စိတ်ပိုင်းဆိုင်ရာကျန်းမာရေးနှင့် Omega-3 Fatty Acids

ယနေ့ခေတ်တွင် လေ့လာစမ်းသပ်မှုများ ပိုမိုလုပ်ဆောင်လာသည်နှင့်အမျှ Omega-3 Fatty Acids များ၏ကောင်းကျိုးများကို ပိုမိုသိရှိလာကြပါသည်။

ခန္ဓာကိုယ်နှင့် ကျန်းမာရေးအပေါ် သက်ရောက်သည့် Omega-3 Fatty Acids များ၏ ကောင်းကျိုးများစွာအနက် စိတ်ပိုင်းဆိုင်ရာကျန်းမာရေးသည်လည်း တစ်ခုအပါအဝင်ပင်ဖြစ်ပါသည်။

စိတ်ပိုင်းဆိုင်ရာရောဂါများ

လေ့လာတွေ့ရှိချက်များအရ စိတ်ကျရောဂါခံစားနေရသူများ၏ သွေးအတွင်းတွင် Omega-3 Fatty Acids ပမာဏများ လျော့နည်းနေကြောင်း တွေ့ရှိရပြီး Omega-3 Fatty Acids များဖြစ်သော DHA နှင့် EPA လုံလောက်စွာရရှိနေမှုသည် စိတ်ကျဝေဒနာဖြစ်ပွားမှုကို များစွာလျှော့ချပေးနိုင်ကြောင်း တွေ့ရှိရပါသည်။

DHA နှင့် EPA တို့သည် စိတ်၏အခြေအနေကို မျှတအောင်ထိန်းသိမ်းကူညီပေးနိုင်သည့် အာရုံကြော သတင်းပေးပို့သည့်ပစ္စည်းတစ်ခုဖြစ်သော Serotonin ကို အကူအညီပေးနိုင်ကြောင်းလည်း တွေ့ရှိရပါသည်။

ထို့အပြင် Omega-3 အဆီများ၏ ရောင်ရမ်းမှုကိုသက်သာစေသည့် ဂုဏ်သတ္တိများကလည်း စိတ်ကျဝေဒနာများကို လျော့ပါးသက်သာစေကြောင်း တွေ့ရှိ့ရပါသည်။

ထို့ပြင် သုတေသနများအရ Omega-3 အဆီ ဖြည့်စွက်အာဟာရများသည် Schizophrenia၊  Bipolar Disorder ကဲ့သို့သော စိတ်ပိုင်းဆိုင်ရာရောဂါများတွင် စိတ်ခံစားမှုအပြောင်းအလဲများ ဖြစ်သည့်အကြိမ်အရေအတွက်ကို လျော့နည်းစေခြင်း၊ စိတ်ပိုင်းဆိုင်ရာနှင့်ပတ်သက်သည့် ကြမ်းတမ်းသည့်အပြုအမူများကို နည်းပါးစေခြင်း၊ ထိုရောဂါများနောက်ထပ်တစ်ဖန် ထပ်မံဖြစ်ပွားသည့် အခွင့်အလမ်းကိုနည်းပါးစေခြင်း စသည့်အကျိုးကျေးဇူးများပေးနိုင်ကြောင်း တွေ့ရှိရပါသည်။

အသက်အရွယ်ကြီးရင့်မှုကြောင့်ဖြစ်ပေါ်လာသော ဦးနှောက်နှင့် စိတ်ပိုင်းဆိုင်ရာပြဿနာများ

ဦးနှောက်နှင့် စိတ်ပိုင်းဆိုင်ရာလုပ်ငန်းဆောင်တာများ၏ အရည်အသွေးကျဆင်းခြင်းသည် အသက်အရွယ်ကြီးရင့်လာသည့်အခါ မရှောင်ရှားနိုင်သည့် ပြဿနာတစ်ရပ်ဖြစ်ပါသည်။

လေ့လာတွေ့ရှိချက်များအရ  Omega-3 အဆီများကို လုံလောက်အောင် စားသုံးခြင်းအားဖြင့် အသက်အရွယ်ကြီးရင့်မှုကြောင့် ဖြစ်ပေါ်လာသည့် ဦးနှောက်နှင့်စိတ်ပိုင်းဆိုင်ရာ လုပ်ငန်းဆောင်တာများ အရည်အသွေးကျဆင်းခြင်းနှင့် အယ်လ်ဇိုင်းမားရောဂါဖြစ်ခြင်းများကို နည်းပါးစေကြောင်း တွေ့ရှိရပါသည်။

ထို့အပြင် အချို့သောလေ့လာမှုများတွင် Omega-3 အဆီများသည် အသက်အရွယ်ကြီးရင့်သော အဖိုးအဖွားများတွင် မှတ်ဉာဏ်ဆိုင်ရာအရည်အသွေးများကိုလည်း တိုးတက်စေကြောင်းတွေ့ရှိရပါသည်။

အိပ်စက်ခြင်းနှင့် စိတ်ပိုင်းဆိုင်ရာအရည်အသွေး

အိပ်စက်ခြင်းသည် ကျန်းမာရေးအတွက် အခြေခံလိုအပ်ချက်များထဲက အရေးပါဆုံးတစ်ခု ဖြစ်ပါသည်။ ထို့အပြင် စိတ်ပိုင်းဆိုင်ရာ၊ ဦးနှောက်ပိုင်းဆိုင်ရာ အရည်အသွေးများနှင့်လည်း များစွာဆက်စပ်မှုရှိနေကြောင်း တွေ့ရှိရပါသည်။

ကောင်းမွန်ပြည့်ဝသော အိပ်စက်ခြင်းကို မရရှိခြင်းသည် စိတ်ကျရောဂါကဲ့သို့သော စိတ်ပိုင်းဆိုင်ရာ ပြဿနာအများအပြားကိုဖြစ်စေသလို အဝလွန်ခြင်း၊ ဆီးချိုရောဂါစသည့် ရောဂါများစွာကိုလည်း ဖြစ်စေနိုင်ကြောင်း တွေ့ရှိရပါသည်။

Omega-3 Fatty Acids နည်းပါးခြင်းသည် အိပ်စက်ခြင်း၏အရည်အသွေးကို ကျဆင်းစေသည့်အပြင် ကလေးများတွင် အိပ်စက်ခြင်းဆိုင်ရာပြဿနာများနှင့် လူကြီးများတွင် အိပ်နေစဉ် အသက်ရှူခေတ္တခဏရပ်သွားသည့်ရောဂါများကိုလည်း ပိုမိုဖြစ်ပွားစေကြောင်း တွေ့ရှိရပါသည်။

ထို့အပြင် နှစ်ခြိုက်စွာအိပ်စက်နိုင်စေရန် ကူညီပေးသည့် Melatonin ဟော်မုန်း၏ ပမာဏသည်လည်း DHA ပမာဏနည်းပါးလာသည့်အခါ လျော့နည်းလာတတ်ကြောင်းတွေ့ရှိရပါသည်။

ထို့ကြောင့် စိတ်ပိုင်းဆိုင်ရာ၊ ဦးနှောက်၏လုပ်ငန်းပိုင်းဆိုင်ရာ၊ အိပ်စက်ခြင်းဆိုင်ရာ အရည်အသွေးများတိုးတက်စေရန်အတွက် Omega-3 Fatty Acids များကို လုံလောက်အောင် ဖြည့်စွက်စားသောက်ရန် လိုအပ်ကြောင်း တင်ပြလိုက်ပါသည်။

Author: Dr. မွန်