လူစည်ကားရာ ပျံကျ ရပ်ကွက်မှာ ဆေးခန်းလေးဖွင့်ထားတဲ့ ကျွန်တော်အတွက် တစ်ခါတစ်လေမှာ လူနာတွေကို ကျန်းမာရေး စောင့်ရှောက်မှုတွေ ပေးရတာ ပျော်စရာလည်းကောင်းသလို တစ်ခါတစ်လေကျ ရယ်စရာလည်းကောင်းနေတတ်ပါတယ်
ခုလည်း ကျွန်တော် ဆေးခန်းလေး ဖွင့်ရုံရှိသေး ဆေးခန်းဘေးမှာနေတဲ့ ရခိုင်အဒေါ်ကြီးတစ်ယောက် အော်ဟစ်ပြီး ရောက်လာလေရဲ့
“ဆရာရေ ၊ လုပ်ပါဦး”
“လာ အဒေါ်၊ ဘာဖြစ်လာသလဲ”
သူ့ဗိုက်ကြီးကို ပုတ်ပြပြီး “ကျွန်မဗိုက်ထဲ “ဘုန်းဘုန်း… ဘုန်း”ကြီး ဖြစ်နေတယ်ဆရာ”
“ဟုတ်လား ပြပါဦး စမ်းကြည့်ရအောင်”
စမ်းသပ်ကြည့်တော့လည်း ဟုတ်တယ်။ ဗိုက်ကြီးကတင်းတောင့်နေတယ် ၊ ဝမ်းဗိုက်ကို ဖိပြီး စမ်းသပ်ကြည့်တိုင်းမှာ လေတွေက တဂွီဂွီနဲ့
ရင်ညွှန့်နားမှာလည်း နာကျင်မှုလေး အနည်းငယ်ရှိနေတယ်
“အခြား ဘာဖြစ်သေးလဲ အဒေါ် ၊ အန်သေးလား ၊ လေချဉ်တက်တာ ပျို့တာတွေ ဘာတွေကော ရှိသေးလား”
“အန်တော့ မအန်ဘူးဆရာ ။ ပျို့တော့ ပျို့တယ်။ လေချဉ်လည်း တက်တယ်ဆရာ”
“ဗိုက်အောင့် ဗိုက်နာတွေ ဘာတွေကော ရှိသေးလား ၊ အစာစားပြီးသွားရင် အစာမကြေတာတို့ ဘာတို့ကောရှိလား”
“ရှိတယ်ဆရာ၊ လေထိုးတာပဲလားတော့မသိပါဘူး ဆရာရယ်။ အရင်ကလိုလဲ သိပ်မစားနိုင်ဘူးရယ် ၊ နည်းနည်းလေးစားလိုက်တာနဲ့ ဗိုက်ကြီးက တင်းတင်းသွားတယ် ။ ဘာဖြစ်တာမှန်းကို မသိတော့ပါဘူးဆရာရယ်”
“အဒေါ်ရောဂါက အစာအိမ်ရောင်နေတာ ၊ အစားအသောက်အနေအထိုင် ဆင်ခြင်ဖို့တော့ လိုလိမ့်မယ်
အဒေါ်ကြိုက်တဲ့ အစပ်တွေလည်း လျော့စားဖို့ လိုလိမ့်မယ်”
“အစာအိမ်ရောင်တာ !!! အဒေါ်တော့ တစ်ခါမှ မဖြစ်ဘူးပါဘူးကွယ်။ အဲဒီဟာကြီးက ဘာလို့ဖြစ်ရတာတုန်း ဆရာရယ်”
“အစာအိမ်ရောင်တယ်လုပ်ပါအဒေါ်ရယ်၊ ဘယ်နှယ့် အဲဟာကြီးတုန်း
အစာအိမ်ရောင်တယ်ဆိုတာ အစာအိမ်အတွင်းပိုင်းမှာ ရှိတဲ့ နံရံတွေ ရောင်ရမ်းသွားလို့ဖြစ်ရတာ
ရောင်ရမ်းစေတဲ့ အဓိကအကြောင်းအရာတွေကတော့
အရက်သောက်သုံးတာ၊ စိတ်ဖိစီးမှုများတာ ၊ အကိုက်အခဲပျောက်ဆေးများကို ကြာရှည်စွဲသောက်တာနဲ့ H.pylori လို့ခေါ်တဲ့ ပိုးကြောင့်လည်းဖြစ်တတ်သေးတယ်”
“ဆရာပြောသလိုဆို ဟုတ်လောက်တယ်ဆရာ ။ ကျွန်မ အခုတလော စိတ်ညစ်စရာတွေ အရမ်းများနေတယ်ဆရာ၊ စိတ်ဖိစီးတယ်ပဲပြောရမှာပေါ့။”
“အစာအိမ်ရောင်ရင် အခြားဘယ်လိုခံစားရနိုင်သေးလဲဆရာ။”
“အစာအိမ်ရောင်တဲ့အခါ ပျို့အန်တာ၊ လေထိုးလေအောင့်တာ၊ ဗိုက်အောင့်တာ၊ အန်တာ၊ အစာမကြေတာ၊ အစာစားချိန်တစ်ချိန်နဲ့ တစ်ချိန်ကြားတွေ ၊ ညတွေမှာ ရင်ပူတာတွေ ဖြစ်တတ်တယ်။ ဒါ့အပြင် ကျို့ထိုးတာတို့ အစာစားချင်စိတ်မရှိတော့တာတွေလည်းဖြစ်တယ်။
ရောဂါလက္ခဏာ အရမ်းဆိုးဝါးတဲ့အခါမှာ ကော်ဖီရောင်အန်တာ ၊ သွေးအန်တာ ၊ ကတ္တရာစီးလို ဝမ်းမဲမဲတွေသွားတာမျိုးတွေ ထိဖြစ်နိုင်တယ်”
“သွေးအန်တာတို့ ဘာတို့ မရှိသေးဘူးဆိုတော့ ကျွန်မ အရမ်းမဆိုးသေးဘူးမို့လားဆရာ ။ဘယ်လိုလုပ်ရင် ပျောက်နိုင်မလဲ ဆရာ”
“ကျွန်တော်ပေးတဲ့ ဆေးမှန်မှန်သောက်ရမယ်။ အစားအစာကို နည်းနည်းနဲ့ မကြာခဏစားပေးရမယ်။ အပူအစပ်တွေ ရှောင်ရမယ်။အဆီအစိမ့်များတဲ့ အစားအစာတွေ ရှောင်ရမယ်။နောက် အချဉ်ဓာတ်ပါတဲ့ အသီးအနှံတွေလည်း ရှောင်ရမယ်။”
“ဆရာ ဒီအစာအိမ်ရောင်တာက နောက်ဆက်တွဲဆိုးကျိုးတော့ မရှိပါဘူးနော်”
“နောက်ဆက်တွဲ ဆိုးကျိုးဖြစ်တာ ရှိတာပေါ့။ ဒါပေမယ့် အနည်းအကျဉ်းမှာပဲ ရှိတာပါ။
တချို့လူအနည်းအကျဉ်းမှာတော့ နာတာရှည်အစာအိမ်ရောင်တာ၊ အစာအိမ်အနာဖြစ်တာ၊ သွေးယိုတာတွေဖြစ်တတ်တယ်။
“ဟုတ်ကဲ့ပါဆရာ ၊ ဒါနဲ့ကျွန်မဘာစားလို့ရလဲဆရာ”
“ဒီညတော့ ဆန်ပြုတ်ပဲသောက်လိုက်ပါဗျာ ။ သက်သာမှ ထမင်းစားပေါ့။”
“ဟုတ်ကဲ့ပါဆရာ။ သောက်ဆိုတော့လဲ သောက်ရတော့မှာပေါ့ဆရာရယ်
ခုလိုရှင်းပြတာ ကျေးဇူးအများကြီးတင်ပါတယ်ဆရာ။ အိမ်က သားလည်းအခုတလော အရက်တွေ အရမ်းသောက်သောက်နေတာ။ဆရာပြောသလိုဆို သူလဲအစာအိမ်ရောင်ရောဂါဖြစ်နိုင်ချေရှိတာပေါ့နော်”
“ဒါပေါ့ ဖြစ်နိုင်ချေရှိတာပေါ”့
“အဲလိုဆို သူ့ကိုလည်း ကျွန်မလို မဖြစ်အောင် ဒီအစာအိမ်ရောင် ရောဂါအကြောင်းပြန်ပြောရမယ်။သွားလိုက်ပါဦးမယ်ဆရာ။”
“ကောင်းပါပြီဗျာ”
Author ; Dr .မေ
