ပျားရည်ကို ခေတ်အဆက်ဆက်ကတည်းက ဆေးဖက်ဝင်ပစ္စည်းအဖြစ် သတ်မှတ်အသုံးပြုခဲ့ကြပါတယ်။ ပျားရည်ဟာ ခန္ဓာကိုယ်ကျန်းမာရေးအတွက်သာမက အသားအရေလှပဖို့အတွက်လည်း အထောက်အကူဖြစ်စေပါတယ်။ အသားအရေထိန်းသိမ်းဖို့အတွက် ပျားရည်နဲ့အတူ အခြားသဘာဝပစ္စည်းလေးတွေပါ တွဲပြီးအသုံးပြုပေးမယ်ဆိုရင် အကုန်အကျသက်သာစေသလို ထိရောက်တဲ့ အာနိသင်ကိုရရှိစေမှာဖြစ်ပါတယ်။ ပျားရည်ကို မျက်နှာအသားအရေပေါ် ပုံမှန်မကြာခဏအသုံးပြုပေးပါက နုပျိုကျန်းမာပြီး ကြည်လင်တဲ့အသားအရေကို ရရှိပိုင်ဆိုင်လာစေမှာဖြစ်ပါတယ်။
အသားအရေအတွက် ပျားရည်ရဲ့ကောင်းကျိုးတွေကတော့-
၁။ အသားအရေအစိုဓာတ်ဖြည့်တင်းပေးနိုင်ခြင်း
ပျားရည်ဟာ အရေပြားအတွင်းပိုင်းထိသို့ စိမ့်ဝင်ပြီး ရေဓာတ်ဖြည့်တင်းပေးနိုင်သလို အသားအရေကိုလည်း နူးညံ့ချောမွေ့စေနိုင်ပါတယ်။ ဒါကြောင့် ရေဓာတ်ဖြည့်တင်းပေးတဲ့ Skincare ပစ္စည်းတွေထဲမှာ ပျားရည်ပါဝင်လေ့ရှိတာကို သတိထားမိကြမှာပါ။
၂။ အမာရွတ်တွေကို မှေးမှိန်သက်သာစေနိုင်ခြင်း
ပျားရည်မှာ ပင်ကိုသဘာဝအရ ပိုးသတ်နိုင်စွမ်းရှိပါတယ်။ ပျားရည်ဟာ ရောင်ရမ်းမှုတွေကို လျော့ကျစေနိုင်ပြီး ဒဏ်ရာတွေကိုလည်း လျင်မြန်စွာ သက်သာလာစေနိုင်ပါတယ်။ ဒါ့အပြင် ပျားရည်မှာပါဝင်တဲ့ Antioxidants ဓာတ်တွေဟာ ပျက်စီးနေတဲ့အသားအရေကို ချော့မွေ့အောင် ပြန်လည်ပြုပြင်ပေးနိုင်ပါတယ်။ ပျားရည်ကို ပုံမှန်လိမ်းပေးနိုင်ရင် အမာရွတ်တွေကိုလည်း တဖြည်းဖြည်းမှေးမှိန်သွားစေပါလိမ့်မယ်။
၃။ ဝက်ခြံတွေကို သက်သာစေခြင်း
ချွေးပေါက်တွေပိတ်တာ၊ အဆီပြန်လွန်းတာတွေဟာ ဝက်ခြံတွေဖြစ်ပေါ်လာစေနိုင်ပါတယ်။ ပျားရည်ဟာ မျက်နှာအသားအရေပေါ်က ပိုလျှံနေတဲ့ အဆီတွေကိုဖယ်ရှားပေးနိုင်ပြီး ချွေးပေါက်တွေမပိတ်ဆို့နေအောင် သန့်စင်ပေးနိုင်ပါတယ်။ ဒါ့ပြင် ဝက်ခြံဖြစ်စေတဲ့ ဗက်တီးရီးယားတွေကို သေစေနိုင်ပြီး ဝက်ခြံကြောင့်ရောင်ရမ်းမှုတွေကိုလည်း သက်သာစေနိုင်ပါတယ်။
၄။ မျက်နှာအရေးကြောင်းမဖြစ်အောင် တားဆီးပေးနိုင်ခြင်း
ပျားရည်မှာပါရှိတဲ့ Antioxidants တွေဟာ မျက်နှာအရေးအကြောင်းတွေ မဖြစ်လာအောင် တားဆးပေးနိုင်ပါတယ်။ ပျားရည်နဲ့ ပေါင်းတင်ပေးမယ်ဆိုရင် အသားအရေကို တင်းရင်းလာစေပြီး ငယ်ရွယ်နုပျိုစေနိုင်ပါတယ်။
၅။ ချွေးပေါက်ကျဥ်းစေပြီး အမည်းစက်တွေကိုလည်း သက်သာစေခြင်း
ပျားရည်ဟာ ချွေးပေါက်တွေမှာပိတ်ဆို့နေတဲ့ အညစ်အကြေးတွေကို ဖယ်ရှားသန့်စင်ပေးခြင်းဖြင့် ဝက်ခြံအမည်းစက်တွေကို ပျောက်ကင်းစေပါတယ်။ အစိုဓာတ်ပေးစွမ်းနိုင်သလို ချွေးပေါက်တွေကိုလည်း ကျဥ်းသွားစေနိုင်တာကြောင့် ကြည်လင်တဲ့ အသားအရေကို ရရှိစေမှာပဲဖြစ်ပါတယ်။
၆။ နေလောင်ဒဏ်ကို သက်သာစေခြင်း
ပျားရည်ဟာ ရောင်ရမ်းမှုတွေကို လျော့ကျစေပြီး ပျက်စီးသွားတဲ့ တစ်ရှူးတွေကို ပြန်လည်ပြုပြင်ပေးတာကြောင့် နေလောင်ဒဏ်နဲ့အခြားအပူလောင်နာတွေကို သက်သာစေဖို့ အသုံးဝင်ပါတယ်။ နေလောင်ဒဏ်တွေ အမြန်ဆုံးသက်သာစေနိုင်ဖို့ ပျားရည်နဲ့ရှားစောင်းလက်ပပ်ကို ရောစပ်ပြီး လိမ်းပေးနိုင်ပါတယ်။
၇။ ကြေးချွတ်ပေးနိုင်ခြင်း
အသားအရေသန့်စင်အောင် ကြေးချွတ်ဖို့အတွက် ဓာတုပစ္စည်းပါဝင်တဲ့ ပစ္စည်းတွေသုံးမယ့်အစား သဘာဝပစ္စည်းဖြစ်တဲ့ ပျားရည်ကို ရွေးချယ်အသုံးပြုသင့်ပါတယ်။ ပျားရည်ဟာ အရေပြားပေါ်က ဆဲလ်အသေတွေကို ဖယ်ရှားပေးခြင်းဖြင့် အသားအရေကို သန့်စင်ပေးပြီး ကြည်လင်ဝင်းပလာစေပါတယ်။
ပျားရည်ကို အသုံးပြုပြီးတဲ့အခါမှာတော့ မျက်နှာကို သေချာပြန်ပြီး ဆေးကြောပေးဖို့လိုပါတယ်။ ပျားရည်ကို အချိန်တစ်ခုထိ ပုံမှန်အသုံးပြုပေးသွားမယ်ဆိုရင် သိသာထင်ရှားတဲ့ အကျိုးရလဒ်ကို ရရှိလာစေမှာဖြစ်ပါတယ်။
Author: Dr. Aye Myat
