ငလျင်အကြောင်းသိကောင်းစရာ
ကျွန်တော်တို့နေထိုင်ရာကမ္ဘာကြီးကို တဆက်တစပ်တည်းမဟုတ်တဲ့ မြေလွှာချပ်ကြီးတွေနဲ့ဖွဲ့စည်းထားပါတယ်။
ဒီမြေလွှာချပ်ကြီးတွေဟာ အချိန်နဲ့အမျှမသိမသာ နည်းနည်းချင်းစီ အသီးသီးရွေ့လျားနေကြပါတယ်။
ဒီလိုရွေ့လျားရင်းနဲ့ မြေလွှာချပ်ကြီးတွေအချင်းချင်းတိုက်မိတတ်ကြပါတယ်။
အဲ့အခါမှာ ငလျင်လှုပ်ခြင်းဆိုတဲ့တုန်ခါမှုကြီးဖြစ်လာပါတယ်။
ငလျင်လှုပ်တာကို အင်္ဂလိပ်လို Earthquake လို့ခေါ်ပါတယ်။
မြေလွှာချပ်ကြီးတွေတိုက်မိတဲ့အရှိန်ပြင်းအားပေါ်မှုတည်ပြီး ပြင်းထန်တဲ့ငလျင်လှုပ်နိုင်သလို အားပျော့တဲ့ငလျင်လည်းလှုပ်နိုင်ပါတယ်။
ငလျင်တခုရဲ့ပြင်းအားကို ရစ်ချက်တာစကေးနဲ့တိုင်းတာပါတယ်။
ရစ်ချစ်တာစကေး ၅ နဲ့အထက်ပြင်းအားရှိတဲ့ငလျင်တွေဟာ ပြင်းထန်ပြီး အသက်အိုးအိမ် တိုက်တာအဆောက်အအုံတွေပြိုကျပျက်စီးဆုံးရှုံးမှုများစွာကိုဖြစ်စေပါတယ်။
ပင်လယ်သမုဒ္ဒရာတွေရဲ့အောက်ခြေကြမ်းပြင်မှာလည်း မြေလွှာချပ်ကြီးတွေရှိတဲ့အတွက် သူတို့အချင်းချင်းတိုက်မိပြီး ငလျင်တွေဖြစ်နိုင်ပါတယ်။
ပင်လယ်သမုဒ္ဒရာကြမ်းပြင်အောက်မှာဖြစ်တဲ့ငလျင်က ကုန်းပေါ်မှာဖြစ်တဲ့ငလျင်လို တိုက်တာအဆောက်အအုံတွေပြိုကျတာကိုမဖြစ်စေနိုင်ပေမယ့် ဆူနာမီခေါ်ကြီးမားတဲ့လှိုင်းလုံးကြီးတွေကို ဖြစ်စေကာ ကမ်းရိုးတန်းနားမှာရှိတဲ့ဒေသနယ်ပယ်တွေကိုရေလွှမ်းရေကြီးပြီး ရေဘေးဒုက္ခကိုဖြစ်စေနိုင်ပါတယ်။
ဒီလိုသဘာဝဘေးအန္တရာယ်တွေဟာ တားဆီးလို့မရတဲ့အတွက် ဖြစ်လာခဲ့ရင်ဘာတွေလုပ်ရမလဲ မဖြစ်ခင်မှာကော ဘာတွေပြင်ဆင်ထားလို့ရလဲဆိုတာတွေကို
ကြိုသိထားပါက မိမိအတွက် အသက်အန္တရာယ်ကင်းနိုင်ပါတယ်။
ဒါကြောင့်ဒီတပတ်မှာ ငလျင်လှုပ်ပါက ဘာတွေလုပ်ရမလဲ မလှုပ်ခင်မှာကောဘာတွေပြင်ဆင်ထားရမလဲ လှုပ်ပြီးရင်ကော ဘာတွေလုပ်ရမလဲစတဲ့အချက်တွေကို သိသလောက်ရေးသားမျှဝေတင်ပြလိုက်ရပါတယ်။
၁။မြေငလျင်လှုပ်နေစဉ်မှာလုပ်ရမည့်အရာများ
မြေငလျင်လှုပ်တဲ့အခါမှာအဆောက်အအုံအတွင်းမှာ မနေပါနဲ့။အပြင်ဘက်သို့ အမြန်ဆုံးထွက်ပါ။အထပ်မြင့်အဆောက်အအုံမှာနေတဲ့သူတွေဆိုရင် ဓါတ်လှေကားမသုံးပါနဲ့။
တကယ်လို့ထွက်ဖို့အချိန်မရပါက လျှောက်ပြေးမနေဘဲ စားပွဲခုံ၊ကုတင်စတဲ့နေရာအောက်မှာ အကာအကွယ်ယူ စားပွဲခြေထောက် ခုတင်ခြေထောက်ကိုကိုင်ထားပြီးဝပ်နေပါ။စားပွဲခုံတွေ၊ခုတင်တွေမရှိဘူးဆိုရင် အဆောက်အအုံရဲ့ထောင့်ချိုးနေရာတွေမှာ အကာအကွယ်ယူပြီးဝပ်နေပါ။မျက်နှာနဲ့ခေါင်းကိုလည်း လက်နဲ့အုပ်ကာထားပါ။
အထပ်မြင့်မှာရှိနေပါက ပြတင်းပေါက်၊ဝရံတာ နားတွေမှာမနေပါနဲ့။
အဆောက်အအုံအပြင်ဘက်တွင်ရှိတုန်းငလျင်လှုပ်ပါက သစ်ပင်၊ဓါတ်မီးတိုင်၊စတဲ့ပြိုလဲနိုင်တဲ့အရာတွေနဲ့ ဝေးဝေးနေပါ။
၂။မြေငလျင်လှုပ်ပြီးနောက် လုပ်ရမည့်အရာများ
အင်အားကြီးတဲ့ငလျင်လှုပ်ပြီးတဲ့နောက်မှာ နောက်ဆက်တွဲငလျင်တွေထပ်ပြီးလှုပ်တတ်ပါတယ်။ဒါကြောင့် ငလျင်ကြီးလှုပ်ပြီး အဆောက်အအုံထဲကိုချက်ချင်းပြန်မဝင်ပါနဲ့။အဆောက်အအုံထဲမှရှိနေတဲ့သူကလည်း အပြင်ကိုအမြန်ဆုံးထွက်ပါ။
ငလျင်လှုပ်တာကြောင့်တောင်ပြိုတာ၊ဆည်ရေကာတာကျိုးပေါက်တာ၊ကမ်းခြေမှာ ဒီရေလှိုင်းတွေတက်တာတွေဖြစ်ပြီး ရေကြီးရေလျှံနိုင်ပါတယ်။ဒါကြောင့်ကမ်းခြေနဲ့နီးတဲ့နေရာ၊ဆည်နဲ့နီးတဲ့အနိမ့်ပိုင်းနေရာတွေကသူတွေအနေနဲ့ ကုန်းမြေမြင့်သို့ ကြိုတင်ရှောင်တိမ်းဖို့လိုပါတယ်။
တကယ်လို့ငလျင်လှုပ်ပြီးနောက်သင်ဟာအပျက်အစီးများအောက်မှာပိတ်မိနေပါက မီးခြစ်ကိုမသုံးပါနဲ့။မီးလောင်နိုင်လို့ပါ။မီးခြစ်အစားဓါတ်မီးကဲ့သို့သော အလင်းရောင်တွေအသုံးပြုပြီး အချက်ပြပါ။
၃။ငလျင်လှုပ်ခြင်းအတွက်ဘာတွေကြိုတင်ပြင်ဆင်ထားရမလဲ။
အဆောက်အအုံအမြင့်တွေဆောက်တဲ့အခါ မြေငလျင်ဒဏ်ခံနိုင်အောင် သေချာစနစ်တကျ တွက်ချက်ဆောက်ပါ။
နံရံကပ်ဗီရိုကြီးတွေ၊စာအုပ်စင်တွေ၊ပန်းချီကားကြီးတွေစတဲ့ ပြိုလဲကျနိုင်တဲ့ပစ္စည်းကြီးတွေကို မူလီတို့သံတို့နဲ့အသေစွဲထားပါ။လေးလံကွဲရှနိုင်တဲ့ပစ္စည်းတွေကို စင်အောက်အဆင့်တွေမှာပဲထားပါ။အမြင့်မှာမတင်ထားပါနဲ့။
အိမ်မှာ ခြကိုက်ဆွေးနေတဲ့ နေရာများရှိပါက သေချာပြုပြင်ပါ။
ဓါတ်မီး၊လျှပ်စစ်မီးအိမ်၊အရေးပေါ်ဆေးသေတ္တာစတဲ့ အရေးပေါ်ပစ္စည်းတွေကို အသင့်ဆောင်ထားပါ။
ငလျင်ကြောင့် မိသားစုတွေ တကွဲတပြားဖြစ်ခဲ့ပါက ပြန်ဆုံနိုင်အောင် ဆုံမှတ်ကြိုတင်သတ်မှတ်ထားပါ။
Dr. 528
