တခါတလေမှာ ခါးနာတာလိုလိုနဲ့ ခါးနေရာမှာမဟုတ်ဘဲ ခါးအောက် တင်ပဆုံခွက်နေရာမှာ နာနေပြီး လမ်းလျှောက်တဲ့အခါ မျက်ခနဲနာတာ သို့မဟုတ် တင်ပဆုံခွက်နေရာကနေ ခြေထောက်ထိ တောက်လျှောက်နာနေတာမျိုးနဲ့ ကြုံဖူးကြမှာပါ။
ဒီလိုတွေကြုံရပြီဆိုရင် အတော်များများက ခါးနာတယ်လို့ပဲ ထင်တတ်ကြပါတယ်။
တကယ်တော့ အဲ့လိုခံစားရရင် ခါးနာတာထက် တင်ပဆုံအာရုံကြောညှပ်တာ ဖြစ်နိုင်ခြေပိုများပါတယ်။
ဆေးပညာအရတော့ တင်ပဆုံအာရုံကြောညှပ်ခြင်းကို Sciatica လို့ခေါ်ပါတယ်။
ကျွန်တော်တို့ရဲ့ ဘယ်ညာ တင်ပဆုံနှစ်ဖက်မှာ Sciatic nerve လို့ခေါ်တဲ့ တင်ပဆုံအာရုံကြောမကြီး တခုစီရှိပါတယ်။
ထိုတင်ပဆုံ အာရုံကြောမကြီးတွေဟာ ခါးအောက်ပိုင်းနေရာမှစပြီး ဒူးအောက်ထိရောက်ကာ ခြေထောက်မှာရှိတဲ့ ကြွက်သားများစွာကို ထိန်းချုပ်ပေးပါတယ်။
ဒါ့အပြင် ခြေထောက်အောက်ပိုင်းနဲ့ ခြေဖဝါးကနေလာတဲ့ အာရုံခံစားမှုတွေကိုလည်း ဦးနှောက်ဆီရောက်အောင်ပို့ပေးပါတယ်။
အကြောင်းတခုခုကြောင့် ဒီတင်ပဆုံအာရုံကြောကို သွားထိခိုက်မိတာရှိပါက အာရုံကြောဟာရောင်လာပြီး အပေါ်မှာတခါပြောခဲ့သလို ခါးအောက်တင်ပဆုံခွက်နေရာမှာ နာနေပြီး လမ်းလျှောက်ဖို့ ခြေထောက်ထောက်တဲ့အခါ မျက်ခနဲဖြစ်ဖြစ်သွားတာ၊ ပြင်းထန်ရင် တင်ပဆုံခွက်နေရာကနေ ခြေထောက်ထိတောက်လျှောက် ထုံနေတာ နာနေတာ၊ ခြေဖဝါးနဲ့ ခြေချောင်းလေးတွေနေရာမှာ အပ်နဲ့ထိုးသလိုမျိုး ကျင်တဲ့ဝေဒနာခံစားရတာတွေဖြစ်ပြီး လမ်းလျှောက်ဖို့ကို မလွယ်တာမျိုးတွေထိ ဖြစ်နိုင်ပါတယ်။
ဘယ်ညာနှစ်ဖက်လုံးဖြစ်တာမျိုးလည်းရှိပေမယ့် အများအားဖြင့်တော့ ဘယ် သို့မဟုတ် ညာတဖက်ပဲ ဖြစ်တာများပါတယ်။
တင်ပဆုံကြောညှပ်ခြင်းကို ဖြစ်စေနိုင်တဲ့အကြောင်းတွေကတော့ ခါးဆစ်ရိုးကျွံတာ၊ ထိုင်တဲ့အနေအထားမမှန်တာ ချော်လဲတာ အလေးအပင်တွေကို နည်းစနစ်တကျမခြင်း မရှိတာ စတဲ့အကြောင်းတွေကြောင့် ခါးရိုးကိုထိခိုက်မှု ဖြစ်စေတာ၊ ခါးရိုးမှာ တီဘီဖြစ်တာ စသဖြင့် အများကြီးရှိပါတယ်။
သုတေသနတွေအရ လူအယောက် ၁၀၀ မှာ ၄၀ လောက်ဟာ တသက်မှာအနည်းဆုံးတခါလောက်တော့ တင်ပဆုံကြောညှပ်ခြင်းဝေဒနာနဲ့ ကြုံတွေ့ရနိုင်ခြေရှိတယ်လို့ သိရပါတယ်။
အသက် ၄၀ ကျော်အရွယ်တွေ၊ ကိုယ်လက်လှုပ်ရှားမှုနဲပြီး အထိုင်များတဲ့သူတွေ၊ အလေးအပင်မတဲ့ အလုပ်တွေကို ရေရှည်လုပ်နေရသူတွေဟာဆိုရင် တင်ပဆုံကြောညှပ်ခြင်းဝေဒနာနဲ့ ကြုံရနိုင်ခြေပိုများကြောင်း လေ့လာမှုတွေအရ ထပ်သိရပါတယ်။
တင်ပဆုံကြောညှပ်ခြင်း ဖြစ်တဲ့အခါ သက်သာအောင် ရေနွေးအိတ် သို့မဟုတ် ရေခဲကပ်တာ၊ အကိုက်အခဲပျောက်ဆေး သိပ်မပြင်းတာကို အစာစားပြီးသောက်တာ (အစာအိမ်ရောဂါအခံရှိရင် ဗိုက်မကြာခဏအောင့်တတ်ရင်တော့ ဆရာဝန်နဲ့ပြသပြီးမှသောက်ပါ။) တွေလုပ်နိုင်ပါတယ်။
ဒါ့အပြင် နာနေတဲ့နေရာကို လိမ်းဆေးလိမ်းတာ၊ နာနေတဲ့ ခြေထောက်ကို ဖြည်းဖြည်းချင်းဆန့်ထုတ်တဲ့ လေ့ကျင့်ခန်းမျိုးတွေလည်း လုပ်ပေးနိုင်ပါတယ်။ (ဥပမာ – အနည်းငယ်မြင့်တဲ့ နေရာတခုပေါ် ဖြစ်တဲ့ခြေထောက်ကို ဆန့်တင်ထားပြီး ထိုခြေထောက်ရဲ့ ခြေဖျားနဲ့ မိမိရဲ့လက်ဖျားထိအောင် ခန္ဓာကိုယ်ကို ညင်ညင်သာသာကိုင်းညွတ်ပြီး ထိတဲ့အနေအထားဖြင့် စက္ကန့် ၃၀ လောက်နေပါ တနေ့ကို နှစ်ကြိမ်လောက် တကြိမ်မှာ ဘယ်ညာတလှည့်စီလုပ်ပေးပါ)
ဒါပေမယ့် တင်ပဆုံကြောညှပ်ခြင်း ဖြစ်တဲ့အချိန်မှာ တအားလှုပ်လှုပ်ရှားရှားလုပ်တာ၊ အလေးအပင်မတာတွေကိုတော့ ရှောင်ဖို့လိုပါတယ်။
ဒီလိုတွေလုပ်လိုက်ရင် အများအားဖြင့်တော့ တင်ပဆုံအာရုံကြောညှပ်တာဟာ ၄ ပတ် သို့မဟုတ် ၈ ပတ်လောက်ဆိုရင် ပျောက်ကင်းသက်သာသွားလေ့ရှိပါတယ်။
တကယ်လို့ ဒီလိုတွေလုပ်သော်လည်း တင်ပဆုံအာရုံကြောညှပ်ခြင်းဝေဒနာဟာ ၈ ပတ်ကျော်တဲ့အထိ မသက်သာဘူးဆိုရင် ရိုးရိုးဓါတ်မှန်ရိုက်တာ၊ သံလိုက်ဓါတ်မှန် (MRI) ရိုက်တာ တွေလုပ်ပြီး အရိုးအကြောဆရာဝန်နဲ့ ပြသကုသဖို့လိုပါတယ်။
Dr 528
