မေမေဖန်တီးပေးတဲ့ အာဟာရအပြည့်နဲ့ မိသားစု ထမင်းဝိုင်းလေး

မေမေတို့ရေ

အိမ်မှာရှိတဲ့ ကလေး၊ လူကြီး၊ ဖိုးဖိုး၊ ဖွားဖွားတို့ရဲ့ ကျန်းမာရေး၊ အာဟာရပြည့်ဝရေးတို့ဟာ မေမေဖန်တီးပေးထားတဲ့ ထမင်းဝိုင်းလေးအပေါ်မှာ အများကြီးမှီခိုနေပါတယ်

အိမ်ရှိလူကုန် ကျန်းမာဖို့၊ သားသားမီးမီးလေးတို့ဉာဏ်ကောင်း ရောဂါကင်းစေဖို့က ချက်ပြုတ်ပေးတဲ့မေမေတို့ရဲ့တာဝန်ပေါ့နော်။

အာဟာရပြည့်တဲ့ထမင်းဝိုင်းလေးတစ်ခု ဖန်တီးနိုင်အောင် ဘယ်လိုအချက်လေးတွေပါဝင်ရမလဲ? ရှောင်ကြဉ်ရမလဲ? အတူတူ ဆက်ပြီးကြည့်ရအောင်ပါနော် …..

✅နေ့စဉ်ပါဝင်သင့်သော အစားအစာများ

1) လတ်ဆတ်သော အသီးအနှံနှင့် အသီးအရွက်များ

         အသီးအနှံနှင့်အသီးအရွက်များတွင် ဗီတာမင်ဓာတ်များ၊ ဓာတ်တိုးဆန့်ကျင်ပစ္စည်းများ၊ အမျှင်ဓာတ်နှင့် ရေဓာတ်များပြည့်ဝစွာပါဝင်ပါတယ်။ ကျန်းမာစေခြင်း၊ ရောဂါကာကွယ်ပေးနိုင်ခြင်းစတဲ့ ကောင်းကျိူးများရစေပါတယ်။ ကလေးများအတွက်ရော လူကြီးများအတွက်ပါ သင့်တော်တာကြောင့် နေ့စဉ်ထည့်သွင်းချက်ပြုတ်သင့်ပါတယ်။

2)ကိုယ်ခန္ဓာဖွံ့ထွားစေသော အစာအုပ်စု

        ဆန်၊ ဂျူံ၊ ပြောင်း၊ အာလူးတို့ဟာဒီအုပ်စုထဲမှာပါပါတယ်။ ခန္ဓာကိုယ်ကြီးထွားရန်နှင့် ကလေးများစာသင်ကြားရာမှာ လိုအပ်သောစွမ်းအင်ရရှိစေပါတယ်။ လူကြီးများအတွက်လည်း နေ့စဉ်လှုပ်ရှား အလုပ်လုပ်ကိုင်နိုင်သော စွမ်းအင်များပေးစွမ်းပါတယ်။

3)အသား၊ ငါး၊ ဥအမျိူးမျိူး၊ ပဲအမျိူးမျိူး

      ကြက်သား၊ ဝက်သား၊ အမဲသား၊ ဥ၊ ပဲအမျိူးမျိူး နှင့်ငါးများမှာ ပါဝင်တဲ့ အသားဓာတ်ကြောင့် ကြွက်သားများသန်စွမ်းစေပါတယ်။ သံဓာတ်၊ ဇင့်ဓာတ်နှင့် အိုမီဂါဓာတ်များပါဝင်သောကြောင့် ဦးနှောက်ဖွံ့ဖြိုးပြီး ဉာဏ်ထက်စေပါတယ်။ လူကြီးများအတွက်လည်း သွေးအားနည်းရောဂါ၊ နှလုံးသွေးကြောရောဂါများကာကွယ်ပေးပါတယ်။ အဆီများသော အသားများကိုတော့ ချင့်ချိန် ချက်ပြုတ်သင့်ပါတယ်။

4)နို့နှင့်နို့ထွက်ပစ္စည်းများ

        နို့၊ ဒိန်ချဉ်၊ ထောပတ်တို့မှာ ကယ်စီယမ်နှင့် ပရိုတင်း(အသားဓာတ်) များပါဝင်သောကြောင့် သွားနှင့်အရိုးများကိုကြံ့ခိုင်သန်မာစေပါတယ်။ ကလေးရော လူကြီးများအတွက်ပါသင့်တော်ပါတယ်။ အလွန်အကျွံတော့ မစားသုံးသင့်ပါ။

❌ရှောင်ကြဉ်ရမည့် အစားအစာများ

ပြုပြင်ထားသော အချိူမှုန့်များ၊အသားမှုန့်များ

ပြည့်ဝဆီများဖြစ်သော တိရိစ္ဆာန်အဆီများ၊ စားအုန်းဆီများ

အာလူးကြော်၊ ဘာကာ၊ ကိတ်၊ ချောကလက်၊ ဘီစကစ်ကဲ့သို့ အသင့်စား အစားအစာများ

အချိူရည်အမျိူးမျိူး

ကဖင်းဓာတ်ပါသော ကော်ဖီ၊ လက်ဖက်ရည်၊ ခွန်အားဖြည့်အချိူရည်များ

    အထက်ပါအစားအစာများ အလွန်အကျွံစားသုံးတဲ့ကလေးတွေမှာ အဝလွန်ရောဂါ၊ အမျိူးအစား၂ ဆီးချိူရောဂါ၊ သွားရောဂါများဖြစ်စေပါတယ်။ လူကြီးတွေမှာလည်း ဆီးချိူရောဂါ၊သွေးတိုးနှင့် နှလုံးရောဂါများဖြစ်စေတယ်။

       လူကြီးများက မိမိအသိစိတ်နှင့်ထိန်းချူပ်နိုင်သော်လည်း ကလေးငယ်များကို ထိန်းချူပ်ရန်ခက်ခဲတတ်ပါတယ်။ ကလေးတွေ ကျန်းမာရေးနဲ့ညီညွတ်အောင် ထိမ်းကျောင်းနိုင်မယ့် နည်းလမ်းလေးတွေလည်း ဖတ်ကြည့်ရအောင် ……

1) အသက်ငယ်ငယ်ထဲက အပြင်စာကျွေးခြင်းကို အကျင့်မလုပ်ပါနဲ့။

2) အပြင်စာမကောင်းဘူး။ မစားနဲ့ဟု ပြောခြင်းထက် အသီးအနှံများ၊ အားရှိစေသောအစာများရဲ့ ကောင်းကျိူးကို ပြောပြီးကျွေးပါ။

3) ဖေဖေ မေမေတို့ကိုယ်တိုင်ကလည်း စံပြဖြစ်အောင် အပြင်စာလျှော့စားပါ။

4) တစ်ခါတစ်ရံ ဖိုးဖိုး၊ ဖွားဖွား၊ ဦးဦး၊ ဒေါ်ဒေါ်တို့က အချိူတွေ အရမ်းကျွေးနေတာမျိူးရှိပါတယ်။ ထိုအခြေအနေမျိုးတွင် မိသားစုကိုပါ ပူးပေါင်းပါဝင်ဆောင်ရွက်အောင် ကြိုးစားပါ။

5) ကလေးကို ဆုချလျှင် အချိူများ၊ မုန့်များ မပေးပါနှင့်။

6) ကျန်းမာရေးနှင့်ညီညွတ်သော အစားအစာများသာ ထမင်းဘူးထဲထည့်ပေးပါ။

7) စျေးဝယ်တဲ့အခါ ကလေးနှင့်တူတူဝယ်လျှင် ကျန်းမာသော စားစရာများသာဝယ်ပါ။ ကလေးကို  တစ်ပါတည်း သင်ကြားပြီးဖြစ်စေပါသည်။

8) ကလေးကို ရေများများတိုက်ပါ။

9) မုန့်များ အချိူရည်များကို လုံးဝမစားဖို့ပြောလို့ရမည်တော့မဟုတ်ပါ။ တစ်ပါတ်မှာ တစ်ရက် သတ်မှတ်ပြီးကျွေးပါ။

10) မုန့်အချိူများအစား အသီး၊ အသီးခြောက်၊ အစေ့ဆန်များအစားထိုးကျွေးပါ။

11) အိပ်ရေးဝဝအိပ်စေပါ။ အိပ်ရေးမဝလျှင် အချိူနှင့်မုန့်များ ပိုမိုတောင့်တ တတ်ပါသည်။

မေမေများအားလုံး အာဟာရနှင့်ပြည့်စုံသော ထမင်းဝိုင်းလေး ဖန်တီးနိုင်ပါစေ။

Author : Dr. ဆုမြတ်နိုး