အမျိုးသမီးတွေ အထူးသဖြင့် အသက် ၅၀ ကျော် အမျိုးသမီးတွေဟာ မကြာခဏ ဆီးကျင်တတ်ကြပါတယ်။ မကြာခဏ ဆီးကျင်နေတတ်ပေမယ့် ဘာကြောင့် ဆီးကျင်နေတာလဲ ဆိုတာကိုတော့ သေချာမသိကြဘူး ထင်တယ်နော်။ ဒါဆို ဆက်ဖတ်လိုက်ကြရအောင်ပါ။
ဆီးကျင်တာဟာ ဆီးလမ်းကြောင်းပိုးဝင်တာကြောင့် ဖြစ်ပါတယ်။ အမျိုးသမီးတွေမှာ ဆီးကျင်စေတဲ့ အကြောင်းရင်း အမျိုးမျိုး ရှိပါတယ်။
သွေးဆုံးချိန်
အသက် ၅၀ ဝန်းကျင် အမျိုးသမီးတွေရဲ့ သွေးဆုံးချိန်ကာလမှာ စတင်ခံစားရတတ်တဲ့ ဝေဒနာတွေထဲမှာ မကြာခဏဆီးကျင်ခြင်းလည်း ပါဝင်ပါတယ်။သွေးဆုံးချိန်မှာ ဓမ္မတာသွေးစီးဆင်းမှု ရပ်တန့်သွားတာ၊ ကိုယ်ဝန်ဆောင်နိုင်ခြင်း မရှိတော့တာတွေဟာ အီစထရိုဂျင်နဲ့ ပရိုဂျက်စတီရုန်း ဟော်မုန်းတွေ ထုတ်လုပ်မှု လျော့နည်းသွားတာကြောင့်ပါ။
အီစထရိုဂျင်ဟော်မုန်းတွေ လျော့နည်းသွားတာကြောင့် မိန်းမကိုယ်နဲ့ ဆီးလမ်းကြောင်းအတွင်းက တစ်ရှူးတွေဟာ ပါးလွှာခြောက်သွေ့လာပြီး ရောဂါပိုးဝင်ရောက်နိုင်ခြေ ပိုများလာတဲ့အတွက် ဆီးလမ်းကြောင်းပိုးဝင်ခြင်း မကြာခဏ ဖြစ်လေ့ရှိပါတယ်။
ဆီးကျန်ခြင်း
အသက်ကြီးလာတဲ့အခါ ဆီးအိမ်က ကြွက်သားတွေရဲ့ ကျုံ့နိုင်ဆန့်နိုင်အားက လျော့နည်းလာတဲ့အတွက် ဆီးသွားတဲ့အခါ ဆီးကျန်နိုင်ပါတယ်။ ဆီးအိမ်ထဲမှာ ဆီးတွေကျန်နေတာက ဆီးလမ်းကြောင်းပိုးဝင်ခြင်း ဖြစ်စေတဲ့ အကြောင်းတစ်ခုပါပဲ။
အမျိုးသမီးတွေရဲ့ ခန္ဓာကိုယ်ဖွဲ့စည်းပုံ
အမျိုးသမီးတွေရဲ့ ဆီးလမ်းကြောင်းဟာ အမျိုးသားတွေထက် ပိုတိုတဲ့အတွက် ဆီးအိမ်ထဲထိ ပိုးဝင်နိုင်ခြေ ပိုများပါတယ်။ ဒါ့အပြင် ဆီးလမ်းကြောင်းနဲ့ မိန်းမကိုယ်က ကပ်လျက်ဖြစ်နေတဲ့အတွက် လိင်ဆက်ဆံရာကတဆင့် ဆီးလမ်းကြောင်း ပိုးဝင်နိုင်ခြေလည်း များပါတယ်။
သားဆက်ခြားခြင်း
သားဆက်ခြားတဲ့ နည်းလမ်းတွေထဲက သုတ်ပိုးသေစေတဲ့ဆေး (spermicides) သုံးတာ၊ သားအိမ်ခေါင်းအစွပ် (diaphragm) သုံးတာတွေကြောင့်လည်း ဆီးလမ်းကြောင်းပိုးဝင်ခြင်း ဖြစ်စေနိုင်ပါတယ်။
မိန်းမကိုယ်ကို ဆေးကြောခြင်း
မိန်းမကိုယ်တဝိုက်ကို နေ့စဥ်သန့်ရှင်းရေး လုပ်ဖို့ လိုအပ်ပေမယ့် မိန်းမကိုယ်ဟာ အလိုအလျောက် သန့်ရှင်းရေးလုပ်တဲ့အင်္ဂါဖြစ်တာကြောင့် ရေနဲ့သန့်ရှင်းရေး လုပ်ရုံနဲ့ လုံလောက်ပါတယ်။ ဆပ်ပြာအပါအဝင် တခြားအနံ့ပါတဲ့ ဓာတုပစ္စည်းတွေ ထည့်သွင်းဖော်စပ်ထားတဲ့ သန့်ရှင်းရေးပစ္စည်းတွေ သုံးတဲ့အခါ မိန်းမကိုယ်ရဲ့ pH level ပျက်စီးသွားပြီး မိန်းမကိုယ်တွင်းရော ကပ်လျက်ရှိတဲ့ ဆီးလမ်းကြောင်းထဲကိုပါ ရောဂါပိုးတွေ ဝင်ရောက်နိုင်ပါတယ်။
ဝမ်းသွားပြီးတဲ့အခါ သန့်ရှင်းရေးလုပ်ခြင်း
နေ့စဥ် ဝမ်းသွားပြီးလို့ ရေနဲ့ဖြစ်စေ၊ စက္ကူနဲ့ဖြစ်စေ သန့်ရှင်းရေးလုပ်တဲ့အခါ အရှေ့ဘက်ကနေ စအိုဘက်သို့ ဦးတည်ပြီး လုပ်သင့်ပါတယ်။ အကယ်၍ စအိုဘက်ကနေ အရှေ့ဘက်ကို ဦးတည်ခဲ့ရင် စအိုကအညစ်အကြေးတွေက မိန်းမကိုယ်နဲ့ ဆီးလမ်းကြောင်းထဲကို ရောက်ရှ်သွားပါလိမ့်မယ်။
ဆီးလမ်းကြောင်းပိုးဝင်တာ မဖြစ်အောင် ဘာတွေ လုပ်ရမလဲ?
ဆီးလမ်းကြောင်းပိုးဝင်တဲ့အခါ ပိုးသတ်ဆေးသောက်ဖို့ လိုပါတယ်။ ဒါပေမယ့် ခဏခဏပိုးဝင်တိုင်း ပိုးသတ်ဆေးတွေ ခဏခဏသောက်နေရတာက မကောင်းလှပါဘူး။ ဆေးယဥ်တာ၊ ဆေးမတိုးတော့တာတွေ ဖြစ်စေနိုင်ပါတယ်။
ဒါဆို ဆီးလမ်းကြောင်း ပိုးမဝင်ရအောင် ဘယ်လိုကာကွယ်မလဲ?
• ရေများများသောက်ပါ။ ရေသောက်ပြီး ဆီးမကြာခဏ သွားပေးတာက ရောဂါပိုးတွေ ခိုအောင်းမနေနိုင်အောင် ကာကွယ်ပေးပါတယ်။
• ဆီးအောင့်မထားပါနဲ့။ ဆီးသွားချင်စိတ်ပေါ်လာတာနဲ့ ချက်ချင်းသွားလိုက်တာကလည်း ဆီးအိမ်ထဲက ဘက်တီးရီးယားတွေကို ဆီးနဲ့အတူ ပါသွားစေပါတယ်။
• Cranberry ဖျော်ရည်သောက်တာ၊ cranberry ပါတဲ့ ဖြည့်စွက်စာ သောက်သုံးတာတွေကလည်း ဆီးလမ်းကြောင်း ပိုးမဝင်အောင် ကာကွယ်ပေးပါတယ်။
• သွေးဆုံးပြီးတဲ့ အမျိုးသမီးတွေရဲ့ မိန်းမကိုယ်အတွင်းကို အီစထရိုဂျင် ထည့်သွင်းခြင်းဖြင့် ဆီးလမ်းကြောင်းပိုးဝင်ခြင်း မဖြစ်ရအောင် ကာကွယ်နိုင်ပါတယ်။ မိန်းမကိုယ်အတွင်း ထည့်လို့ရတဲ့ အီစခရိုဂျင် ဆေးပြား၊ ခရင်မ်၊ ဂျယ်လ်၊ ကွင်း စသဖြင့် ပုံစံအမျိုးမျိုး လာပါတယ်။
ခြောက်လအတွင်း နှစ်ကြိမ်နဲ့အထက် သို့မဟုတ် တစ်နှစ်အတွင်း သုံးကြိမ်နဲ့အထက်
ဆီးလမ်းကြောင်းပိုးဝင်သူတွေမှာ ကျောက်ကပ်ပျက်စီးနိုင်ခြေ များတာမို့ ပေါ့ပေါ့ဆဆ နေသင့်တဲ့ရောဂါ မဟုတ်ပါဘူး။ ဒါကြောင့် အမျိုးသမီးတွေ မကြာခဏ ဆီးကျင်နေရင် ဆီးလမ်းကြောင်းပိုးဝင်ခြင်း ရှိမရှိ စစ်ဆေးသင့်သလို ဆီးလမ်းကြောင်းပိုးဝင်ခြင်း မဖြစ်အောင် ကြိုတင်ကာကွယ်ဖို့လည်း အထူးဂရုပြုသင့်ပါတယ်။
Author : Dr.Yee Mon
