အသည်းအဆီဖုံးခြင်းသည် အသည်းဆဲလ်များအတွင်းအဆီများစုဝေးနေခြင်းဖြစ်သည်။ အသည်းအဆီဖုံးခြင်းတွင် အရက်သောက်ခြင်းကြောင့် အသည်းအဆီဖုံးခြင်းနှင့် အရက်မသောက်သူများတွင် အသည်းအဆီဖုံးခြင်း ဟူ၍ (၂) မျိုးရှိပါသည်။ အရက်မသောက်သော သူများတွင်လည်း အသည်းအဆီဖုံးခြင်း ဖြစ်တတ်ပါသည်။
ကိုယ်အန္ဓာအတွင်း ကိုလက်စထရောများနေခြင်း၊ ဆီးချိုရောဂါရှိခြင်း၊ အ၀လွန်ခြင်း၊ အချိုဓာတ်လွန်ကဲသော အစားအစာများစားသုံးခြင်း၊ ဆီနှင့်ကြော်သောအစားအစာများ စားသုံးခြင်း၊ အချိုရည်များအလွန်အကျွံသောက်ခြင်း၊ Fast Food ဟုခေါ် သော ကျန်းမာရေးနှင့် မညီညွတ်သောအသင့်စား အစာများစားသုံးခြင်း၊ ကိုယ်လက်လှုပ်ရှား အားကစားမလုပ်ခြင်းစသော အလေ့အကျင့်ရှိသူများတွင် အရက်မသောက်သော်လည်း အသည်းအဆီဖုံးခြင်း ဖြစ်တတ်ပါသည်။
အလွန်အကျွံ အသည်းအဆီဖုံးနေလျှင် အစားအသောက်ပျက်ခြင်း၊ အသည်းနေရာမှ အောင့်ခြင်းနှင့် အသည်းကြီးခြင်းများ ဖြစ်တတ်သည်။ သို့သော် အများစုအနေဖြင့် ဘာလက္ခဏာမှမပြဘဲ ရှိနေတတ်ပါသည်။ အသည်းအဆီဖုံးနေပြီဆိုလျှင် နီးစပ်ရာ ဆေးရုံဆေးခန်းများသို့ သွားရောက်ကာ စောစီးစွာ ကုသမှုခံယူသင့်သည်။
အသည်းအဆီဖုံးရောဂါရှိသူများအနေဖြင့် နေ့စဥ်စားသောက်မှုပုံစံကို ပြောင်းလဲခြင်းဖြင့် ဆေးကုသရာတွင် အထောက်အကူပြုပါသည်။ အမျှင်ဓာတ်များသော အစိမ်းရောင်အသီးအရွက်များ၊ အသီးအနှံများ၊ အခွံမာအသီး နှင့် အစေ့အဆံများအား စားသုံးသင့်သည်။ အနီရောင်ရှိသော အသားများဖြစ်သော အမဲသား၊ ၀က်သားနှင့် ဆိတ်သားများ စားသုံးခြင်းကို ရှောင်ကြဥ်ကာ အဆီဓာတ်နည်း သော အရေခွံဆုတ်ထားသော ကြက်သားနှင့် ပင်လယ်စာများကိုသာ အဓိကစားသုံးရမည်။အဆီထုတ်ထားသော နို့နှင့် နို့ထွက်ပစ္စည်းများ၊ ကြက်ဥ အကာနှင့် ပဲအမျိုးမျိုးကို စားသုံးပေးသင့်သည်။ ပဲဆီနှင့် နှမ်းဆီများစားသုံးခြင်းထက်သံလွင်ဆီနှင့် နေကြာဆီကို စားသုံးရမည်။ အချိုဓာတ်လွန်ကဲသော ကိတ်မှုန့်၊ ပေါင်မုန့်၊ ချောကလက်နှင့် ဆီကြော် မှုန့်များ စားသုံးခြင်းကို ရှောင်ကြဉ်ရမည်။
အသည်းကို ထိခိုက် ပျက်စီးစေသော အရက် ဘီယာများအား ရာသက်ပန်ရှောင်ကြဥ်ရမည်။ အားပြည့်အချိုရည်များနှင့် Gas ပါသော အချိုရည်များကို သောက်သုံးခြင်းအလေ့အထကို စွန့်လွှတ်ကာ ရေများများ သောက်သုံးသင့်သည်။ အသည်းအဆီဖုံးခြင်း သည် ကစီဓာတ်များသော ထမင်းနှင့် သကြားများသော အချိုဓာတ်လွန်ကဲသော အစားအစာများကြောင့်လည်း ဖြစ်နိုင်သောကြောင့် ထမင်းနှင့် သကြားများကိုလျှော့စားသင့်ပါသည်။ ကော်ဖီနှင့် လက်ဖက်ရည်ကြမ်းတွင် Antioxident ပါ၀င်သောကြောင့် အသည်းပျက်စီးခြင်းကိုတားဆီးပေးသည်။ ထို့ပြင် သွေးအတွင်း Cholesterol ကိုကျစေသောကြောင့် အသည်းအဆီဖုံးသူများအတွက် သင့်တော်ပါသည်။ နနွင်းနှင့် ကြက်သွန်ဖြူ စားသုံးခြင်းသည် သွေးတွင်း အဆီများကျစေသောကြောင့် အသည်းအဆီဖုံးသူများ စားသုံးသင့်ပါသည်။
အကိုက်အခဲပျောက်ဆေးများနှင့် အသည်းကို ထိခိုက်စေသောဆေးများ သောက်သုံးခြင်းမှလည်း ရှောင်ကြဥ်ရမည်။ ဆရာ၀န်ညွှန်ကြားသော သွေးသွင်း အဆီကျဆေးနှင့် Omega 3 Fatty Acids များကိုလည်း မှန်မှန်သောက်သုံးပေးခြင်းအားဖြင့် အသက်ရှည် ကျန်းမာစွာ နေထိုင်သွားနိုင်မည် ဖြစ်သည်။
Author: Dr. Aye Chan Moe
