သံဓာတ်ချို့တဲ့ခြင်းဟာ အတွေ့များတဲ့ အာဟာရဆိုင်ရာမလုံလောက်ခြင်း (Nutritional Deficiency)အခြေအနေတစ်ခု ဖြစ်ပါတယ်။သံဓာတ်ဟာ သွေးအားကောင်းစေရန်၊ ကိုယ်ခံအားကောင်းစေရန်နဲ့ ခန္ဓာကိုယ်ကြီးထွားဖွံဖြိုးရန် လိုအပ်ပါတယ်။ သံဓာတ်ချို့တဲ့တဲ့အခါ အောက်ပါရောဂါဝေဒနာများ ခံစားရပါလိမ့်မယ်။
၁။ သွေးအားနည်းရောဂါဝေဒနာများ
သံဓာတ်ရဲ့ ခန္ဓာကိုယ်အတွက်အဓိကတာဝန်ကတော့ ဟေမိုဂလိုဘင်ဆိုတဲ့သွေးအားဆဲလ်လေးတွေကို ဖြစ်ပေါ်စေခြင်းဖြစ်ပါတယ်။ခန္ဓာကိုယ်ဟာ သံဓာတ်ကိုသုံးပြီး ဟေမိုဂလိုဘင်ကိုတည်ဆောက်ရပါတယ်။
ဟေမိုဂလိုဘင်ဆိုတာ သွေးနီဥလေးပရိုတင်းတစ်မျိုးဖြစ်ပြီး သွေးထဲမှာ အောက်စီဂျင်ကို သယ်ယူပို့ဆောင်ပေးပါတယ်။ ဟေမိုဂလိုဘင်ဆိုတဲ့ သွေးအားဆဲလ်လေးများ ပုံမှန်ပမာဏအောက်ကျသွားတဲ့အခါ သွေးအားနည်းရောဂါကိုဖြစ်စေပါတယ်။ သွေးအားနည်းတဲ့အခါ
– မူးဝေခြင်း/မူးမိုက်ခြင်း
– အသက်ရှူမဝခြင်း
– မောလွယ်ခြင်း/အမောမခံနိုင်ခြင်း
– ပင်ပန်းနုံးခွေနေခြင်း
– အာရုံမစူးစိုက်နိုင်ခြင်း
– ကြွက်သားများ အားမရှိခြင်း တို့ ခံစားရပါလိမ့်မယ်။
၂။ နှလုံးဆိုင်ရာ ရောဂါဝေဒနာများ
ခန္ဓာကိုယ်ထဲမှာ အောက်ဆီဂျင်သယ်ယူပို့ဆောင်ပေးတဲ့ ဟေမိုဂလိုဘင်ပရိုတင်းရှိနေတဲ့ သွေးနီဥ ဆဲလ်လေးများ လုံလုံလောက်လောက်ရှိမနေဘူးဆိုရင် သင့်ရဲ့ နှလုံးဟာ ခန္ဓာကိုယ်တွင်းရှိ ကိုယ်တွင်းကလီစာများ အောက်စီဂျင်ပြည့်နေသောသွေးများလုံလောက်စွာရရှိရန် အလုပ်ပိုလုပ်လာရပါတယ်။
သင့်နှလုံးဟာအချိန်ကြာမြင့်စွာ ပုံမှန်ထက်ပိုအလုပ်လုပ်နေရလျှင်
– နှလုံးခုန်နှုန်း မြန်လာခြင်း
– နှလုံးစည်းချက်မမှန်ခြင်း
– နှလုံးကြီးခြင်း
– နှလုံး စွမ်းဆောင်ရည်ကျဆင်းခြင်း တို့ဖြစ်ပေါ်ပါလိမ့်မယ်။
၃။ ကိုယ်ဝန်ဆောင်ချိန်ရောဂါဝေဒနာများ
ကိုယ်ဝန်ဆောင်မိခင်များ သံဓါတ်ချို့တဲ့လျှင်
– ပေါင်ချိန်မပြည့်သောကလေးမွေးခြင်း
– လမစေ့သောကလေးမွေးခြင်း
– မိခင်သွေးအားနည်းရောဂါဖြစ်ခြင်း
– ကလေးဦးနှောက်ဖွံ့ဖြိုးမှု နှေးခြင်းတို့ ဖြစ်စေပါတယ်။
-ဒါကြောင့် ကိုယ်ဝန်ဆောင်မိခင်များ မိခင်နှင့် ရင်သွေးကျန်မာစေရန် သံဓာတ်ပြည့်ဝနေဖို့အရေးကြီးပါတယ်။
၄။ ကလေးများကြီးထွားဖွံ့ဖြိုးမှုဆိုင်ရာရောဂါဝေဒနာများ
ကလေးငယ်များအတွက်လည်း သံဓါတ်ဟာအရေးကြီးပါတယ်။ သံဓာတ်ချို့တဲ့ပါက
– ဥာဏ်ရည်ဖွံ့ဖြိုးမှုနှေးကွေးခြင်း၊
– ပေါင်းသင်းဆက်ဆံရေးမကောင်းခြင်း
– ခန္ဓာကိုယ်ကြီးထွားဖွံ့ဖြိုးမှုနှေးခြင်း
– အာရုံစူးစိုက်မှုအားနည်းခြင်းတို့ ဖြစ်စေပါတယ်။
၅။ စိတ်ဓာတ်ကျခြင်း
သံဓာတ်ချို့တဲ့ခြင်းဟာ စိတ်ဓာတ်ကျခြင်းကို အားပေးတယ်လို့ ဆိုကြပါတယ်။
၆။ အိပ်မပျော်ခြင်း
စစ်တမ်းများအရ သံဓာတ်သိုလှောင်မှုလျော့နည်းလာလျှင် အိပ်မပျော်ခြင်း၊ အိပ်နေစဥ်အသက်ရှုခဏရပ်ခြင်း( Sleep Apnea) နဲ့ နှစ်နှစ်ခြိုက်ခြိုက်အိပ်မရခြင်း(Restless Sleep) တို့နဲ့သက်ဆိုင်နေတတ်ပြီး သံဓာတ်ပေးလိုက်တဲ့အခါ တိုးတက်လာကြောင်း တွေ့ရတယ်လို့ဆိုပါတယ်။
၇။ အလှအပဆိုင်ရာပြဿနာများ
သံဓာတ်ချို့တဲ့ခြင်းဟာ
– ဆံပင်ကျွတ်ခြင်း
– ဆံသားအားနည်းစေခြင်း
– အသားအရေဖျော့တော့ခြောက်သွေ့စေခြင်း
– ခြေသည်းလက်သည်းများခွက်ဝင်စေခြင်း/ကျိုးလွယ် ပဲ့လွယ်ခြင်းကို ဖြစ်စေပါတယ်။
၈။ ကူးစက်ရောဂါ ဖြစ်လွယ်ခြင်း
ကိုယ်ခံအားကောင်းမွန်စေရန် သံဓာတ်ဟာ အရေးကြီးပါတယ်။
ရောဂါတွေကို တိုက်ထုတ်ပေးတဲ့ကိုယ်ခံအားစနစ်မှာပါဝင်တဲ့ ဆဲလ်တွေ၊တစ်သျှူးတွေနဲ့ ကိုယ်တွင်းကလီစာတွေဆီသို့ အောက်ဆီဂျင်လုံလုံလောက်လောက်ပို့ပေးခြင်းဖြင့် ကိုယ်ခံအားကို ကောင်းမွန်စေပြီး ပျက်စီးသွားတဲ့ ဆဲလ်တွေ၊ တစ်သျှူးတွေနဲ့နှင့် ကိုယ်တွင်း ကလီစာများကိုပါ ပြန်ကောင်းစေပါတယ်။
-ဒါကြောင့် သံဓာတ်ချို့တဲ့သူတွေဟာ ကိုယ်ခံအားလျော့နည်းသွားတာကြောင့် ကူးစက်ရောဂါများ ပိုကူးစက်လွယ်ပါတယ်။
Author: Dr. Yin Yin Win
