နှလုံးပိုးဝင်ရောင်ရမ်းခြင်း‌

နှလုံးပိုးဝင်ရောင်ရမ်းခြင်းဆိုသည်မှာ နှလုံးမှာရှိသော အဆို့ရှင်များ၊ နှလုံးအတွင်းလွှာ၊ နှလုံးအခန်းတစ်ခုနဲ့တစ်ခုခြားထားသောအလွှာပျက်နေသောနေရာ စသည်တို့တွင် ပိုးဝင်ပြီး နှလုံးရောင်ခြင်းဖြစ်သည်။ ဝင်တဲ့ပိုးအများစုကတော့ ဘက်တီးရီးယားအုပ်စုဖြစ်ပါတယ်။တခြား Rickettsiaeတို့ Fungi တို့ Chlamydia အုပ်စုတွေလည်း ဝင်နိုင်ပါတယ်။

ဒီပိုးတွေကအပြင်မှာရှိနေရာကနေ ဘယ်လိုဝင်လာတာလဲ။
စားတာ၊ သောက်တာ၊ အရေပြားမှာ ထိခိုက်ရှနာရတာ
သွားကျန်းမာရေးမကောင်းတာ၊ သွားနဲ့ခံတွင်းမသန့်ရှင်းတာ၊ သွားပိုးစားတာ
မသန့်တဲ့နေရာမှာသွားနုတ်တာ၊ သွားစိုက်တာ
တစ်ကိုယ်ရေသန့်ရှင်းရေးအားနည်းတာ
မူးယစ်ဆေးဝါးကို အကြောထဲ မသန့်ရှင်းတဲ့ အပ်နဲ့ထိုးသွင်းတာ စတဲ့နည်းတွေနဲ့ ဝင်နိုင်ပါတယ်။

သို့သော် ဒီပိုးတွေခန္ဒာကိုယ်ထဲဝင်တိုင်း နှလုံးပိုးဝင်ရောင်ရမ်းခြင်း ဖြစ်လားဆိုတော့ မဖြစ်ပါဘူး။ အများအားဖြင့် ခန္ဒာကိုယ်ထဲကို ပိုးဝင်ရင် ခန္ဒာကိုယ်ခုံခံအားစနစ်ကတိုက်ထုတ်လိုက်ပါတယ်။သို့သော် ခုခံအားကျဆင်းနေသူများ၊ မွေးရာပါ နှလုံးရောဂါအခံရှိသူများ၊ လေးဖက်နာပိုးရှိသူများ၊ နှလုံးအဆို့ရှင်ပျက်စီးနေသူများ ၊နှလုံးအဆို့ရှင်အစားထိုးထားရသူများ တွင်တော့ ပိုးဝင်တဲ့အခါမှာ နှလုံးပိုးဝင်ရောင်ရမ်းခြင်း ဖြစ်တာများပါတယ်။

ဘယ်လိုလက္ခဏာတွေပြလဲ။
အကြမ်းအားဖြင့်ကတော့ ဖြူဖတ်ဖြူရော်ဖြစ်လာတာ၊ ချမ်းတုန်ဖျားတာ၊ ညဘက်ချွေးစေးထွက်တာ၊
အရိုးအဆစ်နဲ့ကြွက်သားတွေနာတာ၊ ပိန်လာတာ၊ အရေပြားမှာ အနီစက်ပေါ်တာ၊ မျက်လုံးအဖြူသားမှာသွေးကွက်လိုမျိုးလေးပေါ်လာတာ မျက်ခမ်း မှာအနီစက်ပေါ်တာ၊ လက်သည်းမှာအနီစက်လိုပေါ်တာ၊ အစားအသောက်စားချင်စိတ်နည်းတာတွေပါ။

ပိုဆိုးတဲ့အဆင့်ဆိုရင်တော့
-ဆီးထဲမှာသွေးပါတာ
-ခြေထောက်တွေ ရောင်လာတာ
-မောတာ
-ဘေလုံးကြီးပြီးဗိုက်နာတာ
-ရင်ဘတ်ကိုနားကြပ်နဲ့နားထောင်လိုက်ရင် နှလုံးခုန်သံပြောင်းနေတာတွေဖြစ်နိုင်ပါတယ်။

ရောဂါလက္ခဏာတွေက တစ်ယာက်နဲ့တစ်ယာက်မတူနိုင်ပါဘူး။ နောက်ပြီးအချိန်နဲ့အမျှလည်းပြောင်းလဲနိုင်ပါတယ်။ တကယ်လို့ သင်မှာနှလုံးနဲ့ပတ်သက်တဲ့ရောဂါတစ်ခုခုရှိရင် သို့မဟုတ် အရင်ကနှလုံးခွဲစိတ်ဖူးရင် တစ်ခုခုထူးခြားမှုရှိတာနဲ့ ဆရာဝန်နဲ့ တန်းပြသင့်ပါတယ်။

ဘာတွေစစ်ဆေးရမလဲ
-သွေးစစ်တာ
-အက်ခိုးရိုက်တာ
-အီးစီဂျီဆွဲတာ
-ရင်ဘတ်ဓါတ်မှန်ရိုက်တာ စတာတွေလုပ်ကြည့်ရပါမယ်။

ဘယ်လိုကုသရမလဲ
ပိုးဝင်တာဖြစ်တဲ့အတွက် ပိုးသေဆေးသောက်တာ ထိုးတာတွေကိုလုပ်ရပါတယ်။လေးပတ်ကနေ ခြောက်ပတ်လောက်ထိ ဆေးသောက် ဆေးထိုးဖို့ လိုနိုင်ပါတယ်။နောက်ပြီးပိုးဝင်တဲ့အရင်းအမြစ် ရှိနေရင် ဖယ်ရှားရပါမယ်။ (ဥပမာ သွားပိုးစားတာရှိရင် သန့်တဲ့ဆေးခန်းမှာပိုးစားတဲ့သွားကိုနုတ်တာမျိုး)
နှလုံးအဆို့ရှင်မကောင်းရင် မကောင်းတဲ့အပိုင်းကို ခြစ်ထုပ်တာ သို့မဟုတ် လိုအပ်ရင် တစ်ခုလုံးလဲတာ စသဖြင့် ခွဲစိတ်မှုလုပ်ဖို့လည်းလိုနိုင်ပါတယ်။

ပိုးမဝင်အောင်ဘယ်လိုကာကွယ်ရမလဲ
-တစ်ကိုယ်ရေသန့်ရှင်းရေးလုပ်တာ
-အစာစားပြီးတိုင်းပလုတ်ကျင်းတာ
-သွားသေချာတိုက်တာ လုပ်ပါ။
-မူးယစ်ဆေးဝါးသုံးတာ တက်တူးထိုးတာ နားဖောက်တာ တွေရှောင်ပါ။နှလုံးနဲ့ပတ်သက်ပြီး ရောဂါအခံတစ်ခုခုရှိရင် ဖျားတာနဲ့ ဆေးခန်းချက်ချင်းပြပါလို့ အကြံပြုပါရစေ။

Author : Dr 528