ရက်ရှောင်နည်းဆိုတာ
ကိုယ်ဝန်တားနည်းတွေ အမျိုးမျိုးရှိတဲ့အထဲမှာ အမျိုးသမီးများ ရက်ရှောင်နည်းကလည်း တစ်ခုအပါအဝင်ပါ။ အမျိုးသမီးများ ရက်ရှောင်နည်းသုံးတာမှာ အားနည်းချက်ရှိသလို အားသာချက်တွေလည်းရှိပါတယ်။
အရေးကြီးဆုံးအချက်ကတော့ ရက်ရှောင်နည်းသုံးဖို့ဆိုတာ အမျိုးသမီးတွေ ရာသီပေါ်ရက်မှန်နေမှဖြစ်ပါမယ်။ တစ်လတစ်ခါနဲ့တင်မပြီးပါဘူး။ ဘယ်နှစ်ရက်တစ်ခါဆင်းတတ်သလဲ တစ်ခါဆင်းဘယ်နှစ်ရက်ကြာလဲ စတာတွေပါ သိနေဖို့လိုပါတယ်။
ရာသီမမှန်တဲ့သူတွေအဖို့ ရက်ရှောင်နည်းသုံးတာစိတ်မချရပါဘူး။ ပုံမှန်ဆင်းနေကျမျိုးမဟုတ်ဘဲ ရာသီခဏခဏဆင်းနေတာတွေ အရေးပေါ်တားဆေး သောက်ထားလို့ သွေးဆင်းနေတာတွေနဲ့ တွက်ပြီး ရက်ရှောင်လို့မရပါဘူး။
အမျိုးသမီးတွေ ရာသီပေါ်ချိန်ဟာ တစ်ယောက်နဲ့ တစ်ယောက်မတူတတ်ကြပါဘူး။ တစ်ချို့တွေမှာ ရက်၃၀အတိမှာ တစ်ခါပေါ်တတ်တယ်။ ဒီလ ၁ရက်နေ့ဆို နောက်လလည်း၁ရက်နေ့မှာသွေးပေါ်တာမျိုးပါ။ တစ်ချို့ကျတော့ ၂၈ရက် တစ်ခါပေါ်တယ်။ တစ်လတစ်ခါ ရှေ့ကို ၃ရက်လောက် စောပြီး သွေးပေါ်တတ်တာမျိုးတွေပါ။ တစ်ချို့ကျတော့ ၂၅ရက်တစ်ခါသွေးပေါ်တယ် တစ်လတစ်လရှေ့ကို ၅ရက်လောက်စောတတ်တယ်။ တစ်ချို့ကျတော့ ရက်၂၀လောက်နဲ့ ပြန်ပေါ်နေတတ်တယ်။
ဒါမျိုးဆို တစ်လထဲ သွေးနှစ်ကြိမ်ပေါ်တာမျိုးတွေဖြစ်လာတတ်ပါတယ်။ တစ်ချို့ကျတော့လည်း ၃၅ရက်မှ တစ်ခါပေါ်တတ်တယ်။ လတိုင်းရက်ကနောက်ကို ဆုတ်ဆုတ်သွားတယ်။ တစ်ချို့လတွေ သွေးမပေါ်တာမျိုး ဖြစ်တတ်တယ်။ ဒါကြောင့် ရက်ရှောင်နည်းသုံးမယ်ဆိုရင်ဖြင့် အမျိုးသမီးသွေးပေါ်ရက်ကို သေချာသိထားမှ အဆင်ပြေပါလိမ့်မယ်။
ရက်ရှောင်နည်းရဲ့ အားသာချက်ကဘာလဲ ဟော်မုန်းဆေးတွေ ဘာမှသုံးစရာမလိုတဲ့ ကိုယ်ဝန်တားနည်းတစ်ခုပါပဲ။ ဟော်မုန်းကြောင့် ဖြစ်လာစေတတ်တဲ့ ပျို့အန်ချင်တာတွေ ရင်သားနာတာတွေ ဗိုက်အောင့်တာတွေ မဖြစ်စေပါဘူး။ အကာအကွယ်သုံးဖို့မလိုတဲ့အခါ အမျိုးသားရော အမျိုးသမီးရော အိမ်ထောင်ရေးသုခ ပြည့်စုံနိုင်တယ်။ ရက်တွေသာ သေချာတယ်ဆိုရင် ကိုယ်ဝန်အတွက်လည်းစိုးရိမ်စရာ မရှိပါဘူး။
အားနည်းချက်တွေလည်း ထိုက်သင့်သလောက်ရှိပါတယ်။ စိတ်ချရတဲ့ရက်မှာ အတူနေမှ အဆင်ပြေမှာပါ။ ကျန်တဲ့ရက်တွေမှာ အတူနေဖို့ဆိုရင်တော့ အကာအကွယ်တွေ သေချာပြန်သုံးရမှာပါ။ အကာအကွယ် မသုံးမိခဲ့ရင်တော့ အရေးပေါ်တားဆေးတွေ ပြန်သုံးရတာတွေ ဖြစ်တတ်တာကြောင့် သွေးပေါ်တာကို ကမောက်ကမ ပြန်ဖြစ်စေပါတယ်။ ဒါဆိုရက်ရှောင်နည်းသုံးဖို့က အဆင်မပြေနိုင်ပြန်ဘူး။
ရက်ရှောင်နည်းဆိုတာ ဘယ်လိုအသုံးပြုရမှာလဲ။
ဥပမာအားဖြင့်တော့ အမျိုးသမီးတစ်ယောက် ၂၈ရက်တစ်ခါသွေးပေါ်တတ်ပြီး တစ်ခါသွေးပေါ်ရင် ၃ရက်လောက်ပဲဆိုခဲ့မယ်ဆိုရင် နောက်လမှာ ပုံမှန်လာနေကျရက်ထက် သုံးရက်ရှေ့တိုးပေါ်တတ်ပါတယ်။ ဒီလို ရာသီစက်ဝန်းမျိုးမှာ ရာသီစပေါ်တဲ့ရက်ကနေ နှစ်ပတ်ဝန်းကျင်လောက်မှာ သားဥကြွေနိုင်တဲ့ရက်တွေပါ။ ၂၈ရက်ဆိုတာ အပတ်ရေနဲ့တွက်ရင် လေးပတ်ပါ။
ဒါကြောင့် အလွယ်ပြောရမယ်ဆိုရင်တော့ ရာသီစပေါ်ပြီး တစ်ပတ်နဲ့ မပေါ်ခင်တစ်ပတ်ကစိတ်ချရတဲ့ရက်တွေပါပဲ။ ကိုယ်ဝန်ရနိုင်တဲ့ရက်တွေကတော့ ရာသီစပေါ်ပြီး ၁၀ရက်လောက်ကနေ ၂၀ရက်လောက်ထိပါ။
အမျိုးသမီးသွေးပေါ်တာ စောလာလေလေ စိတ်ချရတဲ့ရက်ကနည်းလေလေပါ။ ရက်၂၀ တစ်ခါ သွေးပေါ်တတ်တဲ့သူဆို အတော်မှန်းရခက်တာပါ။ ရာသီစပေါ်တဲ့ ၅ရက်လောက်အတွင်းပဲ သေချာစိတ်ချလို့ရပါမယ်။
တစ်လတစ်ခါ နောက်ဆုတ်သွားတတ်တယ်ဆိုရင်တော့ စိတ်ချရတဲ့ရက်က ဘယ်လောက်နောက်ဆုတ်လဲပေါ် မူတည်ပြီး အပြောင်းအလဲ ရှိတတ်ပါတယ်။ ရာသီပေါ်နေတုန်း အတူနေမိရင်ရောလို့ မေးစရာရှိပါတယ်။ ရာသီက ပုံမှန်ပေါ်နေတာမဟုတ်ဘဲ ဆေးသောက်လို့ စသဖြင့် အကြောင်းတစ်ခုခုကြောင့်ဆိုရင် စိတ်မချရပါဘူး။ ပုံမှန်ပေါ်ရက်ဖြစ်နေတယ်ဆိုရင်တော့ စိတ်ချရတတ်တယ်။
ဒါပေမယ့် ပထမဆုံးသွေးပေါ်တဲ့ရက်ထက်စာရင် နောက်ရက်တွေမှာ အတူနေတာက ပိုစိတ်ချရတယ်။ အတူနေပြီး သွေးဆက်ဆင်းတယ်ဆို ပိုစိတ်ချရပါတယ်။ ပထမဆုံးရက်မှာ နည်းနည်းပဲဆင်းတယ်ဆို တစ်ခါတစ်လေသွေးပေါ်တာမမှန်တဲ့အခါတွေမှာ သားဥကြွေလည်းသွေးနည်းနည်းပါးပါးဆင်းတာတွေ ရှိတတ်လို့ပါ။
ရက်ရှောင်နည်းက ရာနှုန်းပြည့်စိတ်ချရတယ်လို့တော့ မပြောနိုင်ဘူး။ တစ်ချို့တွေမှာ ရက်ရှောင်နည်းသုံးပေမယ့် ကလေးရသွားတာလည်းဖြစ်နိုင်တယ်။ ဘာကြောင့်လဲ စဉ်းစားကြည့်ရင် သားဥကြွေတာက တစ်ရက်ပဲခံတယ်ဆိုပြီး သားဥကြွေရက်မရောက်ခင် အကာအကွယ်မဲ့ အတူနေလိုက်မိပေမယ့် သားဥကြွေရက်က တိတိကျကျမပြောနိုင်တာရယ် အမျိုးသားသုက်ပိုးက အမျိုးသမီးကိုယ်ထဲမှာ သုံးရက်အထိအသက်ရှင်နေနိုင်တာရယ်ကြောင့်ပါ။
အမျိုးသားသုက်ပိုးအသက်ရှင်နေတုန်း သားဥကြွေလိုက်တာနဲ့ သုက်ပိုးနဲ့သားဥတွေ့ပြီးကိုယ်ဝန်ရသွားနိုင်တတ်ပါတယ်။ ဒါကြောင့်လည်း ရက်ရှောင်နည်းသုံးတဲ့သူတွေက တကယ်စိတ်ချရတဲ့ ရက်တွေမှာသာ အကာအကွယ်မပါဘဲ အတူနေသင့်ပြီး မှန်းမရနိုင်တဲ့ ရက်မျိုးတွေဆိုရင်တော့ မရှောင်နိုင်ရင် အကာအကွယ်သေချာသုံးဖို့လိုပါတယ်။
Author : Dr. CST
