ညှင်းပေါက်တာက အရေပြားမှိုရောဂါတစ်ခုဖြစ်ပြီး အဖြစ်များတဲ့ အရေပြားရောဂါတစ်ခုဖြစ်ပါတယ်။ ဆယ်ကျော်သက်အရွယ်များတွင် အတွေ့များပါတယ်။ အရေပြားမှိုတစ်မျိုးဖြစ်တဲ့ Malassezia furfur ဆိုတဲ့ Yeast တစ်မျိုးကြောင့်ဖြစ်ပါတယ်။
ပုံမှန်အရေပြားအရောင်ထက်ဖျော့တဲ့/ရင့်တဲ့ အစက်တွေ၊အကွက်တွေအနေနဲ့ တွေ့ရပါမယ်။ အများအားဖြင့် ရင်ဘတ်၊ ပခုံးနဲ့ ကိုယ်လုံးတွေမှာ တွေ့ရလေ့ရှိပါတယ်။ တစ်ခါတစ်ရံ မျက်နှာတွင်တွေ့ရတတ်ပါတယ်။
– ပူပြီးစွတ်စိုသောရာသီဥတု
– အဆီပြန်သောအသားအရေ
– ဟော်မုန်းပြောင်းလဲခြင်းများ
– ကိုယ်ခံအားကျဆင်းခြင်း
စတဲ့အခြေအနေတွေက ညှင်းပေါက်ခြင်းကို ဖြစ်စေပါတယ်။
ညှင်းပေါက်နေပြီဆိုလျှင် အကောင်းဆုံးကုသမှုကတော့ နားလည်တတ်ကျွမ်းတဲ့သူနဲ့ပြပြီးကုသခြင်းပဲဖြစ်ပါတယ်။ ကုသနည်းတွေမှာ လိမ်းဆေး၊ ခေါင်းလျှော်ရည်နဲ့ သောက်ဆေးတွေ ပါဝင်ပါတယ်။ ကုသမှုနည်းလမ်းတွေကတော့ ညှင်းပေါက်တဲ့ပမာဏ၊ ရောဂါကြာချိန်နဲ့ ပြင်းထန်မှုအပေါ်မူတည်ပြီး ကွဲပြားသွားလေ့ရှိပါတယ်။
အောက်ပါနည်းလမ်းများကတော့ ညှင်းပေါက်နေလျှင် ကုသလေ့ရှိတဲ့နည်းလမ်းတွေဖြစ်ပါတယ်။
၁။ လူနေမှုပုံစံ
တချို့လူနေမှုပုံစံတွေဟာ ညှင်းပေါက်ခြင်းမဖြစ်အောင်၊ ညှင်းပေါက်ခြင်းကုသရာမှာ ပိုမြန်မြန်သက်သာအောင်နဲ့ ပြန်မကြွအောင် ကူညီပေးနိုင်ပါတယ်။ အောက်ပါနည်းလမ်းတွေကတော့ ညှင်းရောဂါအတွက် အထောက်အကူဖြစ်စေမယ့် နည်းလမ်းတွေဖြစ်ပါတယ်။
– သင့်အရေပြားတွေကို အဆီပြန်စေတဲ့ အရေပြားအသုံးအဆောင်တွေကို ရှောင်ပါ။ ဘယ်အစိုဓာတ်မဆို ခန္ဓာကိုယ် မှာကြာရှည်စွာရှိနေလျှင် အရေပြားမှိုရောဂါကိုဖြစ်စေပါတယ်။
– ပေါ့ပါးချောင်ချိတဲ့ အဝတ်အစားတွေကိုသာ ဝတ်ပါ။ အထူးသဖြင့် ခြည်သားတွေဟာ လေဝင်လေထွက်ကောင်းစေတဲ့အတွက် ချွေးထွက်လျှင် မြန်မြန်ခြောက်စေပြီး အချိန်ကြာကြာစိုစွတ်မနေအောင် ကူညီပေးပါတယ်။
– နေစောင်းချိန်/နေပူအရမ်းမပြင်းတဲ့အချိန်မှာပဲ အပြင်ထွက်ပါ။ဒါဟာ နေရောင်ကြောင့် အသားအရေထိတဲ့အခါ အကွက်တွေပေါ်ခြင်းနဲ့ အသားမဲခြင်းတို့ဖြစ်တဲ့အခါ ညှင်းပေါက်ရာနေရာကို ပို၍သိသာစေတဲ့အတွက်ဖြစ်ပါတယ်။
– ကပ်စေးစေးမဖြစ်စေတဲ့နေရောင်ကာလိမ်းဆေး နေ့စဥ်လိမ်းပေးပါ။ ဒါဟာ သင့်အရေပြားကို နေရောင်ကြောင့်ထိခိုက်ခြင်းမဖြစ်အောင် ကာကွယ်ပေးပါလိမ့်မယ်။
– အပြင်ထွက်ပြီး နေရောင်အောက်မှာ အချိန်ကုန်ဆုံးရမယ်ဆိုလျှင် အရေပြားမှိုရောဂါသက်သာစေမယ့် ခေါင်းလျှော်ရည် ဒါအှမဟုတ် ဆပ်ပြာ သုံးပေးပါ။
– နေ့ချင်းပြန်ခရီးများသွားသည့်အခါမှာ လည်း ချည်သား T shirt အပိုလေးတွေ ထည့်သွားပါ။
ချွေးစိုလျှင် လဲပေးပါ။
၂။ အပျော့စားညှင်းရောဂါ
အပျော့စားညှင်းရောဂါအတွက် ဆရာဝန်ညွှန်ကြားချက်မလိုတဲ့ (OTC) အရေပြားမှိုရောဂါသက်သာစေတဲ့ ဆေးတွေပါတဲ့ Lotion, Cream, Ointment နဲ့ ခေါင်းလျှော်ရည်တွေကိုအသုံးပြုနိုင်ပါတယ်။
ဥပမာ-Clotrimazole ခရင်မ်/လိုးရှင်း
-Miconazole ခရင်မ်
-Selenium Sulphide ၁ % လိုးရှင်း
-Terbinafine ခရင်/Gel
-zinc Pyrithionee ဆပ်ပြာ
-လိမ်းဆေးများလိမ်းမည်ဆိုလျှင် လိမ်းမည့်နေရာကို ဆေးကြောပြီး ခြောက်အောင်သုတ်ပါ။
-ခပ်ပါးပါးပဲလိမ်းပါ။
-တစ်နေ့လျှင် တစ်ကြိမ် သို့မဟုတ် နှစ်ကြိမ် အနည်းဆုံး ၂ပတ်ဆက်တိုက်လိမ်းပေးဖို့ လိုအပ်ပါတယ်။
-ဆေးပါတဲ့ခေါင်းလျှော်ရည်သုံးလျှင် ၅မိနစ်မှ ၁၀မိနစ်လောက်အထိ ထားပြီးမှ ရေဆေးချပေးပါ။
-၄ ပတ်ကြာတဲ့အထိ သက်သာလာတဲ့အရိပ်အရောင်မတွေ့ပါက ဆရာဝန်နဲ့ ပြသရန်လိုအပ်ပါတယ်။
-ပိုပြီးပြင်းတဲ့ကုသမှုလိုပါလိမ့်မယ်။
-ဒါ့ပြင် အရေပြားကို နေဖြင့်တိုက်ရိုက်ထိတွေ့ခြင်းနဲ့ ခရမ်းလွန်ရောင်ခြည်နဲ့ထိတွေ့ခြင်း ရှောင်ပါ။
၃။ဆိုးရွားသောညှင်းရောဂါ
အိမ်တွင်းကုထုံးများနဲ့ မသက်သာပါက ဒါမှမဟုတ် ဆိုးရွားစွာ ညှင်းပေါက်နေလျှင် ဆရာဝန်ညွှန်ကြားတဲ့ဆေးများကို သေချာလိမ်းရန်၊ သောက်ရန် လိုအပ်ပါတယ်။ လိမ်းဆေးများ၊ ခေါင်းလျှော်ရည်များအပြင် သောက်ဆေးများပါ ပေးလေ့ရှိပါတယ်။ ညွှန်ကြားလေ့ရှိသော ဆေးများကတော့ –
– Ketoconazole Cream / Gel/ Shampoo
– Ciclopriox Cream/ Gel/ Shampoo
– Fluconazole အခဲ/ ဆေးတောင့်/ သောက်ဆေးအရည်များ
– Itraconazole အခဲ/ ဆေးတောင့်/ သောက်ဆေးအရည်များ
– Selenium Sulphide ၂.၅ % Lotion/ ခေါင်းလျှော်ရည် တို့ကို သုံးစွဲဖို့ညွှန်ကြားလေ့ရှိပါတယ်။
ညှင်းရောဂါကုသရာမှာ သတိထားရမှာကတော့ ကုသမှုအောင်မြင်စွာပြီးသွားသည့်တိုင် အရေပြားအရောင်မညီညာခြင်းဟာ ရက်ပေါင်းများစွာ၊ တစ်ခါတစ်ရံ လနှင့်ချီပြီးကြာနိုင်တယ်ဆိုတာပါပဲ။
ဒါ့ပြင် ညှင်းဟာ ရာသီဥတုပူနွေးစွတ်စိုလာလျှင် ပြန်ကြွလာတတ်ပါတယ်။ နှစ်ရှည်လပေါင်းများစွာ ကြာနေတဲ့ ညှင်းရောဂါများအတွက် တစ်ခါတစ်ရံ တစ်လလျှင် ဆေးတစ်ကြိမ် ဒါမှမဟုတ် နှစ်ကြိမ် ရောဂါပြန်မကြွအောင် သောက်ရန်/ လိမ်းရန် လိုအပ်တတ်ပါတယ်။
၄။ ဘယ်အချိန်ဆရာဝန်နှင့်ပြသင့်သလဲ
-အိမ်တွင်းကုထုံးများ(OTC ဆေးများ)နဲ့ မသက်သာလျှင် ဒါမှမဟုတ် ပြန်ဖြစ်လျှင်
-ညှင်းကွက်တွေဟာ ခန္ဓာကိုယ်နေရာတော်တော်များမျာမှာနေပြီဆိုလျှင် ဆရာဝန်နှင့်သေချာပြသပြီး ဂရုတစိုက်ကုသမှု ခံယူရပါမယ်။
Author: ဒေါက်တာယဉ်ယဉ်ဝင်း
