ဟုတ်တဲ့နေရာမှာမထူးချွန်ဘဲ မဟုတ်တဲ့နေရာမှာထူးချွန်နေရင် လူကြီးမိဘ တွေက ဒီကောင် တလွဲဆံပင်ကောင်းနေတယ်လို့ဆုံးမလေ့ရှိပါတယ်။
အမျိုးသမီးအချို့တွင်လည်း ပုံမှန်အမွေးရှိရမယ့်နေရာမှာ အမွေးမရှိဘဲ မရှိသင့်တဲ့နေရာ(ဥပမာ အမျိူးသားတွေသာရှိသင့်သော ရင်ဘတ် နှုတ်ခမ်း ခြေသလုံး စသည့်နေရာများ) တွင် အမွေးထူထပ်စွာ ပေါက်နေခြင်းသည်လည်း တလွဲဆံပင်ကောင်းခြင်းပင်ဖြစ်သည်။
ဘာလို့ဒီလိုမျိုးဖြစ်ရတာပါလဲ
အဓိကအကြောင်းရင်းကတော့ ထိုအမျိူးသမီးများတွင် Androgen(အမျိုးသားဟော်မုန်း) လွန်ကဲစွာများပြားလာခြင်းကြောင့်ဖြစ်သည်။
Androgen များလာရတဲ့အကြောင်းရင်းတွေကတော့
-သားဥအိမ်တွင် အရည်အိတ်များစွာတည်သောရောဂါ(Polycystic Ovarian Sydrome)ဖြစ်ခြင်း
-အဝလွန်ခြင်း
-တချို့သောအကျိတ်ရောဂါများခံစားနေရခြင်း(pituitary adenoma)
-စတီးရွိုက်ပါသော သောက်ဆေးများသောက်နေခြင်း
-မျိူးရိုးလိုက်ခြင်း
-ဟော်မုန်းတစ်ခုတည်းပါသော တားဆေးများသောက်ခြင်း(Progesterone Only pills) စသည်တို့ကြောင့်ဖြစ်နိုင်သည်။
ဘယ်လိုကုသရမလဲ။
တကယ်လို့ ရုတ်တရက် ရက်အနည်းငယ်အတွင်းမှာ အမွေးထူလာပြီး ရာသီထိန်သွားတာ အသံပြောင်းလာတာ တွေပါရှိခဲ့ရင်တော့ ဆရာဝန်နဲ့ပြသပြီး စစ်ဆေးမှုခံယူပါ။ ဖြစ်တဲ့အကြောင်းရာကိုလိုက်ရှာပြီးကုသရပါမယ်။
ဘာရောဂါမှ မရှိဘဲ အမွေးထူတာမျိူးဆိုရင်တော့ အောက်ပါနည်းလမ်းများကို သုံးနိုင်ပါတယ်။
၁။ရိတ်ခြင်း
သင်တုန်းဓါး မုတ်ဆိတ်ရိတ်ဓါး စတာတွေကို သုံးပြီး ရိတ်လို့ရပါတယ်။ အားသာချက်က မြန်တယ် လွယ်တယ် ငွေကုန်သက်သာတယ်။ အားနည်းချက်က မကြာခဏ ပြန်ပြီး ရိတ်နေရတတ်တယ်။ ညအခါမှာသာရိတ်သင့်ပြီး ရိတ်ပြီးခါစမှာ နေပူမိခြင်း ပင်လယ်ရေထိခြင်းတွေမဖြစ်အောင်ကာကွယ်ရပါမယ်။ အမွေးတွေ နူးညံ့နေအောင် ရေဆွတ်ခြင်း ခရင်မ်လိမ်းခြင်းတို့ကိုလုပ်ရပါမယ်။
၂။ကျောက်တုံးနဲ့ပွတ်ခြင်း
ကျောက်ပွတုံး(Pumice stone)ကိုလဲ ဓါးအစားသုံးနိုင်ပါတယ်။ ကျောက်ပွတုံးနဲ့ပွတ်တိုက်ခြင်းအားဖြင့် အမွေးတွေပြုတ်ပြီး ချောမွေ့စေနိုင်ပေမယ့် အခြောက်ပွတ်တိုက်ခြင်းကို လုံးဝမလုပ်ရပါဘူး။ အားလုံးပွန်းပဲကုန်နိုင်ပါတယ်။ ရေချိုးနေတုန်းမှာသာပွတ်တိုက်ပေးသင့်ပါတယ်။
၃။ဖယောင်းကပ်ခြင်း
အရည်ပျော်နေတဲ့ဖယောင်းကို ဇွန်းပြားကလေးနဲ့ ကလော်ပြီး အရေပြားပေါ်မှာ ဖယောင်းမခြောက်ခင်ဖြန့်သုတ်ပေးရပါတယ်။ တချို့ကတော့အပူပေးစရာမလိုတဲ့ဖယောင်းချပ်ပြားကို အရေပြားပေါ်မှာဖိကပ်ပေးရပါတယ်။ တအောင့်အကြာမှာ ကပ်နေတဲ့ဖယောင်းချပ်ကို ပလာစတာခွာသလို ဆတ်ခနဲ့ ဆွဲခွာလိုက်ရပါမယ်။ အဲ့အခါမှာ ဖယောင်းထဲမှာမြုပ်နေတဲ့ အမွေးတွေက အမြစ်ကကျွတ်ပြီး ပါကုန်ပါတယ်။
အားသာချက်က ဖယောင်းခွာပြီးစမှာ အရေပြားဟာ အမွှေးအမျှင်လုံးဝကင်းစင်သွားတာမို့ ပိုးသားလေးလိုချောမွတ်နေစေပါတယ်။တစ်လ နှစ်လလောက်ထိခံပါတယ်။ ပြန်ပေါက်လာတ့အမွေးဟာလဲ အရင်လောက်မသန်စွမ်းတော့ဘဲ ပိုပျော့ပြီး ပိုပါးနေတတ်ပါတယ်။ တစ်ကြိမ်ထက်တစ်ကြိမ်ပိုလွယ်လာပါတယ်။
အားနည်းချက်ကတော့ ဖယောင်းကပ်ဖို့ အမွေးငုတ်တိုလေးတွေဟာ အနည်းဆုံး တစ်လက်မရဲ့ လေးပုံတစ်ပုံရှိဖို့လိုပါတယ်။ ဒါမှဖယောင်းကမြဲအောင်ဆုပ်ထားနိုငမှာဖြစ်ပါတယ်။ ဖယောင်းပူကြောင့် ပူလောင်နာကျင်ခြင်းနဲ့ ဓါတ်မတည့်လို့အရေပြားယားယံခြင်းတွေလည်းဖြစ်နိုင်ပါတယ်။ အချိန်လဲပေးရပါတယ်။ ဖယောင်းအအေးချပ်ပြားကိုကပ်ပေးရင် အပူဒဏ်မခံရပေမယ့် ခွာတဲ့အခါ အမွေးအားလုံးမပါပဲ ကျိူးတိုးကျဲတဲ ကျန်နေတတ်ပါတယ်။
၄။ဆေးလိမ်းခြင်း
ဒီဘက်ခေတ်မှာ အမွေးကျွတ်ဆေးတွေအများကြီးပေါ်လာပါတယ်။ သို့သော်ကျွန်တော်ကတော့အားမပေးချင်ပါဘူး။ ဓါတ်မတည့်ဘဲ အရေပြားလောင်တာတွေဖြစ်နိုင်လို့ပါ။ မဖြစ်မနေလိမ်းချင်တယ်ဆိုရင် ဦးဆုံးလက်ဖမိုးနေရာမှာ ၁၀ပြားစေ့လောက်လေးကွက်ပြီး အရင်စမ်းလိမ်းပါ။ အမွေးလည်းကျွတ်တယ် ကိုယ့်အရေပြားနဲ့လဲတည့်တယ်ဆိုမှသုံးပါ။ ဒါတောင်ကြာရှည်သုံးမှ ဓါတ်မတည့်တာမျိုးလည်းဖြစ်နိုင်ပါတယ်။ အရေပြားပေါ်မှာခြစ်ရာ ကုတ်ရာတွေ ဓါးရှတာမျိူးတွေရှိရင် မသုံးပါနဲ့။
၅။နုတ်ခြင်း
ရှေးတုန်းကတော့ ဇာဂနာနဲ့တစ်ချောင်းချင်းစီနုတ်ပါတယ်။ အခုခေတ်မှာတော့ အမွေးနုတ်တဲ့စက်လေးတွေရှိပါတယ်။ အားနည်းချက်ကတော့ အမွေးနုတ်တဲ့အချိန်မှာနာကျင်ပါတယ်။ နုတ်ပြီးအချိန်မှာလည်း နာနေ ရောင်နေ ယားနေတာတွေလည်းခံစားရနိုင်ပါတယ်။ အရေပြားမှာ ယားနာတွေ မိတ်တွေပေါက်နေရင်လဲ မသုံးသင့်ပါဘူး။
အဆုံးသတ်အနေနဲ့အကြံပေးချင်တာကတော့ ဦးဆုံးဖယောင်းကပ်တဲ့နည်းကိုသုံးပြီး အမွေးအတော်ကျဲသွားတဲ့အခါ ရိတ်တဲ့နည်း နုတ်တဲ့နည်းတွေကို လုပ်ကြည့်ပါလို့ ပြောလိုပါတယ်။
Author : Dr 528
