အနာကျက်ခြင်းဖြစ်စဉ်ကို အကျိုးသက်ရောက်မှုရှိစေသောအချက်များ

ဒဏ်ရာအနာတရများရသည့်အခါ အနာကျက်ခြင်းဖြစ်စဉ်သည် လူအများစုတွင် ပုံမှန်အတိုင်း ဖြစ်ပေါ်လေ့ရှိပါသည်။ သို့သော် အချို့လူများတွင် အနာကျက်ခြင်းဖြစ်စဉ်သည် ပုံမှန်ထက်နှောင့်နှေးနေတတ်ပါသည်။ ထိုသို့အနာကျက်ခြင်းဖြစ်စဉ် နှောင့်နှေးနေခြင်းသည် ခန္ဓာကိုယ်တွင် မလိုလားအပ်သော နောက်ဆက်တွဲပြဿနာအများအပြားကို ဖြစ်ပေါ်စေနိုင်ပါသည်။
အောက်ပါအချက်များသည် အနာကျက်ခြင်းဖြစ်စဉ်ကို အနည်းနှင့်အများဆိုသလို လွှမ်းမိုးအကျိုးသက်ရောက်မှုရှိစေသည့် အချက်များဖြစ်ပါသည်။ ထို့ကြောင့် အောက်ပါအချက်များကို သတိပြုထည့်သွင်းစဉ်းစားခြင်းအားဖြင့် အနာကျက်ခြင်းဖြစ်စဉ်တွင် ပိုမိုကောင်းမွန်သောရလဒ်များကို ရရှိနိုင်စေမည်ဖြစ်ပါသည်။

အသက်အရွယ်
အသက်အရွယ်ကြီးရင့်လာခြင်းသည် ခန္ဓာကိုယ်ရှိ စနစ်အားလုံးကို အကျိုးသက်ရောက်မှုရှိစေသကဲ့သို့ အရေပြား၏ ဖွဲ့စည်းတည်ဆောက်ပုံနှင့် လုပ်ငန်းဆောင်တာများအပေါ်တွင်လည်း အကျိုးသက်ရောက်မှုရှိစေ ပါသည်။
အသက်အရွယ်ကြီးရင့်လာသည်နှင့်အမျှ အရေပြားပါးလာခြင်း၊ နာကျင်ရောင်ရမ်းမှုဆိုင်ရာ တုံ့ပြန်မှုများ နှေးကွေးလာခြင်း၊ အနာကျက်ခြင်းဖြစ်စဉ်များ နှေးကွေးလာခြင်း စသည်ဖြင့် ခန္ဓာကိုယ်၏ စနစ်အားလုံး နှေးကွေးလာကြပါသည်။
ထိုသို့ပြောင်းလဲမှုများဖြစ်ပေါ်လာခြင်းကြောင့် အသက်အရွယ်ကြီးရင့်သူများတွင် ဒဏ်ရာအနာတရများကို ပိုမိုရရှိစေသည့်အပြင် ရရှိသော ဒဏ်ရာများသည်လည်း အနာကျက်ခြင်း ပိုမိုနှေးကွေးလာကြပါသည်။

အာဟာရဓာတ်
ကောင်းမွန်စွာအနာကျက်ရန်အတွက် ပြည့်စုံသော အာဟာရဓာတ်များသည် မရှိမဖြစ်လိုအပ်ပါသည်။
အနာကျက်ခြင်းဖြစ်စဉ်တွင် အရေးပါသည့် ကော်လာဂျင်များဖွဲ့စည်းတည်ဆောက်ရန်အတွက် လုံလောက်သည့်စွမ်းအင်နှင့် အခြားအာဟာဓါတ်များမရရှိခဲ့လျှင် အနာကျက်ခြင်းဖြစ်စဉ်သည် နှေးကွေးနေနိုင်ပါသည်။

အဝလွန်ခြင်း
ပုံမှန်ရှိသင့်သည့် ကိုယ်အလေးချိန်ထက် ၂၀% ပိုမိုများပြားနေသူများသည် အနာကျက်ခြင်းဖြစ်စဉ်ကို နှေးကွေးစေသည့် ရောဂါပိုးများ ဒဏ်ရာအနာအတွင်းသို့ ဝင်ရောက်နိုင်သည့်အန္တရာယ် ပိုမိုမြင့်မားကြောင်း တွေ့ရှိရပါသည်။

အညစ်အကြေးများ၊ ပျက်စီးနေသောဆဲလ်များ၊ ရောဂါပိုးများ ဒဏ်ရာအနာအတွင်းတွင် ရှိနေခြင်း
ရောဂါပိုးများဝင်ရောက်လာသည့်အခါ အနာကျက်ခြင်းဖြစ်စဉ်ကိုကူညီပေးသည့် ကော်လာဂျင်များ ပြိုကွဲခြင်းကို ဖြစ်စေနိုင်သကဲ့သို့ အညစ်ကြေးများ၊ ပုပ်ဆွေးပျက်စီးနေသော တစ်ရှူးများ ဒဏ်ရာအနာအတွင်းတွင် ရှိနေခြင်းကလည်း အလားတူ အကျိုးသက်ရောက်မှုများကိုဖြစ်စေနိုင်ကာ အနာကျက်ခြင်းကို နှေးကွေးစေနိုင်ပါသည်။
ထို့အပြင် အရေပြားတစ်ရှူးများ၏လုပ်ဆောင်ချက်များ မှန်ကန်စေရန်အတွက် အရေပြားတွင် လုံလောက်သော ရေပမာဏ ရှိရန်လိုအပ်ပါသည်။ အရေပြားခြောက်သွေ့နေခြင်းသည် ဒဏ်ရာအနာတရများရရှိစေရန်နှင့် ရောဂါပိုးများ ဒဏ်ရာများအတွင်းသို့ ဝင်ရောက်စေရန် ပိုမိုလွယ်ကူစေပါသည်။ ထို့ကြောင့် အရေပြားကို ရေဓါတ်ပြည့်၀နေစေရန် ထိန်းသိမ်းခြင်းအားဖြင့် အနာကျက်ခြင်းဖြစ်စဉ်ကို နှေးကွေးမှုမရှိစေရန် ကာကွယ်နိုင်ပါသည်။ သို့သော် အရေပြား အလွန်အမင်းစိုစွတ်မှုမရှိစေရန်ကိုမူ သတိပြုရမည်ဖြစ်ပါသည်။

ခန္ဓာကိုယ်စနစ်အားလုံးကို အကျိုးသက်ရောက်မှုရှိစေသော အခြားအကြောင်းရင်းများ
ဆီးချိုရောဂါ၊ အာဟာရမပြည့်ဝခြင်း၊ ကိုယ်ခံအားစနစ် အားနည်းနေခြင်း စသည့် အကြောင်းခြင်းရာများကလည်း အနာကျက်ခြင်းကို နှေးစေသည့် သက်ရောက်မှုရှိပါသည်။
ဆီးချိုရောဂါသည် အာရုံကြောဆိုင်ရာပြဿနာများကြောင့် ဒဏ်ရာအနာတရများကို ပိုမိုရရှိစေနိုင်သလို သွေးစီးဆင်းမှုမလုံလောက်ခြင်းနှင့် သွေးတွင်းသကြားဓာတ်များမြင့်မားနေမှုကြောင့် အနာကျက်ခြင်းဖြစ်စဉ်ကို ပိုမိုနှေးကွေးစေနိုင်ပါသည်။
ထို့အပြင် အနာကျက်ခြင်းဖြစ်စဉ်ကို နှေးကွေးစေသည့် ဆေးဝါးများနှင့် အခြားရောဂါများစွာလည်းရှိပါသည်။ ဥပမာ steroid ကဲ့သို့ဆေးဝါးများကို ကြာရှည်စွာသုံးစွဲခြင်းသည် အနာကျက်ခြင်းဖြစ်စဉ်ကို နှေးကွေးစေနိုင်ပါသည်။

တစ်ရှူးများ အောက်ဆီဂျင် ကောင်းစွာမရရှိခြင်း
တစ်ရှူးများဆီသို့ အောက်ဆီဂျင်ကို လုံလောက်စွာ မပေးပို့နိုင်ခြင်းသည် သွေးကြောများကျဉ်းမြောင်း ပိတ်ဆို့နေသော ပြဿနာများ၊ သွေးပေါင်ချိန်လျော့ကျနေသော ပြဿနာများနှင့် သွေးအတွင်းအောက်ဆီဂျင် မပြည့်ဝသော ပြဿနာများကြောင့် အဖြစ်များလေ့ရှိပါသည်။
ထိုသို့ အောက်ဆီဂျင်လုံလောက်စွာ မရရှိသောအခါ ကော်လဂျင်များ ထုတ်လုပ်မှုတွင် အတားအဆီးအနှောင့်အယှက် ဖြစ်လာသောကြောင့် အနာကျက်ခြင်းကို နှေးကွေးစေပါသည်။
ဆေးလိပ်သောက်ခြင်းသည်လည်း တစ်ရှူးများအောက်ဆီဂျင်လုံလောက်စွာမရရှိခြင်းကို ဖြစ်စေသည့် အကြောင်းရင်းတစ်ချက်ဖြစ်ပါသည်။
Author : Dr. မိုး (ဆေး ၁)