်နေရာတွင် ပူလောင်ခြင်းဝေဒနာကို ခံစားနေရခြင်း
-ကြို့ထိုးခြင်း
-အစာစားချင်စိတ်မရှိခြင်း
-ကတ္တရာစေးကဲ့သို့ဝမ်းမည်းမည်းသွားခြင်း
-သွေးအရောင် သို့မဟုတ် ကော်ဖီအရောင်များအန်ခြင်း စသည့်လက္ခဏာများကို တွေ့ရှိရပါသည်။
အထက်ပါလက္ခဏာများအနက် ၀မ်းအမည်းရောင်သွားခြင်း ၊ သွေးအရောင် သို့မဟုတ် ကော်ဖီရောင်များအန်ခြင်း၊ အလွန်အမင်းမခံမရပ်နိုင်အောင် ဗိုက်အောင့်ခြင်းတို့သည် အရေးကြီးသော လက္ခဏာရပ်များဖြစ်သဖြင့် ဆရာဝန်နှင့် အမြန်ဆုံး တိုင်ပင်ပြသသင့်ပါသည်။
ရောဂါကုသခြင်း
-အစာအိမ်အချဉ်ပေါက်ခြင်းကို သက်သာစေရန် အစာအိမ်အက်ဆစ်ထွက်ခြင်းကို လျော့နည်းစေသည့် အောက်ပါဆေးဝါးများအားပေး၍ ကုသလေ့ရှိကြပါသည်။
( ၁ ) Simethicone ပါသော အစာအိမ်လေဆေးများ ( Antacids )
( ၂ ) Proton Pump Inhibitors သို့မဟုတ် H2 blockers အုပ်စု အစာအိမ်ဆေးဝါးများ စသည်တို့ ဖြစ်ကြပါသည်။
-H . pylori ကြောင့်ဖြစ်သော အစာအိမ်ရောင်ခြင်းတွင်မူ သက်ဆိုင်သောပဋိဇီ၀ပိုးသတ်ဆေးများကို ဖြည့်စွက်ပေးခြင်းဖြင့်လည်း ကုသလေ့ရှိပါသည်။
အစာအိမ်အချဉ်ပေါက်ခြင်းကို ကုသရာတွင် ဆေးဝါးများအပြင် အောက်ပါဆောင်ရန်ရှောင်ရန် နည်းလမ်းများကို လိုက်နာရန်လည်း လိုအပ်ပါသည်။
-ပူလွန်းစပ်လွန်းသော အစားအစာများ၊ အဆီဓာတ်များသော အစားအစာများ ၊ ကော်ဖီ၊ လက်က်ရည် ၊ အချိုရည်အအေးများကို စားသောက်ခြင်း ရှောင်ပါ။
-ဆေးလိပ်သောက်ခြင်း ၊ အရက်သောက်ခြင်း ရှောင်ပါ။
– ဆရာဝန်ညွှန်ကြားချက်မရှိဘဲ အကိုက်အခဲပျောက်ဆေးများ ၊ ပိုးသတ်ဆေးများကို သောက်သုံးခြင်း ရှောင်ပါ။
-အစားအစာများကို တစ်ချိန်တည်းတွင် အများကြီးမစားဘဲ ပမာဏနည်းနည်းနှင့် အကြိမ်များများစားပေးပါ။
-အစားအစာများကို ကြေညက်အောင်ဝါးစားသည့် အလေ့အကျင့်ကို ဆောင်ပါ။
-စိတ်ဖိစီးမှုလျော့နည်းစေရန် တရားထိုင်ခြင်း ၊ယောဂကျင့်ခြင်းစသည်တို့ကို မှန်မှန် ပြုလုပ်ပေးပါ။
-ပြင်းထန်သည့် လေ့ကျင့်ခန်းများပြုလုပ်ခြင်း ရှောင်ပါ။
အထက်ဖော်ပြပါ နည်းလမ်းများကို လိုက်နာခြင်းဖြင့် အစာအိမ်အချဉ်ပေါက်ခြင်း ရောဂါမှ ကင်းဝေးကြစေရန် ဆုမွန်ကောင်းတောင်းအပ်ပါသည်။
Author: Dr. မိုး ( ဆေး ၁ )
