ကျား၊မ မရွေး အသားလေးဖြူချင်၊ ကြည်ချင်လို့ဆိုပြီး အသားဖြူဆေးတွေ သောက်တဲ့သူတွေ များလာပေမယ့် အသားဖြူဆေးသောက်တာက ကောင်းသလား၊ ဆိုးကျိုးတွေ ရှိသလား ဆိုတာ သိတဲ့သူတော့ နည်းမယ်ထင်ပါတယ်။ အသားဖြူဆေးအနေနဲ့ အဓိကသောက်သုံးနေကြတဲ့ gluta ဂလူသာ ဆိုတဲ့ glutathione ကို glycine, L-cysteine, and L-glutamate လို့ခေါ်တဲ့ အမိုင်နိုအက်ဆစ်တွေကနေ ပြုလုပ်ပေးပြီး ခန္ဓာကိုယ်ရှိ အသည်းနဲ့ အာရုံကြောတွေကနေ ထုတ်လုပ်ပေးပါတယ်။
Glutathione ဟာ ခန္ဓာကိုယ်ထဲက အဆိပ်အတောက်တွေနဲ့ free radicals တွေကို ချေဖျက်ပေးသလို ကိုယ်ခံအားစနစ်ကိုလည်း ကောင်းစေတဲ့ antioxidant တစ်မျိုးဖြစ်ပါတယ်။ ဗိုက်တာမင်စီနဲ့အီးကို တိုးပွားစေတာ၊ DNA တွေ ပြုပြင်ထုတ်လုပ်ပေးတာ၊ အသည်းနဲ့ သည်းခြေအိတ်က အဆီတွေကို ချေဖျက်ရာမှာ ကူညီပေးတာတွေကိုလည်း glutathione က လုပ်ဆောင်ပေးပါတယ်။Glutathione က အသားဖြူစေတဲ့ pheomelanin ဆိုတဲ့ ဓာတ်တွေကို များများထွက်စေတဲ့အတွက် အသားဖြူဆေးအနေနဲ့ သုံးစွဲလာကြတာပါ။
အသားဖြူဆေးအနေနဲ့ တွင်ကျယ်စွာသိကြပေမယ့်လည်း တကယ်တော့ glutathione ကို သုံးစွဲနိုင်တဲ့ ရောဂါတွေ အများကြီး ရှိပါတယ်။ ဆီးချို၊ သွေးတိုး၊ နှလုံးရောဂါ၊ သွေးတွင်းအဆီများခြင်း၊ အတွင်းတိမ်၊ ရေတိမ်ရောဂါ၊ အသည်းရောင်၊ အူရောင်ရောဂါ၊ ပန်းနာရင်ကြပ်ရောဂါ၊ အယ်လ်ဇိုင်းမားသတိမေ့ရောဂါ၊ ပါကင်ဆွန်အကြောရောဂါတွေကို ကာကွယ်တဲ့အနေနဲ့ glutathione ကို သုံးစွဲကြပါတယ်။
အဆုတ်ရဲ့ လုပ်ငန်းပိုကောင်းအောင် ရှူဆေးအဖြစ် သုံးစွဲတာ ရှိသလို ကင်ဆာရောဂါရှင်တွေ ကင်ဆာဆေးသွင်းရာမှာရတဲ့ ဘေးထွက်ဆိုးကျိုးတွေကို ကာကွယ်ဖို့ glutathione ကို အကြောဆေးအနေနဲ့ သွင်းပေးတာမျိုးလည်း ရှိပါတယ်။ Glutathione က ခန္ဓာကိုယ်အတွက် မရှိမဖြစ်လိုအပ်တဲ့ အာဟာရဓာတ်တော့ မဟုတ်ပါဘူး။ အစာအာဟာရချို့တဲ့တာ၊ စိတ်ဖိစီးမှုများတာ၊ အသက်ကြီးလာတာ၊ အဆိပ်အတောက်တွေ များတာတွေက glutathione ချို့တဲ့မှု ဖြစ်စေနိုင်ပါတယ်။
ဘေးထွက်ဆိုးကျိုးတွေက ဘာလဲ?
ကြွက်တတ်တာ၊ ဗိုက်ကယ်တာ၊ ဓာတ်မတည့်လို့ ယားပြီးအင်ပြင်ထသလိုဖြစ်တာ၊အသက်ရှူလမ်းကြောင်းဆိုင်ရာ ပြဿနာတွေဖြစ်တာ စတာတွေ ဖြစ်နိုင်ပါတယ်။ Glutathione ကို ကြာရှည်သောက်သုံးရင် ဇင့်ဓာတ်ချို့တဲ့ နိုင်ပါတယ်။ ဒါ့အပြင် ဖြည့်စွက်အစာတွေ၊ ဆေးတွေဟာ အသည်းနဲ့ကျောက်ကပ်မှ စွန့်ထုတ်ရတဲ့အတွက် အင်္ဂါအစိတ်အပိုင်းတွေကို ဒဏ်ဖြစ်စေတဲ့အတွက် ရေများများသောက်ပြီး အဆိပ်အတောက်နဲ့ စွန့်ပစ်ပစ္စည်းတွေကို မြန်မြန်စွန့်ထုတ်ဖို့ လိုအပ်ပါတယ်။
Glutathione ကို ဗိုက်တာမင်စီနဲ့ တွဲသောက်ရင် အာနိသင်ပိုရပြီး အရက်သောက်ရင်တော့ ခန္ဓာကိုယ်ကနေ glutathione ကို စုပ်ယူနိုင်စွမ်း လျော့ကျစေပါတယ်။ Glutathione ကို ကိုယ်ဝန်ဆောင်နဲ့ နို့တိုက်မိခင်တွေကတော့ မသောက်သုံးသင့်ပါဘူး။ သောက်သင့်တဲ့ ပမာဏကတော့ တစ်နေ့ကို ၂၅၀-၁၀၀၀ မီလီဂရမ်အတွင်း သောက်သုံးလို့ရပြီး ဆက်တိုက်အနေနဲ့ နှစ်လခန့် သောက်လို့ရပါတယ်။ မိမိအသားအရေ ပင်ကိုယ်သဘာဝအတိုင်းကတော့ အကောင်းဆုံးဖြစ်ပေမယ့် ပိုလှချင်၊ ပိုဖြူချင်လို့ အသားဖြူဆေး သောက်မယ်ဆိုရင် ကောင်းကျိုးဆိုးကျိုးကို ချိန်ဆပြီး အန္တရာယ်ကင်းကင်းနဲ့ လှနိုင်ကြစေဖို့ ဆောင်ရန်၊ ရှောင်ရန်များကို ရေးသားမျှဝေလိုက်ပါတယ်။
Author: Dr.Yee Mon
