ရင်ပူခြင်းဆိုသည် ရင်ဘတ်ထဲတွင် ပူလောင်ခြင်း ခံစားချက်ကို ဖြစ်စေသော ရောဂါလက္ခဏာတစ်ခုပင် ဖြစ်ပါသည်။ ၎င်းရောဂါလက္ခဏာသည် အစားစားပြီးချိန်၊ ညနေပိုင်းအချိန် သို့မဟုတ် လဲလျောင်းနေစဉ် အချိန်များတွင် ပို၍ပြင်းထန်စွာ ခံစားရလေ့ရှိကြောင်း တွေ့ရှိရပါသည်။
-အစားစားပြီးချိန် နှင့် ညဘက်အိပ်ချိန်များ၌ ရင်ဘတ်ထဲတွင် ပူလောင်သည့် ဝေဒနာခံစားရခြင်း
-လဲလျောင်းနေစဉ်တွင် ဝေဒနာပို၍ဆိုးရွားခြင်း
-ပါးစပ်တွင် ခါးခြင်း သို့မဟုတ် ချဉ်ခြင်းဝေဒနာကို ခံစားရခြင်း စသည့် လက္ခဏာများကို တွေ့ရှိရပါသည်။
အထက်ပါလက္ခဏာများသည်
-တစ်ပတ်လျှင် နှစ်ကြိမ်ထက်ပို၍ ခံစားရလျှင်
-အစာအိမ်လေဆေးများကို သောက်သုံးခြင်းဖြင့် မသက်သာလျှင်
-အစာမျိုချရန် ခက်ခဲလာလျှင်
-မကြာခဏ ပျို့အန်ခြင်းများ ခံစားရလျှင်
-အစာစားချိန်စိတ်မရှိဘဲ ခန္ဓာကိုယ်အလေးချိန်ကျဆင်းလာလျှင် ဆရာဝန်နှင့် အမြန်ဆုံး စနစ်တကျ တိုင်ပင်ပြသ သင့်ပါသည်။
ထို့ပြင် အချို့သော အစားအစာများ၊ အဖျော်ယမကာများသည် ရင်ပူခြင်းကို ဖြစ်စေနိုင်သော အကြောင်းရင်းများအဖြစ် လေ့လာသိရှိရပါသည်။
-အပူအစပ်အစားအစာများ
-အချဉ်ဓာတ်များသော အစားအစာများ
-ကော်ဖီ ၊လက်ဘက်ရည် စသည့် ကဖင်းဓာတ်များစွာပါဝင်သည့် အစားအစာများ
-ကြက်သွန်နီ
-ငရုတ်ကောင်း
-ခရမ်းချဉ်သီး
-အဆီဓာတ်များသော ဆီကြော်အစားအစာများ
-ချောကလက်
-အရက် ၊ ဘီယာ စသည့်အစားအသောက်များသည် ရင်ပူခြင်းကို အားပေးသည့် အကြောင်းရင်းများဖြစ်ကြပါသည်။
ရင်ပူခြင်းသက်သာစေမည့်နည်းလမ်းများ
( ၁ ) Baking soda ကို ရေတစ်ဖန်ခွက်ထဲတွင် ထည့်ဖျော်၍ သောက်ပါ
အဘယ်ကြောင့်ဆိုသော် ၎င်း Baking soda တွင် ရင်ပူခြင်းကို ဖြစ်စေသည့် အစာအိမ်အက်ဆစ်ရည်များကို ဓာတ်ပြယ်စေသည့် အာနိသင်ရှိသောကြောင့် ဖြစ်ပါသည်။
( ၂ ) ရှားစောင်းလက်ပပ်ဖျော်ရည်ကို သောက်ပေးပါ
အရေပြားလောင်ခြင်းများကို သက်သာစေနိုင်သကဲ့သို့ ရှားစောင်းလက်ပပ်တွင် အစာအိမ်အက်ဆစ်စားခြင်းကြောင့်ဖြစ်သော အစာအိမ်နံရံရှိ ဒဏ်ရာများကိုလည်း သက်သာ ပျောက်ကင်းစေနိုင်သည့် ဂုဏ်သတ္တိရှိကြောင်း လေ့လာသိရှိရပါသည်။.
( ၃ ) ပီကေ ဝါးစားပေးပါ
တံထွေးသည် အစာအိမ်အက်ဆစ်များကို ဓာတ်ပြယ်စေနိုင်သဖြင့် တံထွေးပမာဏ အမြောက်အမြားထွက်စေခြင်းဖြင့် ရင်ပူခြင်းကို ပျောက်ကင်းစေနိုင်မည်ဖြစ်ပါသည်။
ထို့ကြောင့် မိနစ် ၃၀ ခန့် ကြာအောင် ပီကေ ဝါးပေးခြင်းဖြင့် ရင်ပူခြင်းဝေဒနာကို သက်သာပျောက်ကင်းစေနိုင်မည်ဖြစ်ပါသည်။
( ၄ ) ငှက်ပျောသီး စားပေးပါ
ငှက်ပျောသီးသည်လည်း အစာအိမ်အက်ဆစ်များကို ဓာတ်ပြယ်ခြင်းဖြင့် အစာအိမ်ရင်ပူခြင်း
ကို သက်သာစေနိုင်သည့် အစားအစာအဖြစ် လက်ခံယုံကြည်ထားကြပါသည်။
( ၅ ) ဆေးလိပ်သောက်ခြင်း အရက်ဘီယာသောက်ခြင်းမှ ရှောင်ကြဉ်ပါ
( ၆ ) အစားအသောက် နေထိုင်စားသုံးမှု ပုံစံကို ပြုပြင်ပေးပါ
-အစားအစာများကို ပမာဏနည်းနည်းနှင့် အကြိမ်များများစားပေးပါ
-အစားစားရာတွင် ကြေညက်စွာ စားတတ်သည့် အလေ့အကျင့်ကို ပြုပြင်ယူပါ
-ချဉ်လွန်း ၊ပူလွန်း၊ စပ်လွန်းသော အစားအစာများကို မစားသင့်ပါ။
-အစာကြေရန်ခက်ခဲသော အစားအစာများ ( ဥပမာ ဆီကြော်အစားအစာများ ) ကို စားခြင်းမှ ရှောင်ကြဉ်ပါ
-ကော်ဖီ ၊ လက်ဖက်ရည် ၊ လက်ဖက်သုပ် ၊ ရေနွေးကြမ်း နှင့် ဂတ်စ်ပါသော အချိုရည်အအေးများကို သောက်သုံးခြင်းမှ ရှောင်ကြဉ်ပါ။
-စိတ်ဖိစီးမှုသက်သာစေရန် ယောဂကျင့်ခြင်း နှင့် တရားထိုင်ခြင်းတို့ကို ပြုလုပ်ပေးပါ။
( ၇ ) Simethicone ပါဝင်သော အစာအိမ်လေဆေးများ ( Antacids ) ကို သောက်သုံးခြင်းဖြင့်လည်း အစာအိမ်ရောဂါကြောင့် ရင်ပူခြင်းကို သက်သာစေနိုင်မည်ဖြစ်ပါသည်။
Author: Dr. မိုး ( ဆေး ၁ )
