သဘာဝပစ္စည်းလေးတွေနဲ့ အသားအရေထိန်းသိမ်းမယ်

ကြည်လင်လှပပြီး အပြစ်အနာအဆာကင်းတဲ့ မျက်နှာ​လေးကို ပိုင်ဆိုင်ဖို့က အားလုံးရဲ့အိပ်မက်ပဲဖြစ်ပါတယ်။ မျက်နှာမှာ ဘာမှမလိမ်းထားရင်​​တောင် သဘာဝအလှ​လေးနဲ့ ကြည့်​ကောင်း​နေဖို့က ကြည်လင်ကျန်းမာတဲ့ အသားအ​ရေ​လေးရှိ​နေဖို့လိုပါတယ်။ ဒါပေမဲ့ ​နေ့စဥ်ဘဝမှာ ကြုံ​တွေ့​နေရတဲ့ စိတ်ဖိစီးမှု​ကြောင့် အိပ်​ရေးပျက်တာ​တွေ၊ မမှန်ကန်တဲ့စား​သောက်ပုံစနစ်​တွေ၊ မသန့်ရှင်းတဲ့ပတ်ဝန်းကျင်နဲ့ထိ​တွေ့​​နေရတာ​တွေ၊ ​နေ​လောင်ဒဏ်နဲ့ဖုန်မှုန့်​တွေ စတာ​တွေ​ကြောင့် မျက်နှာဟာ ကြည်လင်မှုမရှိ​တော့ဘဲ ညစ်နွမ်းလာကာ တင်းတိတ်၊ ဝက်ခြံ၊ အဆီဖုစတာ​တွေ ဖြစ်​ပေါ်လာတတ်ပါတယ်။

ဒါ​ကြောင့် အနည်းဆုံး တစ်ပတ်ကို တစ်ကြိမ်ခန့် မိမိရဲ့မျက်နှာအသားအ​ရေကို ပြန်လည်ထိန်းသိမ်း​ပေးဖို့ လိုအပ်ပါတယ်။ အသားအ​ရေထိန်းသိမ်းဖို့ ​ငွေလည်းအများကြီးမကုန်ချင်ဘူး၊ Chemical တွေနဲ့လည်း စမ်းသုံးရမှာ​ကြောက်တယ်ဆိုရင်​တော့ အန္တရာယ်ကင်းတဲ့ သဘာဝပစ္စည်း​လေး​တွေနဲ့ ပုံမှန်ထိန်းသိမ်း​ပေးသင့်ပါတယ်။ အကုန်အကျသက်သာပြီး မိမိရဲ့အိမ်မှာပဲ အလွယ်တကူ အသားအ​ရေထိန်းသိမ်းလို့ရနိုင်မယ့် သဘာဝပစ္စည်း​လေး​တွေကို ဆက်လက်​ဖော်ပြသွားပါမယ်။

(၁) နနွင်း

နနွင်းမှာ Curcumin လို့​ခေါ်တဲ့ ​ရောင်ရမ်းမှုကို ​လျော့ကျ​စေနိုင်တဲ့ ဓာတ်တစ်မျိုးပါဝင်ပြီး ပိုးသတ်နိုင်စွမ်းလည်းရှိတာ​ကြောင့် ​ရောင်ရမ်း​နေတဲ့ ဝက်ခြံ​တွေကို သက်သာသွား​စေနိုင်ပါတယ်။ ဒါ့ပြင် နနွင်းဟာ ​ကော်လဂျင်ထုတ်လုပ်မှုကို အား​ပေးပြီး Antioxidants ​​တွေလည်း ပါဝင်တာ​ကြောင့် အသားအ​ရေကို ဝင်းဝါစို​​​ပြည်တင်းရင်းလာ​စေနိုင်ပါတယ်။ နနွင်းမှုန့်လက်ဖက်ရည်ဇွန်းတစ်ဝက်ခန့်ကို ​ရေနဲ့​ရောစပ်ကာ မျက်နှာ​ပေါင်းတင်​ပေးနိုင်ပါတယ်။

(၂) ပျားရည်

ပျားရည်ဟာ အဆီပြန်ပြီး ဝက်ခြံထွက်လွယ်တဲ့ အသားအ​ရေပိုင်ရှင်​တွေအတွက် အထူးသင့်​တော်ပါတယ်။ ပျားရည်မှာ ပိုးသတ်နိုင်စွမ်းရှိပြီး ဝက်ခြံနဲ့ နီမြန်းမှု​တွေကို ​လျှော့ချ​ပေးနိုင်ပါတယ်။ ဒါ့ပြင် ပျားရည်ဟာ အမာရွတ်နဲ့ အမည်းစက်​တွေကိုလည်း ​မှေးမှိန်သွား​စေနိုင်ပါတယ်။ ပျားရည်စစ်စစ်ကို မျက်နှာ​​ပေါင်းတင်ခြင်းကို တစ်ပတ်နှစ်ကြိမ်ခန့် ပြုလုပ်​ပေးနိုင်ပါတယ်။

(၃) သံလွင်ဆီ

သံလွင်ဆီဟာ အသားအရေခြောက်သွေ့သူတွေအတွက် အထူးသင့်လျော်ပါတယ်။  သံလွင်ဆီဟာ အရေပြားပျက်စီးမှုတွေကို ပြန်လည်ပြုပြင်ထိန်းသိမ်းပေးနိုင်ပြီး အရေပြားကင်ဆာဖြစ်စေနိုင်တဲ့ဆဲလ်တွေကိုပါ ဖျက်ဆီးပေးနိုင်ပါတယ်။ နေလောင်ထားတဲ့အသားအရေကို ပြန်လည်ကုသနိုင်ဖို့အတွက်လည်း သံလွင်ဆီက အထူးသင့်တော်ပါတယ်။ ညအိပ်ရာမဝင်ခင် သံလွင်ဆီအနည်းငယ်ကို မျက်နှာနေရာအနှံ့အပြားသုတ်လိမ်းပြီး ရေနွေးနွေးလေးနဲ့ ပြန်လည်ဆေးချပေးပါ။ သံလွင်ဆီနဲ့ ပုံမှန်မျက်နှာပေါင်းတင်ပေးမယ်ဆိုရင် ကြည်လင်လှပတဲ့မျက်နှာအသားအ​​ရေ​လေးကို ရရှိပိုင်ဆိုင်လာမှာဘဲဖြစ်ပါတယ်။

(၄) လိမ္မော်သီး

လိမ္မော်သီးမှာ ဗီတာမင်စီ ကြွယ်ဝစွာပါဝင်တဲ့အတွက် အဆိပ်အတောက်တွေကိုဖယ်ရှားပေးနိုင်ပြီး ဝက်ခြံကင်းရှင်းကာ တင်းရင်းစိုပြည်တဲ့အသားအရေကို ရရှိပိုင်ဆိုင်လာ​စေနိုင်ပါတယ်။ အသားအရေထိန်းသိမ်းဖို့ လိမ္မော်သီးဖျော်ရည်ကို တစ်နေ့တစ်ခွက် ပုံမှန်သောက်သုံးပေးနိုင်ပါတယ်။

(၅) သခွားသီး

သခွားသီးကို အသားအရေထိန်းသိမ်းဖို့အတွက် တော်တော်များများ အသုံးပြုဖူးကြပါတယ်။ သခွားသီးဟာ ရေဓာတ်ဖြည့်တင်းပေးနိုင်တဲ့အပြင် အရေပြားရဲ့အပေါ်ဆုံးအလွှာကိုပါ ပြုပြင်ထိန်းသိမ်းပေးနိုင်ပါတယ်။ ကျန်းမာစို​ပြည်တဲ့မျက်နှာအသားအရေကိုရရှိပိုင်ဆိုင်နိုင်ဖို့ သခွားသီးကိုပါးပါးလှီးပြီး မျက်နှာပေါ်ကပ်ခြင်းကို တစ်ပတ် နှစ်ကြိမ်ခန့် အနည်းဆုံးပြုလုပ်ပေးရမှာဖြစ်ပါတယ်။

(၆) ရှားစောင်းလက်ပပ်

ရှားစောင်းလက်ပပ်မှာ ဗီတာမင်နဲ့ Antioxidants ​တွေ ကြွယ်ဝတာတာကြောင့် အသားအရေကို စိုပြည်နူးညံ့လာစေနိုင်ပါတယ်။ ဒါ့ပြင် ဝက်ခြံ နဲ့နေလောင်ဒဏ်တွေကို ကုသဖို့အတွက်လည်း အလွန်အသုံးဝင်ပါတယ်။ ရှားစောင်းလက်ပပ်နဲ့ ပုံမှန် မျက်နှာပေါင်းတင်ပေးမယ်ဆိုရင် ရေဓာတ်ပြည့်ဝပြီး အရေးကြောင်းတွေကင်းရှင်းတဲ့ အသားအ​ရေကို ရရှိပိုင်ဆိုင်လာ​စေမှာဖြစ်ပါတယ်။

(၇) သံပရာသီး

သံပရာသီးဟာ အဆိပ်အ​တောက်​တွေကို ဖယ်ရှား​ပေးနိုင်ပြီး ပိုး​သေ​စေနိုင်စွမ်းရှိတာ​ကြောင့် ဝက်ခြံ​တွေကို ကုသဖို့အတွက် အလွန်အသုံးဝင်ပါတယ်။ ဒါ့ပြင် သံပရာသီးမှာ ဗီတာမင်စီနဲ့ Citric Acid တို့ ကြွယ်ဝစွာပါဝင်တာ​ကြောင့် အသားအ​ရေကို ဖြူဝင်းနူးညံ့လာ​စေနိုင်ပါတယ်။ ဒူးမည်းခြင်းနဲ့ တံ​တောင်ဆစ်မည်းခြင်း​တွေကိုလည်း သက်သာ​စေနိုင်ပါတယ်။ တစ်​နေ့ကို သံပရာရည်တစ်ခွက်ပုံမှန်​သောက်​ပေးရင် အသားအရည်ကြည်လင်စို​ပြေလာ​စေနိုင်သလို ခုခံအားကိုလည်း ​ကောင်းမွန်လာ​စေနိုင်ပါတယ်။

(၈) အုန်းဆီ

အုန်းဆီမှာ Antioxidants နဲ့ Fatty Acidsတို့ ကြွယ်ဝစွာပါဝင်ပြီး ရောင်ရမ်းမှု​တွေကို လျှော့ချ​ပေးနိုင်စွမ်းရှိပါတယ်။ အုန်းဆီကို အစိုဓာတ်ထိန်းဖို့အတွက်ပဲဖြစ်ဖြစ်၊ မျက်နှာသန့်စင်​စေဖို့ဘဲဖြစ်ဖြစ် အသုံးပြု​ပေးနိုင်ပါတယ်။ ဒါ့ပြင် အုန်းဆီဟာ ဝက်ခြံ၊ အမည်းစက်​တွေကိုလည်း သက်သာလာ​စေနိုင်ပါတယ်။

(၉) ဒိန်ချဥ်

ဒိန်ချဉ်မှာ Lactic Acid ကြွယ်ဝစွာပါဝင်လို့ အသားအရေကို စိုစွတ်စေပြီး အရေးကြောင်းများကို လျော့ပါးစေပါတယ်။ မျက်နှာမည်းညစ်ခြင်းနဲ့ အမည်းစက်​တွေ လျော့ပါးစေရန်လည်း ကူညီပေးပါတယ်။ အသားအ​​ရေကို တင်းရင်းစေပြီး တောက်ပြောင်လာစေပါတယ်။ ဒါ့ပြင် နေလောင်တာကို သက်သာစေပြီး ဝက်ခြံမပေါက်​စေရန်လည်း ကာကွယ်ပေးနိုင်ပါတယ်။ ဒိန်ချဥ်နဲ့​​ပေါင်းတင်မယ်ဆိုရင် မျက်နှာ​ပေါ် ၁၅ မိနစ်ခန့်ထားပြီး ​ရေ​​အေးနဲ့ပြန်လည်​ဆေးပေးနိုင်ပါတယ်။

(၁၀) ငှက်​ပျောသီး

ငှက်ပျောသီးမှာ ပိုတက်စီယမ်၊ ဗီတာမင် A၊ Bနဲ့ ​ရေဓာတ်တို့ ကြွယ်ဝစွာပါ၀င်​နေပါတယ်။ ငှက်​ပျောသီးနဲ့ မျက်နှာ​ပေါင်းတင်​ပေးမယ်ဆိုရင် အရေးကြောင်းတွေကို ကာကွယ်ပေးပြီး အရွယ်မတိုင်မီ အိုမင်းရင့်​​ရော်ခြင်း​တွေကိုလည်း တားဆီး​ပေးနိုင်ပါတယ်။ ဒါ့ပြင် ငှက်ပျောသီးဟာ ဝက်ခြံ၊ အမည်းစက်​တွေကို ကုသဖို့အတွက်လည်း အသုံးဝင်ပါတယ်။

အထက်ပါ သဘာဝပစ္စည်း​လေး​တွေတိုင်းမှာ အသားအ​ရေကို ကျန်းမာလှပ​စေတဲ့ ဓာတ်အမျိုးမျိုးပါဝင်​နေတာ​ကြောင့် စွဲစွဲမြဲမြဲ ပုံမှန်​မျက်နှာပေါင်းတင်​ပေးသွားမယ်ဆိုရင် ကြည်လင်ပြီး အနာအဆာကင်းတဲ့မျက်နှာ ​​လေးကို ရရှိပိုင်ဆိုင်လာမှာပဲဖြစ်ပါတယ်။

Author: Dr. Aye Myat