Probiotics နဲ့ Prebiotics ဘာကွာလဲ၊ လူ့ခန္ဓာကိုယ်အတွက် ဘာတွေအကျိုးပြုလဲ

Probiotics နဲ့ Prebiotics ​တွေတာ အူလမ်း​ကြောင်းကျန်းမာ​ရေးအတွက်အ​​ထောက်အကူဖြစ်​စေတယ်ဆိုတာကို ကြားဖူးကြမှာပါ။ အူလမ်း​ကြောင်းကျန်းမာ​ရေးအတွက် Gut flora လို့​ခေါ်တဲ့ ​ကောင်းမွန်တဲ့ဗက်တီးရီးယား​လေး​တွေ လုံ​လောက်စွာ​ပေါက်ဖွား​နေဖို့လိုပါတယ်။ ဒီဘတ်တီးရီးယား​လေး​တွေဟာ ပြင်ပက​နေတစ်ဆင့် အူလမ်း​ကြောင်းထဲဝင်လာမယ့် ပိုး​မွှား​တွေကို တိုက်ထုတ်​ပေးနိုင်ပါတယ်။

ဗိုက်ထဲမှာဆိုရင် ဗက်တီးရီးယားပိုး​ကောင်း​လေး​တွေဟာ မ​ရေမတွက်နိုင်​အောင်​မြောက်များစွာရှိ​နေပါတယ်။ အစားအာဟာရပြည့်ဝစွာမစားတာ၊ အရက်​သောက်တာ၊ ​ပိုးသတ်​ဆေး၊ ဟော်မုန်း​တွေနဲ့ စိတ်ဖိစီးမှုစတာ​တွေဟာ  ပုံမှန်ရှိသင့်တဲ့ဗက်တီးရီးယားအ​ရေအတွက်ထက် ​လျော့နည်းသွား​စေနိုင်ပါတယ်။ ဒီလို​လျော့နည်းသွားတာကို ပြန်လည်ဖြည့်တင်းနိုင်ဖို့ Probiotics နဲ့ Prebiotics ​တွေကို စားသုံး​ပေးသင့်ပါတယ်။

Probiotics နဲ့ Prebiotics ဘာကွာလဲ

▪︎Probiotics ဆိုတာက​တော့ ​အူလမ်း​ကြောင်းကျန်းမာ​ရေး​ကောင်းမွန်ဖို့အတွက် အ​ရေးပါတဲ့ ဗက်တီးရီးယားအ​​ကောင်အရှင်​လေး​တွေဘဲဖြစ်ပါတယ်။ Probiotics ကို အချဥ်​ဖောက်ထားတဲ့အစားအစာ​တွေဖြစ်တဲ့ ဒိန်ချဥ်၊ ချိစ်၊ ကင်မ်ချီနဲ့ ဟင်းသီးဟင်းရွက်ချဥ်စတာ​တွေက​နေ ရရှိနိုင်ပါတယ်။

▪︎Prebiotics ဆိုတာက​တော့ အဲ့ဒီဘတ်တီးရီးယား​လေး​တွေ ကြီးထွားနိုင်ဖို့အ​ရေးပါတဲ့ အစာဖြစ်ပါတယ်။ များ​သောအားဖြင့် အမျှင်ဓာတ်များတဲ့ အသီးအနှံ​တွေ၊ အသီးအရွက်​တွေဖြစ်တဲ့ ငှက်​ပျောသီး၊ ဘယ်ရီသီး၊ ကညွတ်၊ ကြက်သွန်နီ၊ ကြက်သွန်ဖြူနဲ့ ပဲအမျိုးမျိုးစတာ​တွေမှာ Prebiotics ပါဝင်ပါတယ်။

▪︎Probiotics က ​အူလမ်း​ကြောင်းထဲမှာ ကောင်းမွန်တဲ့ ဗက်တီးရီးယား​အ​ရေအတွက်တိုးပွားလာ​စေပြီး Prebiotics က​တော့ ဗက်တီးရီးယား​လေး​တွေကို ကြီးထွားလာ​စေပါတယ်။ ဒါ​ကြောင့် အူလမ်း​ကြောင်းကျန်းမာ​စေဖို့ ၂ မျိုးစလုံးက အ​ရေးပါပါတယ်။

Probiotics က ခန္ဓာကိုယ်အတွက်ဘာ​တွေ​ကောင်းလဲ

Probiotics​တွေကို ဝမ်းပျက်ဝမ်း​လျှောခြင်းကုသတဲ့အခါ အသုံးပြု​လေ့ရှိပါတယ်။ အူလမ်း​ကြောင်းပိုးဝင်မျိုး​​တွေကို ကာကွယ်ကုသဖို့အတွက်လည်းသုံးပါတယ်။ ဒါ့ပြင် ပိုးသတ်​ဆေး​တွေ​ကြောင့်ဖြစ်​လေ့ရှိတဲ့ အစာအိမ်နဲ့အူလမ်း​ကြောင်းဆိုင်ရာ ဆိုးကျိုးပြဿနာ​တွေကို ကုသဖို့အတွက်လည်း အသုံးဝင်ပါတယ်။ ပိုးသတ်​ဆေး​တွေဟာ ​ရောဂါပိုး​တွေကိုတိုက်ဖျက်သလို အူလမ်း​ကြောင်းမှာ ပုံမှန်ရှိ​နေရမယ့် ပိုး​ကောင်း​လေး​တွေကိုပါ သတ်ပစ်ပါတယ်။ ဒါ​ကြောင့် Probiotics ​သောက်ပြီး ပိုး​ကောင်း​လေး​တွေကို ပြန်​မွေးမြူရပါတယ်။ ဒါ့အပြင် Probiotics ​တွေဟာ အ​အေးမိဖျားနာခြင်း၊ ဆီးပိုးဝင်ခြင်း၊ မိန်းမကိုယ်မှိုစွဲခြင်းစတာ​တွေမဖြစ်​အောင်လည်း ကာကွယ်​ပေးနိုင်ပါတယ်။

Prebiotics ​တွေက ခန္ဓာကိုယ်အတွက်ဘာ​ကောင်းလဲ

Prebiotics ​တွေဟာ ပိုး​ကောင်း​လေး​တွေကြီးထွားလာ​စေတဲ့အတွက် အူလမ်း​ကြောင်းကျန်းမာ​ရေးအတွက် များစွာအ​ထောက်အကူဖြစ်​စေပါတယ်။ အစာ​ချေမှုကိုလည်းမြန်ဆန်​စေပါတယ်။ ဒါ့အပြင် ခန္ဓာကိုယ်ကကယ်ဆီယမ်ဓာတ်စုပ်ယူနိုင်ဖို့အတွက်လည်း အား​ပေးပါတယ်။ Prebiotics ​တွေဟာ အာရုံ​ကြောကျန်းမာ​ရေးအတွက်လည်း အ​ထောက်အကူဖြစ်တာကြောင့် မှတ်ဥာဏ်​ကောင်း​စေပြီး သင်ယူမှုကိုလွယ်ကူ​စေပါတယ်။ ဒါ့ပြင် ခုခံအားအတွက်အ​ရေးပါတဲ့ Cytokines ​တွေကိုလည်း တိုးပွား​စေနိုင်ပါတယ်။

Probiotics ရဲ့ အခြား​ကောင်းကျိုး​တွေကဘာ​တွေလဲ

ကိုယ်အ​လေးချိန်ထိန်းသိမ်း​ပေးနိုင်ခြင်း

Probiotics ​တွေဟာ အူလမ်း​ကြောင်းကျန်းမာ​စေတဲ့ ပိုး​ကောင်း​လေး​တွေကို တိုးပွား​စေတဲ့အတွက် အူနံရံ​တွေကိုပါ ကြံ့ခိုင်သန်မာလာ​စေပါတယ်။ ဒီလို ကြံ့ခိုင်တဲ့အူနံရံ​တွေဟာ အစားအ​​သောက်က​နေပါလာတဲ့ ကြီးမားတဲ့အဆီလုံး​တွေကို ခန္ဓာကိုယ်က​နေမစုပ်ယူမိ​အောင် တားဆီး​ပေးပါတယ်။ ဒါ့​ကြောင့် ကိုယ်ခန္ဓာအဆီပို​တွေကင်းရှင်းကာ ကိုယ်အ​လေးချိန်ကို ထိန်းသိမ်းနိုင်မှာဘဲဖြစ်ပါတယ်။

စိတ်ကြည်လင်​လန်းဆန်း​စေခြင်း

Probiotics ​တွေဟာ စိတ်ဖိစီးမှုနဲ့ စိတ်ပူပင်​သောက​တွေကို ​လျော့နည်း​စေတဲ့အတွက် စိတ်ကိုကြည်လင်​စေပါတယ်။

အူလမ်း​ကြောင်းမှာရှိတဲ့ ဗက်တီးရီးယားပိုး​ကောင်း​လေး​တွေဟာ ခန္ဓာကိုယ်ကျန်းမာ​ရေးအတွက် အ​ရေးပါပါတယ်။ ဒီလိုပိုး​ကောင်း​လေး​တွေ ရှင်သန်ကြီးထွားနိုင်​စေဖို့အတွက် Probiotics နဲ့ Prebiotics တို့ပါဝင်တဲ့ အစားအစာ​တွေ၊ ​ဆေး​တွေကို လုံ​လောက်​အောင်စားသုံး​ပေးရမှာဖြစ်ပါတယ်။ ဒါပေမဲ့ တန်​ဆေးလွန်​ဘေးဆိုတဲ့စကားလည်းရှိ​သေးတာမို့ ဆရာဝန်နဲ့တိုင်ပင်ပြီးမှသာ သင့်​တော်တဲ့ပမာဏကို ​သောက်သုံး​ပေးသင့်ပါတယ်။

Author: Dr. Aye Myat