အသားအရေ ကောင်းမွန်ခြင်းဆိုတာ အားကျစရာအချက်တစ်ခု ဖြစ်တာကြောင့် ကလေးတစ်ယောက်ရဲ့ အသားအရေလို နူးညံ့ပြီး ကျန်းမာကြည်လင်နေဖို့ကို အတော်များများက ဆန္ဒရှိကြပါတယ်။ ကလေးလေးတစ်ယောက်လို နူးညံ့တဲ့ အသားအရေလေးဖြစ်စေဖို့ရာ အသားအရေကိုပဲ သီးသန့် ထိန်းသိမ်းလို့မရပါဘူး၊ ခန္ဓာကိုယ်အတွင်းကပါ ကျန်းမာနေအောင် အစာအာဟာရ၊ ရေဓါတ်လုံလောက်အောင် စားသောက်တာ၊ အိပ်ရေးဝအောင်အိပ်တာ၊ သွေးလည်ပါတ်မှုကောင်းအောင် လေ့ကျင့်ခန်းလုပ်ပေးတာ၊ စိတ်ဖိစီးမှုတွေ လျှော့ချပေးပြီး အနားယူတာမျိုးကိုပါ လုပ်ပေးဖို့ လိုအပ်ပါတယ်။ မျက်နှာနှင့် ခန္ဓာကိုယ်အရေပြားအတွက် မှန်ကန်တဲ့ အသားအရေထိန်းသိမ်းနည်း skincare အဆင့်ဆင့်ကို ပုံမှန်ပြုလုပ်ပေးဖို့ လိုအပ်ပါတယ်။
မျက်နှာပေါ်မှာ တစ်နေကုန် ကပ်ငြိနေတဲ့ သနပ်ခါး၊ မိတ်ကပ်၊ ဖုန်၊ ဘက်တီးရီးယားပိုးမွှား၊ အညစ်အကြေးတွေကို နေ့စဉ်သေချာသန့်စင်ပေးရန် လိုအပ်ပါတယ်။ မျက်နှာအရေပြား ချွေးပေါက်များထိ သန့်စင်ပေးတဲ့ double cleansing ခေါ် အဆင့်နှစ်မျိုးဖြင့် သေသေချာချာ သန့်စင်ပေးရပါမယ်။ ပထမအဆင့်အနေဖြင့် ကိုယ့်အသားအရေ အမျိုးအစား Oily skin၊ Dry skin၊ sensitive skin စသည်တို့နှင့် သင့်လျော်သော၊ပြင်းထန်သည့် ဆပ်ပြာ၊ဓါတုပစ္စည်းတွေမပါတဲ့ အပျော့စား မျက်နှာသစ်ဆေး cleanser အသုံးပြုပေးဖို့ လိုအပ်ပါတယ်။ တစ်နေ့လျှင် နံနက်တစ်ကြိမ်၊ ညအိပ်ယာဝင်ခါနီးတစ်ကြိမ် မျက်နှာသန့်စင်ပေးရန် လိုအပ်ပါတယ်။
မျက်နှာသစ်၊ ရေချိုးပြီးတိုင်း အရေပြားအစိုဓါတ် ထိန်းပေးတဲ့ moisturizer ၊ cream၊ lotion ၊ အဆီတစ်မျိုးမျိုးကို ပုံမှန်လိမ်းပေးဖို့လည်း လိုအပ်ပါတယ်။ အရေပြားအစိုဓါတ်ဖြည့်ပေးခြင်းက အရေပြားခြောက်သွေ့ ကြမ်းတမ်းခြင်း မဖြစ်စေပဲ နူးညံ့စိုပြေစေနိုင်ပါတယ်။ အသားအရေ ထိန်းသိမ်းဖို့ အသုံးပြုတဲ့ ထုတ်ကုန်ပစ္စည်းတွေမှာ ဓါတ်တိုးဆန့်ကျင် အာနိသင်ရှိသော antioxidant serum အလှဆီတစ်မျိုးမျိုးကို ပုံမှန်ထည့်သွင်း အသုံးပြုပေးပါ။
နေ့ဖက် skincare step အတွက် အရေးကြီးတဲ့ အချက်တစ်ခုကတော့ အသားအရေကို ဖျက်ဆီးတဲ့ နေရောင်ခြည်ဒါဏ်မှ ကာကွယ်ဖို့ပဲဖြစ်ပါတယ်။ နေလောင်ဒါဏ်ကြောင့် အသားအရေ ခြောက်သွေ့ကြမ်းတမ်းခြင်း၊ အမည်းစက်၊ ဝက်ခြံ၊ အရေးအကြောင်းများ ဖြစ်ခြင်းတို့မှ ကာကွယ်ရန် sun protection factor SPF နှင့် ခရမ်းလွန်ရောင်ခြည် UVA rays များမှ ကာကွယ်ပေးသည့် PA++ ပါဝင်သည့် နေရောင်ကာလိမ်းဆေးများကို အိမ်မှာနေစဉ်ရော အပြင်မထွက်ခင်ပါ ဂရုတစိုက် လိမ်းပေးပြီး ကာကွယ်ရပါမယ်။
အရေပြားဆဲလ်သေများဟာ အသားအရေ ကြမ်းတမ်းမွဲခြောက်ခြင်း၊ အသုံးပြုသော skincare အာနိသင်အပြည့်အဝ မရရှိခြင်းတို့ ဖြစ်စေနိုင်ပါတယ်။ ဒါကြောင့် တစ်ပါတ်တစ်ကြိမ်ခန့် အရေပြားဆဲလ်သေများကို ဖယ်ရှားခြင်း exfoliation ကို ပုံမှန်ပြုလုပ်သင့်ပါတယ်။ Exfoliate ပြုလုပ်ရာမှာ ကြမ်းတမ်းသော physical scrub များဖြင့် ပွတ်တိုက်ခြင်း၊ ပြင်းထန်သော ဓါတုပစ္စည်းများ အသုံးပြုပြီး ချေးချွတ်ခြင်းမျိုး မပြုလုပ်ရပါ။
Collagen ဟာ အရေပြား တင်းရင်းမှုကို ထောက်ပံ့ပေးပြီး ပျက်စီးသွားသော အရေပြားဆဲလ်များကို ပြုပြင်ပေးကာ အသားအရေကို ကြည်လင်စေပါတယ်။ အသက်၂၅နှစ်နောက်ပိုင်းမှစ ခန္ဓာကိုယ်မှ Collagen ထုတ်လုပ်မှု ကျဆင်းလာသဖြင့် အရွယ်မတိုင်ခင် အိုမင်းရင့်ရော်ခြင်း၊ အရေးအကြောင်းနှင့် အသားအရေပျက်စီး မွဲခြောက်ခြင်း မဖြစ်အောင် ကော်လာဂျင်ပါသော အစားအစာ၊ ဖြည့်စွက်အာဟာရများ မှီဝဲသင့်ပါတယ်။
ကလေးလေးတစ်ယောက်လို နူးညံ့တဲ့ အသားအရေလေးဖြစ်စေဖို့ရာ မှန်ကန်တဲ့ အလှကုန်၊ skincare များ အသုံးပြုပေးဖို့ လိုတဲ့အပြင် ခန္ဓာကိုယ်အရေပြား နူးညံ့လှပဖို့ လိုအပ်တဲ့ vitamins တွေဖြစ်တဲ့ ဗီတာမင်အေ၊ ဗီတာမင်စီ၊ ဗီတာမင်အီး ၊ ကော်လာဂျင်ဓါတ်များကို လုံလောက်မျှတအောင် ဖြည့်စွက်ပေးဖို့လည်း လိုအပ်ပါတယ်။
Dr. Yee Mon
