လေ့လာတွေ့ရှိချက်များအရ ဆီးချိုသွေးချိုရောဂါနှင့် အိပ်စက်ခြင်းမူမမှန်မှုများသည် ဆက်စပ်မှုရှိကြောင်းတွေ့ရှိရပါသည်။
အိပ်စက်ခြင်း မူမမှန်မှုဟုဆိုရာ၌ နှစ်ခြိုက်စွာ အိပ်ပျော်ရန်ခဲယဉ်းခြင်း၊ မကြာခဏလန့်နိုးခြင်းနှင့် အလွန်အကျွံ အိပ်စက်ခြင်းများ ပါဝင်ပါသည်။
ထိုသို့ အိပ်စက်ခြင်းဆိုင်ရာ မူမမှန်မှုများသည် ဆီးချိုသွေးချိုရောဂါရှိသူများအတွက် နောက်ဆက်တွဲပြဿနာများကို ပိုမိုဖြစ်လာစေနိုင်သည့် အချက်တစ်ချက်ပင်ဖြစ်ပါသည်။
သို့သော် ဆီးချိုသွေးချိုရှိသူတိုင်း ဤပြဿနာများကို ကြုံတွေ့ရသည် မဟုတ်ပေ။ သွေးတွင်းအချိုဓါတ် ထိန်းသိမ်းနိုင်မှု အနည်းအများပေါ်မူတည်၍ ကြုံတွေ့ရသည့် ပြဿနာများ ပြောင်းလဲမှု အနည်းအများရှိနိုင်ပါသည်။
ဆီးချိုသမားများအများစုတွင် ညဘက်အိပ်စက်အနားယူသည့်အချိန်တွင် အိပ်စက်ခြင်းကို အနှောင့်အယှက်ပြုလေ့ရှိသည့် အဓိက အကြောင်းခြင်းရာများမှာ အောက်ပါအတိုင်းဖြစ်ပါသည်။
ညဘက်အချိန်တွင် မကြာခဏ ဆီးသွားခြင်း
သွေးတွင်းသကြားဓာတ်များက ခန္ဓာကိုယ်အတွင်းရှိ တစ်ရှူးများမှ ရေများကို ဆွဲယူခြင်းကြောင့် တစ်ရှူးများအတွင်း ရေဓါတ်များနည်းပါးလာကာ ရေငတ်ခြင်းဝေဒနာခံစားရပြီး မကြာခဏ ရေထသောက်ရခြင်း၊ ဆီးမကြာခဏသွားရခြင်းများ ကြုံတွေ့ရလေ့ရှိပါသည်။
အိပ်ရေးမဝခြင်းနှင့် သွေးတွင်းသကြားဓာတ်မြင့်မားမှု အပြန်အလှန်ဆက်စပ်ပုံ
အိပ်ရေးမဝခြင်းသည် အစာစားခြင်းနှင့် ကိုယ်အလေးချိန်တို့ အပေါ်တွင် အကျိုးသက်ရောက်မှု ရှိနိုင်ပါသည်။
အများအားဖြင့် အိပ်ရေးမဝသော သူများသည် အစားအစာများကို ပိုမိုစားသုံးခြင်းဖြင့် ခန္ဓာကိုယ်ကို အားအင်ပြည့်ဝစေရန် ပြန်လည်လုပ်ဆောင်လေ့ရှိကြပါသည်။
ထိုသို့အစားအစာ ပိုမိုစားသုံးပါက သွေးတွင်းသကြားဓာတ်များ ပိုမိုမြင့်တက်လာကာ နှစ်ခြိုက်စွာ အိပ်စက်ခြင်းကို အနှောင့်အယှက် ထပ်မံပြုလုပ်ပါတော့သည်။ နှစ်ခြိုက်စွာ မအိပ်စက်နိုင်၍ အစားအစာများကို ထပ်မံ ပိုမိုစားသုံးပါက အိပ်ရေးပျက်ခြင်းနှင့် သွေးတွင်းသကြားဓာတ် မြင့်တက်ခြင်း ဆက်စပ်မှုသံသရာသည် ပျောက်ပျက်မသွားဘဲ ပို၍ပို၍ ထပ်မံလည်ပတ်လာမည်ဖြစ်ပါသည်။
ထို့အပြင် အိပ်ရေးမဝခြင်းသည် ခန္ဓာကိုယ်ကို ကိုယ်အလေးချိန်တက်လာစေရန်လည်း လုပ်ဆောင်ပေးနိုင်ပါသည်။ ထိုသို့ ကိုယ်အလေးချိန်တက်လာခြင်းသည် အမျိုးအစား ( ၂ ) ဆီးချိုရောဂါကို ပိုမို၍ ဖြစ်စေနိုင်ပါသည်။
ဆီးချိုသွေးချိုရှိသူများတွင် အိပ်စက်ခြင်း အရည်အသွေးကို တက်လာရန် လုပ်ဆောင်သင့်သည့် အချက်များ
အိပ်ရာမဝင်ခင် အီလက်ထရောနစ်ပစ္စည်းများ အသုံးပြုခြင်းကို ရှောင်ရှားပါ
ဆဲလ်ဖုန်း၊ tablet နှင့် ကွန်ပျူတာကဲ့သို့သော အီလက်ထရောနစ်ပစ္စည်းများသည် အိပ်စက်ခြင်းကို အနှောင့်အယှက် ပြုနိုင်သဖြင့် အိပ်ရာမဝင်ခင် အဆိုပါ ပစ္စည်းများ အသုံးပြုခြင်းကို ရှောင်ရှားသင့်ပါသည်။
အဆိုပါပစ္စည်းများကို အသုံးပြုမည့်အစား စာအုပ်တစ်အုပ်ကိုဖတ်လိုက်ခြင်းက မိမိ၏ စိတ်ကိုတည်ငြိမ်စေသည့်အပြင် မျက်လုံးအားစိုက်ရသည့် ပမာဏလည်း နည်းပါးမည်ဖြစ်ပါသည်။
အိပ်ခါနီးအချိန်တွင် Alcohol ပါသော အဖျော်ယမကာများကို ရှောင်ရှားပါ။
Alcohol ပါသော အဖျော်ယမကာများသည် ခန္ဓာကိုယ်ကို မူးဝေစေ၍ ပိုမိုအိပ်စက်နိုင်အောင် ပြုလုပ်ပေးနိုင်သည်ဟု ထင်ရသော်လည်း တစ်ညလုံး နှစ်ခြိုက်စွာ အိပ်ပျော်စေရန်ကိုမူ အနှောင့်အယှက်ပြုနိုင်ပါသည်။ ထို့ကြောင့် အိပ်ခါနီးအချိန်တွင် Alcohol ပါသော အဖျော်ယမကာများကို ရှောင်ရှားသင့်ပါသည်။
အိပ်ချိန်ထချိန်မှန်ကန်အောင် ကြိုးစားပါ
ညတိုင်း အိပ်ရာဝင်ချိန် မှန်ကန်ခြင်းနှင့် မနက်တိုင်း နိုးထချိန်မှန်ကန်ခြင်းသည်လည်း အိပ်စက်သည့် အရည်အသွေးများကို တက်လာစေရန် ကူညီပေးပါသည်။
ညဘက်တွင် ခန္ဓာကိုယ်ကို တက်ကြွလန်းဆန်းစေမည့်အရာများပြုလုပ်ခြင်းကို ရှောင်ရှားပါ။
ညအိပ်ခါနီးတွင် ကဖင်းဓါတ်ပါသော အဖျော်ယမကာများ သောက်သုံးခြင်း၊ လေ့ကျင့်ခန်းများပြုလုပ်ခြင်းနှင့် အခြားခန္ဓာကိုယ်ကို တက်ကြွလန်းဆန်းစေမည့် အလုပ်များလုပ်ခြင်းကို ရှောင်ရှားသင့်ပါသည်။ ပြင်းထန်သောလေ့ကျင့်ခန်းများ ပြုလုပ်ခြင်းသည် ခန္ဓာကိုယ်၏ သွေးလှည့်ပတ်မှုများကို မြန်ဆန်လာစေခြင်းကြောင့် တည်ငြိမ်မှုပြန်လည်ရရှိ၍ အိပ်ပျော်စေရန် အချိန်တစ်ခုပြန်လည်စောင့်ဆိုင်းရမည် ဖြစ်ပါသည်။
ညအိပ်ခါနီးအချိန်တွင် ပြုလုပ်သင့်သော တစ်ခုတည်းသော ကိုယ်လက်လှုပ်ရှားမှုမှာ ယောဂ လေ့ကျင့်ခန်းပြုလုပ်ခြင်းသာ ဖြစ်ပါသည်။
Author : Dr. မိုး (ဆေး ၁)
