ဒူးနာ၊ ခါးနာတယ်ဆိုတာ အသက်ကြီးတဲ့သူတွေမှာ ပိုအဖြစ်များပေမယ့် အသက်ငယ်တဲ့သူတွေမှာလည်း ခံစားရနိုင်တဲ့ ဝေဒနာတစ်ခုပါ။ ပစ္စည်းတွေကို ကြာရှည်သုံးတဲ့အခါ ပျက်စီးယိုယွင်းလာတတ်သလိုပဲ အမြဲတမ်းအသုံးပြုနေရတဲ့ ကျောရိုးဆစ်နဲ့ ဒူးဆစ်က ကူရှင်သဘောမျိုး လုပ်ဆောင်ပေးနေတဲ့ အရိုးနုလေးတွေဟာလည်း ပွန်းပဲ့ပျက်စီးလာတဲ့အတွက် ဒူးနာ၊ ခါးနာဝေဒနာတွေ ခံစားကြရတာ ဖြစ်ပါတယ်။
ခါးနာ၊ ဒူးနာတာဟာ ကျောရိုးနဲ့ ဒူးဆစ်ရိုးတွေကို ဒဏ်ဖြစ်စေတဲ့ နေထိုင်မှုပုံစံအလွဲတွေကြောင့်လည်း ဖြစ်နိုင်ပါတယ်။ ဒါကြောင့် ဘယ်လိုနေထိုင်မှုပုံစံအလွဲတွေက ဒူးနာ၊ ခါးနာခြင်းကို ဖြစ်စေသလဲဆိုတာကို ကြည့်လိုက်ကြရအောင်နော်။
1. ဒေါက်ဖိနပ်တွေ စီးလေ့ရှိတာ
ဒေါက်ဖိနပ်တွေက ကြွကြွရွရွနဲ့ လှပစေတာ သေချာသလို ခြေဖနောင့်နာကျင်ပြီး ဒူးနာ၊ ခါးနာစေမှာလည်း သေချာပါတယ်။ ဒေါက်ဖိနပ်ရဲ့ သဘောသဘာဝကိုက ခန္ဓာကိုယ်မျှခြေကို ထိန်းထားနိုင်ခြင်း မရှိတဲ့အတွက် ဒေါက်ဖိနပ်စီးထားပြီး ခြေဖျားထောက်ထားရတဲ့ ပုံစံနဲ့ နေရတာ အချိန်ကြာလာတာနဲ့အမျှ ကျောရိုးနဲ့ ဒူးဆစ်ရိုးတွေအပေါ် ဖိအားပိုမိုကျရောက်လာမှာပါ။ အဲဒီအခါ နောက်ဆက်တွဲ ဒူးနာ၊ ခါးနာခြင်းပါ ဖြစ်လာပါလိမ့်မယ်။
2. လှုပ်ရှားမှု မရှိတာ
အထိုင်များတဲ့သူတွေ၊ အလုပ်များတဲ့သူတွေမှာ ဖြစ်တဲ့ ပြဿနာကတော့ လှုပ်ရှားမှု မရှိတာပါပဲ။ လှုပ်ရှားမှုမရှိဘဲ ထိုင်တာဖြစ်ဖြစ်၊ ရပ်တာဖြစ်ဖြစ်၊ လဲလျောင်းတာဖြစ်ဖြစ် ခန္ဓာကိုယ်အနေအထားတစ်ခုမှာ ကြာရှည်နေတဲ့အခါ ကြွက်သားတွေ၊ အရိုးနုတွေနဲ့ အဆစ်တွေမှာ တင်းအားတွေ ဖြစ်ပေါ်လာသလို သွေးစီးဆင်းမှုလည်း နည်းသွားတဲ့အတွက် အရိုးအဆစ်တွေရဲ့ သန်မာမှုကို ထိခိုက်နိုင်ပါတယ်။ ဒါကြောင့် ဘယ်လောက်ပဲ အလုပ်ရှုပ်ရှုပ် သတိထားပြီး ၁၀-၁၅ မိနစ်တစ်ခါ ကိုယ်အနေအထားကို ပြောင်းဖို့ မမေ့ပါနဲ့။
3. နာကျင်နေတာကို ပေါ့ပေါ့တန်တန် သဘောထားတာ
ဒူးနာ၊ ခါးနာနေတာ၊ တင်းတောင့်နေတာ၊ ရောင်နေတာက ရက်သတ္တပတ်ထက် ကျော်လွန်တဲ့ထိ မသက်သာရင် နားလည်တတ်ကျွမ်းတဲ့ ဆရာဝန်နဲ့ ပြသတိုင်ပင်ဖို့ လိုအပ်နေပါပြီ။ ကောင်းသွားမယ်ထင်ပြီး နာကျင်နေတာကို ပေါ့ပေါ့တန်တန်သဘောထားရင် အပ်နဲ့ထွင်းရမှာကို ပုဆိန်နဲ့ ပေါက်ရတဲ့အဖြစ်မျိုး ရောက်သွားပါလိမ့်မယ်။
4. ကြွက်သားသန်မာတဲ့ လေ့ကျင့်ခန်းတွေ မလုပ်တာ
လေ့ကျင့်ခန်းတွေထဲမှာ အကြောလျော့လေ့ကျင့်ခန်းနဲ့ တွန်းကန်ရတဲ့ လေ့ကျင့်ခန်းတွေက အရိုးအဆစ်တွေနဲ့ အနီးတဝိုက်က ကြွက်သားတွေကို သန်မာစေပါတယ်။ ယောဂလေ့ကျင့်ခန်းတွေ၊ အလေးမလေ့ကျင့်ခန်းတွေနဲ့ နံရံကိုတွန်းကန်ရတဲ့ လေ့ကျင့်ခန်းတွေက ကျောရိုးနဲ့ ခန္ဓာကိုယ်အောက်ပိုင်းက ကြွက်သားတွေကို သန်မာစေတဲ့ လေ့ကျင့်ခန်းတွေမို့ တစ်ပတ်မှာ မိနစ် ၁၅၀ ခန့် လေ့ကျင့်ခန်းလုပ်ဖို့ ဂရုပြုသင့်ပါတယ်။
5. လေ့ကျင့်ခန်း အပြင်းအထန် လုပ်တာ
လေ့ကျင့်ခန်းဆိုတာ မလုပ်ရင် မကျန်းမာသလို အပြင်းအထန်လုပ်ရင်လည်း အရိုးအဆစ်တွေကို ဒဏ်ဖြစ်စေနိုင်ပါသေးတယ်။ လေ့ကျင့်ခန်းလုပ်ပြီးလို့ နာရီအနည်းငယ် ကြာတဲ့အထိ ခန္ဓာကိုယ်နဲ့ အရိုးအဆစ်တွေက နာကျင်ကိုက်ခဲနေပြီဆိုရင် လေ့ကျင့်ခန်းလုပ်တာက ပြင်းထန်နေပြီလို့ ပြောလို့ရပါတယ်။ ဒါကြောင့် ဖြည်းဖြည်းမှန်မှန်နဲ့ ခန္ဓာကိုယ်ကို မထိခိုက်ရအောင် သတိထား စတင်သင့်ပါတယ်။
6. အိပ်ရေးဝအောင် မအိပ်တာ
အိပ်ရေးပျက်တဲ့အခါ ခန္ဓာကိုယ်မှာ ရောင်ရမ်းမှုတွေကို ဖြစ်စေတဲ့ ဓာတ်ပစ္စည်းတွေ သွေးထဲမှာ များပြားလာစေပါတယ်။ ဒါ့အပြင် အိပ်ရေးဝအောင် မအိပ်ရင် ကျောရိုးအာရုံကြောမနဲ့ ဦးနှောက်က နာကျင်ခြင်းကို ထိန်းချုပ်ပေးတဲ့ ဆဲလ်တွေက မူမမှန်ဖြစ်လာပြီး ရောင်ရမ်းနာကျင်မှုတွေကို ပိုခံစားရနိုင်ပါတယ်။
7. ဆေးလိပ်သောက်တာ
ဆေးလိပ်နဲ့ ဆေးရွက်ကြီးမှာပါတဲ့ နီကိုတင်းဓာတ်က အရိုးအဆစ်တွေ အထူးသဖြင့် ကျောရိုးဆီကို စီးဆင်းတဲ့ သွေးကြောငယ်လေးတွေကို ကျဥ်းစေ၊ ပိတ်ဆို့စေပါတယ်။ ဆေးလိပ်နဲ့ ဆေးရွက်ကြီး သုံးစွဲသူတွေဟာ အသက် ၃၀ ဝန်းကျင်ခန့်တည်းက ဒူးနာ၊ ခါးနာ၊ အဆစ်အမြစ်တွေနာကျင်တဲ့ ဝေဒနာကို ခံစားရနိုင်ပါတယ်။
8. ကယ်လ်ဆီယမ်နဲ့ ဗိုက်တာမင်ဒီ လုံလောက်အောင် မမှီဝဲတာ
အရိုးအဆစ်တွေ သန်မာဖို့ အရေးအကြီးဆုံးဓာတ်တွေက ကယ်လ်ဆီယမ်နဲ့ ဗိုက်တာမင်ဒီပါ။ နို့နဲ့နို့ထွက်ပစ္စည်းတွေ၊ ပဲနို့၊ ပဲပိစပ်ပဲ၊ ဗာဒံစေ့၊ အစိမ်းရောင်ဟင်းသီးဟင်းရွက် စတာတွေမှာ ကယ်လ်ဆီယမ်ကြွယ်ဝပြီး ဆယ်လ်မွန်ငါးလို အဆီများတဲ့ ငါးတွေ၊ အုတ်ဂျူံနဲ့ အစေ့အဆန်တွေမှာ ဗိုက်တာမင်ဒီ ကြွယ်ဝပါတယ်။ နေရောင်ခြည်ခံတာကလည်း ဗိုက်တာမင်ဒီ ရစေတာမို့ မနက်ခင်း ၁၀ နာရီမတိုင်ခင် နေရောင်ခြည်နွေးနွေးလေးကို ခံယူသင့်ပါတယ်။ ကယ်လ်ဆီယမ်နဲ့ ဗိုက်တာမင်ဒီ မလုံလောက်ခဲ့ရင် ဖြည်စွက်စာအားဆေးတွေကိုလည်း မှီဝဲလို့ ရပါတယ်။
9. ကိုယ်အလေးချိန် တက်လာတာ
ဝခြင်းရဲ့ ဆိုးကျိုးတွေထဲမှာ ဒူးနာ၊ ခါးနာတာကလည်း တစ်ခုအပါအဝင်ပါ။ ကိုယ်အလေးချိန်တက်လာတာနဲ့အမျှ ကိုယ်အလေးချိန်ကို သယ်ယူထားရတဲ့ ကျောရိုးနဲ့ ဒူးဆစ်ရိုးတွေက ဒဏ်ဖြစ်လာပါလိမ့်မယ်။ ဒါကြောင့် ဖက်ထားလို့ရတာကလွဲပြီး ဘာမှကောင်းကျိုးမပေးတဲ့ ဝတာကို ကျေနပ်မနေဘဲ ကိုယ်အလေးချိန်လျှော့ဖို့ စဥ်းစားသင့်ပါတယ်။
10. ကျောပိုးအိတ်နဲ့ ပိုက်ဆံအိတ် အလေးကြီးတွေ သယ်လေ့ရှိတာ
ခေတ်ရဲ့ဆိုးကျိုးတွေထဲမှာ ကျောပိုးအိတ်အလေးကြီးတွေ နေ့စဥ် သယ်ရတဲ့ကလေးတွေလည်း ပါဝင်ပါတယ်။ နုနယ်လှတဲ့ ကျောရိုးဆစ်လေးတွေဟာ စာအုပ်များစွာ ပါဝင်တဲ့ ကျောပိုးအိတ်အလေးကြီးတွေကြောင့် ထိခိုက်လာပြီး ကလေးတွေမှာ ကျောရိုးမူမမှန်တာ၊ ခါးနာတာတွေ ဖြစ်လာရပါတယ်။ တိုလီမုတ်စ ပစ္စည်းပေါင်းသောင်းခြောက်ထောင်ပါဝင်တဲ့ ဘေးလွယ်အိတ်တွေ လွယ်တတ်တဲ့ အမျိုးသမီးတွေမှာလည်း ခါးနာခြင်းဝေဒနာ ခံစားရတတ်ပါတယ်။
နာကျင်ခြင်းဝေဒနာကို ခံစားချင်တဲ့သူရယ်လို့တော့ ဘယ်သူမှ မရှိပါဘူး။ ဒါပေမယ့် အခုဖော်ပြခဲ့တဲ့ နေထိုင်မှုပုံစံအလွဲတွေကို ဆက်လက်ကျင့်သုံးနေမယ်ဆိုရင်တော့ ဒူးနာ၊ ခါးနာခြင်း ဝေဒနာနဲ့ အတူယှဥ်တွဲ နေထိုင်ရတဲ့ဘဝကို ရောက်သွားနိုင်ပါတယ်။ ဒါကြောင့် သတိထားဆင်ခြင် ပြုပြင်ခြင်းဖြင့် ကြံ့ခိုင်သန်မာတဲ့ အရိုးအဆစ်တွေကို ပိုင်ဆိုင်လိုက်ကြရအောင်။
Author: Dr.Yee Mon
