ကင်ဆာဖြစ်နိုင်တဲ့အထိ ပြင်းထန်တဲ့ နေရောင်ခြည်
ခရမ်းလွန်ရောင်ခြည်ကို အင်္ဂလိပ်လို Ultraviolet rays(ယူဗွီရေး) လို့ခေါ်ပါတယ်။
ခရမ်းလွန်ရောင်ခြည်ဟာ နေရောင်ခြည်ထဲမှာပါတဲ့ ရောင်ခြည်တမျိုးပါပဲ။
နေရောင်ခြည်ထဲမှာ ခရမ်းလွန်ရောင်ခြည်၁၀ရာခိုင်နှုန်း၊အနီအောက်ရောင်ခြည်၅၀ရာခိုင်နှုန်းနဲ့အလင်းရောင်ခြည်၄၀ရာခိုင်နှုန်းပါပါတယ်။
၁၀ရာခိုင်နှုန်းပါတယ်ဆိုပေမယ့် ၁၀ရာခိုင်နှုန်းလုံး ကမ္ဘာမြေကြီးပေါ်ကိုမကျရောက်ပါဘူး။အိုဇုန်းလွှာဆိုတဲ့အလွှာကနေ တချို့တဝက်ကိုစုပ်ယူပေးထားပါတယ်။
သို့သော် ဒီခေတ်မှာ ကား၊ဆိုင်ကယ်၊အဲယားကွန်းလေအေးပေးစက်စတာတွေသုံးရာကထွက်တဲ့ ဓါတ်ငွေ့တွေ၊စက်ရုံတွေလည်ပတ်ရာကထွက်တဲ့ဓါတ်ငွေ့တွေဟာ အိုဇုန်းလွှာကို ထိခိုက်ပျက်စီးစေပါတယ်။
ဒီအခါမှာ အိုဇုန်းလွှာဟာ ပုံမှန်အတိုင်း ခရမ်းလွန်ရောင်ခြည် တချို့တဝက်ကိုမစုပ်ယူပေးနိုင်တဲ့အတွက် နေရောင်ခြည်မှာပါတဲ့ခရမ်းလွန်ရောင်ခြည်ရာခိုင်နှုန်းမြင့်တက်လာပြီး လူသားတွေ သတ္တဝါတွေကို အန္တရာယ်ဖြစ်စေနိုင်ပါတယ်။
ကမ္ဘာကိုကျရောက်တဲ့နေရောင်ခြည်မှာ ခရမ်းလွန်ရောင်ခြည်ပမာဏ ဘယ်လောက်ပါဝင်လဲဆိုတာကို UV index ခေါ် ခရမ်းလွန်ရောင်ခြည်အညွန်းကိန်းနဲ့တိုင်းတာ ဖော်ပြပါတယ်။
ခရမ်းလွန်ရောင်ခြည်အညွန်းကိန်း သတ်မှတ်ချက်အနေနဲ့ ၁ ကနေ ၁၅ထိ ရှိပါတယ်။
ခရမ်းလွန်ရောင်ခြည်အညွန်းကိန်း ၁၊၂ (UV index 1-2)ဆိုရင် နေရောင်ခြည်မှာ ခရမ်းလွန်ရောင်ခြည် ပါဝင်မှု နည်းတယ်။
ခရမ်းလွန်ရောင်ခြည်အညွန်းကိန်း ၃ကနေ ၅ (UV index 3-5)အတွင်း ဆိုရင် နေရောင်ခြည်မှာ ခရမ်းလွန်ရောင်ခြည် အသင့်အတင့် ပါဝင်တယ်။
ခရမ်းလွန်ရောင်ခြည်အညွန်းကိန်း ၆၊၇ (UV index 6-7) ဆိုရင် နေရောင်ခြည်မှာခရမ်းလွန်ရောင်ခြည်ပါဝင်မှု များတယ်။
ခရမ်းလွန်ရောင်ခြည်အညွန်းကိန်း ၈ကနေ ၁၀(UV index 8-10)အတွင်းဆိုရင် နေရောင်ခြည်မှာခရမ်းလွန်ရောင်ခြည်ပါဝင်မှု အလွန်မြင့်မားတယ်။ သတိပေးရတဲ့အဆင့်မျိုး ဖြစ်တယ်။
ခရမ်းလွန်ရောင်ခြည်အညွန်းကိန်း ၁၁ကနေ ၁၅ (UV index 11-15)ဆိုရင်တော့ နေရောင်ခြည်ထဲမှာ ခရမ်းလွန်ရောင်ခြည် ပါဝင်မှုဟာ အရမ်းအရမ်းကိုများပါတယ်။အလွန်ပြင်းထန်ပြီး စိုးရိမ်ရတဲ့ အဆင့်မျိုးဖြစ်ပါတယ်။
နေရောင်ခြည်မှာပါတဲ့ခရမ်းလွန်ရောင်ခြည်ပမာဏ အညွန်းကိန်းဟာ ၈ကျော်ပြီဆိုတာနဲ့ အဲ့နေရောင်ခြည်နဲ့အရေပြားနဲ့ မထိအောင်နေတာအကောင်းဆုံးပါ။
ခရမ်းလွန်ရောင်ခြည်ရာခိုင်နှုန်းမြင့်မားစွာပါတဲ့ နေရောင်ခြည်နဲ့ လတ်တလောထိတွေ့မှုကြောင့် လက်ငင်းဆိုးကျိုးအနေနဲ့အသားအရောင်ညိုမည်းတာ၊အသားရေတွေပူစပ်ပူလောင်ဖြစ်ပြီးနေလောင်တာမျိုးတွေဖြစ်နိုင်ပါတယ်။
နေ့စဉ်ရက်ဆက်ထိတွေ့တာကြာလာခဲ့ရင်တော့ ဆိုးကျိုးအနေနဲ့ နောက်ပိုင်းမှာ မျက်စိတိမ်စွဲတာ၊အမြင်အာရုံထိခိုက်ပျက်စီးတာ၊အရေပြားများအိုမင်းရင့်ရော်တာ၊အရေပြားကင်ဆာဖြစ်တာ၊သားသမီးရဖို့ခက်တာ၊ခုခံအားကျဆင်းတာစတဲ့ရောဂါဆိုးကျိုးတွေခံစားရနိုင်ပါတယ်။
ဒါကြောင့် ဒီတပတ်မှာ ခရမ်းလွန်ရောင်ခြည်ပါသော နေရောင်ခြည်ဒဏ်ကနေ ဘယ်လိုသတိပြုကာကွယ်ရမလဲဆိုတဲ့အကြောင်းကိုသိသလောက်မျှဝေတင်ပြလိုက်ရပါတယ်။
၁။ခရမ်းလွန်ရောင်ခြည် မြင့်မားစွာကျရောက်နိုင်သည့် မနက် ၁၀နာရီမှ ညနေ၄နာရီ အတွင်းမှာ တတ်နိုင်သမျှ အပြင်မထွက်ပါနဲ့။အရိပ်ရအေးမြသောနေရာတွေမှာနားနေပါ။
၂။မဖြစ်မနေအပြင်ထွက်ရမည်ဆိုပါက မိမိအသားရေနဲ့နေရောင်ခြည် တိုက်ရိုက်မထိတွေ့အောင် ထီး၊ဦးထုပ်စသည်တို့ကို ဆောင်းသွားပါ။
၃။ ချည်သားအကျီလက်ရှည်အပွဝတ်ပါ။သို့မဟုတ်ပါကလည်း အဝတ်လွတ်ကင်းနေနိုင်သော လက်၊လည်ပင်းနဲ့ ပခုံးစတဲ့နေရာတွေကို သနပ်ခါးထူထူ သို့မဟုတ် SPF(Skin Proetction Factor)15+ ပါဝင်သောနေရောင်ခံလိမ်းဆေးများကို အပြင်မထွက်မှီ ၁၅မိနစ်ခန့်ကြိုလိမ်းပါ။နေရောင်ခံလိမ်းဆေးများကို တခါလိမ်းပြီး နှစ်နာရီကြာတိုင်းမှာ နောက်တခါထပ်ပြီးလိမ်းဖို့လိုပါတယ်။
၄။ခရမ်းလွန်ရောင်ခြည်ဟာမျက်စိကိုလည်းထိခိုက်စေနိုင်တဲ့အတွက် နေပူတဲ့အချိန်အပြင်ထွက်ပါက နေကာမျက်မှန်တပ်သွားပါ။
အဆုံးသတ်အနေနဲ့အကြံပေးရရင် ကလေးတွေ၊အသက်ကြီးတဲ့သူတွေ၊ရောဂါအခံရှိတဲ့သူတွေ၊အရက်အလွန်အကျွံ့သောက်တဲ့သူတွေဟာဆိုရင် ခရမ်းလွန်ရောင်ခြည်ရဲ့ဆိုးကျိုးတွေကို တခြားသူတွေထက်ပိုမိုထိခိုက်ခံစားရနိုင်ပါတယ်။
ဒါကြောင့် ကလေးတွေ၊ရောဂါအခံရှိတဲ့သက်ကြီးရွယ်အိုတွေကို ပူပြင်းတဲ့အချိန်တွေမှာ အပြင်နေပူထဲမထွက်အောင် အထူးဂရုစိုက်ကြပါလို့ အကြံပေးချင်ပါတယ်။
Dr. 528
