သင်္ကြန်ရောက်တော့မယ် အတာကူးတဲ့နှစ်ကူးအခါသမယမှာ နှစ်ဟောင်းကအညစ်အကြေးတွေကို ဆေးကြောပြီး နှစ်သစ်ကိုစိတ်သစ်လူသစ်နဲ့ကြိုဖို့ စိတ်ကူးထားတဲ့သူတွေ အများကြီးပါ။
သင်္ကြန်ဆိုတာ ပျော်ရွှင်စရာပွဲတော့တစ်ခုပါ။ လေးရက်ကနေ ငါးရက်အထိရှိတတ်တယ်။ မနက်ကနေ ညနေအထိ အားရပါးရ ရေကစားဖို့ စိုင်းပြင်းနေတဲ့ လူငယ်လူရွယ်မောင်မယ်တွေလည်း ဒုနဲ့ဒေးပါ။
သင်္ကြန်လည်တာဟာ ပျော်စရာကောင်းပေမယ့် သင်္ကြန်ပြီးနောက်ရက်တွေမှာ ကျန်းမာရေးဆိုင်ရာပြဿနာတွေ ဖြစ်လာတတ်ကြပါတယ်။ အဲ့ဒီအထဲမှာ အရေပြားဆိုင်ရာပြဿနာတွေလည်း တစ်ခုအပါအဝင်ဖြစ်ပါတယ်။
သင်္ကြန်မှာ အရေပြားထိခိုက်နိုင်တာ နှစ်မျိုးရှိပါတယ်။ တစ်မျိုးကတော့ နေပူကြီးထဲမှာ တစ်နေကုန်လည်ထားတာကြောင့် နေလောင်ဒဏ်တွေဖြစ်တယ်။ အသားတွေ နီရဲနေတတ်တယ်။ နောက်ပိုင်းတွေမှာတော့ အသားအရည်က နဂိုထက် ပိုမည်းသွားတတ်ပါတယ်။ နောက်တစ်မျိုးကတော့ ရေမှာပါတာတွေကို မတည့်တာကြောင့်ဖြစ်ဖြစ် ရေမသန့်တာကြောင့်ဖြစ်ဖြစ် အရေပြားမှာ ယားနာမျိုးစုံ ဖြစ်လာတတ်တာပါ။
သင်္ကြန်မှာ အရေပြားနေလောင်တာကတော့ ကြိုတင်ကာကွယ်တာတွေ လုပ်လို့ရပါတယ်။ SPF 15 ပါ တဲ့ နေလောင်ဒဏ်ကာကွယ်စေတဲ့ လိမ်းဆေး cream တွေကို ခဏခဏလိမ်းပေးပါ။ နှစ်နာရီခြားလိမ်းပေးပါ။ အင်္ကျီလက်ရှည် ဘောင်းဘီရှည်တွေဝတ်ပါ။ အရောင်နုလေပိုကောင်းလေပါ။ နေပူလွန်းတဲ့ အချိန် နေ့လည်၁၂နာရီကနေ ၂နာရီအထိကို အရိပ်ထဲမှာနေပေးပါ။ ပြန်ရောက်လာတာနဲ့ ရေချိုးသန့်စင်ပြီး အရေပြားကိုပြန်လည်းထိန်းသိမ်းပါ။ ပေါင်းတင်တာတွေ လုပ်ပါ။ သနပ်ခါးလိမ်းပါ။ ဒါဆို နေလောင်တာတွေ သက်သာနိုင်ပါတယ်။
သင်္ကြန်ပြီးတဲ့အခါလည်း အသားအရောင် ပိုမည်းသွားတာတွေ မဖြစ်စေတော့ပါဘူး။
နောက်ပြဿနာတစ်ခုကတော့ ယားနာတွေပါပဲ။ တစ်ချို့လူတွေက သင်္ကြန်ရေကို မွှေးမွှေးလေးဖြစ်စေချင်တာကြောင့် ရေထဲ ရေမွှေးထည့်တာတွေ တစ်ခြားသော အမွှေးအကြိုင်ထည့်တာတွေ လုပ်တတ်ကြတယ်။ တစ်ချို့သောလူနည်းစုတွေကျတော့ ရေအသန့်မသုံးကြတော့ဘဲ တွေ့ရာရေနဲ့ ပက်တတ်ကြတာတွေကြောင့်လည်းပါတတ်တယ်။ တစ်ချို့ကျတော့ ကန်ရေထဲ ရေဆင်းဆော့တာတွေကြောင့်လည်းဖြစ်တတ်ပါတယ်။
ယားနာရယ်လို့ပြောတဲ့အခါ ဝဲပေါက်တာလည်းပါတယ်။ ပွေးတို့ညှင်းတို့လည်းဖြစ်တတ်တယ်။ တစ်ခါတစ်လေကျတော့ အနီစက်တွေတစ်ကိုယ်လုံးထွက်ပြီး ယားလာတာလည်းဖြစ်တတ်တယ်။ အရည်ကြည်ဖုတွေလည်းဖြစ်တတ်တယ်။ အနီကွက်တွေလည်းဖြစ်တတ်တယ်။ အစုံဖြစ်တတ်ပါတယ်။
ဓာတ်မတည့်တာ တစ်ခုခုဖြစ်လာပြီဆိုရင်တော့ ယားနေတာအပြင် တစ်ခါတစ်လေမှာ အင်ပြင်တွေထွက်ပြီး အသားတွေပါယောင်လာတတ်ပါတယ်။ ပိုဆိုးတယ်ဆိုရင် အသက်ရှူခက်တာတွေပါ ဖြစ်လာတတ်တယ်။ ဓာတ်မတည့်တာတွေကတော့ ဖြစ်လာတာနဲ့ ရေအေးဖတ်အမြန်ကပ်ပါ။ ဘာမီတွန်တစ်လုံးလောက်သောက်ပြီး လိုအပ်တယ်ဆိုရင် နီးစပ်ရာဆေးခန်းကို အမြန်ပြရပါလိမ့်မယ်။
ယားနာတွေကတော့ လိမ်းဆေးတွေလိမ်းလို့ရတယ်။ ဘယ်လိုယားနာပုံစံဖြစ်တာလဲတော့ သိဖို့လိုပါတယ်။ ယားနာအလိုက်လိမ်းရတဲ့ ဆေးလည်း ကွာတတ်ပါတယ်။ ရေတွေသေချာဆေးပြီးတိုင်း ခြောက်အောင်ပြန်သုတ်ပေးဖို့လိုပါတယ်။ ပြီးမှဆေးသေချာလိမ်းပါ ဆေးလိမ်းတဲ့အခါ ယားနာပေါ်ကိုပါးပါးပဲလိမ်းပါ ပျောက်ချင်ဇောနဲ့ အများကြီးလိမ်းမယ်လုပ်လို့မရပါဘူး။ ကောင်းနေတဲ့ အရေပြားတွေကို မလိမ်းမိဖို့လည်းလိုပါတယ်။
အရောင်ပြောင်းနိုင်လို့ပါ။ မနက် နေ့ ည ပုံမှန်လိမ်းပေးရတယ်။ အရေပြားလိမ်းဆေးတွေက အနည်းဆုံးတော့ နှစ်ပတ်စောင့်ကြည့်ရပါတယ်။ ချက်ချင်းလိမ်း ချင်ချင်းသက်သာဖို့ကတော့ ရှားပါတယ်။ စိတ်ရှည်ရပါမယ်။ ယားတာတွေကိုမကုတ်မိဖို့လိုပါတယ်။ ကုတ်လေပွားလေပါ။ အစားလည်းရှောင်ရပါမယ်။ ယားလွန်းတယ်ဆိုရင်တော့ အယားသက်သာစေဖို့ သောက်ဆေးတွေ သောက်လို့ရပါတယ်။ တစ်ချို့တွေမှာတော့ ဆေးခန်းပြဖို့လိုတဲ့အထိ ဖြစ်တတ်ပါတယ်။
သင်္ကြန်လည်တာက ပျော်စရာကောင်းပါတယ်။ သင်္ကြန်လည်းပြီးရော အရေပြားကြောင့်စိတ်ညစ်ရရော မဖြစ်ရအောင် ကြိုတင်ဂရုစိုက်ကြဖို့လိုပါတယ်။ သင်္ကြန်ရေထဲ ဘာမှထည့်မရောဖို့ တွေ့ရာရေနဲ့ မပက်ဖို့လည်းလိုပါတယ်။ သင်္ကြန်ပြီးတဲ့အခါပုံမှန်အတိုင်းလှပနိုင်ကြပါစေ။
Dr. CST
