ရောဂါပိုးတွေ များပြားလှတဲ့ ကမ္ဘာကြီးမှာ ကျန်းမာစွာ နေထိုင်နိုင်ဖို့ လူသားတွေရဲ့ ခန္ဓာကိုယ်ထဲမှာ ကိုယ်ခံအားစနစ် ပါရှိပါတယ်။ ပြင်ပက ရောဂါပိုးတွေ ခန္ဓာကိုယ်ထဲကို ဝင်ရောက်လာတဲ့အခါ ကိုယ်ခံအားစနစ်က အလိုအလျောက် ပြန်လည်တုံ့ပြန်ပြီး ရောဂါပိုးတွေကို တိုက်ထုတ်ပစ်လေ့ ရှိပါတယ်။
ကိုယ်ခံအားနည်းလာတဲ့အခါ ခန္ဓာကိုယ်မှာ ဘာတွေ ဖြစ်လာမလဲ?
1. မကြာခဏ အအေးမိတုပ်ကွေး ဖြစ်မယ်
ရာသီအကူးအပြောင်းတွေမှာ တစ်နှစ်ကို ၂ကြိမ်၊ ၃ ကြိမ်လောက် အအေးမိတာက ပုံမှန်ပါပဲ။ အအေးမိ နှာစေးချောင်းဆိုးတဲ့အခါ ခန္ဓာကိုယ်က ပြန်လည်တိုက်ထုတ်ပြီး လေးငါးရက်နေရင် ပြန်ကောင်းသွားလေ့ ရှိပါတယ်။ ဒီလိုမဟုတ်ဘဲ တစ်လမှာ အကြိမ်ကြိမ် အအေးမိနေတာ၊ အအေးမိရင်လည်း ခဏနဲ့ သက်သာမသွားဘဲ ရက်ကြာရှည်နေရင်တော့ ကိုယ်ခံအားစနစ်က အားနည်းပြီး အတော်ကို ရုန်းကန်နေရတဲ့ လက္ခဏာ ဖြစ်ပါတယ်။
2. အစာခြေစနစ်မှာ ပြဿနာတွေ ဖြစ်လာမယ်
ကိုယ်ခံအားစနစ်ရဲ့ ၇၀%ခန့်က အစာခြေစနစ်ထဲမှာ တည်ရှိပါတယ်။ အူတွေထဲက အကျိုးပြုဘက်တီးရီးယားတွေဟာ ရောဂါပိုးတွေ မဝင်ရောက်နိုင်အောင် ကာကွယ်ပေးပြီး ကိုယ်ခံအားစနစ်ကို ပံ့ပိုးပေးပါတယ်။ ဒါကြောင့် ကိုယ်ခံအားနည်းလာရင် ဝမ်းသွားတာ၊ ဝမ်းချုပ်တာ၊ အစာမကြေ ရင်ပြည့်ရင်ကယ်ဖြစ်တာ၊ အစာအိမ်အနာဖြစ်တာ စတဲ့ ပြဿနာတွေ ကြုံတွေ့ရနိုင်ပါတယ်။
3. ရောဂါပိုးတွေ ဝင်လွယ်မယ်
ရောဂါပိုးတွေ ဝင်လွယ်တာကလည်း ကိုယ်ခံအားနည်းခြင်းရဲ့ နောက်ဆက်တွဲ ဆိုးကျိုးပါပဲ။
• တစ်နှစ်မှာ ၄ ကြိမ်နဲ့အထက် နားအတွင်း ပိုးဝင်တာ
• တစ်နှစ်မှာ ၃ ကြိမ်လောက် ထိပ်ကပ်နာဖြစ်တာ
• တစ်နှစ်မှာ ၂ ကြိမ်ခန့် နမိုးနီးယားအဆုတ်ရောင်ရောဂါ ဖြစ်တာ
• ပိုးသတ်ဆေးတွေ ခဏခဏ သောက်ရတာတွေက ကိုယ်ခံအားနည်းနေတဲ့ လက္ခဏာတွေ ဖြစ်ပါတယ်။
4. အနာကျက်နှေးမယ်
အနာကျက်တဲ့စနစ်ဟာ ကိုယ်ခံအားအပေါ် မူတည်နေပါတယ်။ ကိုယ်ခံအား မကောင်းရင် ဆဲလ်အသစ်တွေ မမွေးဖွားနိုင်တော့တဲ့အတွက် ထိခိုက်ရှနာနဲ့ ဒဏ်ရာတွေဟာ အနာကျက်ပြီး ပုံမှန်အရေပြား ပြန်ဖြစ်နိုင်ဖို့ ကြာတတ်ပါတယ်။
5. တချိန်လုံး မောပန်းနုံးချိနေမယ်
ကိုယ်ခံအားနည်းနေတဲ့အခါ ရောဂါပိုးတွေကို တိုက်ထုတ်နိုင်ဖို့ စွမ်းအင်တွေ ပိုမိုသုံးရတဲ့အတွက် တချိန်လုံး မောပန်းနုံးချိသလို ခံစားနေရတတ်ပါတယ်။
6. စိတ်ဖိစီးမှုတွေ များလာမယ်
စိတ်ဖိစီးမှု များနေတာဟာ ကိုယ်ခံအားနည်းတဲ့ လက္ခဏာတခုပါပဲ။ အလုပ်မှာ၊ အိမ်မှာ စိတ်ဖိစီးတဲ့အခါ ရောဂါပိုးတွေကို တိုက်ထုတ်နိုင်တဲ့ သွေးဖြူဥတွေ ခန္ဓာကိုယ်ထဲမှာ နည်းသွားပြီး ကိုယ်ခံအား ကျလာတတ်ပါတယ်။ ကိုယ်ခံအားကျလာပြီး နေထိုင်မကောင်းတဲ့အခါ စိတ်ဖိစီးမှုက ပိုဆိုးလာပါလိမ့်မယ်။
ကိုယ်ခံအားကောင်းချင်ရင်…
• အိပ်ရေးဝအောင်အိပ်တာ
• လေ့ကျင့်ခန်းမှန်မှန်လုပ်တာ
• လက်မကြာခဏဆေးတာ
• ကာကွယ်ဆေးတွေထိုးတာ
• ဗီတာမင် C၊ ဗီတာမင် D ၊ zinc နဲ့ selenium ဓာတ်တွေ ကြွယ်ဝတဲ့ အာဟာရတွေ စားတာ သို့မဟုတ် အားဆေး မှီဝဲတာတွေ လုပ်ခြင်းဖြင့် ဒီဆိုးကျိုးတွေ မဖြစ်အောင် ကာကွယ်နိုင်မှာပါ။
Author : Dr.Yee Mon
