ဝက်ခြံကင်းစင်ပြီးလှပတဲ့ အသားအရေပိုင်ရှင်ဖြစ်ဖို့ လိုအပ်သော ဗီတာမင်များ။

ဝက်ခြံထွက်ခြင်းသည် အသက်အရွယ်မရွေး ကြုံတွေ့ရတတ်သော အရေပြားပြဿနာတစ်ခုပင်ဖြစ်ပါသည်။

ထိုသို့ဖြစ်ရခြင်း၏အကြောင်းရင်းမှာ အရေပြားအတွင်း အဆီဓာတ်အလွန်အကျွံ ထုတ်လုပ်ခြင်းနှင့် အရေပြားပေါ်တွင် ဆဲလ်သေများစုဝေးများပြားလာမှုကြောင့် ဘက်တီးရီးယားပိုးများပေါက်ပွားလာခြင်းကြောင့် ဖြစ်ပါသည်။

ထို့ပြင် ဟော်မုန်းဓာတ်ပြောင်းလဲခြင်းနှင့် မိသားစုဝင်များတွင် ဝက်ခြံထွက်သည့် ရာဇဝင်ရှိခြင်းများသည် လည်း  ဝက်ခြံထွက်ရခြင်း၏ အကြောင်းရင်းများဖြစ်ကြပါသည်။

ဝက်ခြံထွက်စေသည့် အကြောင်းရင်းများ ရှိသကဲ့သို့ ဝက်ခြံကို သက်သာစေနိုင်သည့် အရာများလည်း ရှိပါသည်။ အောက်ပါဗီတာမင်ဓာတ်များသည် ဝက်ခြံထွက်ခြင်းကို ကာကွယ်ပေးနိုင်သော ဗီတာမင်များ ဖြစ်ကြပါသည်။

( ၁ ) Vitamin A

ဗီတာမင် အေ သည် မျက်နှာအရေပြားတွင်အဆီဖြစ်ပေါ်ခြင်းကို  လျော့နည်းစေခြင်းအားဖြင့် ဝက်ခြံထွက်ခြင်းကို ကာကွယ်ပေးပါသည်။ ထို့အပြင် ဗီတာမင်အေ သည် ဓာတ်တိုးဆန့်ကျင် ပစ္စည်းတစ်မျိုးဖြစ်ပြီး  ခန္ဓာကိုယ်အတွက် ဆိုးကျိုးဖြစ်စေသော အဆိပ်အတောက်များကို ဖယ်ရှားပေးနိုင်သော အာနိသင်ရှိကြောင်းလည်း တွေ့ရှိရပါသည်။

ထို့ကြောင့် ဝက်ခြံပျောက်လိမ်းဆေးအများစုကို ဗီတာမင် အေ ကို အခြေခံ၍ထုတ်လုပ်ထား ကြောင်း  တွေ့ရှိရပါသည်။

ထို့ကြောင့် ဗီတာမင် အေ ပါဝင်မှုများပြားသော ဆေးဝါးများကို ဝက်ခြံပျောက်လိမ်းဆေးခရင်မ်များနှင့် အတူတကွ သုံးစွဲမှုမပြုလုပ်ရန် သတိပြုရပါမည်။ ထိုသို့ အတူတကွ အသုံးပြုမိပါက အရေပြားခြောက်သွေ့ခြင်းကို ဖြစ်စေနိုင်သောကြောင့် ဖြစ်ပါသည်။

ဗီတာမင် အေ ပေါကြွယ်၀သော အစားအစာများမှာ

ဟင်းနုနွယ်၊ ဘရိုကိုလီ၊ မုန်လာဥနီ၊ သရက်သီး၊ ရွှေဖရုံသီး၊ ကျောက်ကပ်၊ အသည်း၊ ဥအနှစ်၊ ထောပတ်၊ နို့၊ ချိစ် နှင့် ငါးအသည်း၏အဆီ စသည်တို့ဖြစ်ကြပါသည်။

( ၂ ) Vitamin B complex

လေ့လာတွေ့ရှိချက်များအရ စိတ်ဖိစီးမှုများခြင်းသည်လည်း ဝက်ခြံထွက်ခြင်း၏အကြောင်းရင်း တစ်ရပ်ဖြစ်ကြောင်းတွေ့ရပါသည်။ Vitamin B complex သည် စိတ်ဖိစီးမှုကို လျှော့ချပေးနိုင်သဖြင့် ဝက်ခြံကို ကာကွယ်ရန် Vitamin B complex ကို‌ သောက်သုံးနိုင်ကြောင်းတွေ့ရှိရပါသည်။

( ၃ ) Vitamin B 5 (Pantothenic acid )

Vitamin B5 သည် အရေပြားရှိ အဆီဓာတ်ကို ခြေဖျက်ရန်လိုအပ်သော  Coenzyme A ဟူသော အင်ဇိုင်းဓါတ်ထုတ်လုပ်ရာတွင် အရေးပါသော ဗီတာမင်တစ်မျိုးဖြစ်ပါသည်။ ၎င်းပြင် စိတ်ဖိစီးမှုကို လျှော့ချပေးနိုင်သော ဂုဏ်သတ္တိလည်းရှိသောကြောင့် ဝက်ခြံထွက်ခြင်းကို ကာကွယ်ပေးနိုင်ကြောင်း တွေ့ရှိရပါသည်။

( ၄ ) Vitamin C (Ascorbic acid)

Vitamin C သည် ဓာတ်တိုးဆန့်ကျင်ပစ္စည်းတစ်ခုဖြစ်ပြီး ခန္ဓာကိုယ်၏ ခုခံအားစနစ်နှင့် ရောဂါကူးစက်ခြင်းကို ကာကွယ်ပေးနိုင်သော ဗီတာမင်တစ်မျိုးဖြစ်ပါသည်။ ဝက်ခြံအတွင်းတွင်  ပေါက်ဖွားတတ်သော ဘက်တီးရီးယားပိုးမွှားများကိုလည်း ဖယ်ရှားရှင်းလင်းပေးနိုင်သော အရည်အသွေးလည်းရှိကြောင်းတွေ့ရှိရပါသည်။ ထို့ပြင် ဝက်ခြံအမာရွတ်များ ပြန်လည်သက်သာစေရန် လိုအပ်သည့် အာဟာရဓါတ်များကို အူလမ်းကြောင်းမှ စုပ်ယူရာတွင်လည်း Vitamin C က ကူညီပေးပါသည်။

Vitamin C ကို သံပုရာသီး၊ လိမ္မော်သီး၊ မာလကာသီး၊ ဇီးသီး၊ ကီဝီသီး၊ဟင်းနုနွယ်၊ ဂေါ်ဖီထုပ်၊အာလူး၊ ခရမ်းချဉ်သီး စသည့်ဟင်းသီးဟင်းရွက်နှင့် သစ်သီး၀လံများတွင် ပေါကြွယ်၀စွာတွေ့ရှိရပါသည်။

( ၅ ) Vitamin E

Vitamin E သည် ဝက်ခြံပျောက်ပြီးနောက် ကျန်ရစ်သော အမာရွတ်များကို သက်သာ ပျောက်ကင်းစေ နိုင်သော ဗီတာမင်ဓာတ်တစ်မျိုးဖြစ်ပါသည်။

ထို့အပြင် နေရောင်ခြည်နှင့်ထိတွေ့မှုကြောင့် ရရှိနိုင်သော ခရမ်းလွန်ရောင်ခြည်အန္တရာယ်မှလည်း ကာကွယ်ပေးနိုင်ကြောင်းတွေ့ရှိရပါသည်။

မြေပဲဆီ၊ နေကြာဆီ၊ ပြောင်းဖူးဆီ၊ နို့၊ အသား၊ ထောပတ်နှင့် ဥများတွင် Vitamin E  ပေါကြွယ်၀စွာ ပါဝင်ကြောင်းတွေ့ရှိရပါသည်။

( ၆ ) Vitamin K

ဝက်ခြံကြောင့် အရေပြားခြောက်သွေ့ခြင်းနှင့် အရေပြားအရောင်ပြောင်းခြင်းတို့ကို Vitamin K  က ပြန်လည်သက်သာ ကောင်းမွန်စေနိုင်ပါသည်။  ထို့ပြင် Vitamin K သည် မျက်နှာရှိအရေးအကြောင်းများ ထွက်ပေါ်ခြင်းနှင့် မျက်ကွင်းညိုခြင်းတို့ ကိုလည်း ကာကွယ်ပေးနိုင်ကြောင်းတွေ့ရှိရပါသည်။

( ၇ )  Vitamin B 2 (Riboflavin)

Vitamin B2 သည် အရေပြား၊ ဆံပင်နှင့် လက်သည်း တို့ကို ကောင်းမွန်ကျန်းမာစေသော အာဟာရဓာတ်တစ်မျိုးဖြစ်ပါသည်။

ထို့အပြင် Vitamin B2 ချို့တဲ့ခြင်းကြောင့်လည်း ဝက်ခြံထွက်နိုင်ကြောင်းတွေ့ရှိရပါသည်။ ထို့ကြောင့် ဝက်ခြံကင်းစင်သော အသားအရေပိုင်ဆိုင်နိုင်ရန် Vitamin B2 များပြားစွာ ပါဝင်သော အစားအစာများကို စားသုံးရန်လိုအပ်ပါသည်။

နို့၊ နို့ထွက်ပစ္စည်းများ၊ ဥ၊ အသား၊ အသည်း ၊ ငါး၊ သစ်သီး၀လံများနှင့် ဟင်းသီးဟင်းရွက်များ စသော အစားအစာများတွင် Vitamin B 2  ပြည့်၀စွာပါဝင်ကြောင်းတွေ့ရှိရပါသည်။

( ၈ )     Vitamin B3 (Niacin)

Vitamin B3 သည် သွေးလည်ပတ်မှုကိုကောင်းမွန်စေပြီး ကာဗိုဟိုက်ဒရိတ်ဓာတ်၊ အဆီဓာတ်နှင့် အသားဓာတ်တို့၏ ခြေဖျက်မှုတွင်  အထောက်အကူပေးသော ဗီတာမင်ဓာတ်တစ်မျိုးဖြစ်ပါသည်။ထို့ပြင် အရေပြားဆဲလ်များမှ အဆိပ်အတောက်များကို ဖယ်ရှားပေးနိုင်သော ဂုဏ်သတ္တိလည်းရှိကြောင်း တွေ့ရှိရပါသည်။

သို့သော် Vitamin B3 ကို လိုအပ်သော ပမာဏထက်ပို၍လိမ်းမိလျှင် အရေပြားပြဿနာများ ဖြစ်နိုင်သဖြင့် သတိပြုရန်လိုအပ်ပါသည်။

Vitamin B3 ပေါကြွယ်၀သော အစားအစာများမှာ တစေး၊ အသည်း၊ ပဲ၊ မြေပဲ၊ ငါး၊ ဥ၊ နို့ နှင့်ဟင်းသီးဟင်းရွက်စသည်တို့ဖြစ်ပါသည်။

Author : Dr. မိုး (ဆေး ၁)