ပရိုတင်းဆိုတာ အသက်အရွယ်မရွေး လူ့ခန္ဓာကိုယ်ကြီးထွားဖွံဖြိုးဖို့အတွက် မရှိမဖြစ်လိုအပ်တဲ့ ဓါတ်တစ်မျိုးဖြစ်ပါတယ်။ အသက်အရွယ်ကြီးမြင့်လာတာနဲ့အမျှ ကြွက်သားဆုံးရှုံးခြင်း၊ အရိုးကြံခိုင်မှုလျော့နည်းလာခြင်း၊ ခန္ဓာကိုယ်တွင်းဇီဝကမ္မဖြစ်စဥ်များ နှေးကွေးလာပြီး ပရိုတင်းဓါတ်ကို ကောင်းစွာမထုတ်လုပ်နိုင်ခြင်းတို့ ဖြစ်ပေါ်လာနိုင်ပါတယ်။ ဒါကြောင့် လူကြီးတွေဟာ သန်မာကြံ့ခိုင်တဲ့ လူငယ်တွေထက် ပရိုတင်းဓါတ်လိုအပ်မှုများလာတာကြောင့် ပိုမိုစားသုံးပေးရပါမယ်။
✔ လူကြီးအများစုဟာ အစာမျိုရခက်ခြင်း၊ သွားကိုက်ခြင်း၊ အစားစားချင်စိတ်လျော့နည်းလာခြင်းတို့ကြောင့် တစ်နေ့တာအစားအသောက်မှာ ပရိုတင်းဓါတ်ကို လုံလောက်အောင်မစားဖြစ်ကြပါဘူး။ အဲ့သလိုမလုံလောက်တာ ကြာလာရင် နောက်ဆက်တွဲအနေနဲ့ ကြွက်သားဆုံးရှုံးမှုပမာဏလွန်စွာများပြားလာပြီး နေ့စဥ်သွားလာလှုပ်ရှားမှုတွေကိုတောင် ကောင်းစွာမလုပ်နိုင်ကြတော့တာတွေဖြစ်လာပါတယ်။ လူကြီးတွေဟာ အမြင်အာရုံလျော့နည်းခြင်း၊ ကြွက်သားကြံ့ခိုင်မှုအားနည်းခြင်း၊ အရိုးသန်မာမှုလျော့နည်းလာခြင်းတို့ကြောင့် လမ်းလျောက်ရတာခက်ခဲခြင်း၊ မကြာခဏချော်လဲခြင်း၊ လှေကားအတက်အဆင်းမပြုလုပ်နိုင်ခြင်းတို့ ကြုံတွေ့လာကြရပါတယ်။ ဒါကြောင့် နေ့စဥ်စားသောက်ရာမှာ ပရိုတင်းပမာဏလုံလောက်အောင်စားပေးရမှာဖြစ်ပါတယ်။
✔ ပရိုတင်းဟာ ကြွက်သားကြံ့ခိုင်မှုအတွက်သာမက သွေးတွင်းသကြားဓါတ်ကိုထိန်းညှိပေးခြင်း၊ သွေးပေါင်ချိန်ကို ထိန်းသိမ်းပေးခြင်း၊ သွေးတွင်းအဆီဓါတ်ကို လျော့ကျစေခြင်း၊ ကျောက်ကပ်ကျန်းမာရေးကိုအထောက်အကူပြုခြင်းစတဲ့ လူကြီးတွေအတွက် ကောင်းကျိုးများစွာကို ရရှိစေပါတယ်။
✔ ပရိုတင်းဓါတ်လျော့နည်းလာရင် ကြွက်သားနဲ့အရိုးသန်မာမှု လျော့နည်းရုံသာမက ကိုယ်ခံအားကျဆင်းလာခြင်း၊ ခန္ဓါကိုယ်တွင်းသို့ ရောဂါပိုးများ မကြာခဏဝင်ရောက်ခြင်း၊ နေမကောင်းဖြစ်ပြီးနောက် နာလန်ထူချိန်ကြာမြင့်ခြင်း စတဲ့ဆိုးကျိုးတွေကြုံတွေ့လာရနိုင်ပါတယ်။
✔ လူတစ်ယောက်ဟာ ခြေထောက်တွေဖောယောင်လာခြင်း၊ ဆံပင်တွေပျက်စီးလာခြင်း၊ အရေပြားခြောက်သွေ့ခြင်း၊ လက်သည်းခွံတွေကြွပ်ဆပ်ခြင်း၊ မောပန်းလွယ်ခြင်း၊ မကြာခဏဖျားနာခြင်း၊ မကြာခဏ ဗိုက်ဆာခြင်း စတဲ့လက္ခဏာတွေ ဖြစ်ပေါ်နေရင် ခန္ဓာကိုယ်တွင်း ပရိုတင်းဓါတ်လျော့နည်းနေပြီဆိုတာ သတိပြုမိဖို့လိုပါတယ်။
✔ လူတစ်ယောက်အတွက် ပရိုတင်းလိုအပ်မှုပမာဏဟာ အသက်အရွယ်၊ ကိုယ်အလေးချိန်၊ အရပ်အမောင်းစတဲ့ အချက်တွေပေါ်မူတည်ပြီး ကွာခြားနိုင်ပါတယ်။ ပျမ်းမျှအားဖြင့် လူကြီးတစ်ယောက်အတွက် တစ်နေ့ကို ပရိုတင်း အနည်းဆုံး ၄၅ ဂရမ်ကနေ ၆၀ ဂရမ်လောက်ထိ လိုအပ်ပါတယ်။ အသားငါး၊ ကြက်ဥ နှင့် ပဲအမျိုးမျိုးတို့စားသုံးခြင်းမှ ပရိုတင်းဓါတ်ကို ရရှိနိုင်ပါတယ်။ အစားစားရန်အခက်အခဲရှိတဲ့ လူကြီးတွေအနေနဲ့ ပရိုတင်းဖြည့်စွက်စာတွေကို သင့်တော်တဲ့ပမာဏအတိုင်း လုံလောက်အောင် သောက်သုံးပေးနိုင်ပါတယ်။ လုံလောက်တဲ့ပရိုတင်းပမာဏစားသုံးခြင်းနဲ့အတူ နေ့စဥ် ကိုယ်လက်လှုပ်ရှားမှု ပုံမှန်ပြုလုပ်ပေးမယ်ဆိုရင် လူကြီးတွေမှာဖြစ်တတ်တဲ့ ကြွက်သားဆုံးရှုံးမှုကို လျော့ကျသွားစေမှာဘဲဖြစ်ပါတယ်။
