အမျိုးသမီးများ၏ အလှအပကို ဖျက်လိုဖျက်ဆီးပြုနေသည်မှာ ကိုယ်အလေးချိန်လွန်ကဲခြင်း (ဝခြင်း၊ အဝလွန်ကဲခြင်း) ဖြစ်သည်ဟုဆိုနိုင်သည်။
ရှေးဆိုရိုးစကားတော့ရှိပေသည်။ “လှလို့ဝလို့ဟူ၍” လှခြင်းနှင့် အတူ ဝခြင်းကို လိုက်ဖက်စွာသုံးခဲ့ကြသည်။ သို့သော် ယနေ့ခေတ် အမျိုးသမီးငယ်များသည် သွယ်သွယ်လျလျခန္ဓာကိုယ်ကိုသာပိုင်ဆိုင်လိုကြသည်။ဝခြင်းသည်အလှအပကိုဖျက်ဆီးရုံသာမက ရောဂါဖြစ်စေသောအကြောင်းရင်းဇာစ်မြစ်ဖြစ်နေ ပေသည်။ဝလျှင်နှလုံးရောဂါ၊ သွေးတိုးရောဂါ၊ သွေးချိုဆီးချိုရောဂါတို့မှစ၍ ကင်ဆာရောဂါများပင် ဖြစ်စေနိုင် သည်။ ဤတွင် ကိုယ်အလေးချိန်များသူ (ဝသူ၊ အဝလွန်ကဲသူ) များအဖို့ကိုယ်အလေးချိန်ကျစေရန် ဆောင်ရွက်ကြဖို့လိုအပ်လာပြီဖြစ်သည်။ကိုယ်အလေးချိန်ကျဖို့မှာ ပြောလွယ်အလောက်အလုပ်ခက်သည်ဟုဆိုနိုင်သည်။ကိုယ်အလေးချိန်ကျလိုသဖြင့် နေ့စဉ်ထမင်းတစ်နပ်သာစားသူများရှိသည်။တချို့ဆိုလျှင်“ပိန်ဆေး”ဟုလူသိများသော ဆေးဝါးများသုံးစွဲကြသည်။ ဆေးဝါးများတွင်ဘေးထွက်ဆိုးကျိုးများရှိသဖြင့်အဆိုပါပိန်ဆေးများပြီး ဘေးထွက်ဆိုးကျိုးများမှာလည်းအလွန်ပင်အန္တရာယ်ကြီးသည်။ အခြားသော နိုင်ငံများတွင် အလွန်အကျွံဝသူများကို ခွဲစိပ်ကုသပေးကြသည်။ အတိုင်းအတာ တစ်ခု အထိ အောင်မြင်သည်ဟု ဆိုနိုင်သည်။ အဝလွန်ကဲခြင်းသည် အစားအသောက်ကြောင့်ဟု ဆိုကြသည်။ တချို့ က အဆီဓာတ်ပါသော အစားအစာများကြောင့်ဟု အပြစ်ဖို့ကြသည်။ ကိုယ်လက်လှုပ်ရှားမှုနည်းခြင်းသည်အဝလွန်ကဲစေ သောအကြောင်းတစ်ရပ်ဖြစ်သည်။ဇီဝကမ္မဗေဒသဘောအရ အဝလွန်ကဲခြင်းသည်စွမ်းအင်သုံးစွဲမှုထက် လွန်ကဲခြင်းကြောင့်ဖြစ်သည်ဟု ဆိုနိုင်သည်။ တစ်နေ့တာစားသုံးသောအစားအစာမှစွမ်းအင်ရရှိမှုသည်ခန္ဓာကိုယ်မှသုံးစွဲသော ပမာဏထက်ပို နေပါလျှင် ဝလာမည်ဖြစ်ပေသည်။ သို့ဆိုလျှင် စွမ်းအင်ရရှိမှုကို လျော့ချလျှင်ဖြစ်စေ၊ စွမ်းအင်သုံးစွဲမှုကို တိုးမြှင့် ပေးလျှင်ဖြစ်စေ၊ကိုယ်အလေးချိန် လျော့ကျလာနိုင်သည်။စွမ်းအင်ရရှိမှုကို လျော့ချရန်အစားအစာပမာဏကိုလျော့ရုံသာဖြစ်ပေသည်။ ရှောင်ရန်မလိုပါ။ အစားအစာကို အစုံစားနိုင်သည်။ မျှတဖို့အရေးကြီးသည်။ အဓိကမှာ ပမာဏအလွန်ကဲဖို့သာဖြစ်သည်။ ဝသူများ (ပိန်လို) ကိုယ်အလေးချိန်ကျလိုလျှင်စားနေကျပမာဏထက် လေးပုံတစ်ပုံ(သို့မဟုတ်)သုံးပုံတစ်ပုံမျှ လျှော့သင့်ပေသည်။ နံနက်စာ၊ နေ့လည်စာ၊ ညစာစသည်ဖြင့် အကြိမ်အရေအတွက်လျော့ရန်မလိုပါ။ စားသုံး သည့်အခါတိုင်း ပမာဏအနည်းငယ်လျော့ချလျှင် မလွဲအသွေကိုယ်အလေးချိန်ကျပါလိမ့်မည်။ စွမ်းအင်သုံးစွဲမှု မြှင့်တင်ရန်အတွက် တက်တက်ကြွကြွ သွားလာလှုပ်ရှားရပါမည်။ လေ့ကျင့်ခန်း (ဥပမာ – လမ်းမြန်မြန် လျှောက်ခြင်း၊ စက်ဘီး စီးခြင်း၊ ရေကူးခြင်း) လုပ်နိုင်ပါက ပိုမိုကောင်းမွန်ပါသည်။ အချုပ်အားဖြင့်ဆိုရသော် ကိုယ်အလေးချိန်ကျလိုပါက –
(၁) အစားအသောက်ပမာဏလျော့ပါ။ နှစ်သက်ရာစားနိုင်ပါသည်။ အကြိမ်အရေအတွက်လျော့ရန်မလိုပါ။ စားသောအခါတိုင်းပမာဏကို လေးပုံတစ်ပုံ သို့မဟုတ် သုံးပုံတစ်ပုံခန့်လျော့ပါ။ ပမာဏလျော့ပြီး အကြိမ်အရေအတွက် ပိုမိုစားသုံးခြင်း လုံးဝမပြုရပါ။
(၂) တက်ကြွစွာသွားလာနေထိုင်ပါ။ လမ်းလျှောက်သွားနိုင်သောခရီးအတွက်ကားမစီးပါနှင့်။ အိမ်မှုကိစ္စများ (အိမ်သန့်ရှင်းခြင်း၊အဝတ် လျှော်ဖွတ် ခြင်း၊ချက်ပြုတ်ခြင်း)လုပ်ဆောင်ပါ။ကိုယ်လက်လှုပ်ရှား လေ့ကျင့်ခန်းများကို မှန်မှန် လုပ်ဆောင်ပေးပါ။ ဆေးမလိုပါ။ ခွဲစိတ်ရန်မလိုပါ။
AUTHOR – ဒေါက်တာနှင်းကေသီ
