ဒီလက္ခဏာတွေဖြစ်နေရင် သင်သံဓာတ်ချို့တဲ့နေလို့ဖြစ်ပါတယ်။ ဘယ်လိုလက္ခဏာတွေဖြစ်မလဲ ကြည့်ရအောင်။
၁။ ပုံမှန်မဟုတ်ဘဲ ပင်ပန်းနွမ်းနယ်နေခြင်း
လွန်အမင်း ပင်ပန်းနွမ်းနယ်နေတယ်လို့ခံစားနေရခြင်းဟာ သံဓာတ်ချို့တဲ့ခြင်းအခြေအနေမှာ အများဆုံးတွေးရတဲ့ လက္ခဏာပဲဖြစ်တယ်။ ဒါဟာဘာကြောင့်လဲဆိုတော့ သွေးထဲမှာ အောက်စီဂျင်ကို သယ်ဆောင်ပေးတဲ့ ဟေမိုဂလိုဘင်ဆိုတဲ့ သွေးနီဥ ပရိုတင်းလေးတွေ သံဓာတ်မလုံလောက်မှုကြောင့် ပမာဏပြည့်မီအောင်မရှိလို့ဖြစ်တယ်။
ကြွက်သားများ၊ တစ်သျှူးများဆီသို့ အောက်စီဂျင်လုံလုံလောက်လောက်မရောက်တဲ့အခါ စွမ်းအင် ယုတ်လျော့လာပါတယ်။ ဒါ့ပြင် အောက်စီဂျင်ပိုမိုရရှိရန် နှလုံးမှ အလုပ်ပိုလုပ်ပြီး သွေးလည်ပတ်မှုကို တင်ပေးရပါတယ်။ နှလုံးအလုပ်ပိုလုပ်ရတဲ့အခါ ပင်ပန်းနွမ်းနယ်ခြင်းကိုဖြစ်စေပါတယ်။
၂။ ဖြူဖျော့နေခြင်း
အသားအရေဖြူဖျော့နေခြင်းနဲ့ အောက်မျက်ခမ်းအတွင်းဘက်ဖြူဖျော့နေခြင်းဟာ သွေးအာနည်းခြင်းရဲ့လက္ခဏာဖြစ်ပါတယ်။ ဒါဟာ ဘာကြောင့်လဲဆိုတော့ သွေးနီဥထဲမှာရှိတဲ့ ဟေမိုဂလိုဘင် ပရိုတင်းများဟာ သွေးရဲ့အရောင်ဖြစ်တဲ့ အနီရောင်ကိုဖြစ်စေတဲ့အတွက်ပဲဖြစ်တယ်။
ဖြူဖျော့နေခြင်း လက္ခဏာကို အလယ်အလတ်သွေးအားနည်းခြင်းနဲ့ ဆိုးဆိုးရွားရွား သွေးအားတည်းခြင်း အခြေအနေတွေမှာ တွေ့နိုင်ပါတယ်။ အများအားဖြင့် မျက်နှာ၊ အောက်မျက်ခန်းအတွင်းဘက်၊ သွားဖုံး၊ ခြေသည်းလက်သည်း၊ လက်ဖဝါးများ မှာတွေ့နိုင်ပါတယ်။
၃။ အသက်ရှူမဝခြင်း/မောနေခြင်း
-ဟေမိုဂလိုဘင် သွေးနီဥ ပရိုတင်းလေးများဟာ အောက်စီဂျင်ကိုသယ်ဆောက်ပေးပြီး ကြွက်သားတွေနဲ့ တစ်သျှူးတွေဆီသို့ ပို့ဆောင်ပေးပါတယ်။
-သွေးအားနည်းတဲ့အခါ ထိုအောက်စီဂျင်သယ်သော ဟေမင်ဂလိုဘင်လေးများ လျော့နည်းနေသည့်အတွက် အသက်ရှူမဝခြင်း/မောနေခြင်းတို့ခံစားရပါတယ်။
၄။ ခေါင်းကိုက်ခြင်း
မကြာခဏခေါင်းကိုက်ခြင်းဟာလည်း သံဓာတ်ချို့တဲ့ခြင်းနဲ့ ဆက်စပ်မှုရှိတယ်လို့စစ်တမ်းတွေက ဆိုပါတယ်။ အထူးသဖြင့် အမျိုးသမီးများမှာ ပိုတွေ့ရပါတယ်။
၅။ ရင်တုန်ခြင်း
သံဓာတ်ချို့တဲ့တဲ့အခါ သွေးအားနည်းတဲ့အတွက် နှလုံးက အလုပ်ပိုလုပ်ရပါတယ်။ အဲဒီအခါ နှလုံးစည်းချက်/ခုန်ချက်မမှန်ခြင်း အခြေအနေကို ဖြစ်စေပါတယ်။ အဲဒီအတွက် ရင်တုန်ခြင်းလက္ခဏာကို ခံစားရပါတယ်။
ဆိုးရွားစွာ သံဓာတ်ချို့တဲ့ သွေးအားနည်းလာလျှင် နှလုံးအရွယ်အစားကြီးလာခြင်း၊နှလုံးခုန်သံပုံမှန်မဟုတ်တော့ခြင်းနဲ့ နှလုံးညှစ်အားကျခြင်းတို့ ဖြစ်လာပါလိမ့်မယ်။
၇။ ဆံပင်နဲ့ အသားအရေ ခြောက်သွေ့ပျက်စီးခြင်း
အရေပြားနဲ့ ဆံပင်များဆီသို့ အောက်စီဂျင်လုံလောက်စွာမရောက်ရှိခြင်းဟာ ဆံသားကျန်းမာရေးနဲ့ အသားအရေကျန်းမာရေးကိုထိခိုက်စေပါတယ်။ အသားအရေခြောက်သွေ့ခြင်း၊ ဆံသားခြောက်ခြင်းသာမက ဆံပင်ကျွတ်ခြင်းလက္ခဏာတွေပါ ခံစားရပါလိမ့်မယ်။
၇။ လျှာနဲ့ ပါးစပ် ရောင်ရမ်းနာကျင်ခြင်း
တစ်ခါတလေ ပါးစပ်ဖွင့်၍ကြည့်ခြင်းဟာ သံဓာတ်ချို့တဲ့ခြင်းရှိမရှိကို ညွှန်ပြနိုင်ပါတယ်။ နာကျဥ်ရောင်ရမ်းနေတဲ့ပုံမှန်ထက်ပို၍ချောပြောင်နေသတဲ့လျှာ၊ ခံတွင်းခြောက်ခြင်း၊ ပါးစောင်ကွဲခြင်း၊ ပါးစပ်မှာ အနာပေါက်ခြင်းတို့ဟာ သံဓာတ်ချို့တဲ့ခြင်းရဲ့ လက္ခဏာတွေ ဖြစ်ပါတယ်။
၈။ ခြေထောက်ရုတ်တရက်ထထလှုပ်ခြင်း
Restless Legs Syndrome လို့ခေါ်ပါတယ်။ ညဘက်တွေမှာပိုဖြစ်လေ့ရှိပြီး အိပ်စက်ခြင်းကိုအနှောင့်အယှက်ပေးပါတယ်။ သံဓာတ်ချို့တဲ့ သွေးအားနည်းများရဲ့ ၂၅ %မှာ ခြေထောက်ရုတ်တရတ်ထထလှုပ်ခြင်းလက္ခဏာကို တွေ့ရတယ်လို့ဆိုပါတယ်။
၉။ လက်သည်းများခွက်ခြင်းနဲ့ ကျိုးပဲ့လွယ်ခြင်း
-၅% ေသာသံဓါတ်ချို့တဲ့ သွေးအားနည်းသူတွေမှာတွေ့ရပါတယ်။ နောက်ဆုံးအဆင့် သံဓာတ်ချို့တဲ့ သွေးအားနည်းခြင်းအခြေအနေတစ်ခုရဲ့ လက္ခဏာဖြစ်ပါတယ်။ ဒီအခြေအနေကို Koilonychia လို့လည်းခေါ်ကြပါတယ်။
၁၀။ အခြားလက္ခဏာများ
ထူးဆန်းသောတောင့်တမှုများ(Pica)
ထူးဆန်းသောအစာတွေနဲ့ စားရတဲ့အရာမဟုတ်တာတွေကို စားချင်နေတဲ့အာသီသဖြစ်ခြင်း အခြေအနေတစ်ခုဖြစ်ပါတယ်။ (ဥပမာ-ရေခဲ၊ရွှံစေး၊မြေဖြူ၊စာရွက်များ) ကိုယ်ဝန်ဆောင်မိခင်တွေမှာလည်း အဲဒီအခြေအနေကို တွေ့ရတတ်ပါတယ်။
စိတ်ဓာတ်ကျခြင်း
ကိုယ်ဝန်ဆောင်မိခင်တွေသံဓာတ်ချို့တဲ့သွေးအားနည်းလျှင် စိတ်ဓာတ်ကျခြင်းဖြစ်နိုင်ခြေပိုများတယ်လို့ဆိုပါတယ်။
ခြေလက်အေးခြင်း
ဒါဟာ သွေးထဲတွင် ဟေမိုဂလိုဘင်လို့ခေါ်တဲ့ အောက်စီဂျင်သယ်ပေးတဲ့ သွေးနီဥ ပရိုတင်းလေးတွေ မလုံလောက်တဲ့အတွက် ခြေလက်ဆီသို့အောက်စီဂျင်လုံလုံလောက်လောက်မရောက်ရှိတဲ့အတွက်ပဲဖြစ်ပါတယ်။
ကူးစက်ရောဂါဖြစ်လွယ်ခြင်း
ကိုယ်ခံအားစနစ်ကောင်းမွန်စေရန် သံဓာတ်လိုအပ်ပါတယ်။
ဒါကြောင့် သံဓါတ်ချို့တဲ့သွေးအားနည်းတဲ့အခါ ကိုယ်ခံအားကျစေတဲ့အတွက် ကူးစက်ရောဂါများကူးလွယ်ပြီး မကျန်းမမာဖြစ်ခြင်း နေထိုင်မကောင်းခြင်းနဲ့ မကြာခဏဖျားခြင်းတို့ ဖြစ်စေနိုင်ပါတယ်။
Author: ဒေါက်တာယဉ်ယဉ်ဝင်း
