ကမ္ဘာပေါ်မှာရှိတဲ့ အရွယ်ရောက်ပြီးသူ သုံးယောက်မှာ တစ်ယောက်ခန့်ဟာ အိပ်မပျော်ခြင်းရဲ့ ရောဂါလက္ခဏာတွေ ခံစားနေရတယ်လို့ သုတေသနတွေက ဆိုပါတယ်။
အိပ်ရေးပျက်တယ်ဆိုတာ ညဘက်အိပ်မပျော်နိုင်တာ၊ အိပ်ပျော်ဖို့ခက်ခဲတာ၊ အိပ်ပျော်ပြီးရင် ခဏခဏပြန်ပြန်နိုးနေတာတွေ အားလုံး အကျုံးဝင်ပါတယ်။တချို့တွေအတွက် အိပ်ရေးပျက်တာက ပြဿနာကြီး မဟုတ်ပေမယ့် တချို့အတွက်တော့ လူမှုရေး၊ စီးပွားရေးနဲ့ ကိုယ်စိတ်ကျန်းမာရေးကို ထိခိုက်စေတဲ့ ပြဿနာကြီး ဖြစ်နေတတ်ပါတယ်။
ခန္ဓာကိုယ်ရဲ့ ဇီဝကမ္မလုပ်ငန်းစဉ်တွေကို ကောင်းစွာ လုပ်နိုင်ဖို့အတွက် လုံလောက်တဲ့ ပုံမှန်အိပ်ချိန် ရှိသင့်ပါတယ်။ စောစောအိပ်ပြီး စောစောထတာ၊ နောက်ကျမှအိပ်ပြီး နောက်ကျမှထတာ စသဖြင့် အိပ်တဲ့ အလေ့အထ မတူညီရင်တောင် လူတစ်ယောက်ဟာ တစ်နေ့ကို ၇-၈ နာရီခန့် အိပ်ရင် လုံလောက်ပါတယ်။
အိပ်ရေးပျက်ရင် ဘာဖြစ်မလဲ?
အိပ်ရေးပျက်တဲ့အခါ…
• လူက အိပ်ချင်အိပ်ငိုက်နေတာ၊ မလန်းဆန်းတာ၊ တက်တက်ကြွကြွ မရှိတာ
• အာရုံစူးစိုက်လို့ မရတာ (ကားမောင်းရရင် မတော်တဆ ဖြစ်နိုင်ခြေ များပါတယ်)
• မှတ်ဉာဏ်လျော့နည်းလာတာ၊ မေ့လွယ်တာ
• စိတ်အပြောင်းအလဲ၊ အတက်အကျ မြန်တာ
• စိတ်ဓာတ်ကျနေတတ်တာ
• လုပ်ငန်းခွင်နဲ့ လူမှုဆက်ဆံရေးမှာ အဖုအထစ်တွေ ဖြစ်လာတာတွေ တွေ့ရနိုင်ပါတယ်။
တစ်ပတ်ကို ၃ ကြိမ်နဲ့အထက် အိပ်ရေးပျက်တာက ၃ လကျော်လာရင်တော့ ရေရှည်အိပ်ရေးပျက်တဲ့ ပြဿနာအဖြစ် သတ်မှတ်ပါတယ်။ ရေရှည်အိပ်ရေးပျက်တဲ့သူတွေရဲ့ ထက်ဝက်ခန့်က စိတ်ဖိစီးမှုများတာ၊ စိတ်ကျရောဂါ ခံစားနေရတာလိုမျိုး စိတ်ပိုင်းဆိုင်ရာ ပြဿနာတွေနဲ့ တွဲနေတတ်ပါတယ်။ တချို့ကလည်း အဆစ်အမြစ်ကိုက်တာ၊ ပါကင်ဆွန်အကြောသေရောဂါ ခံစားနေရတာ၊ ကင်ဆာရောဂါ ခံစားနေရတာ စသဖြင့် ရောဂါအခံ တစ်ခုခုကြောင့်လည်း အိပ်မပျော်တာမျိုး ဖြစ်နိုင်ပါတယ်။
ရေရှည်အိပ်ရေးပျက်တဲ့သူတွေဟာ…
သွေးတိုးရောဂါ
ဆီးချိုရောဂါ
နှလုံးအမောဖောက်တာ
လေဖြတ်တာ
Obstructive slerp apnoea (OSA) လို့ခေါ်တဲ့ အိပ်နေစဥ် အသက်ရှူရပ်သွားတဲ့ ရောဂါ
အဝလွန်ရောဂါနဲ့
စိတ်ဖိစီး၊ စိတ်ဓာတ်ကျတာလို စိတ်ပိုင်းဆိုင်ရာ ရောဂါတွေ ဖြစ်နိုင်ခြေ ပိုများပါတယ်။
အိပ်ပျော်အောင် ဘာတွေ လုပ်သင့်လဲ?
– လက်ဖက်၊ ကော်ဖီ၊ အရက်တွေ သောက်ခြင်းမှ ရှောင်ပါ။ ညနေဘက် ဗိုက်တင်းအောင် အများကြီးစားတာမျိုး မလုပ်ပါနဲ့။
– မအိပ်ခင် ရေနွေးနွေးလေးနဲ့ ရေချိုးပါ။ နွားနို့ပူပူ၊ အိုဗာတင်း ပူပူလေး သောက်တာမျိုး လုပ်ပါ။ အိပ်ပျော်စေတဲ့ ရနံ့ဆီလေးတွေ လိမ်းတာ၊ ဖျန်းထားတာမျိုးလည်း လုပ်လို့ရပါတယ်။
– အိပ်ခန်းကို အိပ်ဖို့အတွက် သီးသန့်အသုံးပြုပါ (အိပ်ယာထဲမှာ အလုပ်လုပ်တာ၊ ဖုန်းသုံးတာ၊ ကွန်ပြူတာသုံးတာ ရှောင်ပါ)။
– အိပ်မပျော်ရင် စာဖတ်တာ၊ အိပ်ပျော်စေမယ့် relaxing music လေးတွေ ဖွင့်ထားတာမျိုး လုပ်ပါ။
– နေ့စဉ်ကိုယ်လက်လေ့ကျင့်ခန်း လုပ်ပါ။
– တရားထိုင်ပါ။
– နေ့ခင်းဘက် အကြာကြီး အိပ်တာမျိုး ရှောင်ပါ။
– ရေရှည် အိပ်မပျော်ဘူး ဖြစ်နေရင် ဆရာဝန်နဲ့ တိုင်ပင်ဆွေးနွေးပြီး အကူအညီ ရယူပါ။
အိပ်ရေးပျက်တာကို အရေးမကြီးဘူးထင်ပြီး ပေါ့ပေါ့ဆဆ မနေသင့်ပါဘူး။ အချိန်ကြာလာတာနဲ့အမျှ ကိုယ်ကျန်းမာရေးနဲ့ စိတ်ကျန်းမာရေးကို ထိခိုက်လာနိုင်တာမို့ အိပ်ရေးဝဝ အိပ်နိုင်ဖို့ ကြိုးစားပြင်ဆင်ကြပါစို့။
Author: Dr.Yee Mon
