ယောဂလေ့ကျင့်ခန်း စတင်လေ့လာဖြစ်ခဲ့ပုံနဲ့ ရရှိလာတဲ့အကျိုးကျေးဇူးတွေကို ပြောပြပေးပါဦး။
ယောဂကစားရတာက ကျန်းမာစေတဲ့အတွက် သဘောကျပါတယ်။ ခန္ဓာကိုယ်လှုပ်ရှားမှုနဲ့ စိတ်ကို ပေါင်း စပ်ပြီး တိုးတက်အောင်လုပ်ဆောင်ရတာ၊ ကိုယ်တိုင်ကလည်းဝါသနာပါတဲ့အတွက်ကြောင့် လေ့လာဖြစ်သွား တာပါ။
ကိုယ်ကိုယ်တိုင်ကလည်း ယောဂကို ရေရှည်လေ့ကျင့်လာတဲ့အတွက် အကျိုးကျေးဇူးတွေက များတယ်။ အတိုချုံ့ပြောရရင် မကစားခင်တုန်းက ခန္ဓာကိုယ်က ပုံမကျဘူး၊ အရပ်လည်း မရှည်ဘူး။ ကစားပြီးတဲ့ နောက်ပိုုင်း ခန္ဓာကိုယ် အချိုးအစားလည်း ပုံကျလာတယ်၊ အရပ်လည်း ပိုရှည်လာပါတယ်။
ရရှိလာတဲ့ အကျိုးကျေးဇူးတွေကို ဘယ်နေရာတွေမှာ အသုံးဝင်ပါသလဲ။
သူ့နေရာနဲ့ သူ အသုံးဝင်ပါတယ်။ ဒေါသထွက်တဲ့နေရာမှာ ပိုပြီးအသုံးဝင်ပါတယ်။ ယောဂကစားရင် စိတ်တည်ငြိမ်တယ်၊ စိတ်ဖိစီးမှုတွေ လျော့ကျတယ်။ အဲဒီအတွက်ကြောင့်မို့ ဒေါသထွက် စိတ်ဆိုးလာရင် စိတ်ကို လျှော့ချတတ်လာတယ်။ အရမ်းနေလို့ မကောင်းတာမျိုးတော့မဟုတ်ပါဘူး၊ စိတ်ကို ထိန်းသွား တတ်တဲ့ သဘောမျိုးပါ။
ကျန်းမာရေးကောင်းမွန်မှုဖို့အတွက် လက်ရှိမှာ ဘယ်လိုနေထိုင်စားသောက်မှုပုံစံနဲ့ နေထိုင်ပါသလဲ။
ကိုယ်တိုင်ကလည်း ယောဂနည်းပြဆရာမ တစ်ယောက် ဖြစ်တဲ့အတွက် ကျန်းမာရေးအတွက် ထွေထွေ ထူးထူးနေထိုင်စရာ မလိုပါဘူး။ ဒါပေမဲ့ သင်တန်းချိန်တွေ တအားများတဲ့အတွက်ကြောင့်မို့ ခန္ဓာကိုယ် မပိန် သွားအောင် အစားအသောက်ပိုင်းတွေကို ဂရုတစိုက် စားဖြစ်ပါတယ်။
ယောဂလေ့ကျင့်ခန်းက ကျန်းမာရေးအတွက်အထောက်အကူပြုတော့ စတင်လေ့ကျင့်မယ့်သူတွေ အတွက် ဆောင်ရန်၊ ရှောင်ရန်အချက်တွေ ပြောပြပေးပါဦး။
စတင်လေ့ကျင့်တော့မယ်သူဆိုရင် အဆင်ပြေရင် ပထမဆုံး သုံးလကို အနည်းဆုံးနည်းပြဆရာမတွေနဲ့ သွားရောက်သင်ယူစေချင်ပါတယ်။ ဒါမှ နည်းစနစ်မှန်ကန်မှုကို ရမှာပါ။ တကယ်လို့ အဆင်မပြေရင် အိမ်မှာပဲ လေ့ကျင့်မယ့်သူဆိုရင်တော့ စာအုပ်တွေ၊ အခွေတွေ၊ ဒါမှမဟုတ် Facebook မှာတင်ထားတာတွေကို သေချာလေ့လာမှတ်သားပြီး စတင်လုပ်ဆောင်စေချင်ပါတယ်။
ထူးထူးခြားခြား ကျန်းမာရေးနဲ့ပတ်သက်လို့ ဖြစ်ရပ်တွေ ရှိရင် ပြောပြပေးပါဦး။
ကျွန်မကိုယ်တိုင်က ယောဂလေ့ကျင့်လို့ ထူးထူးခြားခြား ကျန်းမာရေးနဲ့ပတ်သက်လို့ ပြောင်းလဲလာတာက တော့ အရင်ကဆိုလေးဖက်နာရောဂါရှိတယ်။ အခုဆိုရင် အရှင်းပျောက်သွားပါပြီ။ ပြီးတော့ မိန်းကလေးတွေ ဖြစ်နေကျ ဓမ္မတာလာစဉ်နာကျင်ကိုက်ခဲမှုကို အရမ်းခံစားခဲ့ရပါတယ်။ အဲဒီလိုတွေ စဖြစ်တဲ့နေ့တွေဆိုရင် အိပ်ပဲ အိပ်နေရတဲ့ရက်တွေ များပါတယ်။ အခုတော့ လုံးဝကို သက်သာပျောက်ကင်းသွားပါပြီ။ ပုံမှန် ရက်တွေအတိုင်းပဲ နေထိုင်သွားလို့ရပါပြီ။ အဲဒီနှစ်ခုက ကျွန်မ သိသာတဲ့ ယောဂကျင့်လို့ရတဲ့ အကျိုး တွေပါ။ ကိုယ့်ရဲ့ အသားအရေ အလှအပပိုင်းထိန်းသိမ်းမှုကိုလည်း သိရပါတယ်။ ယောဂကစားရင် သွေးလည်ပတ်မှု အားကောင်းစေပါတယ်။ အဲဒီအတွက်ကြောင့် ခန္ဓာကိုယ်အသားအရေက ကြည်လင်လှပလာပါလိမ့်မယ်။ ယောဂကစားတဲ့သူတွေက အထူးတလည် အသားအရေ ကောင်းမွန်ဖို့ တကူးတက လုပ်စရာမလိုပါဘူး။
တစ်ကိုယ်ရေကျန်းမားရေးအတွက် ယောဂအပြင် တခြားဘယ်လိုလေ့ကျင့်ခန်းတွေ လုပ်ဖြစ်သေးပါ သလဲ။
ညီမက ယောဂတစ်ခုကိုပဲ လေ့ကျင့်ဖြစ်ပါတယ်။ တခြားလေ့ကျင့်ခန်းတွေကိုတော့ မလုပ်ဖြစ်ပါဘူး။
မကြာခင်မှာ မိုးရာသီရောက်လာတော့မှာဖြစ်တဲ့အတွက် OnDoctor Magazine ရဲ့ စာဖတ် ပရိသတ်အတွက် ကျန်းမာရေးစကားလက်ဆောင်ပါးပေးပါဦး။
ဟုတ်ကဲ့ပါ၊ မိုးရာသီလည်း ရောက်လာတော့မှာဖြစ်တဲ့အတွက် ကျန်းမာရေးအတွက် လုပ်ဆောင်နေ သူပဲဖြစ်ဖြစ်၊ ခန္ဓာကိုယ်လှပအောင် လေ့ကျင့်ခန်းသွားရောက်လုပ်ဆောင်တဲ့သူပဲဖြစ်ဖြစ် ၊ အိမ်မှာပဲ လေ့ကျင့် သူပဲဖြစ်ဖြစ် မိုးအေးအေးနဲ့မို့ မပျင်းပါနဲ့လို့ မှာချင်ပါတယ်။ ပုံမှန်အတိုင်းပဲ ကိုယ်လုပ်နေကျကို ကျန်းမာရေး ကောင်းဖို့အတွက် အမြဲလုပ်ဆောင်ပါလို့ ပြောချင်ပါတယ်။ ကျေးဇူးတင်ပါတယ်။
အခုလို အချိန်ပေး ဖြေကြားပေးတဲ့အတွက် ကျေးဇူးအထူးတင်ရှိပါတယ်။
