အူရောင်ငန်းဖျားလား တိုက်ဖွိုက်လား
တနေ့ ဒေါက်တာသီဟတစ်ယောက် ဆေးခန်းမှာရှိနေတုန်း ဘေးအိမ်က ကိုမျိုးရောက်လာပြီး
“ဆရာ အားလားဗျ စကားပြောချင်လို့”
“ဟုတ်ကဲ့ဗျာ၊ ကျွန်တော်လည်းမေးချင်တာလေးရှိလို့ဗျ ”
“ဟုတ်ကဲ့ မေးပါဗျ ”
“ဒီလိုပါ၊ရွာက ကျွန်တော့်ညီဝမ်းကွဲလေးပါ၊အသက် (15)နှစ်ဘဲရှိသေးတယ်၊ဖျားတာဆရာ၊ ဘာစားစားအန်တယ်၊နောက်ပိုင်း ဝမ်းပါပျက်နေလို့၊အစကတော့ ဆေးမြီးတိုပေါ့ဗျာ၊ဆေးရုံ ဆေးခန်းက ဝေးတယ်ဗျ ၊ မသက်သာလို့နောက်ဆုံးမြို့ဆေးရုံပြေးလိုက်ရတော့ အူရောင်ငန်းဖျားတဲ့၊အဲ့ဒါဘာလဲဆရာ”
“ဝမ်းပျက်ဝမ်းလျှောရောဂါတစ်မျိုးပေါ့ဗျာ”
“သြော်ဟုတ်ကဲ့ဆရာ၊ ကျွန်တော်လည်း အူရောင်တာတော့ စဉ်းစားလို့ရသေးတယ်၊ငန်းဖျားဆိုတာကဘာမှန်းမသိလို့ဆရာရေ”
“ဒါကတော့အခေါ်အဝေါ်တစ်မျိုးပေါ့ဗျာ”
“ဟုတ်ကဲ့ ဆရာ၊ဒါကတိုက်ဖွိုက်နဲ့ရောတူလားဆရာ”
“ကျွန်တော်ရှင်းပြမယ်ဗျ ၊အူရောင်ငန်းဖျားဆိုတာက ဘက်တီးရီးယားပိုးလေးတွေကြောင့်ဖြစ်တာဗျ ၊အကောင်လေးတွေကတော့မတူကြဘူး၊တိုက်ဖွိုက်ပိုးလည်းဖြစ်နိူင်တယ်၊ပါရာတိုက်ဖွိုက်ပိုးလည်း ဖြစ်နိူင်တယ် ၊ဖြစ်တဲ့အကောင်ကိုမူတည်ပြီး ခေါ်လိုက်တာပါ၊တိုက်ဖွိုက်ပိုးကြောင့်ဖြစ်တာကတော့ ပိုများတာပေါ့ဗျာ၊ဘာပိုးကြောင့်ဖြစ်ဖြစ် ခြုံခေါ်လိုက်တော့ အူရောင်ငန်းဖျား ရောဂါပေါ့ဗျာ”
“သြော် ဟုတ်ကဲ့ပါဆရာ၊ ကျွန်တော်ခုမှဘဲ သဘောပေါက်တော့တယ်၊ဒီရောဂါအကြောင်းဗဟုသုတ အဖြစ် နည်းနည်းလောက်ပြောပြပေးပါလားဗျာ၊ကျွန်တော်ရွာကလူတွေကို ပြန်ပြောပြချင်လို့ပါ”
“ဟုတ်ကဲ့ပါ၊ဒီရောဂါဖြစ်တာက တကိုယ်ရေသန့်ရှင်းရေးနဲ့လည်းဆိုင်တယ်ဗျ ၊အစာသန့်၊ရေသန့်၊လက်သန့်၊အိမ်သာသန့်ရင်တော့ဖြစ်ဖို့နည်းတယ်ဗျ ၊အဓိကကတော့ မသန့်ရှင်းတဲ့အစာစားမိတာ၊ရေသောက်မိတာ၊ညစ်ပတ်တာတွေကိုင်ပြီး လက်မဆေးဘဲ အစားစားတာ၊ယင်နားစာတွေစားမိတာ စတာတွေနဲ့လည်းဆိုင်တယ်ဗျ ”
“ဟုတ်ကဲ့ဆရာ”
“ရောဂါပိုးဝင်ဝင်ချင်းတော့ မဖြစ်တတ်ဘူး။ (3)ရက်ကနေ (2)ရက်လောက်အတွင်းတော့ ရောဂါလက္ခဏာ စခံစားရတတ်တယ်ဗျ ၊ဖျားမယ်ဗျာ၊အပူလည်းကြီးကြီးမယ်၊ကိုယ်လက်တွေနုန်းတာညောင်းတာ ဖြစ်နိူင်တယ်၊ချောင်းလည်းဆိုးနိူင်တယ်ဗျ ၊စားတာတွေလည်းပြန်အန်နိူင်တယ်၊ဖြစ်စမှာ ဝမ်းချု ပ်တတ်တယ်ဗျ ၊နောက်မှဝမ်းပျက်မှာ၊”
“ဟုတ်ကဲ့ ဆရာ”
“တချို့ကျ တော့ ဒါနဲ့မပြီးဘူးဗျ ၊အနီစက်လည်းထွက်နိူင်တယ်၊ဦးနှောက်အမြှေးပါးယောင်တာတွေလည်း ဖြစ်နိူင်တယ်၊သတိလစ်တာ၊ကယောင်ကတမ်းပြောတာပါဖြစ်မယ်၊ကျောက်ကပ်ယောင်တာ၊နှလုံးကြွက်သားယောင်တာတွေလည်း ဖြစ်နိူင်တယ်ဗျ ”
“အဲ့လောက်ထိဆိုးလားဆရာ”
“တချို့ပေါ့ဗျာ၊သေချာမကုဖြစ်ရင်ပိုဖြစ်နိူင်တယ်ဗျ ”
“ဒီရောဂါက စစ်ကြည့်လို့ရောရလားဗျ ”
“ရပါတယ်၊ရောဂါလက္ခဏာအရ ဒါလို့ထင်လာရင် သွေးစစ်တာလုပ်လို့ရတယ်ဗျ ၊အစပိုင်းရက်တွေမှာစစ်လို့ရတယ်၊နောက်ပိုင်းတွေမှာ ဆီးနဲ့ဝမ်း ပိုးမွေးတာလည်းလုပ်လို့ရတယ်ဗျ ၊လိုအပ်မယ်ထင်တာတွေလည်းဆက်စစ်ရတာပေါ့၊”
“ဟုတ်ကဲ့ပါဆရာ၊ဒီရောဂါကကုလို့လွယ်လားဆရာ”
“ကုလို့ရပါတယ်၊သေချာဖိဖိစီးစီးကုဖို့လိုတယ်ဗျ ၊အန်တာဝမ်းပျက်တာတွေကြောင့်ရေဓာတ်ဆုံးရှုံးနိူင်တာလည်းရှိနိူင်တယ်၊အဲ့ဒါမျိုးဆို ရေဓာတ်ပြန်ဖြည့်ရတာပေါ့၊ပါးစပ်ကပေးမလား၊အကြောကသွင်းမလား၊ကတော့လူနာပေါ်မူတည်တယ်ဗျ ”
“ဟုတ်ကဲ့ ဆရာ”
“ရောဂါပိုးအတွက်လည်း သင့်တော်တဲ့ပိုးသတ်ဆေးသောက်ရတယ်၊သူ့ဆေးကို dose နဲ့ရက်ပြည့်အောင်တော့သောက်ဖို့လိုတယ်ဗျ ၊သက်သာလို့ဆေးမသောက်ဘဲရပ်လိုက်ရင် နောက်ဆက်တွဲတွေပိုဖြစ်နိူင်တယ်ဗျ ”
“ဟုတ်ကဲ့ ဆရာ”
“အဓိက ကတော့ ဆေးရုံဆေးခန်းပြပြီး သေချာကုပေါ့ဗျာ”
“ဟုတ်ကဲ့ ဆရာ”
“အရေးကြီးဆုံးကတော့ တကိုယ်ရေသန့်ရှင်းရေးဗျ ၊သန့်လေးသန့်သေချာလုပ်ရင်တော့ ရောဂါဖြစ်ပွားတာကိုလျော့နည်းအောင် ထိန်းလို့ရတယ်ဗျ ၊ထပ်မဖြစ်အောင် ထိန်းလို့ရတယ်ဗျ ၊အစာသန့်ဖို့လိုတယ်၊ယင်နားစာမဖြစ်ရဘူး၊သေချာချက်ပြုတ်ရမယ်၊အုပ်ဆောင်းအုပ်ထားရမယ်၊ရေလည်းသန့်ရမယ်၊လိုရင်ကျို ချက်သောက်ရမယ်၊လက်လည်းသန့်ရမယ်၊ဆပ်ပြာနဲ့သေချာဆေးရမယ်၊အစားမကိုင်ခင်မပြင်ဆင်ခင်၊ညစ်ပတ်တာတွေကိုင်ပြီးရင်၊အိမ်သာတတ်ပြီးရင်၊အိမ်သာလည်းသပ်ရပ်ရမယ်၊ယင်မအုံစေရဘူး၊အနံ့လုံရမယ်၊တံခါးနဲ့အမိုးလည်းရှိရမယ်၊အဖုံးလည်းရှိရမယ်ဗျ ”
“ဟုတ်ကဲ့ ဆရာ”
“ဒါတွေ သေချာလိုက်နာရင် ရောဂါကိုကောင်းကောင်းကာကွယ်နိူင်တယ်ဗျ ”
“ဟုတ်ကဲ့ပါဆရာရေ၊ကျေးဇူးတင်တယ်ဗျာ၊ကျွန်တော်ရွာကလူတွေသွားပြောလိုက်အုန်းမယ်ဗျ ၊ခွင့်ပြု ပါဦးဗျာ”
“ဟုတ်ကဲ့ပါ”
တတ်တတ်ကြွကြွပြန်ထွက်သွားတဲ့ကိုမျိုးကိုကြည့်ရင်း တကိုယ်ရည်သန့်ရှင်းရေးရဲ့ အရေးပါပုံကိုလည်း စဉ်းစားလိုက်မိပါတယ်”
Author: Dr. CST
