ကိုဗစ်မျိုးကွဲအသစ် အိုမီခရွန် Omicron ဟုဆိုလျှင် နောက်ဆုံးပေါ် ကူးစက်မြန်ဗိုင်းရပ်စ်မျိုးစိတ်ဖြစ်ကြောင်း လူတိုင်းနီးပါး သိရှိထားပြီးဖြစ်ပါသည်။ ရောဂါပြင်းထန်မှုမရှိသော သာမန်အအေးမိလက္ခဏာအပျော့များသာရှိသည်ဟု အချို့သူများက ထင်မှတ်လျက်ရှိပါသည်။ ဗီဇပြောင်းလဲမှုအများဆုံး မျိုးစိတ်ဖြစ်သော အိုမီခရွန် ကူးစက်ပျံ့နှံ့မှုသည် ကမ္ဘာတစ်ဝန်းရှိ ဆေးကုသမှုနှင့်သက်ဆိုင်ရာ ပညာရှင်များအတွက် အထူးကြိုးပမ်းတွန်းလှန်နေရဆဲ ပြဿနာတစ်ရပ်ဖြစ်ပါသည်။
အိုမီခရွန် မျိုးစိတ်သစ်သည် ကိုဗစ်ဗိုင်းရပ်စ် ဖွဲ့စည်းတည်ဆောက်မှု မျိုးဗီဇများအနက် ဆူးချွန်ပုံဗီဇပရိုတင်း S Gene(Spike Protein) တွင်ပုံစံပြောင်းလဲမှု Mutation ၃၂ ခုရှိပြီး ဗီဇပြောင်းလဲမှုအမျိုးပေါင်း ၅၀ ကျော်ပါသည့် ကိုဗစ်ပိုးမျိုးကွဲဖြစ်ပါသည်။ ယခုလက်ရှိ ရရှိနေသော ကိုဗစ်ကာကွယ်ဆေးများသည် SARS-CoV-2 ဗိုင်းရပ်စ်၏ လူ့ခန္ဓာကိုယ်ကိုတွယ်နိုင်သည့် Spike Protein ကို ဦးတည်ထုတ်ထားခြင်းဖြစ်ပါသည်။
အိုမီခရွန်၏ Spike Protein ပုံစံပြောင်းလဲမှုသည် Pfizer-BioNTech ကိုဗစ်ကာကွယ်ဆေး ၂ကြိမ်ထိုးပြီး ရရှိနိုင်သည့် (Neutralising Antibodies) ခုခံအားကို ရှောင်ကွင်းနိုင်ပြီး ကာကွယ်ဆေး၏ခုခံကာကွယ်နိုင်စွမ်းကို လျော့ကျစေနိုင်သည်ဟု ယူဆကြသည်။ သို့သော် ကာကွယ်ဆေးများ၏ လှုံဆော်မှုမှရရှိသော ခန္ဓာကိုယ်၏ ကိုယ်ခံအားဆဲလ် CD+4 နှင့် CD+8 T- Cells သည် အိုမီခရွန်မျိုးကွဲကို မှတ်သားတိုက်ထုတ်နိုင်ပြီး ရောဂါပြင်းထန်မှုမဖြစ်အောင် ခုခံပေးနိုင်ကြောင်း တွေ့ရှိရသည်။ ကာကွယ်ဆေး ၂ကြိမ်ပြည့်ပြီး ထပ်ဆောင်း Booster ထိုးသူများတွင် ခုခံအားထွက်ရန် လှုံဆော်ပေးနိုင်မှု ပိုကောင်းမည်ဟုလည်း ပညာရှင်များကယူဆကြသည်။
လက်ရှိနိုင်ငံအချို့တွင် ရရှိနေသည့် Pfizer-BioNTech နှင့် Moderna ကာကွယ်ဆေးများသည် အိုမီခရွန်၏ ဗီဇပြောင်းလဲမှုခုခံနိုင်မှုကို တွန်းလှန်နိုင်မည့် နည်းပညာအသစ်များ Reformulate ပြောင်းလဲထုတ်လုပ် ပြင်ဆင်လျက်ရှိပါသည်။ အိုမီခရွန်မျိုးကွဲသစ်ကို ဦးတည်ထုတ်လုပ်ထားသည့် Pfizer-BioNTech ၏ mRNA နည်းပညာသုံး Omicron-based Vaccine ကာကွယ်ဆေး အသစ်အတွက် သုတေသနလုပ်ငန်းများကိုလည်း အရှိန်မြှင့်လုပ်ဆောင်လျက်ရှိပါသည်။
Moderna၊Pfizer-BioNTech၊ Johnson & Johnson စသည့် ကာကွယ်ဆေးထုတ်သည့် သုတေသနအဖွဲ့အစည်းကလည်း အိုမီခရွန်ပုံတူ စမ်းသပ်ဗိုင်းရပ်စ် Artificial Version အသုံးပြ၍ ကာကွယ်ဆေးများ၏အာနိသင်များကို စမ်းသပ်လေ့လာလျက်ရှိပါသည်။ mRNA Vaccines ကာကွယ်ဆေး အမျိုးအစားဖြစ်သည့် Johnson & Johnson နှင့် AstraZeneca တို့မှလည်း Omicron မျိုးစိတ်အပေါ် ထိရောက်သော အာနိသင်ရမည့် ကာကွယ်ဆေးများကို စမ်းသပ်လျက်ရှိပါသည်။
အိုမီခရွန်ဗိုင်းရပ်စ၏ Mutation ဗီဇအဆင့်ဆင့်ပြောင်းလဲမှုကြောင့် ကာကွယ်ဆေးပြည့်စုံအောင် ထိုးထားပြီးသူများတွင်ပင် အခြားမျိုးကွဲများထက် ပို၍ကူးစက်မှုရှိနိုင်သည်ကို တွေ့ရသည်။ ထို့ပြင် ကိုဗစ်ပိုးကူးစက်ခံရပြီးသူများတွင် အိုမီခရွန်ဗိုင်းရပ်စကူးစက်မှု Reinfection နောက်တစ်ကြိမ်ဖြစ်နိုင်၍ ကာကွယ်ဆေးထိုးရန် လိုအပ်ပ့သည်။ သို့သော် ကာကွယ်ဆေးထိုးထားသူများတွင် ရောဂါလက္ခဏာပြင်းထန်ခြင်းနှင့် ICU Care အထူးကြပ်မတ်ကုသရန် လိုအပ်နိုင်ခြင်းတို့ လျော့နည်းကြောင်း တွေ့ရပါသည်။
လက်ရှိကမ္ဘာတဝန်းတွင် ကူးစက်မှုမြန်မျိုးစိတ် Supercontagious Variant ဟု ပညာရှင်များက သတ်မှတ်ထားသည့် အိုမီခရွန်နှင့် ပတ်သက်သည့် သုတေသနများ၊ စမ်းသပ်ချက်များ၊ ကာကွယ်ဆေးများကို အချိန်နှင့်အမျှ သုတေသနပြုလုပ်လျက်ရှိပါသည်။ ကိုဗစ်ကာကွယ်ဆေး၂ကြိမ် အပြည့်ပြီးလျှင် တူညီသော ဆေးအမျိုးအစားကို ထပ်ဆောင်း Booster Dose များထိုးသင့်သည်ဟု ကူးစက်ရောဂါ ထိန်းချုပ်ရေးအဖွဲ့ CDC မှ ထောက်ခံထားပါသည်။ ထို့ကြောင့် မိမိနေထိုင်ရာဒေသရှိ အသိအမှတ်ပြုဆေးထိုးဌာနများတွင် ရနိုင်သည့် ကိုဗစ်ကာကွယ်ဆေးကို ထိုးနှံခြင်းဖြင့် ကိုဗစ်ဗိုင်းရပ်စ်ကူးစက်မှုအန္တရာယ်နှင့် ရောဂါပြင်းထန်မှုကို ကာကွယ်နိုင်မည် ဖြစ်ပါသည်။
Author: Dr. Yee Mon
