တစ်ခါတစ်ရံ အစားစားပြီးချိန်မှာ ရင်ထဲမှာမရှင်းသလို အီလည်လည်ကြီး ဖြစ်နေသလို ခံစားချက်မျိုး လူတော်တော်များများ ကြုံရဖူးမှာပါ။ ရင်ပြည့်ရင်ကယ်ဖြစ်တယ်လို့ ဆိုလို့လဲရပါတယ်။
ရင်ပြည့်ရင်ကယ်ခြင်းဟာ အစာမကြေခြင်းရဲ့ လက္ခဏာ တစ်မျိုးဖြစ်ပါတယ်။ အချို့သောသူတွေမှာ ရင်ပြည့်ရင်ကယ်ဖြစ်ခြင်းနဲ့အတူ လေချဉ်တက်ခြင်း၊ လေပွခြင်း၊ ပျို့အန်ခြင်းတွေပါ ခံစားရနိုင်ပါတယ်။
ရင်ပြည့်ရင်ကယ် ဘာကြောင့် ဖြစ်ရသလဲ
- အစားအလွန်အကျွံ စားမိရာမှဖြစ်ခြင်း
- အစားအစာကြောင့် ရင်ပြည့်ခြင်း (ဥပမာ- အဆီများသော အစားအစာများ)
- အစာအိမ် အူလမ်းကြောင်းနှင့်ဆိုင်သော ရောဂါများ ( GERD အစာအိမ်အချဉ်ပြန်ရောဂါ၊ အစာအိမ်နှင့် အူအနာဖြစ်ခြင်း၊ IBS ခေါ် အူလမ်းကြောင်း ရောင်ယမ်းရောဂါများ- Crohn’s Disease, Ulcerative Colitis ၊ အစာအိမ်ကင်ဆာ)
- စိတ်ပိုင်းဆိုင်ရာ ပြဿနာများဖြစ်သည့် စိတ်ကျရောဂါ၊ အစိုးရိမ်လွန်ကဲ ရောဂါ စတာတွေမှာ ဖြစ်နိုင်ပါတယ်။
အပေါ်မှာ ပြောခဲ့တဲ့အချက်တွေထဲမှာ ရောဂါအခံတွေကြောင့်လည်း ဖြစ်နိုင်ပေမဲ့ အများစုကတော့ အစားအသောက်တစ်ခုခုကြောင့် သို့မဟုတ် စိတ်ပူပန်နေချိန်နဲ့ စိတ်ဖိစီးနေချိန်တွေမှာ အတွေ့ရများတတ်ပါတယ်။
ရင်ပြည့်ရင်ကယ်ခြင်းကို ဘယ်လိုအမြန်ဆုံး သက်သာအောင် လုပ်ရမလဲ
- ကိုယ်လက် လှုပ်ရှားပေးပါ
အစားစားပြီးတဲ့အခါမှာ အချိန်အကြာကြီးဆက်ပြီး ထိုင်နေရင် ရင်ပြည့်ရင်ကယ် ဖြစ်တတ်ပါတယ်။ ကိုယ်လက်လှူပ်ရှားရာမှာ အပြင်းအထန် လေ့ကျင့်ခန်းတွေကို ဆိုလိုတာ မဟုတ်ဘဲ လမ်းလျှောက်တာလိုမျိုး နည်းနည်းစီ လှုပ်ရှားပေးကြည့်ပါ။
- သံပရာရည်
သံပုရာရည် သောက်ပေးရင် သံပုရာသီးမှာပါဝင်တဲ့အက်စစ်ဓာတ်သဘာဝကြောင့် အစာခြေအား ကောင်းမွန်စေပြီး အစာမကြေ ရင်ပြည့်ရင်ကယ် ဖြစ်ခြင်းကို သက်သာစေနိုင်ပါတယ်။
- လှဲအိပ်ခြင်းကို ရှောင်ပါ
ပက်လက်အနေအထားဖြစ်နေတဲ့အခါ အစာအိမ် အက်စစ်တွေဟာ အစာရေမျိုပြွန်ထိ ပြန်တက်လာပြီး ရင်ပြည့်ရင်ကယ်ဖြစ်ခြင်းကို ပိုမိုဆိုးရွားလာစေနိုင်ပါတယ်။
- ရေနွေးကို အသုံးချပါ
ကြက်သီးနွေးရေနဲ့ ရေချိုးပေးခြင်း၊ ဒါမှမဟုတ် ဝမ်းဗိုက်ပေါ် ရေနွေးအိတ်လေး ကပ်ပေးမယ်ဆိုရင် သွေးလှည့်ပတ်မှုကောင်းမွန်စေပြီး အစာကြေမြန်စေတဲ့အတွက် ရင်ပြည့်ရင်ကယ်ခြင်းကို အမြန် သက်သာစေပါလိမ့်မယ်။
- မုန့်ဖုတ်ဆိုဒါ
နေရာအတော်များများမှာ အသုံးဝင်တဲ့ Baking Soda ဟာလည်း ရင်ပြည့်ရင်ကယ်ဖြစ်ခြင်းကို သက်သာစေနိုင်ပါတယ်။ Baking Soda အနည်းငယ်ကို သံပရာရည်ထဲမှာ ထည့်သောက်တဲ့အခါ ထွက်လာတဲ့ Carbonic Acid ဒြပ်ပေါင်းဟာ အစာမကြေ ရင်ပြည့်ရင်ကယ် လက္ခဏာတွေကို လျော့နည်းစေနိုင်ပါတယ်။
- ရေများများသောက်ပါ
အစာအိမ်နဲ့အူလမ်းကြောင်းဟာ ရေဓာတ်ပြည့်ဝနေမှ အာဟာရဓာတ်တွေကို ကောင်းမွန်စွာ စုပ်ယူပြီး အစာခြေဖျက်အားကောင်းစေမှာပါ။ ခန္ဓာကိုယ်မှာ ရေဓာတ်နည်းနေရင်လည်း အစာမကြေ ရင်ပြည့်ရင်ကယ် ဖြစ်တတ်ပါတယ်။ တစ်နေ့ကို ရေ ၂ လီတာမှ ၃ လီတာအထိ သောက်သုံးသင့်ပါတယ်။
- ချင်းပြုတ်ရည်
ချင်း(ဂျင်း)မှာ ပါဝင်တဲ့ Gingerol ဒြပ်ပေါင်းဟာ ရင်ပြည့်ရင်ကယ် အစာမကြေလက္ခဏာတွေကို သက်သာစေနိုင်ပါတယ်။ ချင်းပြုတ်ရည်ထဲကို ထန်းလျက်၊ ဒါမှမဟုတ် ပျားရည် ရောပြီး သောက်သုံးနိုင်ပါတယ်။
- ပူစီနံ
ပူစီနံရွက်ကို ရေနွေးကြမ်း လုပ်သောက်လို့ ရသလို ဖျော်ရည်အဖြစ်လည်း သောက်နိုင်ပါတယ်။ ပူစီနံဟာ အစာအိမ်အူလမ်းကြောင်းမှာရှိတဲ့ ကြွက်သားတွေကို ပြေလျော့စေတဲ့အစွမ်းရှိတာကြောင့် ဗိုက်အောင့်ဝေဒနာကို သက်သာစေတဲ့အပြင် လေပွခြင်း၊ အစာမကြေ ရင်ပြည့်ရင်ကယ်ခြင်းတွေကိုပါ သက်သာစေပါတယ်။
ရင်ပြည့်ရင်ကယ်မဖြစ်အောင် ဘာတွေလုပ်လို့ရလဲ
- အဆီများသော အစားအစာများ၊ အလွန်မာသော အစားအစာများ ခဏခဏစားခြင်းကိုရှောင်ပါ။
- အစားစားပြီးတိုင်း လမ်းနည်းနည်းလျှောက်ပေးပါ။
- ဆေးလိပ်နဲ့ အရက် ကို တတ်နိုင်သလောက်ရှောင်ကျဉ်ပါ။
- အစားအစာကိုတစ်ခါတည်း အလွန်အကျွံမစားပဲ ဗိုက်ဝရုံသာ စားပေးပါ။
Author: Dr. Aye Myat
