ခေါင်းတစ်ခြမ်း ကိုက်တတ်တယ်ဆိုတာက အသက် ၂၀ ၊ ၃၀ အရွယ်တွေမှာ အဖြစ်များပါတယ်။ ခေါင်းတစ်ခြမ်းကိုက်တိုင်း Migraine လို့ခေါ်တဲ့ ရောဂါအပြင် တခြားရောဂါတွေလည်း ဖြစ်နိုင်ပါတယ်။ ဒီထဲမှာမှ Migraine က ပိုပြီးအဖြစ်များပါတယ်။
သေချာတာတစ်ခုကတော့ ခေါင်းတစ်ခြမ်းကိုက်တတ်တဲ့သူတွေက ခဏခဏ ပြန်ပြန်ဖြစ်နေတတ် ပါတယ်။ ကိုက်တတ်တဲ့ဘက်ကလည်း တူနေတတ်တာ များပါတယ်။ ရောဂါတွေအလိုက် ကုသပုံတွေ မတူညီ ကြပါဘူး၊ ဒါကြောင့် Migraine လား၊ တခြားကြောင့်လား သေချာခွဲခြားဖို့လိုပါတယ်။ Migraine က အမျိုးသမီး တွေမှာ ပိုဖြစ်တတ်ပါတယ်။ တစ်ယောက်နဲ့ တစ်ယောက်တောင်ဖြစ်ပုံခြင်း မတူတတ်ကြပါ။
တစ်ချို့က ခေါင်းမကိုက်ခင် တစ်နာရီလောက်အတွင်းမှာ တစ်ခုခုကို ကြိုပြီး ခံစားရတတ်ကြပါတယ်။ အမြင်အာရုံပြာလာတာ၊ အမည်းစက်တွေ၊ လိုင်းတွေပေါ်နေတတ်ပါတယ်။ ခန္ဓာကိုယ်အစိတ်အပိုင်းတွေ မလှုပ်နိုင်တာ၊ ထုံကျင်တာ၊ စကားလိပ်တာ စသဖြင့် ဖြစ်တတ်ကြလို့ လေဖြတ်ချင်တယ်လို့တောင် ထင်တတ် ပါတယ်။ ဒါပေမယ့် Migraine ကြောင့်ဖြစ်တာတွေက အများဆုံးနာရီဝက်ပဲ ကြာတာပါ။ ပြီးရင် ပြန်ကောင်း လာပါတယ်။ တစ်ချို့က ဒီလိုမဖြစ်ဘဲ ခေါင်းသာကိုက်တတ်ကြပါတယ်။ Migraine ကြောင့် ခေါင်းကိုက်တဲ့အခါ အထဲကနေ ထိုးပြီး ကိုက်နေသလို ခံစားရပါတယ်။ တခါ ကိုက်ရင် ၄ နာရီကနေ ၇ နာရီအထိ ကြာနိုင်ပါတယ်။ ပျို့တာ၊ အန်တာ၊ အလင်းရောင်မခံနိုင်တာတွေ ဖြစ်နိုင်ပါတယ်။ ခေါင်းတစ်ခါကိုက်ရင် နေ့စဉ် လုပ်နေကျ အလုပ်တွေတောင် မလုပ်နိုင်လောက်အောင် ဒုက္ခပေးတာပါ။
စိတ်ဖိစီးတတ်တဲ့ သူ၊ ချောကလက်၊ ချိစ် စားတာ၊ အရက်၊ coffee သောက်တဲ့သူတွေ၊ တားဆေး သောက်တဲ့ သူတွေမှာ Migraine ဖြစ်တတ်ပါတယ်။ တားဆေးသောက်တဲ့သူတွေမှာမှ အသက် ၃၅ နှစ် ကျော်ရင် ၊ ဝရင်၊ သွေးတိုးဆီးချိုရှိရင် ၊ ဆေးလိပ်သောက်တတ်ရင် Migraine ပိုဖြစ်လွယ်ပါတယ်။ အမျိုးသမီး များ ရာသီလာခါနီး ရက်များမှာလည်း Migraine ဖြစ်တတ်ပါတယ်။
Migraine ဖြစ်တဲ့သူတွေက ကိုယ်ဝန်ဆောင်တဲ့အခါ သက်သာသွားတတ်ကြတာလည်းရှိသလို မသက် သာဘဲ ပိုဆိုးနေရင်တော့ ကိုယ်ဝန်ဆိပ်တက်ခြင်း၊ နှလုံးသွေးကြောဆိုင်ရာ ပြဿနာများ ဖြစ်နိုင်ချေ ရှိပါတယ်။
Migraine ဖြစ်တဲ့သူတွေက ခံစားရတာ ဆိုးပါတယ်။ ဖြစ်တဲ့သူတွေမှာတောင် တစ်ယောက်နဲ့ တစ်ယောက် မတူပါဘူး၊ ဆေးသောက်တဲ့အခါ ပျောက်သွားပြီး နောက်ပိုင်း ပြန်ပြန်ဖြစ်လိုက် ဖြစ်နေတတ် ပါတယ်။ စိတ်က ဖိစီးလေပိုဆိုးလေ ဖြစ်လာတတ်ကြပြီး စိတ်ထဲမှာ သို့လော သို့လောနဲ့ ကင်ဆာများ ဖြစ်နေ တာလားဆိုပြီး စစ်ဆေးမှုတွေ လုပ်လာချင်ကြပါတယ်။
Migraine က စစ်ဆေးမှုတွေလုပ်လည်း ဘာမှမတွေ့ရပါဘူး။ Migraine ဖြစ်တတ်တဲ့သူတွေက ဖြစ်စေ တဲ့ အကြောင်းတွေကို လျှော့ချရပါတယ်။ ဝတဲ့သူတွေက ခန္ဓာကိုယ် အလေးချိန်လျော့ရမှာပါ။ Coffee၊ ချောကလက်၊ ချိစ် စားတာတွေ လျှော့ရပါတယ်။ ဆေးလိပ်၊ အရက် သောက်တတ်ရင် လျှော့ရမှာပါ။
ခေါင်းကိုက်တဲ့အခါ ရေနွေးအိတ်ကပ်တာဖြစ်ဖြစ် ၊ ရေခဲကပ်တာ ဖြစ်ဖြစ် သက်သာရာကို လုပ်ပေးလို့ ရပါတယ်။ အကြောလျှော့ရပါတယ်၊ ပလတ်စတစ်အိတ်ထဲကို အသက်ရှူသွင်းရှူထုတ်လည်း လုပ်လို့ရပါတယ်။ Vitamin B2 တို့ မဂ္ဂနီစီယမ်တို့လည်း သောက်လို့ရပါတယ်။ တားဆေးသောက်တဲ့သူတွေမှာ ဖြစ်ရင်တော့ တားဆေးသောက်ပုံ သောက်နည်းတွေကို သားဖွားမီးယပ် အထူးကုတွေနဲ့ သေချာဆွေးနွေး တိုင်ပင်ရမှာ ပါ။
Migraine ဖြစ်တဲ့အခါ ပုံမှန်အားဖြင့် အကိုက်အခဲ ပျောက်ဆေးပဲ သောက်ရတာပါ။ သက်သာ တတ်ကြပါတယ်။ တကယ်လို့များ Migraine ဖြစ်တာက တစ်လထဲမှာ ၂ ခါနဲ့ အထက် ဖြစ်လာရင်သော် လည်းကောင်း၊ တစ်လထဲမှာ ၁၅ ရက်ကျော်လောက် ခေါင်းကိုက်နေရင်သော်လည်းကောင်း၊ ဆေးဘယ်လို သောက်သောက် မသက်သာရင်လည်းကောင်း ဖြစ်လာတဲ့အခါ အထွေထွေသမားတော်ဖြစ်စေ၊ ဦးနှောက်နဲ့ အာရုံကြောသမားတော်ဖြစ်စေ ပြသပြီး ဆွေးနွေးတိုင်ပင်ကြဖို့လိုပါတယ်။
