Scurvy ဟုခေါ်သော ရောဂါသည် ဗီတာမင်စီ ချို့တဲ့ခြင်းကြောင့် ဖြစ်ပွားသော ရောဂါတစ်မျိုးဖြစ်ပါသည်။
ဖြစ်ပွားနှုန်း နည်းပါးခြင်း၊ ရောဂါလက္ခဏာများသည် သိသာထင်ရှားမှုမရှိခြင်း၊ ပုံမှန်သွေးစစ်ဆေးမှုများတွင်လည်း ဗီတာမင်စီ ကို ထည့်သွင်းစစ်ဆေးလေ့မရှိခြင်းများကြောင့် Scurvy ရောဂါဖြစ်ပွားနေခြင်းကို သတိမထားမိခြင်းများ မကြာခဏဖြစ်ပွားလေ့ရှိပါသည်။
ရောဂါလက္ခဏာရပ်များ
ရောဂါလက္ခဏာရပ်များသည် ကနဦးတွင် မထင်မရှား ဖြစ်ပေါ်တတ်ပြီး တဖြည်းဖြည်းနှင့် ပိုမိုဆိုးရွားလာတတ်ပါသည်။ တွေ့ရှိရသည့် လက္ခဏာများမှာ ဤရောဂါဟုပြောနိုင်ရန် မတိကျ၊ မသေချာမှုများကြောင့် ဗီတာမင် စီ ချို့တဲ့ပြီး Scurvy ရောဂါဖြစ်နေကြောင်းကို ချက်ချင်း မတွေးမိ၊ မသိရှိဖြစ်နေတတ်ပါသည်။
အတွေ့ရများသော ရောဂါလက္ခဏာများမှာ အားအင်ကုန်ခန်းခြင်း၊ ကြွက်သားနာကျင်ခြင်း၊ အစားအသောက်ပျက်ခြင်း၊ အရိုးအဆစ်များ တောင့်တင်းရောင်ရမ်းခြင်း၊ အလိုအလျောက်သွေးထွက်ခြင်း၊ သွေးခြည်ဥခြင်း၊ အရေပြားပေါ်တွင် အစက်အပြောက်များ ထွက်ပေါ်လာခြင်း၊ သွားဖုံးရောင်ခြင်း၊ သွားဖုံးတွင် အနာဖြစ်ခြင်း၊ သွားဖုံးများ ကြီးမားလာခြင်း၊ သွားကျွတ်ခြင်း၊ ဂနာမငြိမ်ဖြစ်ခြင်း၊ စိတ်မတည်မငြိမ်ဖြစ်ခြင်း စသည်တို့ဖြစ်ကြပါသည်။
ကလေးများတွင် Scurvy ရောဂါဖြစ်ခြင်း
ကလေးများတွင် Scurvy ရောဂါ ဖြစ်ပွားခဲ့ပါက လူကြီးများနှင့် ရောဂါလက္ခဏာအတူတူပင်ဖြစ်ပါသည်။
သို့သော် ကလေးများတွင် ဖြစ်ပွားသော Scurvy ရောဂါသည် ကြီးထွားဖွံ့ဖြိုးမှု နှေးကွေးခြင်းများအားလည်း ဖြစ်စေတတ်ပါသည်။ ထို့ပြင် လူမှုပေါင်းသင်းဆက်ဆံရေးဆိုင်ရာ ဖွံ့ဖြိုးတိုးတက်မှုများလည်း နှေးကွေးနေတတ်ပါသည်။
နောက်ဆက်တွဲပြဿနာများ
ဗီတာမင် စီ သည် အူလမ်းကြောင်းအတွင်း သံဓာတ်စုပ်ယူမှုကိုအားပေးကူညီသည့် အတွက်ကြောင့် ဗီတာမင် စီ ချို့တဲ့ခြင်းသည် သံဓာတ်ချို့တဲ့သည့် သွေးအားနည်းရောဂါများကို ဖြစ်ပေါ်လာစေတတ်ပါသည်။
သွေးအားနည်းရောဂါဖြစ်ပွားသည့်အခါ အားအင်ကုန်ခန်းခြင်း၊ မူးဝေခြင်း၊ အရေပြားဖြူဖျော့ခြင်း၊ ရင်တုန်ခြင်း၊ မောပန်းခြင်းများကို ဖြစ်စေနိုင်ပါသည်။
ထို့ပြင် ဗီတာမင် စီ သည် ခန္ဓာကိုယ်၏ အရေပြား၊ သွေးကြောများ၊ အရွတ်များ၊ အရိုးများနှင့် အရိုးနုများကို ဖွဲ့စည်းတည်ဆောက်ရာတွင် လိုအပ်သည့် တွယ်ဆက်တစ်ရှူးတစ်မျိုးဖြစ်သည့် ကော်လာဂျင် ပရိုတင်းများဖြစ်ပေါ်ခြင်းအတွက်လည်း လိုအပ်ပါသည်။
Collagen များမလုံလောက်သည့်အခါ အထက်ပါတစ်ရှူးများသည် အားနည်း၍ ပျက်စီးလွယ်လာကြပါသည်။ ဥပမာ သွေးကြောနံရံများ အားနည်း၍ ယိုစိမ့်ခြင်းကြောင့် ပုံမှန်မဟုတ်သည့် သွေးထွက်ခြင်းများနှင့် သွေးခြည်ဥခြင်းများကို ဖြစ်ပေါ်စေနိုင်ပါသည်။
အကယ်၍ ထို Scurvy ရောဂါကို မကုသဘဲထားရှိခဲ့လျှင် ပြင်းထန်သည့် နောက်ဆက်တွဲ ကျန်းမာရေးပြဿနာများ ဖြစ်ပေါ်လာနိုင်သည့်အပြင် ဖျားခြင်း၊ အသားဝါခြင်း၊ အနာများမကျက်ခြင်း၊ ကိုယ်တွင်း အင်္ဂါများ၏ လုပ်ငန်းဆောင်တာများ အားနည်းချွတ်ယွင်းခြင်းများ ဖြစ်ပေါ်လာနိုင်သည့်အပြင် နောက်ဆုံးတွင် အသက်သေဆုံးခြင်းများပါ ဖြစ်စေနိုင်ပါသည်။
ဖြစ်ပွားစေသောအကြောင်းရင်းများ
ရှေးယခင်က Scurvy ရောဂါသည် ပင်လယ်ရပ်ခြားသို့ ကာလရှည်ကြာစွာ ရွက်လွှင့်သွားလာသည့် သင်္ဘောသားများတွင် အဖြစ်များပါသည်။
အဘယ်ကြောင့်ဆိုသော် ထိုသို့ကာလရှည်ကြာ ခရီးရွက်လွှင့်သွားလာရာတွင် ဗီတာမင် C ကြွယ်ဝသည့် အသီးအနှံများကို အလွယ်တကူရရှိစားသုံးရန် မဖြစ်နိုင်သောကြောင့် ဖြစ်ပါသည်။
ခန္ဓာကိုယ်အတွင်းသိုလှောင်ထားသော ဗီတာမင် စီ သည် ၁ လမှ ၃ လအတွင်း ကုန်ဆုံးသွားတတ်ပါသည်။
ယခုနောက်ပိုင်းတွင် ဗီတာမင် စီ အားဖြည့်ဆေးဝါးများ သောက်သုံးနိုင်မှုကြောင့် သင်္ဘောသားများတွင် အဆိုပါရောဂါဖြစ်ပွားမှု နည်းပါးလာပြီဖြစ်ပါသည်။
Scurvy ရောဂါဖြစ်ပွားရန် အလားအလာမြင့်မားသူများ
Scurvy ရောဂါသည် ဖွံ့ဖြိုးဆဲနိုင်ငံများတွင် အဖြစ်များတတ်သော်လည်း ဖွံ့ဖြိုးပြီးနိုင်ငံများတွင်လည်း ဖြစ်ပွားတတ်ပါသည်။ Scurvy ရောဂါကိုဖြစ်စေနိုင်သော အကြောင်းအချက်များစွာရှိနိုင်ပါသည်။ ၎င်းတို့အနက် အောက်ပါတို့သည် အဖြစ်များသော အကြောင်းရင်းများဖြစ်ကြပါသည်။
-ဗီတာမင် စီ နည်းပါးသော အစားအစာများကို ကာလရှည်ကြာစွာစားသုံးခြင်း
-အစားအစာ စားသောက်ပုံအလေ့အထ မူမမှန်ခြင်း
-အစားအစာများကို ပုံမှန်စားသုံးခြင်းမရှိသည့် စိတ်ပိုင်းဆိုင်ရာပြဿနာများကို ကြုံတွေ့ခံစားနေရခြင်း
-အသက်အရွယ်ကြီးရင့်ခြင်း
-အရက်အလွန်အကျွံသောက်သုံးခြင်း
-ဆေးလိပ်သောက်ခြင်း
-အူလမ်းကြောင်းအတွင်းမှ အာဟာရဓာတ်များကို စုပ်ယူခြင်းဆိုင်ရာရောဂါများကို ခံစားနေရခြင်း
-ငွေကြေးမပြည့်စုံခြင်း စသည်တို့ဖြစ်ကြပါသည်။
Author : Dr. CK
