နှလုံးရောဂါ ဆိုတာ ချက်ချင်းအသက်အန္တရာယ် ပေးနိုင်တဲ့ရောဂါတွေထဲကတစ်ခုပါ။ တချို့တွေမှာ နာတာရှည် နှလုံးရောဂါတွေဖြစ်တတ်ကြတယ်။ နှလုံးကြီးတာ နှလုံးသွေးကြောကျဉ်းတာ စသဖြင့်ပါ။ တစ်ခါတစ်လေကျတော့လည်း နှလုံးရောဂါက ရုတ်တရက်ကို အရေးပေါ်အခြေအနေမျိုး တန်းရောက်တတ်တယ်။ နဂို နှလုံးရောဂါရှိတဲ့သူလည်းဖြစ်နိုင်တယ်။ တစ်ချိန်လုံးတောက်လျှောက်အကောင်းကြီးကနေ ထပြီးဖြစ်တာလည်းဖြစ်နိုင်တယ်။
ဆေးခန်းထိုင်နေတဲ့အတောအတွင်းမှာ နှလုံးအရေးပေါ်ဖြစ်ပြီးလာတဲ့ လူနာတစ်ချို့ကြုံဖူးတယ်။ လူနာတွေမှာ ဖြစ်နေတဲ့လက္ခဏာက သင်ခဲ့တုန်းက နဲ့ တူတာလည်းရှိသလို မတူတာလည်းရှိနေတတ်တယ်။ တစ်ကြိမ်က နေ့လည်ဖက်ကြီးဆေးခန်းထိုင်နေတုန်း အသက် လေးဆယ်ကျော် အမျိုးသမီး မောနေလို့ ဆိုပြီး အိမ်ကလူတွေ လာပို့တယ်။ လူနာကိုကြည့်တော့ မောနေလိုက်တာ။ အသက်ကို ရှိုက်ရှုရတယ်။ ချွေးစေးတွေလည်းပြန်လို့ ခြေဖျားလက်ဖျားတွေအေးလို့ လူနာကစကားကို တစ်ခါမှ တစ်လုံးလောက်ပဲ ပြောနိုင်တယ်။ လုပ်ရင်းကိုင်ရင်းမေးတော့ ရုတ်တရက်ကြီးရင်ဘတ်ထဲ တင်းကျပ်လာတယ်။ မောလာပြီးချွေးစေးပြန်လာတယ်။ အန်ချင်တာလည်းဖြစ်တယ်တဲ့။ အရင်က ဘာရောဂါမှ မရှိလို့ဘာဆေးမှလည်းသောက်မနေတာပြောတယ်။ သွေးပေါင်တိုင်းတော့ သွေးကတက်နေတယ်။
အပေါ်၁၈၀အောက်ကတော့ ၉၀ လောက်ရှိတယ်။ နှလုံးခုန်မှန်တယ်။ အောက်ဆီဂျင်ပမာဏက ကျလို့ ဆေးခန်းမှာ ECG စွဲတာရှိတော့ တစ်ခါတည်းစွဲကြည့်တော့မှ သွေးကြောပိတ်နေတာတွေ တွေ့တယ်။ လူနာကိုအောက်ဆီဂျင်ပေးပြီး သွေးကျဲဆေးပါတစ်ခါတည်းတိုက်လိုက်တယ်။ လူနာနဲ့ လူနာရှင်တွေကို ရောဂါအကြောင်းပြောပြီး ဆေးရုံကြီး မြန်မြန်သွားဖို့လိုကြောင်းပါထပ်ပြောရတယ်။ ကားတွေစီစဉ်ပြီးဆေးခန်းကအောက်ဆီဂျင်နဲ့ တစ်ခါတညိးဆေးရုံလွှဲလိုက်ရတယ်။ နှလုံးသွေးကြောပိတ်တဲ့အခါ သွေးပေါင်က ကျတာလည်းဖြစ်နိုင်တယ်။ တက်နေတာလည်းဖြစ်နိုင်တယ် ဆိုတာ သိလိုက်ရတယ်။
နောက်တစ်ခါက ဆေးခန်းရောက်ပြီး သိပ်မကြာဘူး။ မောတယ်ဆိုပြီး လူနာတစ်ယောက်လာတယ်။ အမျိုးသမီးပဲ။ အသက်လေးဆယ်ကျော်လောက်ပဲ လူနာအိမ်ကတော့ မောနေတာ နှစ်ရက်ရှိပြီလို့ပြောတယ်။ မနေ့ကလည်းဆေးခန်းသွားသေးတယ်တဲ့။ မသက်သာလို့ ဆိုပြီး ဒီမှာလာပြတာပါတဲ့။ဆီးချိုရောဂါအခံလည်းရှိပါတယ်တဲ့။ လူနာတွေ မောတယ်ပြောတိုင်း အောက်ဆီဂျင်တိုင်းနေတတ်တော့ ထုံးစံအတိုင်းကောက်တိုင်းလိုက်တယ်။ အောက်ဆီဂျင်ကောင်းနေပေမယ့် နှလုံးခုန်တာက နှေးလိုက်တာ။ လေးဆယ်ပဲရှိတယ်။ ချက်ချင်း ECG စွဲဖို့ပြင်နေတုန်း သွေးပေါင်တိုင်းတော့ သွေးပေါင်ကကျ။ လူနာကစကားတော့ပြောနိုင်တယ်။ ရင်ဘတ်အောင့်တာတွေ ဘာမှမရှိဘူးပြောတယ်။ မောနေတာတစ်ခုပဲတဲ့။ ဆီးချိုစစ်လိုက်တော့ ပုံမှန်ထက်နည်းနည်းပဲများနေတယ်။ ECG လည်းကြည့်ရော နှလုံးခုန် နှေးပြီး နှလုံးပိတ်ချင်သလို Complete heart block တွေ့ရတယ်။ လူနာကို သွေးပေါင်ကျနေတာကြောင့် အကြောလိုင်းထည့်ပေးထားလိုက်တယ်။ အောက်ဆီဂျင်မကျပေမယ့် အောက်ဆီဂျင်လေးနဲ့ပဲ ဆေးရုံကြီးကိုလွှဲလိုက်တယ်။
ဆေးခန်းမှာက သာမန်အဖျားတွေလာပြတာများပေမယ့် တစ်ခါတစ်လေမှာလည်းအရေးပေါ်အခြေအနေတွေကြုံတွေ့နိုင်တတ်ပါတယ်။ ဒီလိုအရေးပေါ်အခြေအနေတွေဆို ကိုယ်လုပ်နိုင်သလောက်လုပ်ပေးပြီး သင့်တော်ရာ ဆေးရုံကြီးကိုပဲလွှဲပါတယ်။ နှလုံးရောဂါနဲ့ပက်သက်လာရင် ဆေးရုံကြီးကတော့ တစ်ခြားနေရာတွေထက် ပိုပြီးအသင့်တော်ဆုံးပါပဲ။
Author : Dr. CST
