ရင်သွေးလေးတစ်ဦးမွေးဖွားလာတဲ့အခါ ဖေဖေမေမေတို့ဟာ မိမိကလေးလေးရဲ့ ချက်ကြိုးကို တန်ဖိုးထားပြီး အမှတ်တရသိမ်းဆည်းတတ်ကြပါတယ်။ ချက်ကြိုးဆိုတာ ကိုယ်ဝန်ဆောင်စဥ်မှာ မိခင်နဲ့ ရင်သွေးလေးကို ဆက်သွယ်ပေးထားတဲ့ တစ်ခုတည်းသော အရာဖြစ်သလို ထိုချက်ကြိုးလေးကနေပဲ မိခင်ဆီက အာဟာရတွေ အားလုံးကို ရရှိလာပြီး ဖွံ့ဖြိုး ရှင်သန်လာနိုင်တာပဲဖြစ်ပါတယ်။ ဒါကြောင့်မို့လည်း ရင်သွေးလေးတွေ မွေးဖွားပြီးတဲ့အခါ ချက်ကြိုးအပြတ်လေးကို အသေအချာ တန်ဖိုးထားသိမ်းဆည်း ကြတာဖြစ်ပါတယ်။
ဒီအကြောင်းနဲ့ ဆက်စပ်ပြီး ဗိုက်ထဲက ကလေးဟာ မိခင်ဆီကနေ ဘယ်လိုနည်းနဲ့ အာဟာရတွေ ရရှိနိုင်သလဲဆိုတာ ပြောပြပေးသွားပါမယ်။
Placenta ဖြစ်ပေါ်လာပုံ
မိခင်ရဲ့ သားအိမ်မှာ သန္ဓေစတည်ပြီး ရက်သတ္တပတ် ၁၂ ပတ်မြောက်မှာ သန္ဓေသားဖွံဖြိုးလာခြင်းနဲ့အတူ သားအိမ်နံရံမှာလည်း သန္ဓေသားနဲ့မိခင်ကို ဆက်သွယ်ပေးတဲ့ အချင်းတိုင် (Placenta) ဖြစ်ပေါ်လာပါတယ်။ Placenta ဟာ သွေးကြောမျှင်များစွာနဲ့ ဖွဲ့စည်းထားပြီး သန္ဓေသားရဲ့ ချက်ကြိုးနဲ့ ဆက်နွှယ်နေပါတယ်။
Placenta ရဲ့ ပတ်ပတ်လည်မှာရှိတဲ့ အလွှာပါးလေးဟာ မိခင်ရဲ့ သွေးကြော နဲ့ သန္ဓေသားရဲ့ သွေးကြောတွေကို ခြားပေးထားပါတယ်။ ဒါကြောင့် မိခင်ရဲ့ သွေးကြောဆီကနေ မလိုလားအပ်တဲ့ ဓာတ်ပစ္စည်း တွေ မဝင်ရောက်နိုင်အောင် တားဆီးပေးပါတယ်။ ကိုယ်ဝန်ဆောင်ချိန် ထွက်လာတဲ့ဟော်မုန်းတွေဖြစ်တဲ့ HCG, Estrogen , Progesterone စတာတွေကိုလည်း Placenta ကပဲ ထုတ်လွှတ်ပေးပါတယ်။ Placenta ဟာ ကိုယ်ဝန် ၃၄ပတ် ရောက်တဲ့အခါမှာ ရင့်မာလာပါတယ်။
Umbilical Cord (ချက်ကြိုး) သို့မဟုတ် သန္ဓေသား၏ အသက်သွေးကြော
မိခင်ဆီက အာဟာရ အလုံးစုံနဲ့ သွေးတွင်းအောက်ဆီဂျင်ကို ချက်ကြိုးကနေတစ်ဆင့် သန္ဓေသားဆီသို့ ပို့ဆောင်ပေးပါတယ်။ မိခင်ရဲ့အချင်းတိုင်နဲ့ သန္ဓေသားကို ဆက်သွယ်ပေးထားတာကတော့ သန္ဓေသားရဲ့ ချက်ကြိုး (Umbilical cord) ပဲဖြစ်ပါတယ်။
Umbilical Cord ဟာ သွေးလွှတ်ကြော နှစ်ချောင်း (Umbilical Arteries) နဲ့ သွေးပြန်ကြောတစ်ချောင်း (Umbilical Vein) တို့နဲ့ ဖွဲ့စည်းထားပါတယ်။ မိခင်ဆီက အာဟာရအလုံးစုံနဲ့ အောက်ဆီဂျင်ကို Umbilical cord ရဲ့ သွေးလွှတ်ကြောကနေ ကလေးဆီ ပို့ဆောင်ပေးပြီး အညစ်အကြေး၊ အဆိပ်အတောက်တွေကိုတော့ သွေးပြန်ကြောကနေတစ်ဆင့် မိခင်ရဲ့ သွေးကြောထဲသို့ ပြန်လည် ပို့ဆောင်ပေးပါတယ်။
ချက်ကြိုးဟာ မွေးဖွားခါနီး ကလေးတစ်ဦးမှာ 50 cm ခန့် ရှည်လျားတယ်လို့ သိရပါတယ်။ ကိုယ်ဝန် ၃ ပတ်မြောက်မှာ စတင် ဖြစ်ပေါ်လာပြီး ကိုယ်ဝန် ၇ ပတ်မှာ ချက်ကြိုးဟာ ဖွံဖြိုးပြီးအနေအထား ရောက်ရှိပြီး ဖြစ်လာပါတယ်။
မိခင်ဆီက အာဟာရဓာတ်တွေ ဘယ်လို ရသလဲ
ကိုယ်ဝန်ဆောင် မိခင်တို့ စားသုံးလိုက်တဲ့ အစားအစာတွေဟာ အစာအိမ် အူလမ်းကြောင်း ရောက်တဲ့အခါ သေးငယ်တဲ့ Molecules လေးတွေအထိ ဖြစ်အောင် ချေဖျက်ခြင်းခံရပြီး သွေးကြောထဲသို့ ရောက်ရှိလာပါတယ်။ ဒီအခါမှာ သန္ဓေသားအတွက်လိုအပ်တဲ့ အာဟာရဓာတ်အစုံဟာ မိခင်ရဲ့သွေးကြောကနေ အချင်းတိုင်နဲ့ ချက်ကြိုးကနေတစ်ဆင့် ကလေးဆီကို ရောက်ရှိလာပါတယ်။
အကျဉ်းချုံးဆိုရလျှင် မိမိစားသုံးလိုက်တဲ့ အစားအသောက်တွေဟာ ချက်ကြိုးမှတစ်ဆင့် ကလေးဆီကို အာဟာရဓာတ် အနေနဲ့ ရောက်ရှိသွားပြီး ကလေးရဲ့ ကြီးထွားဖွံ့ဖြိုးမှုကို အထောက်အပံ့ပေးပါတယ်။ ဒါ့ကြောင့် မိခင်လောင်းတို့အနေနဲ့ အာဟာရဓာတ် စုံလင်အောင်စားပေးမှသာ မိမိရင်သွေးလေး ကောင်းစွာ ကြီးထွားဖွံ့ဖြိုးပြီး ထူးချွန်တဲ့ ကလေးအဖြစ် မွေးဖွားလာနိုင်မှာပဲ ဖြစ်ပါတယ်။
Author: Dr. Aye Myat
