ရေယုန်ပေါက်တာကို အများစုကကြားဖူးပြီးသားဖြစ်မှာပါ။ ကိုယ်တိုင်လည်းဖြစ်ဖူးကြတာလည်းရှိပါတယ်။ ရေယုန်ပေါက်ရင်သေတတ်သလား လို့လည်း မေးတတ်ကြပါတယ်။ ရေယုန်အကြောင်းပြောကြရအောင်ပါ။
ရေယုန်ဆိုတာ Herpes လို့ ခေါ်တဲ့ ဗိုင်းရပ်စ်ပိုးကြောင့်ဖြစ်တာပါ။ Herpes Virus က ဖြစ်စေနိုင်တာတွေ အများကြီးပါ။ ဒီထဲမှာ ရေယုန်ပေါက်တာလည်း တစ်ခုအပါအဝင်ပါ။ ရေယုန် ဘယ်လိုစဖြစ်လဲပေါ့။ အသက်ရှူလမ်းကြောင်းကတစ်ဆင့်ကူးတာလည်းဖြစ်နိုင်တယ်။ အထိအတွေ့ကနေလည်းကူးနိုင်တယ်။ ရေယုံဖြစ်တဲ့သူမှာ အရည်ကြည်ဖုကပေါက်တဲ့အခါ ထွက်တဲ့အရည် ကတစ်ဆင့်ကူးနိုင်တာပါ။
ရေယုန် ပေါက်ပြီဆို နေရာတစ်နေရာမှာ အရည်ကြည်ဖုတွေ စုပြီးထွက်လာတတ်တယ်။ အရည်ကြည်ဖုမဖြစ်ခင်တည်းက နာနေတတ်တယ်။ ပြီးမှအရည်ကြည်ဖုတွေဖြစ်လာတာပါ။ ရေယုန်ဖြစ်တာမှာ တခြားဖျားနာတာမျိုးတော့အမြဲမတွဲတတ်ပါဘူး။ ဗိုင်းရပ်စ်ပိုးဝင်ပြီး ချက်ချင်းဖြစ်တတ်တာလည်းရှိတယ်။ အိပ်ရေးပျက်တဲ့အခါ ပင်ပန်းတဲ့အခါ မှ ဖြစ်တာလည်းရှိပါတယ်။
ရေယုန်ပေါက်တာက သက်ဆိုင်ရာအာရုံကြောဧရိယာမှာပဲဖြစ်ပါတယ်။ တစ်နေရာမှာဖြစ်လို့ နောက်တစ်နေရာကူးမယ်ဆိုရင်လည်း အာရုံကြောစနစ်တူတဲ့နေရာမှာပဲ ထပ်ဖြစ်တတ်ပါတယ်။ တစ်ခါဖြစ်ဖူးထားရင် နောက်တစ်ခါဖြစ်တဲ့အခါ ပထမနေရာမှာပဲ ခဏခဏ ပြန်ဖြစ်တတ်တာလည်းရှိပါတယ်။
ရေယုန်ဖြစ်ပြီးဆို ပထမတစ်ရက်နှစ်ရက် အရေပြားတစ်နေရာရာမှာ နာနေတတ်တယ်။ ဘာမှ မရှိသေးဘူး။ နောက်ပိုင်းမှ အရည်ကြည်ဖုတွေ စဖြစ်လာတတ်တယ်။ ခပ်တင်းတင်းလေးတွေပါ။ နာပါတယ်။ စပ်ဖျင်းဖျင်းလည်းခံစားရတတ်တယ်။ ဘေးလေးတွေလည်းနီနေတတ်တယ်။
ရေယုန်က ပုံမှန်အားဖြင့်တော့ ဆေးမလိုပါဘူး။ အလိုလိုပြန်ပျောက်တတ်တယ်။ ဒါပေမဲ့ ပိုများလာတယ်၊ အရမ်းနာတယ်၊ တခြား ဖျားနာတာချောင်းဆိုးတာတွေရှိလာရင် ဆေးကုဖို့လိုပါတယ်။
ရေယုန်တစ်ခုပဲ ဖြစ်နေတာကတော့ အရည်ကြည်ဖုတွေကို သန့်သန့်ရှင်းရှင်းထားပေးပါ။ လက်နဲ့ ခဏခဏမကိုင်ရပါဘူး။ ကိုယ်ခံအားကောင်းစေတာတွေ စားပေးပါ။ အသီးအနှံပိုစားပါ။ Vitamin C သောက်ပါ။ အိပ်ရေးလည်းဝဖို့လိုပါတယ်။ စိတ်မဖိစီးစေပါနဲ့။ ရေယုံပေါက်ရင်ရေချိုးလို့လည်းရပါတယ်။ ရေချိုးတာမှာ အရည်ကြည်ဖုကိုအရမ်း ပွတ်ဖို့မလိုပါဘူး။ ချိုးပြီးသေချာဖိသုတ်ပါ။ အရည်ကြည်ဖုပေါက်သွားတယ်ဆိုရင်လည်း Septadine သေချာပြန်ထည့်ပါ။
တစ်ခါတလေမှာတော့ ရေယုန်က ပွားလွယ်တယ်။ အရမ်းလည်းနာတတ်တယ်။ ရင်ဘတ်လို နေရာမျိုးမှာ ဖြစ်တယ်ဆိုရင် ဟိုဘက်ဒီဘက်နှစ်ဖက်လုံးဖြစ်နိုင်တယ်။ အာရုံကြောဧရိယာအတိုင်းဖြစ်တော့ ကိုယ်လုံးပတ်လည် ဖြစ်လာတတ်တယ်။ အရမ်းများလာတဲ့အခါ အသက်ရှူရတောင် ခက်လာတယ်။ နဂိုကိုယ်ခံအားမကောင်းရင် ပိုဖြစ်တတ်ပါတယ်။
အဲဒီလိုဖြစ်လာတယ်ဆိုရင်တော့ ဆေးသောက်ဖို့၊ ဆေးလိမ်းဖို့ လိုတတ်ပါတယ်။ ရေယုန်အတွက် ဆေးလိမ်း၊ ဆေးသောက်ဆိုရင် Acyclovir ကိုသုံးလို့ရပါတယ်။ သောက်ဆေးအနေနဲ့ကတော့ ဆေးရဲ့ ပမာဏလည်းမှန်ဖို့လိုတာကြောင့် လိုအပ်ရင် ဆေးခန်းပြရပါတယ်။ ရေယုန်က နာတတ်တာကြောင့်မခံနိုင်ရင် အကိုက်အခဲ ပျောက်ဆေး တစ်လုံးကို အစာစားပြီးသောက်ပေးလို့ရပါတယ်။ တစ်ခြားသော အာရုံကြောဆေးများလည်း သောက်ပေးလို့ရပါတယ်။
ရေယုန်ပေါက်ရင် သေတတ်လား မေးတတ်ကြပါတယ်။ ပုံမှန်ကတော့ မသေတတ်ပါဘူး။ ဒါပေမဲ့ ရေယုံအရမ်းပွားပြီး ကိုယ်ပတ်ပတ်လည် ဖြစ်လာတဲ့အခါ အသက်ရှူရခက်ခဲတတ်ပါတယ်။ အရမ်းလည်းနာပါတယ်။ ရေယုန်ဖြစ်ရာကနေပိုးဝင်သွားတာတွေဆို ပြည်တည်နာလည်းဖြစ်မယ်။ တခြားပိုးသတ်ဆေးတွေလည်း လိုကောင်းလိုနိုင်ပါတယ်။
ရေယုန်က တစ်ခါဖြစ်ပြီးရင် နောက်ထပ် ခဏခဏပြန်ပြန်ဖြစ်တတ်ပါတယ်။ အထူးသဖြင့်တော့ အားနည်းတာတစ်ခုခုဆို ပြန်ဖြစ်တတ်ပါတယ်။ ပထမနေရာမှာပဲ ပြန်ပြန်ဖြစ်တတ်ပါတယ်။ ဒါကြောင့် အာဟာရ မျှတအောင် စားသုံးဖို့ မှာကြားရင်း ဒီဆောင်းပါးလေးကို နိဂုံးချုပ်အပ်ပါတယ်။
Author: Dr. CST
