“အစာမကြေခြင်း ဝေဒနာခံစားရသောသူများတွင် အစာအိမ်အက်ဆစ်ချဉ်ရည်များသည် အစာရည်မျိုပြွန်သို့ဆန်တက်ခြင်းကြောင့် အစာရည်မျိုပြွန်နံရံများကို အက်ဆစ်တိုက်စားသည့်အတွက် အစာရည်မျိုပြွန်လမ်းကြောင်းကျဉ်းကျုံ့သွားခြင်းရောဂါကို နောက်ဆက်တွဲပြဿနာအဖြစ် တွေ့ရှိရပါသည်။”
အစာမကြေဖြစ်ခြင်းရောဂါဝေဒနာသည် ယေဘုယျအားဖြင့် အောက်ပါရောဂါရှိသောသူများတွင် တွေ့ရလေ့ရှိသည့် ရောဂါလက္ခဏာတစ်ရပ်ဖြစ်ပါသည်။ ၎င်းတို့မှာ
-အစာအိမ်မှ အက်ဆစ်များ အစာရည်မျိုပြွန်သို့ ပြန်လည်ဆန်တက်သောရောဂါ (GERD)
-အစာအိမ်နှင့် အူသိမ်ဦးပိုင်းတွင် အနာဖြစ်သောရောဂါ
-သည်းခြေရောဂါများ စသည်တို့ဖြစ်ကြပါသည်။
အစာမကြေဖြစ်ခြင်း၏ ရောဂါလက္ခဏာများ
-ဝမ်းဗိုက်အထက်ပိုင်း သို့မဟုတ် အစာအိမ်နေရာတွင် ပူလောင်သည့် ဝေဒနာကို ခံစားရခြင်း
-ဗိုက်အောင့်ခြင်း
-ဝမ်းဗိုက်တွင် လေထိုးလေအောင့်ဖြစ်ခြင်း
-ပျို့ခြင်း
-အန်ခြင်း
-ခံတွင်းချဉ်ခြင်း
စသည့် ရောဂါလက္ခဏာများသည် အစာမကြေဖြစ်ခြင်းဝေဒနာ ခံစားနေရသောသူများတွင် တွေ့ရှိရတတ်သည့် ရောဂါလက္ခဏာများ ဖြစ်ကြပါသည်။
အစာမကြေဖြစ်ခြင်း ဝေဒနာကို ဖြစ်စေနိုင်သည့် အကြောင်းရင်း အချက်များ
အောက်ဖော်ပြပါအချက်များသည် အစာမကြေဖြစ်ခြင်း ရောဂါဝေဒနာကို ဖြစ်စေနိုင်ကြောင်း လေ့လာချက်များအရသိရှိရပါသည်။
-အရက်အလွန်အကျွံ သောက်သုံးခြင်း
-အကိုက်အခဲပျောက်ဆေးများ ၊ ပဋိဇီ၀ပိုးသတ်ဆေးများ၊ သိုင်းရွိုက်လည်ပင်းကြီးရောဂါ ဆေးဝါးများ၊ ကိုယ်ဝန်တားသည့် ဆေးဝါးများ စသည့် ဆေးဝါးများကို အချိန်ကာလကြာရှည်စွာ သောက်သုံးမှီဝဲရခြင်း
-အစာအိမ်အူလမ်းကြောင်းတွင် အခြေခံရောဂါရှိနေခြင်း
-စိတ်သောကများသော ရောဂါ၊ စိတ်ကျရောဂါအစရှိသော စိတ်ပိုင်းဆိုင်ရာရောဂါပြဿနာ များရှိခြင်း
-ဆေးလိပ်သောက်ခြင်း
-စိတ်ဖိစီးမှုများခြင်း
-အဆီဓာတ်များသော အစားအစာများကို မကြာခဏစားသုံးခြင်း
စသည့် အချက်များသည် အစာမကြေဖြစ်ခြင်းကို ဖြစ်စေနိုင်သော အကြောင်းရင်းများအဖြစ် တွေ့ရှိရပေသည်။
အစာမကြေဖြစ်ခြင်း၏ နောက်ဆက်တွဲရောဂါပြဿနာများ
( ၁ ) အစာရည်မျိုပြွန်လမ်းကြောင်း ကျဉ်းမြောင်းသွားခြင်း ( Oesophageal Stricture )
အစာမကြေခြင်း ဝေဒနာခံစားရသောသူများတွင် အစာအိမ်အက်ဆစ်ချဉ်ရည်များသည် အစာရည်မျိုပြွန်သို့ဆန်တက်ခြင်းကြောင့် အစာရည်မျိုပြွန်နံရံများကို အက်ဆစ်တိုက်စားသည့်အတွက် အစာရည်မျိုပြွန်လမ်းကြောင်းကျဉ်းကျုံ့သွားခြင်းရောဂါကို နောက်ဆက်တွဲပြဿနာအဖြစ် တွေ့ရှိရပါသည်။
၎င်းရောဂါတွင်တွေ့ရှိရသော ရောဂါလက္ခဏာများမှာ
-အစာမျိုရန်ခက်ခဲခြင်း
-အစားအစာများသည် လည်ချောင်းတွင် တစ်ဆို့နေခြင်း
-ရင်ဘတ်အောင့်ခြင်း စသည်တို့ဖြစ်ကြပါသည်။
( ၂ ) အစာအိမ်၏ Pylorus အစိတ်အပိုင်းတွင် ကျဉ်းမြောင်းနေခြင်း ( Pyloric Stenosis )
အစာမကြေဖြစ်ခြင်းရောဂါတွင် အစာအိမ်အက်ဆစ်ရည်များ ဆန်တက်ရာမှ အစာအိမ်၏ Pylorus အစိတ်အပိုင်းနေရာအား အက်ဆစ်တိုက်စားသဖြင့် ကျဉ်းမြောင်းသွားသည့် နောက်ဆက်တွဲ ရောဂါပြဿနာကိုလည်း တွေ့ရှိနိုင်ပါသည်။
( ၃ ) ( Barrett’s Oesophagus ) အစာရည်မျိုပြွန်ကင်ဆာရောဂါအဖြစ်ပြောင်းလဲနိုင်သည့် ရောဂါပြဿနာကို ဖြစ်စေခြင်း
၎င်းရောဂါပြဿနာသည် အစာအိမ်၏ အက်ဆစ်ချဉ်ရည်များ ဆန်တက်ခြင်းကြောင့် အစာရည်မျိုပြွန်နံရံရှိ ဆဲလ်များ ပြောင်းလဲမှုများဖြစ်လာသည့် ရောဂါအခြေအနေတစ်ခု ဖြစ်ပါသည်။
ထိုရောဂါပြဿနာတွင် အစာရည်မျိုပြွန်ဆဲလ်များသည် ကင်ဆာအဆင့်သို့ ပြောင်းလဲခြင်း မရှိသေးသော်လည်း နောင်တစ်ချိန်တွင် ကင်ဆာရောဂါဖြစ်နိုင်ခြေများကြောင်း လေ့လာချက်များအရ သိရှိရပါသည်။
အထက်ပါ ဆိုးရွားပြင်းထန်သည့် နောက်ဆက်တွဲပြဿနာများရှိခြင်းကြောင့် အစာမကြေဖြစ်ခြင်း ဝေဒနာကို ကာကွယ်နိုင်ရန် အောက်ဖော်ပြပါဆောင်ရန်ရှောင်ရန် အချက်များကို ဖော်ပြအပ်ပါသည်။
-အစားအစာများကို တစ်ကြိမ်တည်းတွင် ပမာဏများများစားခြင်းမှ ရှောင်ကြဉ်ခြင်း
-အစားစားရာတွင် ကြေညက်စွာ ဝါး၍ စားသုံးခြင်း
-အချဉ်ဓာတ်များသော အစားအစာများ၊ ပူလွန်း စပ်လွန်းသော အစားအစာများကို လွန်ကဲစွာ စားသုံးခြင်းမှ ရှောင်ကြဉ်ခြင်း
-ကဖင်းဓာတ်များသော အစားအစာများကို ရှောင်ကြဉ်ခြင်း
-စိတ်ဖိစီးမှုလျော့နည်းစေရန် ယောဂလေ့ကျင့်ခန်းများကျင့်ခြင်း ၊ ဝိပဿနာရှုမှတ်ခြင်း စသည်တို့ကို ပုံမှန်လုပ်ဆောင်ပေးခြင်း
-ဆေးလိပ်သောက်ခြင်း ၊ အရက်ဘီယာသောက်ခြင်းမှ ရှောင်ကြဉ်ခြင်း
စသည့် အချက်များကို လိုက်နာခြင်းဖြင့် အစာမကြေဖြစ်ခြင်းနှင့် ၎င်း၏ နောက်ဆက်တွဲ ပြဿနာများကို ရှောင်ကြဉ်နိုင်မည် ဖြစ်ကြောင်း အကြံပြုအပ်ပါသည်။
Author: Dr မိုး ( ဆေး -၁ )
