ကိုယ်လက်လှုပ်ရှား အားကစားလုပ်ခြင်းဟာ ကျန်းမာသောလူမှုနေထိုင်မှုပုံစံဖြစ်ဖို့ရန်အတွက် အရေးပါတဲ့ အမူအကျင့်ဖြစ်ပါတယ်။ ကိုယ်လက်လှုပ်ရှား အားကစားလုပ်ခြင်းဟာ နှလုံးနှင့်အဆုတ်ကျန်းမာရေးကို တိုးတက်ကောင်းမွန်စေတဲ့အပြင် အရိုးနဲ့ကြွက်သားတွေကို သန်မာစေပါတယ်။
ဒါပေမဲ့ ကိုယ်လက်လှုပ်ရှား အားကစားလုပ်ခြင်းဟာ ကြွက်သားတွေကို နာကျင်စေတတ်ပါတယ်။ သင် လေ့ကျင့်ခန်းစလုပ်တဲ့အခါ၊လေ့ကျင့်ခန်းအသစ်စလုပ်တဲ့အခါနဲ့ လေ့ကျင့်ခန်းတွေကို ပိုတိုးလုပ်မိတဲ့အခါတွေမှာ ကြွက်သားနာခြင်းကို ခံစားရပါလိမ့်မယ်။ ဒါဟာ သင်လုပ်လိုက်တဲ့ကိုယ်လက်လှုပ်ရှား အားကစားလုပ်ခြင်းအတွက် ကြွက်သားအသစ်တွေကို သုံးရခြင်း၊ သင့်ကြွက်သားဒဏ်ပိခြင်း ဒါမှမဟုတ် အသေးစားကြွက်သားပြဲခြင်း အခြေအနေတစ်ခုခုဖြစ်နိုင်ပါတယ်။
ကိုယ်လက်လှုပ်ရှားကစားပြီးချိန် ကြွက်သားနာကျင်ခြင်းဟာ သိပ်မကြာလိုက်ဘဲ ကောင်းသွားနိုင်သလို တစ်ခါတစ်ရံ ရက်ပေါင်းများစွာ ကြာရှည်နိုင်ပါတယ်။ ကိုယ်လက်လှုပ်ရှားကစားပြီးချိန် ကြွက်သားနာကျင်ခြင်းမဖြစ်အောင် –
၁။ သွေးပူလေ့ကျင့်ခန်းလုပ်ပါ
ကိုယ်လက်လှုပ်ရှားကစားမလုပ်ခင် သွေးပူလေ့ကျင့်ခန်းလုပ်ခြင်းဟာ ကြွက်သားတွေဆီ သွေးသွားသွေးလာပိုကောင်းစေတဲ့အတွက် ဒဏ်ဖြစ်ခြင်း၊ နာကျင်ခြင်းကို မဖြစ်အောင် ၊ သက်သာအောင် ကူညီပေးနိုင်ပါတယ်။
သွေးပူလေ့ကျင့်ခန်းအတွက် ပေါ့ပေါ့ပါးပါးလှုပ်ရှားမှုလေးတွေ လုပ်လို့ရပါတယ်။
-ခပ်ဖွဖွပြေးခြင်း
-စက်ဘီးနင်းခြင်း
-ကြိုးခုန်ခြင်း
-အလေးခပ်ပေါ့ပေါ့မခြင်း
၂။ ကြွက်သားများကိုနှိပ်နယ်ပေးပါ
လေ့ကျင့်ခန်းလုပ်ပြီးချိန် ကြွက်သားတွေကို နှိပ်နယ်ပေးခြင်းဟာလည်း နာကျင်ခြင်းကို သက်သာအောင်ကူညီပေးတယ်လို့ဆိုပါတယ်။
၃။ ရေနွေးဖြင့်ရေချိုးပါ
အပူဓာတ်၊အနွေးဓာတ်ဟာ သွေးလည်ပတ်မှုကိုကောင်းစေပြီး ကြွက်သားတွေဆီ သွေးပိုရောက်စေပါတယ်။ ဒါကြောင့် ရေနွေးနွေးဖြင့်ရေချိုးပေးခြင်းဟာ ကိုယ်လက်လှုပ်ရှားကစားပြီးချိန် ကြွက်သားနာကျင်ခြင်းမဖြစ်အောင်၊သက်သာအောင် ကူညီပေးပါတယ်။
၄။ အနားယူပါ
ကိုယ်လက်လှုပ်ရှားကစားပြီးချိန် ကြွက်သားနာကျင်ခြင်းဖြစ်လျှင် နာကျင်သွားသည့်ကြွက်သားကိုထပ်အသုံးမပြုမိအောင် သတိထားအနားပေးရပါမယ်။ ဒါဟာ လေ့ကျင့်ခန်းလုံးဝမလုပ်ပဲနားခိုင်းတာမဟုတ်ပါဘူး။
နာကျင်သွားတဲ့ကြွက်သားကို သုံးစရာမလိုတဲ့အခြားပေါ့ပေါ့ပါးပါး လေ့ကျင့်ခန်းမျိုး လုပ်လို့ရပါတယ်။ ဥပမာ-သင်ပြေးခြင်းပြုလုပ်ရာမှ ကြွက်သားနာကျင်သွားပါလျှင် နောက်ရက်အနည်းငယ်လောက်မပြေးဘဲ ပေါ့ပေါ့ပါးပါးလမ်းလျှောက်ခြင်း၊ စက်ဘီးနင်းခြင်းတို့ဖြင့် အစားထိုးလုပ်နိုင်ပါတယ်။ ယျေဘုယျအားဖြင့် နာကျင်နေသောကြွက်သားအုပ်စုကို ၄၈ နာရီလောက်အနားပေးသင့်တယ်လို့ဆိုပါတယ်။
၅။ မှန်ကန်တဲ့နည်းလမ်းများသုံး၍ လေ့ကျင့်ခန်းလုပ်ပါ
နည်းလမ်းမှန်စွာ လေ့ကျင့်ခန်းလုပ်ခြင်းဟာ ကိုယ်လက်လှုပ်ရှားကစားပြီးချိန် ကြွက်သားနာကျင်ခြင်းမဖြစ်အောင်နဲ့ ကြွက်သားဒဏ်မဖြစ်အောင် ကာကွယ်ပေးပါတယ်။ သင်ဟာ GYMသွားပြီး လေ့ကျင်ခန်းလုပ်နေသူဆိုလျှင် ညွှန်ကြားသူဆရာတွေရဲ့ အကြံဥာဏ်အတိုင်း၊ ညွှန်ကြားချက်အတိုင်းလုပ်ပါ။
၆။ လေ့ကျင်ခန်းလုပ်ပြီးလျှင် အကြောလျှော့ပေးပါ
လေ့ကျင်ခန်းလုပ်ပြီးလျှင် အကြောလျှော့ပေးဖို့ အရေးကြီးပါတယ်။ လေ့ကျင့်ခန်းလုပ်ပြီးစသွေးပူနေတဲ့အချိန်မှာ သင့်ကြွက်သားတွေဟာပိုမိုပျော့ပျောင်းနေပါတယ်။
အဲဒီအချိန် အကြောလျှော့ခြင်းဟာ သွေးတွေကို နှလုံးဆီသို့ ပိုရောက်စေပြီး ကြွက်သားနာကျင်ခြင်းမဖြစ်အောင် ကူညီပေးပါတယ်။
၇။ မိမိခံနိုင်သောပမာဏအတွင်းသာ လေ့ကျင့်ခန်းလုပ်ပါ
-တစ်ခါတစ်ရံ ဖြစ်ချင်ဇောဖြင့် မိမိခံနိုင်တာထက်ပို၍လေ့ကျင်ခန်းလုပ်မိတတ်ကြပါတယ်။ ဒါဟာ ကြွက်သားဒဏ်မပိစေရန် သတိထားသင့်တဲ့ အမူအကျင့်ဖြစ်ပါတယ်။
ကိုယ်လက်လှုပ်ရှားကစားပြီးချိန် ကြွက်သားနာကျင်ခြင်းမဖြစ်အောင် လေ့ကျင်ခန်းလုပ်တဲ့အရှိန်ကို အချိန်တစ်ခုယူပြီး ဖြည်းဖြည်းမှန်မှန်တင်သင့်ပါတယ်။ အချိန်တိုအတွင်း လေ့ကျင့်ခန်းအရှိန်တင်ခြင်းက သင့်ကိုထိခိုက်စေပါတယ်။
၈။ ရေသောက်ပါ
ရေသောက်ခြင်းဟာ ကြွက်တက်ခြင်း၊နုန်းခြင်း၊ မူးဝေခြင်းမဖြစ်အောင်နဲ့ ရေဓာတ်မဆုံးရှုံးအောင် ကာကွယ်ပေးပါတယ်။
၉။ ဆေးဝါးများ
Menthol နဲ့ Capsaicin ပါတဲ့ လိမ်းဆေးတွေ လိမ်းနိုင်ပါတယ်။ ဆရာဝန်ညွှန်ကြားချက်မလိုတဲ့ အကိုက်အခဲပျောက်ဆေးတွေ( OTC ) ဥပမာ – Ibuprofen တို့ကို နာတဲ့အခါ သောက်နိုင်ပါတယ်။
၁၀။ RICE နည်းလမ်း
-သင်ကြွက်သား ဒဏ်ဖြစ်သွားပြီလို့သံသရှိပြီဆိုလျှင်တော့ RICE နည်းလမ်းဖြင့် အိမ်တွင်ကုသလို့ရပါတယ်။
R – Rest (အနားပေးပါ။)
I – Ice (ရေခဲကပ်ပါ။)
C – Compress (ဒဏ်ဖြစ်သွားသောနေရာကို ပတ်တီးပတ်ထားပေးပါ။)
E – Elevate (ဒဏ်ဖြစ်သွားသောနေရာကို တစ်နေ့လျှင် ၂ နာရီ မှ ၃ နာရီလောက် နှလုံးအထက်မြှောက်ထားပေးပါ။ )
Author: Dr. Yin Yin Win
