ဗီတာမင်စီ Vitamin C- ascorbic acid ဟာရေမှာပျော်ဝင်နိုင်တဲ့ ဗီတာမင်ဓါတ်တစ်မျိုးဖြစ်ပါတယ်။ ဗီတာမင်စီကို လူ့ခန္ဓာကိုယ်မှ အလွယ်တကူစုပ်ယူနိုင်ပြီး အရေးကြီးဇီဝကမ္မဖြစ်စဉ်များတွင် ပါဝင်လုပ်ဆောင်ပေးနိုင်သော ဗီတာမင်တစ်မျိုလည်းဖြစ်ပါတယ်။ ဗီတာမင်စီဟာ ကိုယ်ခံအားစနစ်၊ ခန္ဓာကိုယ်ရှိ ဆဲလ်များဖွဲ့စည်းခြင်းနှင့် အရေပြားကျန်းမာရေးမှာလည်း အဓိကကျတဲ့ဓါတ် တစ်မျိုးဖြစ်ပါတယ်။
ဗီတာမင်စီကို ခန္ဓာကိုယ်မှမထုတ်လုပ်နိုင်ဘဲ အချဉ်အရသာရှိသော အသီးအနှံများမှ အဓိကရရှိပါတယ်။ဗီတာမင်စီ မလုံလောက်သော အစားအစာ စားသောက်မှုပုံစံရှိသူများ၊ အစာစားသောက်မှု ပုံမမှန်ဝေဒနာ အေနိုရက်စီးယား anorexia ရောဂါရှိသူများ၊ ဆေးလိပ်သောက်သူများနှင့် အရက်စွဲနေသောသူများ၊ စိတ်ကျန်းမာရေးမကောင်းသော ဝေဒနာရှင်များတွင် ဗီတာမင်စီဓါတ် ချို့တဲ့မှု ခံစားရတာကို အများဆုံးတွေ့ရလေ့ရှိပါတယ်။
ခန္ဓာကိုယ်တွင်း ဆဲလ်များဓာတ်တိုးမှုကြောင့် ပျက်စီးခြင်း oxidative stress ကို ခံနိုင်ရည်ရှိအောင် ဗီတာမင်စီက ဓါတ်တိုးဆန့်ကျင်ပစ္စည်း antioxidants အနေဖြင့် ကူညီပေးပါတယ်။ ခန္ဓာကိုယ်ရှိဆဲလ်များ ယောင်ရမ်းမှုကိုလည်း သက်သာစေပါတယ်။ ခန္ဓာကိုယ်တွင်းသို့ ရောဂါပိုးမွှား ကူးစက်ခံရလျှင် သွေးဖြူဥဆဲလ်များ ထုတ်လုပ်မှုကို အားပေးပါတယ်။ ဒါ့ပြင် ဆဲလ်များ ဓာတ်တိုးမှုကြောင့် မပျက်စီးရအောင် ကာကွယ်ပေးခြင်းဖြင့် ခုခံအားကို ကောင်းစေပါတယ်။ ဗီတာမင်စီဓါတ် ချို့တဲ့လျှင် ကိုယ်ခံအားနည်းပြီး မကြာခဏ ဖျားနာတတ်ပါတယ်။
ဗီတာမင်စီဓါတ် VitaminC ဟာအရေပြားနှင့် သွေးကြောများကို ကျန်းမာစေပြီး ဒါဏ်ရာအနာများကို အနာကျက်မြန်စေပါတယ်။ ဒါ့ကြောင့် ဗီတာမင်စီဓါတ် ချို့တဲ့လျှင် အရေပြားခြောက်သွေ့ ကြမ်းတမ်းပျက်စီးခြင်း၊ အရေပြားတွင် အနီစက်များ ထွက်လာခြင်း၊အရေးအကြောင်း ၊ကြာဆူး၊ ဝက်ခြံ၊အဆီဖု၊ အမဲစက်ပြဿနာတွေ ဖြစ်နိုင်ပါတယ်။ ထိခိုက်ဒဏ်ရာကြောင့် အရေပြား အညိုအမဲ၊အကွက်စွဲ၊ အနာကျက်နှေးတာတွေ၊ ယောင်ယမ်းနာကျင်တာတွေလည်း ခံစားရနိုင်ပါတယ်။
ဗီတာမင်စီဓါတ် ချို့တဲ့တာနဲ့ ဆံပင်များခြောက်သွေ့ခြင်း၊ ခန္ဓာကိုယ် အမွှေးအမျှင်ထွက်တဲ့ မွှေးညှင်းအိတ်လေးတွေမှာ ပုံမမှန်ဖြစ်ပြီး အမွှေးရဲ့အရင်းပိုင်းတွင် သွေးထွက်ကာ အဆို့ဖောက်တံပုံစံ အမွှေးများထွက်လာတတ်ပါတယ်။ သွားဖုံးများတွင် သွေးထွက်ခြင်းနှင့် သွားများကျွတ်ခြင်းတို့အထိ ခံစားရနိုင်ပါတယ်။ ခြေသည်းလက်သည်းခွံပေါ်မှာ အစင်းကြောင်းထွက်တာ spoon-shaped ဇွန်းပုံစံ လက်သည်းခွံပုံမမှန်ဖြစ်တာတွေလည်း ဖြစ်နိုင်ပါတယ်။
ဗီတာမင်စီဓါတ် ချို့တဲ့ခြင်းကို အချိန်မှီ ကုသမှုမပြုလျှင် ၂-၃ လအတွင်း ဗီတာမင်စီချို့တဲ့ရောဂါ စကာဗီ Scurvy ကို ခံစားရနိုင်ပါတယ်။ ရှေးဦးလက္ခဏာ အနေနဲ့ အစာစားချင်စိတ်မရှိခြင်း၊ ကိုယ်အလေးချိန်ကျခြင်း၊ အလွယ်တကူ ပင်ပန်းနွမ်းနယ်ခြင်း၊ လုပ်ချင်ကိုင်ချင်စိတ်မရှိခြင်းတို့ စတင်ခံစားရတတ်ပါတယ်။ သွေးအားနည်းခြင်း၊ အရိုးနဲ့ကြွက်သားများ နာကျင်ခြင်း၊ ခန္ဓာကိုယ် အစိတ်အပိုင်းများ ယောင်ရမ်းခြင်း၊ စိတ်ခံစားမှု အပြောင်းအလဲများခြင်းနှင့် စိတ်ဓါတ်ကျခြင်းထိ ခံစားရနိုင်ပါတယ်။
လူကြီးတစ်ယောက်ရဲ့ တစ်နေ့တာ ဗီတာမင်စီ လိုအပ်ချက်ပမာဏဟာ ၉၀ မီလီဂရမ်ခန့် ရှိပါတယ်။ မိမိစားသောက်သော အစားအစာများမှတဆင့် တစ်နေ့တာလိုအပ်တဲ့ ဗီတာမင်စီပမာဏကို ရရှိနိုင်ပေမယ့် မကြာခဏ ဖျားနာတတ်သူများ၊ ရောဂါပိုးမွှား ကူးစက်နိုင်ချေ များသူများ၊ ကိုယ်ခံအားနည်းသူများ၊ ကိုယ်ဝန်ဆာင်များ အနေနဲ့ဗီတာမင်စီ ဖြည့်စွက်အားဆေးများ သောက်သုံးမယ်ဆိုရင် တစ်နေ့ကို ၁၀၀၀ မီလီဂရမ် ကျော်လွန်ပြီးမသောက်ရန် သတိပြုသင့်ပါတယ်။
Author: Dr.Yee Mon
