ဖြည့်စွက်စာအားဆေးတွေ တွင်ကျယ်နေတဲ့ခေတ်မှာ အမျိုးသားတွေရော ဖြည့်စွက်စာတွေ သောက်သုံးဖို့လိုလား ဆိုတဲ့ မေးခွန်းက စိတ်ဝင်စားစရာပါပဲ။
ဖြည့်စွက်စာတွေ သောက်သုံးတာက အပိုတွေပါ၊ မလိုပါဘူးဆိုတဲ့ အမြင်တွေကလည်း ရှိတယ်မဟုတ်လား။ လူတိုင်းလူတိုင်းက ကျန်းမာရေးနဲ့ ညီတဲ့ balanced diet ကို နေ့စဥ်စားနိုင်မယ်၊ ကိုယ်လက်လေ့ကျင့်ခန်း ပုံမှန်လုပ်နိုင်မယ်ဆိုရင် ဖြည့်စွက်စာအားဆေးတွေကို သောက်ဖို့ မလိုပါဘူး။
ဒါပေမယ့် ပြောင်းလဲလာတဲ့ ခေတ်ကာလအခြေအနေ အသင့်စားအစားအစာတွေ များတဲ့ခေတ်မှာ နေ့စဥ်အသီးအရွက် ၅ မျိုး၊ အသား ၅ ကျပ်သားခန့်နဲ့ သစ်သီးတွေ ပါဝင်အောင် စားသုံးဖို့၊ ဆီကြော်တွေ၊ ပြုပြင်ထားတဲ့ အစားအစာတွေ ရှောင်ဖို့ ဆိုတာ တကယ်မလွယ်လှသလို အလုပ်တွေများ၊ စိတ်ဖိစီးမှုတွေများပြီး ကိုယ်လက်လှုပ်ရှားမှုလည်း နည်းတဲ့အခါ ကျန်းမာပြီး အာဟာရပြည့်နိုင်ဖို့ ဖြည့်စွက်စာအားဆေးတွေရဲ့ အကူအညီကို လိုလာပါတယ်။
ဒါကြောင့် အမျိုးသားတွေအတွက် ဖြည့်စွက်စာ ရွေးချယ်တဲ့အခါ ဘယ်လို ဗီတာမင်နဲ့ သတ္တုဓာတ်တွေ ပါဝင်သင့်တယ် ဆိုတာကို ပြောပြပေးသွားပါမယ်။
ဗီတာမင် A
ဗီတာမင် A က အမြင်အာရုံအတွက် အရေးကြီးတဲ့ ဗီတာမင်ပါ။ ဖုန်း၊ ကွန်ပြူတာတွေ တချိန်လုံး သုံးနေကြရတဲ့ IT ခေတ်ကြီးမှာ ဗီတာမင် A ကို လိုအပ်ပါတယ်။
ဗီတာမင် C
ဗီတာမင် C ကတော့ ကိုယ်ခံအားကောင်းပြီး ရောဂါပိုးတွေကို ခုခံကာကွယ်ပေးပါတဲ့ antioxidants ဖြစ်ပါတယ်။ အနာကျက်မြန်တာ၊ ဆဲလ်အသစ်တွေ ဖြစ်စေတာနဲ့ အသားအရေ ချောမွေ့စေတာကလည်း ဗီတာမင် C ကြောင့်ပါ။
ဗီတာမင် D
ဗီတာမင် D ကတော့ ကြွက်သားနဲ့ အရိုးအဆစ်တွေ သန်မာအောင် လုပ်ဆောင်ပေးပါတယ်။ ခန္ဓာကိုယ်ကနေ ကယ်လ်ဆီယမ်တွေ ပိုမို စုပ်ယူနိုင်အောင်လည်း ဗီတာမင် D က ကူညီပေးပါတယ်။
ဗီတာမင် B complex
ဗီတာမင် B complex ဆိုတာက ဗီတာမင် B1, B2, B3, B5, B6, B7, B9, B12 ရှစ်မျိုး ပေါင်းထားတာကို ခေါ်တာ ဖြစ်ပြီး စွမ်းအင်တွေ ထုတ်လုပ်ဖို့၊ ဦးနှောက်ရဲ့ စွမ်းဆောင်ရည်တွေ ကောင်းဖို့နဲ့ နှလုံးကျန်းမာရေး ကောင်းဖို့ အရေးပါပါတယ်။
အိုမီဂါသရီး ဖက်တီးအက်ဆစ် (omega 3 fatty acids)
Omega 3 fatty acids ကတော့ ငါးကြီးဆီပါ။ ငါးကြီးဆီက နှလုံးကျန်းမာစေပြီး မှတ်ဥာဏ်ကောင်းစေသလို ရောင်ရမ်းမှုတွေကိုလည်း လျော့ကျစေပါတယ်။
မဂ္ဂနီဆီယမ်
မဂ္ဂနီဆီယမ်က အမျိုးသားတွေရဲ့ ကျန်းမာရေးအတွက် အရေးပါတဲ့ သတ္တုဓာတ်ဖြစ်ပြီး စွမ်းအင်တွေ ထုတ်လုပ်ပေးတာ၊ အာရုံကြောတွေ ကောင်းစေတာ၊ ကြွက်သားတွေ သန်မာစေတာ၊ သွေးဖိအားကို လျော့ကျစေတာ စတဲ့ အာနိသင်တွေ ရှိပါတယ်။
ကယ်လ်ဆီယမ်
ကယ်လ်ဆီယမ်က အရိုးသန်မာစေပြီး အရိုးပါး၊ အရိုးပွရောဂါ မဖြစ်အောင် ကာကွယ်ပေးလို့ အမျိုးသားတွေအတွက် အရေးကြီးတဲ့ သတ္တုဓာတ်ပါ။ ဗီတာမင် D နဲ့ တွဲသောက်ရင် ပိုပြီး စုပ်ယူမှု အားကောင်းစေပါတယ်။
ပိုတက်ဆီယမ်
ပိုတက်ဆီယမ်ကလည်း အရေးအပါဆုံး သတ္တုဓာတ်တမျိုး ဖြစ်ပြီး ခန္ဓာကိုယ်တွင်း အရည်ပမာဏကို ထိန်းညှိပေးတာ၊ နှလုံးကြွက်သား အပါအဝင် ကြွက်သားတွေကို ညှစ်အားကောင်းစေတာ၊ အာရုံကြောတွေ အားကောင်းစေတာ စတဲ့ အကျိုးကျေးဇူးတွေ ရစေပါတယ်။
ဇင့်ဓာတ်
ဇင့်ဓာတ်က ကိုယ်ခံအား ကောင်းစေသလို အမျိုးသားတွေအတွက် အရေးပါတဲ့ တက်စတိုစတီရုန်း ဟော်မုန်းတွေ ထွက်ရှိစေပြီး ဆီးကျိတ်ပြဿနာတွေ မဖြစ်အောင်လည်း ကာကွယ်ပေးပါတယ်။
အထက်မှာ ဖော်ပြခဲ့တဲ့ ဗီတာမင်နဲ့ သတ္တုဓာတ်တွေအပြင် ဆီးကျိတ်ရောဂါ ကာကွယ်တဲ့ saw palmetto ပါဝင်တဲ့ ဖြည့်စွက်စာတွေက အသက် ၅၀ ကျော် အမျိုးသားတွေမှာ အဖြစ်များတဲ့ ဆီးကျိတ်ရောဂါတွေ မဖြစ်အောင် ကာကွယ်ပေးနိုင်ပါတယ်။
အာဟာရတွေ စုံလင်အောင် စားသောက်ဖို့ အခြေအနေ မပေးလို့ ဖြည့်စွက်စာ သောက်မယ့် အမျိုးသားတွေဟာ အခုပြောခဲ့တဲ့ ဗီတာမင်နဲ့ သတ္တုဓာတ်တွေ ပါဝင်တဲ့ ဖြည့်စွက်စာတွေကို ဂရုပြု ရွေးချယ်သင့်ကြောင်း မျှဝေလိုက်ပါတယ်။
Author: Dr.Yee Mon
