မဂ္ဂနီဆီယမ်ဓာတ်ဟာ ခန္ဓာကိုယ်ကျန်းမာဖို့ လိုအပ်တဲ့ အရေးအကြီးဆုံးသော သတ္တုဓာတ်တွေထဲမှာ တစ်ခုအပါအဝင် ဖြစ်ပါတယ်။ အာရုံကြောစနစ် ကောင်းမွန်ရန်၊ ကြွက်သားတွေ ကောင်းမွန်စွာ ညှစ်နိုင်ရန်၊ သွေးလှည့်ပတ်မှု ကောင်းရန်၊ အရိုးတစ်ရှူးနဲ့ ဆဲလ်အသစ်ထုတ်လုပ်ရန်၊ စွမ်းအင်တွေ ထုတ်လုပ်ရန်နဲ့ ဇီဝကမ္မလုပ်ငန်းတွေ ချောမွေ့ရန် မဂ္ဂနီဆီယမ်ဓာတ် လုံလောက်နေဖို့ လိုပါတယ်။
နှလုံးကျန်းမာရေးအတွက်လည်း မဂ္ဂနီဆီယမ်က အရေးပါပြီး နှလုံးရောဂါတွေ မဖြစ်အောင် ကာကွယ်ပေးနိုင်ပါတယ်။
(၁) နှလုံးစည်းချက် မှန်စေတယ်
မဂ္ဂနီဆီယမ်က နှလုံးထဲက လျှပ်စစ်စနစ်ကို ကောင်းမွန်စေပြီး နှလုံးကို စည်းချက်ညီညီ ခုန်နိုင်အောင် ကူညီပေးပါတယ်။ ဒါကြောင့် နှလုံးစည်းချက်မမှန်တဲ့ ရောဂါရှင်တွေဟာ မဂ္ဂနီဆီယမ်ဓာတ် လုံလောက်စွာ ရရှိဖို့ အရေးကြီးပါတယ်။
(၂) သွေးဖိအား ကျစေတယ်
မဂ္ဂနီဆီယမ်ဟာ သွေးကြောနံရံတွေကို ပျော့ပြောင်းစေတဲ့ အစွမ်းသတ္တိရှိတဲ့
nitric oxide နဲ့ endothelial prostaglandin တွေ ထွက်စေပြီး သွေးဖိအားကို ကျစေပါတယ်။
(၃) သွေးကြောနံရံတွေ မာကြောလာခြင်းမှ ကာကွယ်ပေးတယ်
သွေးကြောတွင်းနဲ့ သွေးကြောနံရံမှာ အဆီ၊ ကိုလက်စထရောနဲ့ တခြားအရာတွေ စုပုံလာပြီး သွေးကြောနံရံတွေ မာပြီးထူလာကာ သွေးစီးဆင်းမှု နှေးလာတာကို athrosclerosis လို့ ခေါ်ပါတယ်။ မဂ္ဂနီဆီယမ်က atherosclerosis ဖြစ်စဥ်ကို လျှော့ချပေးပြီး နှလုံးရောဂါတွေ မဖြစ်အောင် ကာကွယ်ပေးပါတယ်။
(၄) မကောင်းတဲ့ ကိုလက်စထရောတွေကို နည်းစေတယ်
မဂ္ဂနီဆီယမ်က သွေးကြောတွေထဲမှာ high-density lipoprotein (HDL) လို့ ခေါ်တဲ့ ကောင်းတဲ့ ကိုလက်စထရောတွေကို များစေပြီး low-density lipoprotein (LDL) လို့ခေါ်တဲ့ မကောင်းတဲ့ ကိုလက်စထရောနဲ့ triglycerides အဆီတွေကို လျော့နည်းစေပါတယ်။
(၅) အမျိုးအစား ၂ ဆီးချိုမဖြစ်အောင် ကာကွယ်ပေးတယ်
မဂ္ဂနီဆီယမ်က သကြားဓာတ်တွေကို ဖြိုခွဲနိုင်တဲ့ အစွမ်းသတ္တိရှိပြီး အင်ဆူလင်ခုခံမှု (ခန္ဓာကိုယ်ဆဲလ်တွေက အင်ဆူလင်ကို မတုံ့ပြန်နိုင်တော့လို့ သွေးထဲမှာ သကြားဓာတ်တွေ များလာခြင်း) မဖြစိအောင် ကာကွယ်ပေးလို့ အမျိုးအစား ၂ ဆီးချို ဖြစ်နိုင်ခြေလည်း လျော့နည်းစေပါတယ်။
ဒါကြောင့် မဂ္ဂနီဆီယမ် ချို့တဲ့ရင်…
• သွေးတိုးရောဂါ (hypertension)
• နှလုံးစည်းချက်မမှန်တဲ့ ရောဂါတွေ (heart arrhythmias)
• နှလုံးသွေးကြောကျဥ်း/ သွေးကြောပိတ်ရောဂါ (coronary artery diseases)
• ရုတ်တရက်နှလုံးအမောဖောက်တဲ့ရောဂါ (heart attack)
• အမျိုးအစား ၂ ဆီးချိုရောဂါ (type 2 diabetes) စတဲ့ ရောဂါတွေ ဖြစ်နိုင်ခြေ များမှာပါ။
မဂ္ဂနီဆီယမ် မချို့တဲ့ရအောင် မဂ္ဂနီဆီယမ် ကြွယ်ဝတဲ့ အစားအစာတွေ နေ့စဥ် ပါဝင်အောင် စားသုံးပါ။ အစိမ်းရောင်အရွက်တွေ၊ အစေ့အဆံတွေ၊ အခွံမာသီး၊ ပဲအမျိုးမျိုးနဲ့ ချောကလက်တွေမှာ မဂ္ဂနီဆီယမ် ကြွယ်ဝစွာ ပါဝင်ပါတယ်။
အစားအစာတွေ ဂရုတစိုက် မစားနိုင်လို့ ဖြည့်စွက်စာအားဆေးအနေနဲ့ သောက်သုံးမယ်ဆိုရင် အရွယ်ရောက်ပြီးသား အမျိုးသားတွေက တစ်နေ့ကို 280-400 mg သောက်သင့်ပြီး အမျိုးသမီးတွေက 270-350 mg ခန့် သောက်သုံးသင့်ပါတယ်။ လူတစ်ယောက်နဲ့ တစ်ယောက်က အသက်အရွယ်နဲ့ ခန္ဓာကိုယ်အချိုးအစား ကွာခြားသေးတာမို့ ဆရာဝန်နဲ့ တိုင်ပင်ပြီးမှ သောက်တာ အကောင်းဆုံးပါပဲ။
မဂ္ဂနီဆီယမ်ဓာတ်တွေ လိုအပ်တာထက် ပိုနေခဲ့ရင်…
• ပျို့အန်တာ၊ ဝမ်းသွားတာ၊ အစာအိမ်နာတာ
• ဆီးမသွားနိုင်တာ
• ကြွက်သားတွေအားနည်းတာ
• အသက်ရှူရခက်တာ
• သွေးပေါင်ကျတာ
• နှလုံးခုန်နှုန်းမမှန်တာ
• သတိလစ်ပြီး ကိုမာဝင်သွားတာနဲ့
• အသက်သေဆုံးသည်အထိ ဖြစ်နိုင်ပါတယ်။
ဒါကြောင့် နှလုံးကျန်းမာရေးအတွက် မရှိမဖြစ်လိုအပ်တဲ့ မဂ္ဂနီဆီယမ် လုံလောက်ပြီး မချို့တဲ့ရအောင် ဂရုစိုက်ရမှာ ဖြစ်သလို တန်ဆေးလွန်ဘေး ဆိုသလို လိုအပ်တာထက် ပိုလွန်မသွားရအောင် ဂရုပြုဖို့လည်း အရေးကြီးတာမို့ သောက်သင့်တဲ့ ပမာဏနဲ့ အချိန်ကာလကို ဆရာဝန်နဲ့ တိုင်ပင်ပြီးမှ သောက်သင့်ပါတယ်။
Author: Dr.Yee Mon
