လူ့ဘဝသက်တမ်းတစ်လျှောက်၌ အပျော်ရွှင်ဆုံးအချိန်ကိုမေးလျှင် အဖြေအမျိုးမျိုးထွက်လာမည်ထင်ပါသည်။ ကလေးအရွယ်လား၊ ဆယ်ကျော်သက်အရွယ်လား၊ အိမ်ထောင်ရှင်ဘဝအရွယ်လား၊ ဘယ်အရွယ်ဖြစ်နိုင် ပါမည်နည်း။ သုတေသနတစ်ခုက ဘဝ၏ အပျော်ရွှင်ဆုံးအရွယ်မှာ အသက် ၆၅နှစ် နှင့် ၇၉နှစ် ကြားအရွယ် ဖြစ်သည်ဟု ဆိုသည်။ UK နိုင်ငံမှ အရွယ်ရောက်ပြီးသူပေါင်း ၃၀၀,၀၀၀ ကျော်အား ကွင်းဆင်းလေ့လာခဲ့ကြခြင်းဖြစ်သည်။ ဘဝ၏ အပျော်ရွှင်ဆုံးနှင့် အကျေနပ်ဆုံးအချိန်များသည် အသက် ၈၀ ကျော်လာလျှင် လျော့နည်းကျဆင်းသွားခဲ့သည်။အဆိုပါအရွယ်တွင်စိတ်ပူပင်သောကအမြင့်မားဆုံးဖြစ်သည်ဟုဆိုသည်။ ငယ်ရွယ်သူများနှင့် အငြိမ်းစားယူပြီးသူများသည် လွတ်လပ်သော အချိန်ပိုမိုရနိုင်ကြသည်။ ပိုမိုရလာသော အချိန်များကို မိမိစိတ်ပျော်ရွှင်ချမ်းသာမှုအတွက် လုပ်ဆောင်နိုင်ကြမည်ဖြစ်ပါသည်။ ၆၅ နှစ်နှင့် ၇၉နှစ်ကြားတွင်ရရှိခဲ့သောအမြင့်မားဆုံးပျော်ရွှင်မှုအခြေအနေမှာ၈၀ ကျော်လာချိန်တွင် လျော့နည်းကျဆင်းသွားသည်။ ကျန်းမာရေးညံ့ဖျင်းလာမှု၊ အထီးကျန်ဆန်မှုနှင့် အထီးကျန်ဆန်သည်ဟု ခံစားရမှုတို့ကြောင့် ပျော်ရွှင်မှု ဆိတ်သုန်းလာခြင်းဖြစ်သည်ဟု ဆိုသည်။ ပျော်ရွှင်မှုနှင့် ပတ်သတ်၍ အသက်အရွယ်၊ လူမျိုး၊ ကိုးကွယ်သည့်ဘာသာ၊ အိမ်ထောင်ရေးအခြေအနေ၊ အလုပ်အကိုင်အခြေအနေ၊ နေထိုင်သည့်နိုင်ငံစသည်တို့ှနှင့်ဆက်နွယ်မှုကိုသုတေသနပညာရှင်များက လေ့လာတင်ပြခဲ့ကြသည်။
• အိမ်ထောင်ရှိသူများသည် လူပျိုအပျို၊ မုဆိုးဖိုမုဆိုးမ၊ တစ်ခုလပ်တို့ထက် ပိုမိုပျော်ရွင်မှုရှိကြသည်ဟု ဆိုသည်။ လူ ၁၀ ယောက်တွင် ပျော်ရွှင်ကျေနပ်မှုရှိသူ ၇.၆၇ ရှိသည်။
• အလုပ်အကိုင်ရှိသူများသည် အလုပ်လက်မဲ့များထက် ပျော်ရွှင်ကျေနပ်မှုပိုကြသည်။ အမြဲတမ်း အလုပ်သမားများသည် အချိန်ပိုင်းအလုပ်သမားများထက် ပျော်ရွှင်ကျေနပ်မှု၌ သာလွန်ကြသည်။
• ကိုးကွယ်ရာဘာသာ မတူညီမှုအရ လေ့လာကြည့်ရာတွင် Hindus များသည် အပျော်ရွှင်ဆုံးဖြစ်ကြပြီး Hindus များနောက်တွင် Christians နှင့် Sikhs တို့ရှိသည်ဟုဆိုသည်။
• အမျိုးသမီးများသည် အမျိုးသားများထက် ပူပင်သောကပိုကဲကြသော်လည်း၊ ဘဝအပေါ် ပျော်ရွှင် ကျေနပ်မှု၌ သာလွန်ကြသည်။
• အာရပ်လူမျိုးများသည် ပူပင်သောကအများဆုံးဖြစ်ကြပြီး၊ တရုတ်လူမျိုးများသည် ပူပင်သောက အနည်းဆုံး ဖြစ်ကြသည်။
• မြောက်အိုင်ယာလန်တွင် နေထိုင်သူများသည် ပျော်ရွှင်ကျေနပ်မှု၌ထိပ်ဆုံးတွင်ရှိနေသည်ဟုဆိုသည်။ အင်္ဂလန်တွင် နေထိုင်သူများသည်ပူပင်သောကများ၍ ပျော်ရွှင်မှုနည်းပါးကြသည်။ အရှေ့မြောက်ပိုင်း ဒေသတွင် နေထိုင်ကြသူများသည် ဘဝ၏ ကျေနပ်ပျော်ရွှင်မှု အနိမ့်ဆုံးဖြစ်ကြသည်။
•မိမိကိုယ်မိမိကျန်းမာသည်ဟု ပြောဆိုကြသူများတွင်၁၀ ယောက်၌၈.၀၁ဦးမှာ ကျေနပ် ပျော်ရွှင်သူများဖြစ်ကြသည်။ မိမိကိုယ်မိမိ မကျန်းမာဟု ပြောဆိုကြသူများတွင် ၁၀ ဦး၌ ၄.၉၁ ဦးသာ ပျော်ရွှင်မှုရှိကြသည်။
• အသက် ၉၀ ကျော်သူများသည် ဘဝ၌ ပျော်ရွှင်ကျေနပ်မှု အနိမ့်ဆုံးအဆင့်၌ ရှိနေကြသည်များ ဖြစ်သည်။
• ဘဝ၌ ပျော်ရွှင်ဆုံးအချိန်မှာ အသက် ၆၄ နှစ် မှ ၇၉ နှစ်ကြားအရွယ်ဖြစ်သည်ဟု သုတေသနပညာရှင် များက ပြောကြားခဲ့သည်။
Author – ဒေါက်တာအေးကျော် (ဇီဝကမ္မဗေဒ)
