အစာအိမ်ကင်ဆာ၏လက္ခဏာများ
အစာအိမ်ကင်ဆာ၏ အစောပိုင်းလက္ခဏာများသည် တိတိကျကျမရှိပေ။ ထို့ကြောင့် အောက်ပါလက္ခဏာများ တစ်စုံတစ်ခုပေါ်ပေါက်လာပါက စောစီးစွာစစ်ဆေးမှုခံယူသင့်ပါသည်။
- ပျို့ခြင်း၊
- အစားအသောက်ပျက်ခြင်း
- ဝမ်းဗိုက်၏ အပေါ်ခြမ်းတွင် မအီမသာဖြစ်ခြင်း
- အစားအစာများမျိုချရခက်ခဲခြင်း
- အစားအစာအနည်းငယ်စားပြီးသည်နှင့် ပြည့်အင့်သကဲ့သို့ခံစားရခြင်း စသည်တို့ဖြစ်ကြပါသည်။
အကယ်၍ကင်ဆာသည် ပိုမို၍ဆိုးရွားလာပါက အောက်ပါလက္ခဏာများကိုခံစားရမည်ဖြစ်ပါသည်။
- အားမရှိသကဲ့သို့ခံစားရခြင်း
- ကိုယ်အလေးချိန်ကျခြင်း
- သံဓါတ်ချို့တဲ့မှုကြောင့်ဖြစ်ပေါ်လာသော သွေးအားနည်းရောဂါခံစားရခြင်း
- သွေးအန်ခြင်း သို့မဟုတ် ကော်ဖီရောင်အန်ခြင်း
- ဝမ်းအမည်းရောင်များသွားခြင်း စသည်တို့ ဖြစ်ကြပါသည်။
အစာအိမ်အနာ၏ရောဂါလက္ခဏာများ
အစာအိမ်အနာသည်လည်း ပုံမှန်အားဖြင့် ရောဂါလက္ခဏာများပြသလေ့မရှိပါ။
တစ်ခါတစ်ရံ ပြင်းထန်သည့် နောက်ဆက်တွဲပြဿနာများဖြစ်သည့် သွေးယိုစိမ့်ခြင်း သို့မဟုတ် ဝမ်းဗိုက်အပေါ်ခြမ်း ဆိုးဆိုးရွားရွားရုတ်တရက်အောင့်ခြင်းများသည် အစာအိမ်အနာ၏ ပထမဆုံးလက္ခဏာများဖြစ်နေတတ်ပါသည်။
အစာအိမ်အနာတွင် အတွေ့ရအများဆုံးရောဂါလက္ခဏာမှာ ဝမ်းဗိုက်အောင့်ခြင်းဖြစ်ပါသည်။
ထိုသို့ ဗိုက်အောင့်ခြင်းသည်
- ဝမ်းဗိုက်၏အပေါ်ခြမ်းအလယ်ဘက် တစ်နည်းအားဖြင့် ချက်နှင့်ရင်ညွန့်ရိုးအကြားတွင် အောင့်တတ်ပါသည်။
- ထိုသို့အောင့်သည့်အခါ ပူလောင်၍ ကျောထိတိုင်အောင် အဆက်မပြတ်အောင့်နေတတ်ပါသည်။
- အစားအစာ စားပြီးသည့်အချိန် နာရီပေါင်းများစွာကြာအောင် အောင့်နေတတ်ပါသည်။
- တစ်ခါတစ်ရံ ညဘက်နှင့် မနက်ခင်းအချိန်များတွင် ပိုမိုဆိုးရွားတတ်ပါသည်။
- မိနစ်အနည်းငယ်မှ နာရီပေါင်းများစွာ ကြာတတ်ပါသည်။
- အစာစားလိုက်လျှင်သော်လည်းကောင်း၊ အက်ဆစ်ထွက်ခြင်းကို သက်သာစေသည့် ဆေးဝါးများကို သောက်လိုက်လျှင်သော်လည်းကောင်း၊ အန်လိုက်လျှင်သော်လည်းကောင်း နာကျင်မှုသက်သာသွားတတ်ပါသည်။
အစာအိမ်အနာဖြစ်ခြင်း၏အခြားလက္ခဏာများမှာ ပျို့ခြင်း၊ အန်ခြင်း၊ အစားအသောက်ပျက်ခြင်း၊ ကိုယ်အလေးချိန်လျော့ကျခြင်းတို့ ဖြစ်ကြပါသည်။
ပြင်းထန်သည့်အစာအိမ်အနာများသည် အစာအိမ်နှင့်အူသိမ်ဦးပိုင်းတို့တွင် သွေးယိုစိမ့်မှုများဖြစ်စေနိုင်ပါသည်။
ထိုသို့သွေးယိုစိမ့်မှုသည် တစ်ခါတစ်ရံ အစာအိမ်အနာတွင်တွေ့ရသော တစ်ခုတည်းသောလက္ခဏာ ဖြစ်နေတတ်ပါသည်။
သွေးယိုစိမ့်သည့်အခါတွင်လည်း လျင်မြန်စွာ သွေးယိုစိမ့်ခြင်းနှင့် ဖြည်းညင်းစွာသွေးယိုစိမ့်ခြင်းများ ဖြစ်ပွားတတ်ပါသည်။
လျင်မြန်စွာသွေးယိုစိမ့်သည့်အခါ အောက်ပါလက္ခဏာများ ပေါ်ပေါက်လာတတ်ပါသည်။
- သွေးအန်ခြင်း သို့မဟုတ် ကော်ဖီရောင်အန်ခြင်း
- ဝမ်းအမည်းရောင်၊ ကတ္တရာစေးအရောင်သွားခြင်း သို့မဟုတ် ဝမ်းအတွင်းသွေးပါခြင်းစသည်တို့ ဖြစ်ကြပါသည်။
ဖြည်းညင်းစွာသွေးယိုစိမ့်သည့်အခါ ထူးခြားသည့်လက္ခဏာများမပြတတ်သောကြောင့် တစ်ခါတစ်ရံ သတိထားမိရန် ခက်ခဲတတ်ပါသည်။
ထို့အပြင် သွေးယိုစိမ့်မှုကြောင့် သွေးအားနည်းရောဂါဖြစ်ပေါ်လာသောအခါ ကိုယ်လက်မလှုပ်မရှားချင်ဖြစ်ခြင်း၊ အားအင်မရှိသကဲ့သို့ဖြစ်ခြင်း၊ အားနည်းနေခြင်း၊ ရင်တုန်ခြင်း၊ အရေပြားဖြူဖျော့နေခြင်း စသည့်လက္ခဏာများလည်းဖြစ်ပေါ်လာတတ်ပါသည်။
Author : Dr. CK
