အဆစ်အမြစ်တွေ ရောင်တာက အတော်ကို ခံစားရခက်တဲ့ ဝေဒနာ ဖြစ်ပါတယ်။ နေ့စဥ် လူမှုဘဝ လှုပ်ရှားမှုတွေကိုတောင် ပုံမှန် မလုပ်နိုင်တော့လောက်အောင် နာကျင်ကိုက်ခဲ နေလေ့ရှိပါတယ်။
ဘာ့ကြောင့် အဆစ်ရောင်တာလဲ?
အရိုးတွေရဲ့အဆုံး၊ အရိုးတစ်ခုနဲ့တစ်ခု ဆက်စပ်တဲ့ နေရာမှာ ကူရှင်သဘောမျိုး ခံထားတဲ့ အရိုးနု (cartilage) လေးတွေနဲ့ ချောဆီအရည် (sinovial fluid) ရှိတတ်ပြီး အရိုးအဆစ်တွေ လွယ်ကူချောမွေ့စွာ လှုပ်ရှားနိုင်အောင် ကူညီပေးပါတယ်။အဲဒီအရိုးနုလေးတွေ ထိခိုက်ပျက်စီးသွားတဲ့အတွက် အဆစ်ရောင်ရောဂါ ဖြစ်လာတာပါ။
ဘယ်လိုလူတွေမှာ အဆစ်ရောင်ရောဂါ အဖြစ်များသလဲ?
*အဆစ်မှာ ထိခိုက်ဒဏ်ရာရဖူးပြီး သို့မဟုတ် ခွဲစိတ်ကုသမှု ခံယူပြီးနောက် လုံလောက်စွာ အနားမယူသူ
*လေးဘက်နာရောဂါ၊ ဂေါက်ရောဂါ ရှိသူ
*အသက်အရွယ်ကြီးသူ
*အဝလွန်သူနဲ့ (ဝိတ်ကို ထမ်းထားရတဲ့ တင်ပဆုံ၊ ဒူးဆစ်တို့မှာ အဖြစ်များပါတယ်)
*အမျိုးသမီးတွေမှာ (သွေးဆုံးပြီးတဲ့ အမျိုးသမီးတွေမှာ ဟော်မုန်းလျော့နည်းသွားမှုကြောင့် အရိုးပါးအရိုးပွ လာတတ်ပါတယ်) အဆစ်ရောင်ရောဂါ ပိုပြီး အဖြစ်များပါတယ်။
ရောဂါလက္ခဏာအနေနဲ့…
*အဆစ်က နာနေတာ
*အဆစ်ခိုင်နေတာ
*လှုပ်ရှားရခက်တာတွေ ခံစားရတတ်ပြီး ပိုမိုဆိုးဝါးလာတဲ့အခါ
*အဆစ်ရောင်ရမ်းလာတာ
*တင်းလာတာ
*လှုပ်ရှားလိုက်တိုင်း အဆစ်ထဲက တခွပ်ခွပ် အသံမြည်နေတာမျိုး ခံစားရတတ်ပါတယ်။
အဆစ်ရောင်ရောဂါဟာ ကုသပျောက်ကင်းနိုင်တဲ့ ရောဂါမဟုတ်ပါဘူး။ ဒါပေမယ့် အနေအထိုင်ဆင်ခြင်ပြီး ကုသမှု သေချာခံယူရင် ရောဂါလက္ခဏာတွေ လျော့ပါးသက်သာပြီး လူကောင်းနီးပါး နေထိုင်နိုင်ပါတယ်။
သက်သာအောင် ဘာတွေ လုပ်ရမလဲ?
*လေ့ကျင့်ခန်း ပုံမှန်လုပ်တာ
*အဝလွန်နေရင် ဝိတ်ချတာ
*အနာသက်သာစေရန် ထုတ်လုပ်ထားတဲ့ ဒူးစွပ်၊ ခြေစွပ်တွေ ဝတ်တာ
*အကိုက်အခဲပျောက်ဆေး သောက်တာ (ရေရှည်စွဲသောက်ရင် အစာအိမ်ထိခိုက်နိုင်ပါတယ်) တွေက အဆစ်ရောင်ရောဂါကို အနည်းနဲ့အများ သက်သာစေပါတယ်။
ဒါ့အပြင် အရိုးအဆစ်နဲ့ အရွတ်တွေ ကျန်းမာစေတဲ့ ကယ်လ်ဆီယမ်၊ ဗိုက်တာမင် D၊ type 2 collagen နဲ့ hyaluronic acid ပါတဲ့ အစားအစာတွေ စားတာ သို့မဟုတ် ဖြည့်စွက်စာအားဆေးတွေ သောက်သုံးတာက အဆစ်ရောင်ရောဂါကို သက်သာစေသလို အဆစ်ရောင်ရောဂါ မဖြစ်ရအောင်လည်း ကာကွယ်ပေးနိုင်ပါတယ်။
အဆစ်ရောင်တာက သေစေနိုင်လောက်တဲ့ ရောဂါကြီး မဟုတ်ပေမယ့်လည်း ဝေဒနာခံစားရတဲ့အခါ သေချင်လောက်အောင် စိတ်ညစ်ရတဲ့ ရောဂါဖြစ်ပါတယ်။ ဒါ့ကြောင့် မပေါ့ဆဘဲ မိမိရဲ့ အရိုးအဆစ်လေးတွေကို တန်ဖိုးထားကာကွယ်နိုင်ကြပါစေ။
Author : Dr.Yee Mon
