ယခုလို ခေတ်ရေစီးကြောင်းအရ မိုဘိုင်းဖုန်းနဲ့ အင်တာနက်သုံးစွဲလာသူများလာတာနဲ့အမျှ ကလေးများနဲ့ သက်ကြီးရွယ်အိုများအထိ မိုဘိုင်းဖုန်းကို လွယ်ကူစွာအသုံးပြုလာနိုင်ကြပါတယ်။ ဒါပေမယ့် သည်လို လွယ်ကူစွာသုံးလာနိုင်တဲ့နောက်မှာ လူအများစုဟာ ကျန်းမာရေးကိုထိခိုက်လာတဲ့အထိ ဖုန်းကိုစွဲလန်းလာကြပါတယ်။
မိုဘိုင်းဖုန်းနှင့်ကျန်းမာရေး ပြဿနာများ
ဖုန်းကြည့်ပါများတဲ့အခါ အဓိကထိခိုက်တာဟာ လည်ပင်း အရိုးအဆစ်နေရာဖြစ်ပါတယ်။ ဖုန်းကြည့်ချိန်ခေါင်းကိုငုံ့ထားတဲ့အခါ လည်ပင်း အရိုးအဆစ်များက ဦးခေါင်းရဲ့ အလေးချိန်ကို ထမ်းပေးထားရတဲ့အတွက် အချိန်ကြာလာတဲ့အခါ လည်ပင်းအရိုးအဆစ်များဟာ ဒဏ်ဖြစ်ပြီး ထိခိုက်လာပါတယ်။အသေးစိတ်ပြောရရင် ဦးခေါင်းဟာ ရှေ့ကို ၁၅ ဒီဂရီခန့်ငုံ့ထားချိန်မှာ လည်ပင်းပေါ်မှာ ၂၇ပေါင်ခန့် အလေးချိန် သက်ရောက်မှု ရှိပါတယ်။ ၃၀ဒီဂရီ ခန့်ငုံ့ထားတဲ့အခါမှာ ပေါင်၄၀ ဦးခေါင်းပေါ်မှာ သက်ရောက်မှုရှိနေပြီး ခေါင်းကို ပိုပိုငုံ့လေ လည်ပင်းပေါ်မှာ အလေးချိန် ပိုပိုသက်ရောက်လေဖြစ်ပါတယ်။ ဒါကြောင့် အချိန်ကြာလာတာနဲ့အမျှ လည်ပင်းနဲ့ဆိုင်တဲ့ ပြဿနာတွေ ပေါ်လာပါတော့တယ်။ ဖုန်းသုံးလို့ လည်ပင်းကြွက်သားများနာရတာကြောင့် ‘Text neck pain’ လို့လည်း အလွယ်ခေါ်ကြပါတယ်။
အဓိက အဖြစ်အများဆုံး လက္ခဏာတွေကတော့
လည်ပင်းတောင့်ခြင်း – လည်ပင်းကို လှုပ်ရှားမှု ပြုလုပ်တိုင်း နာပြီး တောင့်တင်းနေခြင်း၊ လည်ပင်း လှည့်ရခက်နေခြင်း၊
လည်ပင်းတစ်ဝိုက် နာနေခြင်း – အထူးသဖြင့် လည်ပင်းအောက်နားက ကိုက်ခဲနေသလို ပုံစံမျိုးနာနေတတ်ပြီး ပိုဆိုးတဲ့သူတွေဆို စူးပြီး အောင့်နေသလို ခံစားရတတ်ပါတယ်။
မထင်မှတ်သော နေရာများ နာကျင်တတ်ခြင်း – တခါတရံ ပုခုံးနဲ့ လက်မောင်းကြွက်သားများပါ တောင့်တင်းနာကျင်နေတတ်ပါတယ်။
ကြွက်သားအားနည်းခြင်း – ပုခုံးနဲ့ လက်မောင်းကြွက်သားများ အားနည်းမှုကြောင့် ပစ္စည်းများကြာကြာ မကိုင်နိုင်ခြင်း၊ လေးလံနေခြင်း၊ ခေါင်းကိုက်ခြင်း စတဲ့ လက္ခဏာများခံစားရတတ်ပါတယ်။
ဒီလို ခံစားလာရရင် ဘယ်လိုကုသရမလဲ?
အရင်ဆုံး လုပ်သင့်တာဟာ နာကျင်ခြင်းကို သက်သာစေဖို့အတွက်ပါ။
နာကျင်ခြင်းကို သက်သာဖို့အတွက် –
(၁) အကိုက်အခဲပျောက်ဆေးများ သုံးစွဲပေးရပါမယ်။ သောက်ဆေး၊ ထိုးဆေးများဟာ ဆိုးကျိုးများတာကြောင့် မသုံးစွဲလိုရင် လိမ်းဆေးများ သုံးနိုင်ပါတယ်။
(၂) လည်ပင်းလေ့ကျင့်ခန်းများ – ဘေး ဘယ်၊ညာ လှည့်၊ ခေါင်းမော့၊ ခေါင်းငုံ့ လေ့ကျင့်ခန်းကို ဖြည်းဖြည်းချင်း ပြုလုပ်ပေးပါ။
(၃) နှိပ်နယ်ပေးခြင်း
(၄) ရေခဲကပ်ခြင်း၊ ကြပ်ထုပ်ထိုးခြင်း
အလွန်အခြေအနေဆိုးဝါးပြီး ကြာရှည်စွာ နာကျင်နေတဲ့သူတွေမှာဆို နာတဲ့ အရိုးအဆစ်ထဲကို ဆေးထိုးခြင်းများပြုလုပ်နိုင်ပါတယ်။
ဒီလို မဖြစ်အောင် ဘယ်လိုလုပ်ရမလဲ?
- ဖုန်းကို တောက်လျှောက် ကြည့်တာမျိုးမလုပ်ပဲ ကြားမှာ နားချိန်ပေးသင့်ပါတယ်။ နားနေချိန်မှာ လည်ပင်းကို လေ့ကျင့်ခန်း အနည်းငယ်ပြုလုပ်ပေးသင့်ပါတယ်။
- ဖုန်းသုံးတဲ့အခါ ဖုန်းကို မိမိကို သက်တောင့်သက်သာဖြစ်စေမယ့် အနေအထားနဲ့ကြည့်ပါ။ ဥပမာ- လက်ကကိုင်ပြီးကြည့်ရင် ခေါင်းငုံ့ထားရတဲ့အတွက် စားပွဲပေါ်မှာ phone stand နဲ့တင်ပြီး ခေါင်းငုံစရာမလိုအောင် ထားတာမျိုးပါ။
- မျက်စိ ပိုမိုညောင်းစေတဲ့ ဖုန်းနဲ့အကြာကြီး typing ရိုက်ခြင်း၊ ဖုန်းကြည့်နေရင်း screen ကိုပွတ်ဆွဲပြီး မြန်မြန်ကြည့်ခြင်း စတာတွေကို အတတ်နိုင်ဆုံးရှောင်ပါ။ လက်တဖက်တည်းနဲ့ ဖုန်းကို အကြာကြီးကိုင်ပြီး ကြည့်နေခြင်းကို ရှောင်ပါ။
Author – Dr. Aye Myat Mon
